СЛЕР ӧйди билип аларга нени эдедигер? Кӧп сабада, часты кӧрӱп турган болороор. А кем-кем слердеҥ: «Ӧй канча?» — деп сураза, слер кандый каруу бередигер? Карууны канайып ла берерге јараар.

Темдектезе, слерге бир час одус минут деп айдар керек болзын. Бу ӧйди кезик улус 1:30, кезиги 13:30, кезиги дезе, јарым эки деп айдар болор.

Агару Бичикти кычырып тура, азыйдагы улус ӧйди канайып бӧлӱген деп, качан бирде сананганаар ба? Еврей Бичимелдерде мындый сӧстӧр туштайт: «эрте таҥ», «тал тӱш», «эҥир» (Баш. 8:11; 19:27; 43:16; Јаҥ. т. 28:29; 1 Каан. 18:26). Је кезикте ӧй оноҥ чокум айдылар болгон.

Библиялык ӧйлӧрдӧ калаларды, анчада ла тӱнде, корулаарга, каруулчыктар тургузылатан. Канча чактардыҥ туркунына израильтяндар тӱн туркунына бой-бойын солып турган ӱч каруул тургузып, тӱнди ӱч бӧлӱкке бӧлӱген (Сар. 63:6). Темдектезе, Јаргычылар 7:19-та «экинчи каруулдыҥ турган ӧйи» керегинде айдылат. Је Иисус јерге келген ӧйдӧ, еврейлер гректер ле римляндар чылап, тӱнди тӧрт бӧлӱкке бӧлӱӱр болгон.

«Каруул» деген сӧс Сӱӱнчилӱ јардыҥ бичиктеринде јаҥыс катап туштабай јат. Темдектезе, Иисус суула кемеде отурган ӱренчиктерине базып келедерде, тӧртинчи каруулдыҥ ӧйи — «таҥ алды» болгон (Матф. 14:25). Иисус укаа сӧстӧриниҥ бирӱзинде мынайып айткан: «Уурчы тӱнниҥ кажы кирезинде келерин айыл ээзи билген болзо, ойгу болуп, айылын тонотпос эди деп, билип јадыгар» (Матф. 24:43).

Анайда ок Иисус ӱренчиктерине: «Сергек болыгар! Айыл ээзи качан келерин билбезигер: эҥирде бе, эмезе тӱн аразында ба, эмезе пӧтӱк этсе бе, эмезе эртен тура ба» — деп айдарда, тӱнниҥ бастыра тӧрт каруулы керегинде айткан (Марк 13:35). Баштапкы каруул ол эмезе «эҥир», кӱн ашкан кийнинеҥ ала эҥирдиҥ 9 саадына јетире болгон. Экинчи каруул ол эмезе «тӱн аразы», эҥирдиҥ тогус саадынаҥ ала тӱн аразына (24:00) јетире болгон. Ӱчинчи каруул — «пӧтӱк эткен ӧй», тӱн аразынаҥ ала тӱнниҥ ӱч саадына јетире болгон. Иисусты тудуп алган тӱнде, пӧтӱк эдерде, ӱчинчи каруулдыҥ ӧйи болгон болор (Марк 14:72). Тӧртинчи каруул — «эртен тура», тӱнниҥ ӱч саадынаҥ ала таҥ атканча улалган.

Айдарда, библиялык ӧйлӧрдӧ улуста ӧйди чоттойтон эдим болбогон до болзо, олордо ӧйди тоолойтон бойыныҥ эби болгон.