Бис библиялык бичиктерди ле ӧскӧ дӧ материалдарды улуска акчага сатпай јадыс. Мынаҥ улам кезик улус бу материалдарды социальный сетьттерге эмезе кандый бир ӧскӧ интернет сайттарга чыгарарга јараар деп сананат. Је чынынча болзо, мынайып чыгарганы бистиҥ интернет-ресурстардыҥ «Тузаланарыныҥ ээжилерин (Условия использования)» * бузуп јат ла јаан каршу экелет. «Тузаланарыныҥ ээжилеринде» интернетле тузаланган улуска бистиҥ сайттарда чыгып турган «јуруктарды, электронный бичиктерди, торговый маркаларды, кӱӱни, фотојуруктарды, кӧрӱлмелерди ле јӧрмӧлдӧрди интернетке (кандый ла сайттарга, кӧрӱлмелерди ле файлдарды солыжарга јараар сервистерге эмезе социальный сетьтерге) чыгарарга јарабас» деп, чике бичилип калган. Бу ээжилер неге керектӱ?

Бистиҥ ончо интернет-материалдарыс авторский праволу. Бистиҥ организацияныҥ удурлажаачылары ла јана баскан улус ака-эјелеристи де, ӧскӧ дӧ улусты бойына тартып аларга, сайттарында Иегованыҥ Керечилериниҥ материалдарын тузаланарга албаданат. Бу сайттардыҥ амадузы — улусты алаҥзыдары (Сар. 26:4; Укаа 22:5). Кезик улус бистиҥ материалдарды, анайда ок логотиптерди рекламада, јӱзӱн-базын товарларда ла мобильный приложениелерде тузалангылайт. Јасак авторский правоны ла торговый маркаларды корулап јат, оныҥ учун бистиҥ материалдарды ла логотиптерди јастыра тузаланганын токтодотон юридический тӧзӧлгӧ бар (Укаа 27:12). Је бис кемге-кемге, ол тоодо ака-эјелериске бистиҥ материалдарды ӧскӧ сайттарга чыгарарга эмезе кандый бир товарларды садарга, бистиҥ логотиптерди тузаланарга јарадып ийзеес, удурлажаачылардыҥ ла коммерческий фирмалардыҥ бистиҥ материалдарды бойыныҥ амадузына тузаланып турганын токтодорго албаданганыска јаргы болужып болбос.

Бистиҥ материалдарды окылу (официальный) интернет-ресурстардаҥ башка сайттардаҥ чыгарып алганы јаан каршу экелердеҥ айабас. Иегова кӧгӱс курсакты беретен јакылтаны јӱк ле «бӱдӱмјилӱ ле керсӱ кулга» берген (Матф. 24:45). Оныҥ учун «керсӱ кул» кӧгӱс курсакты, јӱк ле бистиҥ организацияныҥ окылу интернет-ресурстары ажыра берет. Бу сайттарда реклама ла Сатананыҥ телекейиниҥ тӧгӱн јетирӱлери јок. Је кӧгӱс курсак биске ӧскӧ јердеҥ келип турган болзо, бу курсак ӧскӧртилбеген деп бӱдер арга јок (Сар. 18:26; 19:8).

Анайда ок бистиҥ материалдар, бойыныҥ кӧрӱм-санаазын бичийтен сайттарда чыгып келзе, бу сайтты Кудайдаҥ јана баскан улус ла ӧскӧ дӧ удурлажаачылар, улусты Иегованыҥ организациязына бӱтпей барзын деп, тузаланардаҥ айабас. Бу сайттарга кирген кезик акалар, блааш-тартыштарга кирип калган. Мынаҥ улам Кудайдыҥ ады оноҥ јаан јаман айдылган. Андый сетевой форумдар «удурлажып турган улусты јымжак тӱзедетен» јер болбой јат (2 Тим. 2:23—25; 1 Тим. 6:3—5). Анайда ок бистиҥ организацияныҥ адынаҥ, керек дезе Башкару јӧптиҥ ле оныҥ улузыныҥ бир-бирӱзиниҥ адынаҥ тӧгӱн сайттар ла социальный сетьтерде страницалар ачылган учуралдар болгон. Је Башкару јӧпкӧ кирип турган улустыҥ кемизинде де бойыныҥ сайтты да, социальный сетьте страницазы да јок.

Улусты бистиҥ организацияныҥ окылу интернет-ресурстарыла таныштырып тура, «сӱӱнчилӱ јарды» таркадарына јӧмӧжӧдис (Матф. 24:14). Бистиҥ јарлаар ишке болужып турган окылу интернет-ресурстар јаантайын јаҥыртылып јат. Бис оны ончо улус тузаланзын деп кӱӱнзейдис. Оныҥ учун «Тузаланарыныҥ ээжилеринде» бистиҥ интернет-ресурстардагы кандый бир материалды эмезе бу материалдыҥ ссылказын электронный почта ажыра аткарарга јараар деп айдылат. Анайып бис чындыкла јилбиркеген улуска кӧгӱс курсакты јӱк ле «бӱдӱмјилӱ ле керсӱ» кул берет деп кӧргӱзип јадыс.