1, 2. а) Биске нениҥ учун Иеговага чындык болор керек? б) Бис бу јӧрмӧлдӧ нени шӱӱп кӧрӧрис?

БИСКЕ нениҥ учун Иеговага чындык болор керек? Нениҥ учун дезе Кудайдаҥ улу, ойгор ло сӱӱштӱ кем де јок. Бистиҥ кажыбыс ла оныҥ јанында турарга кӱӱнзейт эмей (Сар. 96:4—6). Је андый да болзо, Иегованыҥ кезик ишчилери оноҥ туура јӱре берген.

² Бис бу јӧрмӧлдӧ Иегованыҥ јанында турган, је керектериле оны ачындырган улустыҥ темдерин кӧрӧрис. Бу темдерди шӱӱп сананганы, Иеговага акту јӱректеҥ чындык артарга болужар.

3. Иегова Каинге нени айткан? Нениҥ учун?

³ Озо баштап Каинниҥ темин кӧрӱп ийектер. Ол Иегованаҥ ӧскӧ кемге де бажырбаган да болзо, оныҥ бажырузы Иеговага јарабаган. Нениҥ учун? Не дезе, оныҥ јӱрегинде јаман санаалар ӧзӱп јаткан болгон (1 Иоанн 3:12). Иегова Каинге мынайып айткан: «Јакшыны эдип турган болзоҥ, бажыҥды кӧдӱр. Ондый эмес болзо, иргееде кинчек бар. Ол сени бойына тартып јат, је сен ого бажыҥды бербезиҥ [оны бийлеп аларыҥ ба?, ЈТ]»  (Баш. 4:6, 7). Ӧскӧртӧ айтса, Иегова ого: «Јаманыҥды алынып, мениҥ јаныма бек туруп алзаҥ, мен де сениҥ јаныҥда болорым» — деген.

4. Каин Иегованыҥ јанына туратан арганы канайып јылыйткан?

⁴ Каин бойыныҥ кӧрӱм-санаазын солыган болзо, Иегова оныҥ бажырузын јарадар эди. Је Каин Кудайдыҥ јӧбин укпай, јӱк бойын сананып ла јастыра санааларга алдыртып, кинчек эткен (Иак. 1:14, 15). Каин јиит тужында: «Качан бирде Иеговага удура барарым» — деп, сананбаган да болор. Је соондо ол коркышту јаман кинчек эткен — Иеговага удура барып, кожо чыккан карындажын ӧлтӱрип салган.

5. Бис недеҥ улам Иегованыҥ јарадузын јылыйтар болорыс?

⁵ Бистиҥ де ӧйдӧ, христиан кижи, Каин чилеп, Иеговага бажырып та турган болзо, јастыра јолло барардаҥ айабас (Иуда 11). Темдектезе, андый кижи јуундарды божотпой јат, јарлаар ишке эрчимдӱ туружып јат, је бу ок ӧйдӧ ачыркап јат эмезе ака-эјелерди јаман кӧрӧт лӧ балыр санаалар сананат (1 Иоанн 2:15—17; 3:15). Андый санаалар кинчекке экелердеҥ айабас. Кижиниҥ мындый санааларын эмезе нени эдип турганын, кем де билбей турган болор. Је Кудай ӱзени кӧрӱп јат, ол бисти ого акту јӱректеҥ бажырып турган ба, јок по деп билер. (Иеремия 17:9, 10 кычырыгар *.)

6. Бис Иегованыҥ јанына бек туруп алзаас, ол биске кинчектӱ кӱӱн-санаабысты «бийлеп аларга» канайып болужат?

⁶ Је бис јастырып та турзаас, Иегова бисти артыргызып саларга меҥдебей јат. Качан бис јастыра јолго кире берзеес, ол биске: «Меге кайра бурылыгар, ол тушта мен де слерге бурыларым» — деп айдат (Мал. 3:7). Иегова бисти кандый бир јаман јанысла тартыжып турзаас, кинчекке кирбей, турумкай артсын деп кӱӱнзейт (Иса. 55:7). Ол тушта Иегова бистиҥ јаныста болор, ӧскӧртӧ айтса, кинчектӱ кӱӱн-санаабысты «бийлеп аларга», ич-кӧгӱс ле эмоциональный јанынаҥ болужар, анайда ок эт-каныска да ийде-кӱч берер (Баш. 4:7).

7. Соломон Иеговала колбуларын недеҥ улам јылыйткан?

⁷ Бис Соломон каанныҥ темин шӱӱп сананзаас, кӧп немеге ӱренип аларыс. Соломон јиит тужында Иеговала јуук колбуларлу болгон. Иегова ого ойгор берип, Иерусалимде улу ӧргӧӧ тутсын деп јакарган. Је соондо Соломон Иеговала колбуларын јылыйтып салган (1 Каан. 3:12; 11:1, 2). Кудайдыҥ Јасагы аайынча каанга кӧп ӱйлер аларга јарабас болгон. Оноҥ ӧскӧ, оныҥ јӱреги ӱрелип калар эди (Јаҥ. т. 17:17). Је Соломон бу јакаруны бузып, 700 ӱйлӱ ле 300 наложницалу болуп калган (1 Каан. 11:3). Оныҥ ӱйлериниҥ кӧбизи израильтян укту болбогон ло тӧгӱн кудайларга бажырган. Анайып ол, ӧскӧ уктаҥ кижи аларга  јарабас деген база бир јасакты бузып салган (Јаҥ. т. 7:3, 4).

8. Соломон кандый кинчектер эткен?

⁸ Соломонныҥ сӱӱжи Иегованыҥ јасактарына араайынаҥ сооп калган. Учы-учында ол уур кинчектер эткен: Астарта ла Хамос деген кудайларга тагылдар тудуп, тӧгӱн кудайларга, ӱйлери ле чилеп, бажырып баштаган. Ол бу тагылдарды кайда да ӧскӧ јерде эмес, је чек ле Иерусалимниҥ јанындагы кырда, Иегованыҥ ӧргӧӧзи турган јерде туткан (1 Каан. 11:5—8; 2 Каан. 23:13). Соломон: «Ӧргӧӧдӧ тайылгалар эдим турзам, Кудай мениҥ сӧс укпай турганыма ајару этпес» — деп, сананган болор.

9. Соломон Кудайдыҥ сӧзин укпай барарда, не болуп калган?

⁹ Је кинчек Иегованыҥ кӧзинеҥ качан да туура калбай јат. Агару Бичикте мынайда айдылган: «Соломонныҥ јӱреги, ого эки катап кӧрӱнген Иегова Кудайынаҥ тууралай берерде, Иегова ого чугулданган. Иегова ого ӧскӧ кудайларга бажырбазын деп айткан, је ол Иегованыҥ айтканын бӱдӱрбеген». Учы-учында Соломон Кудайдыҥ јарадузын ла болужын јылыйтып салган. Мынаҥ улам Израиль каандык эки јара бӧлӱне берерде, Соломонныҥ калдыгы бӱдӱн Израильле эмес, је оныҥ јӱк эки ӱйезиле башкарар аргалу болгон. Анайып, олор канча  јӱс јылдардыҥ туркунына кӧп кыйын-шыра кӧргӧн (1 Каан. 11:9—13).

10. Бистиҥ Кудайла колбуларыс недеҥ улам ӱрелип калардаҥ айабас?

¹⁰ Соломонныҥ теминеҥ кӧргӧндӧ, Иегованыҥ нормаларын баалабай ла тообой турган улусла најылашканы — Кудайла колбуларысты ӱрейтен эҥ јаан шылтактардыҥ бирӱзи. Темдектезе, јуунныҥ туштажуларына јӱрӱп турган, је Иеговала јуук колбулар јок улусла, эмезе Иеговага бажырбай турган тӧрӧӧндӧрлӧ, айылдаштарла, кожо иштеп турган улусла эмезе кожо ӱренип турган балдарла јуук најылажып турзаас, Кудайла колбуларыс ӱрелип калардаҥ айабас.

11. Кандый кижиле најылашканы каршулу болор деп оҥдоорго, не болужар?

¹¹ 1 Коринфтегилерге 15:33-ти кычырыгар. Кӧп улус јакшы кылык-јаҥду болот. Иегованыҥ Керечилери де эмес улустыҥ кезиги јаман керектер этпей јат. Слердиҥ де таныштараардыҥ ортозында андый улус бар болор, је олор слерге јакшы најылар болор бо? Бойыгардаҥ сурагар: «Олорло најылашсам, Иеговала колбуларым кандый болуп калар? Олор меге Иеговага јууктаарга болужар ба? Олор нени баалап јат? Олордыҥ куучыны не керегинде? Эмезе олор јӱк ле мода, акча-манат, телефон, планшет, компьютер ле соот-јыргалдар керегинде куучындажат па? Улусты ӧчӧп, олорго каткырыжат па? Олордыҥ кокыр-куучыны ару ба?» Иисус: «Кижиниҥ јӱреги неле толо, оозынаҥ чыгары ол ине» — деп, тегин јерге айтпаган (Матф. 12:34). Иеговала колбуларыгарга кандый бир кижиле куучындажып турганаар каршу јетирип турган болзо, андый кижиле кӧп куучындашпаска албаданыгар, эмезе чек куучындашпагар (Укаа 13:20).

12. а) Иегова Египеттеҥ јайымдалып чыккан израильтяндарга нени айткан? б) Израильтяндар, јӱк Иеговага чындык болор керек деген некелтени угала, кандый каруу берген?

¹² Је эмди Египеттеҥ чыккан кийнинеҥ израильтяндарла јаан удабай не болгонын кӧрӱп ийектер. Олор Синай кырдыҥ јанына јууларда, Иегова бойын сӱреен кайкамчылу эдип кӧргӱскен. Бу ӧйдӧ олорго кара булут, јалкын ла ыш кӧрӱнип, мӱӱстиҥ тыҥ ойногон табыжындый табыш ла кӱкӱрт угулган (Чыг. 19:16—19). Оныҥ кийнинде, Иегова бойын чындык болорын некеп турган Кудай деп айткан. Израильтяндар оны сӱӱп, оныҥ јасактарын бӱдӱрзе, ол олорго беринген сӱӱжин кӧргӱзер деп сӧзин берген. (Чыгыш 20:1—6 кычырыгар *.) Ӧскӧртӧ айтса, Иегова бойыныҥ албатызына: «Слер мениҥ јанымда болзоор, мен де слердиҥ јаныгарда болорым» — деп айткан. Иегованыҥ мындый сӧстӧрин угуп, слер  кандый каруу берер эдеер? Израильтяндар ла чылап: «Бис Иегованыҥ айтканын ӱзе бӱдӱрерис» — деп айдар болороор (Чыг. 24:3). Је јаан удабай ла олордыҥ Кудайга чындыгы ченелгенин ундыбагар.

13. Израильтяндардыҥ Иеговага чындыгы канайып ченелген?

¹³ Израильтяндар кара булутты, јалкынды ла кайкамчылу эдип кӧрӱнген Кудайдыҥ ӧскӧ дӧ ийде-кӱчин кӧрӱп ийеле, тыҥ коркый бергендер. Оныҥ учун олор Моисейди ортокчы эделе, Синай кырга чыгып, Иеговала куучындашсын деп сураган (Чыг. 20:18—21). Моисей кырдаҥ узак тӱшпей турарда, израильтяндар бойлорын чӧл јерде башчызы јок артып калдыс деп сананала, ал-санаага тӱжӱп, Ааронноҥ: «Бисти баштап апаратан кудай эдип бер, нениҥ учун дезе бисти Египет јеринеҥ чыгарган Моисей деген кижиле не болуп калганын билбей јадыс» — деп некей берген (Чыг. 32:1, 2). Бу учуралдаҥ, олордыҥ Кудайга бӱдери Моисей башчызынаҥ камаанду болгоны кӧрӱнет.

14. Израильтяндар бойлорын канайып тӧгӱндеген ле Иегова нени эткен?

¹⁴ Израильтяндар чалуга бажырарын — Кудайга удура кинчек болгон деп билер болгон (Чыг. 20:3—5). Је олор тӱҥей ле алтын бозуга бажырганыла Иегованыҥ јасагын бузып, Кудайдыҥ јанында турадыс деп бойлорын тӧгӱндеген. Аарон, керек дезе, бозуга бажырарын — «Иеговага учурлалган байрам» деп адаган. Иегова мыны кӧрӱп, Моисейге мынайда айткан: «Албаты... јескинчилӱ керектер эдет. Мен јакарган јолдоҥ олор кандый капшай туура барды!» Иегова коркышту тыҥ ачынганынаҥ улам, јаҥы тӧзӧлгӧн Израиль албатыны јоголтып саларга сананган (Чыг. 32:5—10).

15, 16. Моисей ле Аарон акту јӱрегинеҥ Иегованыҥ јанында турганын канайып кӧргӱскен? (Јӧрмӧлдиҥ бажындагы јурукты кӧрӱгер.)

¹⁵ Је буурзак Кудай Иегова бойыныҥ албатызын јоголтпогон. Оныҥ буурзагынаҥ улам Кудайдыҥ чындык ишчилеринде Иегованыҥ јанына туруп алатан арга ачылган (Чыг. 32:14). Моисей улустыҥ кыйгы-кышкыла кожоҥдожып, алтын бозуныҥ алдына бијелеп јатканын кӧрӧлӧ, оны ӧртӧп, јок эдип салган. Оныҥ кийнинде ол тыҥ ӱнденип айткан: «Кем Иегованыҥ јанында? Мениҥ јаныма келип турзын! Анайып, оныҥ јанына Левийдиҥ ончо уулдары јуулды» (Чыг. 32:17—20, 26).

¹⁶ Аарон чалу да эткен болзо, кинчегин алынып, арткан левиттерле кожо Иегованыҥ јанына туруп алган. Бу чындык ишчилер јӱк ле Иегованыҥ јанына туруп алган эмес, је кинчек эткен улустаҥ да башка туруп алган. Мынайып эткени ойгор болгон, нениҥ учун дезе ол кӱнде чалуга бажырган ӱч муҥ кире израильтян кижи божогон. А чындык арткан улуска Кудай алкыжын берер деп сӧзин берген (Чыг. 32:27—29).

17. Павелдиҥ алтын бозу керегинде бичигенинеҥ нени билип аладыс?

¹⁷ Элчи Павел бу болгон учуралды эске алып, мынайып айткан: «Јаманга олор чылап тартылбазын деп, бу биске тем болгоны ол. Анайда ок олордыҥ  кезиги чилеп, чалуларга бажырбагар... Бу ончозы... биске, калганчы чакта јӱрген улуска, ӱредӱ болзын деп бичилген. Оныҥ учун, бек туруп јадым деп сананып јӱрген кижи, јыгылбаска, чеберлензин» (1 Кор. 10:6, 7, 11, 12). Павелдиҥ айтканыла болзо, Иегованыҥ чындык ишчилери де кинчек эдердеҥ айабас. Олор ченелтеге тӱжип, керек дезе: «Иеговала колбуларыс ӱрелбеди» — деп, сананар болор. Је Иегованыҥ јарадузын аларга турган болзоос, Кудайга чындык ла оныҥ најылары болорго турганыс деп айдарыла болорзынбас керек (1 Кор. 10:1—5).

18. Бис недеҥ улам Иегованаҥ ыраай берердеҥ айабазыс ла мынаҥ улам не болор?

¹⁸ Моисей кырдаҥ узак тӱшпей турарда, израильтяндар санааркап баштаган. Бӱгӱнги де кӱнде кезик христиандар Кудайдыҥ јаргызыныҥ кӱнин ле јаҥы јӱрӱмниҥ келерин сакып болбой, чӧкӧп баштайт. Олор: «Кудайдыҥ берген сӧзи эм тургуза бӱтпес — деп, керек дезе,— Андый јакшы јӱрӱм канай болотон?» — деп, сананар болор. Мындый санаалардаҥ улам бистиҥ кӱӱн-табыс Иегованыҥ табын туура јылдырып ийердеҥ айабас. Соондо, бис Иегованаҥ ыраап, качан да этпезис деп сананган керектерди эдип баштаар болорыс.

19. Биске нени качан да ундыбас керек, нениҥ учун?

¹⁹ Иегова бисти ого акту јӱрегистеҥ сӧсуккур болзын ла јаҥыс ла ого бажырзын деп кӱӱнзеп турганын качан да ундыбай јӱригер (Чыг. 20:5). Иегованыҥ табын бӱдӱрбей турзаас, Сатананыҥ табын бӱдӱрип, тӱбекке тӱжӱп каладыс. Оныҥ да учун Павел мындый сӧстӧр бичиген: «Кайраканныҥ айагын да, шилемирлердиҥ айагын да ичип болбозыгар, Кайраканныҥ курсагын ла шилемирлердиҥ курсагын јип болбозыгар» (1 Кор. 10:21).

20. Бис јастырып турзаас, Иегова биске канайып болужат?

²⁰ Агару Бичикте бичилген Каин, Соломон ло Синай кырдыҥ јанында јуулган израильтяндар керегинде куучындарда тӱҥей неме бар. Олордыҥ ончозында бойыныҥ јастыразын алынатан ла Кудайга баштанатан арга болгон (Ап. ижи 3:19). Бу сӧстӧрдӧҥ Иегова кинчек эдип салган ишчилерин тӱрген ле артыргызып саларга меҥдебей јат деп кӧрӱнет. Темдектезе, ол Ааронныҥ кинчегин таштап койгон. Бӱгӱн Кудай бисти јастыра керектердеҥ корулап аларга, бойыныҥ Сӧзи, библиялык бичиктер ле ака-эјелер ажыра јӧптӧр берет. Бис бу јӧптӧрди алынып турзаас, Кудай биске буурзаар деп алаҥзыбас аргалу.

21. Иеговага чындык болгоныс ченелип турза, биске нени эдер керек?

²¹ Иегованыҥ буурзагын јастыра тузаланбагар (2 Кор. 6:1). Ӧскӧртӧ айтса, биске «Кудай јок јӱрерин ле телекейдиҥ улузыныҥ кычаларын» јектеер керек. (Титке 2:11—14 кычырыгар.) Бу телекейде јадып тура, Иеговага чындык болгоныс јаантайын ченелер. Оныҥ учун: «Иегова Кудайыҥнаҥ коркып јӱр, јӱк ого иштеп, ого чындык бол» деген кычыруны бӱдӱрип, Кудайдыҥ јанында болугар! (Јаҥ. т. 10:20).