1. Иегованыҥ кысканбас болгоны недеҥ кӧрӱнип јат?

ИЕГОВА немени јайаардаҥ озо, чек јаҥыскан болгон. Је ол теҥериде де, јерде де сагышту јайаандарга јӱрӱм сыйлаган. Анайып, ол јаҥыс бойын сананбаганын кӧргӱскен. Ырысту Кудай, Иегова, бойыныҥ јайаандарына сыйлар эдерге сӱӱп јат (1 Тим. 1:11; Иак. 1:17). Ол бисти база ырысту болзын деп, кысканбас болорына ӱредип јат (Рим. 1:20).

2, 3. а) Кысканбас кижи нениҥ учун ырысту болот? б) Бу јӧрмӧлдӧ кандый сурактар шӱӱжилер?

² «Кудай кижини... Бойына... кеберлеш эткен» — деп, Агару Бичикте айдылат (Баш. 1:27). Оныҥ учун бис Кудайдый ок кылык-јаҥду болор аргалу. Ырысту болорго биске Иегованаҥ тем алып, улуска акту кӱӱнистеҥ болужар керек ле кысканбас болор керек (Флп. 2:3, 4; Иак. 1:5). Нениҥ учун? Нениҥ учун дезе, Иегова бисти анайып јайаган. Оныҥ учун бис толо кемдӱ эмес те  болзоос, кысканбас Кудайыстаҥ тем алар аргалу.

³ Бу јӧрмӧлдӧ Кудайдыҥ Сӧзи бисти кысканбас болорына канайып ӱредип турганы кӧрӱлер. Анайда ок кысканбай турзаас, Иегованы канайып сӱӱндирерис ле берилген јакаруны канайып бӱдӱрерис деген сурактар шӱӱжилер. Анайда ок кысканбас улус нениҥ учун ырысту болот ло биске нениҥ учун бойысты кысканбай турар керек деген сурактар база шӱӱжилер.

4, 5. Иегова ла Иисус кысканбас болорыныҥ кандый темин кӧргӱскен?

⁴ Иегова улусты оноҥ тем алып турзын деп кӱӱнзейт, оныҥ учун бис бойысты кысканбай турзаас, Кудай сӱӱнип јат (Еф. 5:1). Оныҥ бисти ырысту болзын деп турганы кижини канайып јайаганынаҥ, јердеги ончо немени сӱреен јараш ла јӱзӱн-башка эдип јайаганынаҥ кӧрӱнет (Сар. 139:13—16; Ачыл. 4:11). Оныҥ учун кысканбас болгонысла улусты сӱӱндирип турзаас, Кудайды макка чыгарадыс.

⁵ Анайда ок чындык христиандар Иисустаҥ тем алат. Ол кысканбас кижиниҥ эҥ јакшы темин кӧргӱскен. Иисус айткан: «Анайып ок Кижи Уулы улусты Ого јалчы болзын деп эмес, улуска јалчы болойын деп, кӧп улус учун Бойыныҥ јӱрӱмин берейин деп келген» (Матф. 20:28). А Павел христиандарга: «Слердиҥ шӱӱлтегер Христос Иисустыҥ шӱӱлтезиндий болор учурлу. Је Бойын кем де эмес эдип, кулдыҥ бӱткен бӱдӱмин алынган, улуска тӱҥейленип, бӱдӱмиле кижидий боло берген» — деп айткан (Флп. 2:5, 7). Оныҥ учун биске кажыбыска ла бойыстаҥ мынайып сураар керек: «Мен Христостыҥ изиле оноҥ чике барып болорым ба?» (1 Петр 2:21 кычырыгар.)

6. Иисус, јалакай самар кижи керегинде укаа сӧс куучындап, ӱренчиктерин неге ӱредерге сананган? (Јӧрмӧлдиҥ бажындагы јурукты кӧрӱгер.)

⁶ Бис Иегованаҥ ла Христостоҥ тем алып турзаас, темдектезе улус керегинде сананып, олорго болужатан аргалар бедиреп турзаас, Иегованы сӱӱндирип јадыс. Иисус јалакай самар кижи керегинде укаа сӧсти куучындаганыла оныҥ ӱренчиктери кандый ла улуска болужар учурлу деп кӧргӱскен. (Лука 10:29—37 кычырыгар.) Иисустыҥ бу укаа сӧсти нениҥ учун куучындаганы санаагарга кирет пе? Бир еврей укту кижи Иисустаҥ: «А мениҥ јуугым кем?» — деп сураарда, ол, бис Кудайды сӱӱндирерге турган болзоос, јалакай самар кижи чилеп, кысканбас болор учурлу деп јартап берген.

7. Кудайдаҥ тем алып, бойысты кысканбай турзаас, Сатананыҥ блааш-тартышту сурагына кандый каруу бередис?

⁷ Биске база нениҥ учун кысканбас болор керек? Нениҥ учун дезе Сатана Эдем садта блааш-тартышту сурак кӧдӱрген. Ол, Адам ла Ева, чокумдап айтса ончо улус, Кудайдыҥ сӧзин укпай, јаҥыс бойыныҥ кӱӱнин бӱдӱрзе торт болор деп, айткан. Ева јаҥыс бойын сананып, Кудай ошкош болорго  кӱӱнзеген. А Адам јаҥыс бойын сананып, ӱйине јараарга кӱӱнзеген (Баш. 3:4—6). Оноҥ улам јаан тӱбек болгон. Јаҥыс бойын сананган кижи качан да ырысту болбой јат. Је бойысты кысканбай турзаас, Кудайдаҥ тем аларга турганысты кӧргӱзедис, не дезе, бу — јӱрӱмниҥ эҥ ле јакшы јолы.

8. Баштапкы эки кижиге нениҥ учун ӧскӧ улусты сананар керек болгон?

⁸ Эдем садта Адам ла Еванаҥ ӧскӧ кем де болбогон до болзо, олорго ӧскӧ улус керегинде сананар керек болгон. Не дезе андый јакаруны олорго Иегова берген. Иегова баштапкы эки кижини алкап, бала-баркалу болуп, јерди толтырзын ла јарандырзын деген (Баш. 1:28). Адам ла Ева Кудайдаҥ тем алып, бала-барказы ырысту болзын деп сананар учурлу болгон. Нениҥ учун дезе Јайаачы Иегова ончо улусты ырысту јӱрзин деп кӱӱнзеген. Адам ла Ева, анайда ок олордыҥ бала-барказы кӧптӧгӧн сайын бастыра јерди рай эдетен сӱрекей јаан ишти эдерге, бой-бойыла ӧмӧ-јӧмӧ иштенер учурлу болгон.

9. Улус јерди рай эдип ӧмӧ-јӧмӧ иштенген болзо, нениҥ учун јаан сӱӱнчи алар эди?

⁹ Иегованыҥ амадузын бӱдӱрип, оныҥ амырын аларга, толо кемдӱ эр ле ӱй улус Иеговала ӧмӧ-јӧмӧ иштенер учурлу болгон (Евр. 4:11). Ол  тушта олор мындый јилбилӱ јакаруны бӱдӱргенинеҥ јаан сӱӱнчи алар эди! Улуска акту кӱӱнинеҥ болужып, олор сӱреен кӧп алкыштар алар ла ӱргӱлјиге ырысту болор эди.

10, 11. Јарлаар ишке туружарга ла ӱренчиктер белетеерге, биске не болужар?

¹⁰ Иегова бойыныҥ ишчилерине јарлаар ишке туружып турзын ла ӱренчиктер белетезин деп јакару берген. Бу ишти бӱдӱрерге, улустыҥ јӱрӱмин сананар керек. Нениҥ учун дезе Иегованы ла јуугысты чыннаҥ сӱӱбей турзаас, бу јакаруны бӱдӱрип болбозыс.

¹¹ Элчи Павел бойын ла бойыныҥ кезик најыларын «Кудайга [Кудайла, ЈТ] кожо иштеп јӱргенибис» деген, нениҥ учун дезе олор Каандык керегинде чындыктыҥ ӱрендерин отургызып, сугарган (1 Кор. 3:6, 9). Бис те Кудайдыҥ Каандыгы керегинде јарды јарлаарга, бойыстыҥ ӧйисти, ийде-кӱчисти, акча-јӧӧжӧбисти кысканбай берип турзаас, Кудайла кожо иштенип јадыбыс. Бу сӱреен јаан кӱндӱ!

12, 13. Ӱренчиктер белетеер ишке турушканы слерге кандый алкыштар экелет?

¹² Ийде-кӱчин кысканбай јарлап турган ла ӱренчиктер белетеп турган јарчылар бу иштеҥ јаан сӱӱнчи алат. Бу сӧстӧрлӧ, Агару Бичикле једимдӱ ӱредӱлер ӧткӱрип турган јарчылар, јӧпсинип јат. Агару Бичикти ӱренип турган улустыҥ чындыкты оҥдогонын, бӱдериниҥ тыҥыганын, јӱрӱмин солыганын ла улуска чындыкты куучындаганын кӧрӱп алган сӱӱнчини сӧслӧ айдып болбозыҥ. Иисус та бойыныҥ ийген 70 ӱренчигиниҥ једимдӱ јарлап, «сӱӱнчилӱ јанып келгенин» кӧрӱп, тыҥ сӱӱнген (Лука 10:17—21).

¹³ Бастыра јердиҥ ӱстиндеги ака-эјелер сӱӱнчилӱ јар улустыҥ јӱрӱмин солып турганын кӧрӱп, база сӱӱнип јадылар. Темдектезе, кижиге барбаган Анна * деген јиит сыйынныҥ темин кӧрӱп ийектер. Ол јарлаар ишке кӧптӧдӧ иштеерге, јарчылар јетпей турган Кӱнчыгыш Европадӧӧн кӧчӧ берген. Ол айдат: «Мында Агару Бичикле ӱредӱ баштаарга сӱрекей јеҥил! Јарлаар иштеҥ јаан сӱӱнчи аладым. Јарлаган кийнинеҥ айылга јанып келзем, бойымныҥ кӱчтеримди сананарга бош то јок. Не дезе мен Агару Бичикти ӱренип турган улус керегинде ле олордыҥ кӱчтерин сананып, олорго болужатан арга бедирейдим. Эмди „алып турганы эмес, берип турганы оноҥ артык кежиктӱ“ деп, оноҥ јакшы оҥдоп јадым» (Ап. ижи 20:35).

14. Улус сӱӱнчилӱ јарды укпай да турза, сӱӱнчини јылыйтпаска, слерге не болужат?

¹⁴ Бис улуска сӱӱнчилӱ јарды, олор бисти укса да, укпаза да, куучындап турзаас, сӱӱнчи аларыс. Бистиҥ ижисти судурчы Иезекиильдиҥ бӱдӱрген ижине тӱҥейлеерге јараар. Иегова ого мынайда айткан: «Олор сени укса да, укпаза да мениҥ сӧстӧримди олорго куучында» (Иез. 2:7; Иса. 43:10). Улус сӱӱнчилӱ јарды укпай да турза, Иегова бистиҥ албаданганысты баалап јат. (Еврейлерге 6:10 кычырыгар.)  Бу јанынаҥ сӱрекей јакшы темди бир ака кӧргӱскен. Ол јарлаар иш керегинде мындый сӧстӧр бичиген: «Бис отургызадыс, сугарадыс, анайда ок Иегова ӧскӱрер деп иженип, мӱргӱп јадыс» (1 Кор. 3:6).

15. Кысканбас болгоныс улустыҥ быйанду болгонынаҥ камаанду болот по? Јартап беригер.

¹⁵ Иисус бисти улуска кысканбас болзын деп кӱӱнзейт, нениҥ учун дезе мынаҥ улам бис ырысту болуп јадыс. Улуска кысканбай болужып турганысты кӧрӱп, кӧп улус быйанду болот. Оныҥ учун Иисус: «Беригер, слерге де берилер: јакшы кемјӱле, тыктап, тепсеп, эдегеерге толо уруп бергилеер. Кандый кемјӱле кемјииригер, анайып ла бойыгарга кемјилер» — деп айткан (Лука 6:38). Је ӱзе улус бистиҥ кысканбас болгоныска быйанду болбой јат, је бистиҥ албаданганысты баалаган кижиниҥ јӱреги оны база кысканбас болорго кӱӱнзедер. Оныҥ учун улус бисти уксын, укпазын оноҥ ло ары беригер. Не дезе бистиҥ јакшы керегис канча кире туза экелерин качан да билбей јадыс.

16. Бис улуска нени сананып болужар учурлу?

¹⁶ Чыннаҥ кысканбас кижи улустаҥ неме сакыбай јат. Иисус бу шӱӱлтени улуска јетирерге мынайып айткан: «Је кӱндӱ-кӱрее эткеҥде, тӱреҥи, кенек, аксак, сокор улусты айттыр. Бат ол тушта кежиктӱ болгоныҥ ол: јандыра јакшызын олор сеге јетирип болбос» (Лука 14:13, 14). Агару Бичикте Кудайдыҥ тыныла мындый сӧстӧр бичилген: «Јалакай кижиге алкыш берилер» ле «Јокту  кижиге болужып турган кижи ырысту болот» (Укаа 22:9; Сар. 41:1). Эйе, улуска болужып турган кижи, чыннаҥ ла ырысту болот!

17. Ырысту болорго, нени эдерге јараар?

¹⁷ Павел Иисустыҥ: «Алып турганы эмес, берип турганы оноҥ артык кежиктӱ» — деп айткан сӧстӧрин бичиирде, улуска јаҥыс ла акча-јӧӧжӧлӧ ӱлежери керегинде эмес, је улустыҥ кӱӱнин кӧдӱрери, Агару Бичикке тайанган јӧп берери ле олорго болужары керегинде айдарга сананган (Ап. ижи 20:31—35). Элчи Павел бисти улуска ајару этсин деп, олорго ийде-кӱчисти, ӧйисти ле сӱӱжисти кысканбай берзин деп, айткан сӧзиле де, эткен керегиле де ӱреткен.

18. Кӧп шиҥжӱчилер, кысканбай турган кижи кандый болот деп, айдат?

¹⁸ Общественный билим јанынаҥ иштеп турган шиҥжӱчилердиҥ айтканыла болзо, кысканбас кижи ырысту болот. Шиҥжӱчилердиҥ бир бичигинде мынайда бичилет: «Улуска болужып турган улус, канча киреге ырысту болот». Олордыҥ санаазыла болзо, бис улуска болужып турзаас, бистиҥ «јӱрӱмис калас ӧтпӧс лӧ јарт чокум амадуларлу болор». Оныҥ учун шиҥжӱчилер, су-кадыкты тыҥыдарга ла ырысту болорго, улуска болужатан кандый бир общественный ишке акту кӱӱнинеҥ туружар керек деп айдат. Ырысту болорго биске бойысты кысканбай турар керек дегенин кайкабай јадыс, не дезе бу керегинде туку качан Кудайдыҥ Сӧзинде бичилип калган (2 Тим. 3:16, 17).

19, 20. Слер нениҥ учун кысканбас болорго турганаар?

¹⁹ Бисти айландыра јаҥыс бойын сананып турган улус болзо, кысканбас болорго кӱч болот. Је Иисус биске эки јаан јакару берген. Баштапкызында, биске Иегованы бастыра јӱрегисле, бастыра бойысла, бастыра санаасла, бастыра кӱчисле сӱӱр керек. Экинчизинде, јуугысты бойысты чылап сӱӱр керек (Мар. 12:28—31). Бу јӧрмӧлдӧҥ кӧргӧнисле, Иегованы сӱӱп тургандар оноҥ тем аларга албаданат. Иегова ла Иисус улуска кысканбас болот, олор бисти де кысканбас болзын деп кӱӱнзейт. Нениҥ учун дезе бис кысканбас болзоос, чыннаҥ ырысту болуп јадыс. Айдарда, Иеговага ла улуска акту кӱӱнистеҥ нени-нени эдип турзаас, Кудайды мактайдыс, улуска болужадыс, бойыс та ырысту болодыс.

²⁰ Слер эмди де улуска, анчада ла ака-эјелереерге, бойыгарды килебей болужып турган болорыгар (Гал. 6:10). Оноҥ ло ары анайда эдип турзаар, улус слерди сӱӱп ле тооп турар, анайып слер ырысту болорыгар. Укаа сӧстӧрдӧ 11:25-те: «Кысканбас кижи тойынат, ӧскӧлӧрдиҥ суузын кандырган кижиниҥ бойыныҥ да суузы канат» — деп айдылат. Бистиҥ христиан јӱрӱмде улуска акту кӱӱнистеҥ болужып, кысканбас ла јалакай болотон кӧп аргалар бар. Келер јӧрмӧлдӧ бу аргалардыҥ кезиги шӱӱжилер.