1. Иисус божоор алдында ӱренчиктериле јаан учурлу кандый теманы шӱӱшкен?

ИИСУС ХРИСТОС божоор алдында ӱренчиктериле куучындажып тура, сӱӱш керегинде 30 кире катап айткан. Анайып, оныҥ ӱренчиктери бой-бойын сӱӱр учурлу деп аҥылаган (Иоанн 15:12, 17). Чындык христиандар сӱӱжиле аҥыланар учурлу болгон (Иоанн 13:34, 35). Иисус андый сӱӱшти јӱк ле сезимдерге тӧзӧлӧнӧт деп айтпаган, андый сӱӱш — бойын килебес тереҥ сӱӱш деп айткан. «Бойыныҥ најылары учун јӱрӱмин бергенче сӱӱринеҥ артык сӱӱш јок. Мениҥ јакылталарымды бӱдӱрип јӱрер болзогор, Мениҥ најыларым болгоныгар ол» — деп айткан (Иоанн 15:13, 14).

2. а) Кудайдыҥ ишчилери незиле аҥыланат? б) Бу јӧрмӧлдӧ бис нени шӱӱжерис?

² Иегованыҥ Керечилери бойын килебес чын сӱӱжиле, анайда ок бузылбас бирлигиле аҥыланат (1 Иоанн 3:10, 11). Иегованыҥ ишчилери бой-бойын угы-тӧзиле,  тилиле ылгабай јат. Је бисте мындый сурактар боло берердеҥ айабас: «Нениҥ учун анчада ла бӱгӱнги кӱнде бой-бойысты сӱӱр керек? Иегованыҥ ла Иисустыҥ сӱӱжи биске канайып болужат? Ака-эјелерге ийде-кӱч берип турган сӱӱжисти канайып кӧргӱзерис?» (1 Кор. 8:1).

3. «Уур-кӱч ӧйлӧр» улуска кандый каршузын јетирет?

³ Улустыҥ јӱрӱми «уур-кӱч ӧйлӧрдӧ» кыйын-шырала толуп калган (2 Тим. 3:1—5; Сар. 90:10). Мынаҥ улам улустыҥ санаа-укаазы караҥуйлап, јӱрӱм јӱрер кӱӱни келбей барат. Бир кезек статистикала болзо, кажы ла јыл 800 000 ажыра кижи бойына кол салынат, айдарда, кажы ла 40 секундта бир кижи божойт. Је андый тӱбек христиан ака-эјелерде де болуп турганы чочыдылу.

4. Иегованыҥ ишчилериниҥ кемизи ӧлӱм сураган?

⁴ Библиялык ӧйлӧрдӧ Иегованыҥ кезик ишчилери јӱрӱминде болгон учуралдардаҥ улам, ал-санаага тӱжӱп, ӧлӱм сураган. Темдектезе, Иов, оорузына чыдашпай: «Јӱрӱмди кӧрӧр кӱӱним јок» — деп, кородоп айткан (Иов 10:1; 14:13). Кудайдыҥ јакарузын бӱдӱрип турган Иона, айалга кенейте солына берерде, коркышту тыҥ ачынып: «Сурап турум сени, Иегова, јӱрӱмимди ал, не дезе, мынайып јӱргенчем, ӧлӱп калзам торт» — деген (Иона 4:3). Илья дезе, кӱч айалганы ӧдӧр арга таппай, Кудайдаҥ ӧлӱм сураган: «Болор! Мениҥ тынымды ал, Иегова» (1 Каан. 19:4). Је Иегова бойыныҥ чындык ишчилерин сӱӱген ле олорды божоп калзын деп кӱӱнзебеген. Кудай олорды ӧлӧргӧ сананганы учун бурулабаган, карын олорго оноҥ ары иштеп јӱретен ийде-кӱч берип, болушкан.

5. Бӱгӱнги кӱнде ака-эјелерге нениҥ учун бистиҥ сӱӱжис тыҥ керек болуп јат?

⁵ Је ончо христиандар ӧлӧргӧ сананбай да турган болзо, олордыҥ кӧбизи јаантайын стресске табартат. Оныҥ учун олорго бистиҥ сӱӱжис керек болот. Ака-эјелер јӱзӱн-јӱӱр кӱчтерге туштап јат: кезигин истежип јат, кезигине каткырыжып јат, кемди де ижинде јамандагылайт эмезе коп јайгылайт; кем де ӧйинеҥ ӧткӱре кӧп иштеп јат эмезе јаантайын ла графиктиҥ кийнинеҥ сӱрӱжип јат. Кезик христиандарга дезе, билезиндеги кӱчтер амыр бербей јат, темдектезе, Кудайга бӱткенин јаратпай турган эш-нӧкӧриниҥ ачу-сӧстӧрин угарга келижет. Мынаҥ улам кӧп ака-эјелердиҥ сӱӱри тӱжӱп калат. Олорго кем болужар аргалу?

6. Иегова бойыныҥ ишчилерин сӱӱп, олорго ийде-кӱчти канайып берет?

⁶ Иегова бойыныҥ ишчилерин јаантайын сӱӱр деп сӧзин берет. Израиль албатыныҥ кӱӱнин Иегованыҥ: «Мен сени баалап јадым, сени тооп, сӱӱп јадым. [...] Коркыба, нениҥ учун дезе мен сениле кожо» — деген сӧстӧри кӧдӱрген болор (Иса. 43:4, 5). Оныҥ  учун Иегованыҥ ончо ишчилери Кудай олорды сӱӱп турганында алаҥзыбас аргалу *. Агару Бичикте Иегова керегинде мынайып айдылат: «Ол кӱчтӱ, ол аргадап алар. Сени кӧрӱп, сӱӱнип кыйгырар» (Соф. 3:16, 17).

7. Иегованыҥ ла энениҥ сӱӱжи незиле тӱҥей? (Јӧрмӧлдиҥ бажындагы јурукты кӧрӱгер.)

⁷ Иегованыҥ ишчилеринде кандый да ченелтелер болзо, Ол олорго токунал берип, болужар деп сӧзин берет. Агару Бичикте Иегованыҥ мындый сӧстӧри бар: «Слерди колго алып јӱрер ле тизеге отургызып, эркеледер. Кижини энези токунатканы чылап, мен слерди токунадарым» (Иса. 66:12, 13). Сӱӱштӱ эне балазын кучактап эмезе тизезине отургызып, ойноп турганын сананып ийзеер. Иегова бу сӧстӧрлӧ бойыныҥ чындык ишчилерин тыҥ сӱӱп турганын кӧргӱзерге сананган. Кудай слерди тыҥ баалап јат деп, качан да алаҥзыбагар (Иер. 31:3).

8, 9. Христостыҥ сӱӱжи биске канайып ийде-кӱч берет?

⁸ Бис Иегованыҥ сӱӱжин база недеҥ кӧрӧдис? Агару Бичикте: «Кудай телекейди сӱӱген бойынча, сок јаҥыс Уулын берген, Ого бӱткен кажы ла кижи ӧлӱп калбай, мӧҥкӱ јӱрӱмдӱ болзын» — деп айдылат (Иоанн 3:16, ЈК 2003). Иисус бис учун јӱрӱмин бергениле бисти база сӱӱп турганын кӧргӱскен. Оныҥ сӱӱжи биске јаан ийде-кӱч берет. Кудайдыҥ Сӧзи бисти Христостыҥ сӱӱжинеҥ кандый да кыйын-шыра айрып болбос деп бӱдӱмјилейт (Рим. 8:35, 38, 39).

⁹ Уур-кӱчтердеҥ улам сӱрис тӱжӱп, кӧгӱс јанынаҥ уйадап калардаҥ айабазыс.  Је Христостыҥ бисти тыҥ сӱӱп турганын шӱӱп сананзаас, ончо кӱчтерде турумкай артарыс. (2 Коринфтегилерге 5:14, 15 кычырыгар.) Иисустыҥ сӱӱжи мындый да кӱчтерде турумкай артарга болужат: ар-бӱткенниҥ тӱбегинде, истежӱлерде, кемнеҥ де, недеҥ де чӧкӧй берзеес эмезе амыр бербей турган санааларла тартыжып турзаас.

10, 11. Сӱри тӱжӱп калган улуска кемдер болужар учурлу? Јартап беригер.

¹⁰ Анайда ок Иегова биске ийде-кӱчти христиан јуун ажыра берет. Бис Кудайдыҥ сӱӱжи учун быйанысты ака-эјелерди сӱӱп турганысла, анайда ок олорго јаҥыс ла кӧгӱс јанынаҥ эмес, је олордыҥ кӱӱн-санаазын кӧдӱрип турганысла кӧргӱзедис (1 Иоанн 4:19—21). Элчи Павел христиандарды: «Бой-бойыгарды кӧкӱдип, бой-бойыгарды тыҥыдыгар» — деп кӱӱнзеткен (1 Фес. 5:11). Эйе, јаҥыс ла аксагалдар эмес, је бис ончобыс, Иегова ла Иисустаҥ тем алып, ака-эјелерди токунадар ла олорго болужар аргалу. (Римдегилерге 15:1, 2 кычырыгар.)

¹¹ Јуунда кем-кем депрессияла ооруп турган болзо, ого јакшы эмчилердиҥ болужы керек болордоҥ айабас (Лука 5:31). Аксагалдар эмезе јуундагы јарчылар бойын психологтор ло психиатрлар эмес деп оҥдоп то турган болзо, је Агару Бичиктеги јӧпти бӱдӱрип, депрессиялу ака-эјеге болужар аргалу. Ондо мындый јӧп бар: «Чинези јокты кӧкӱдигер, јӱдектерди [уйадап калгандарды] јӧмӧгӧр, ончо улуска узакка чыдамкай болыгар»  (1 Фес. 5:14). Биске ончобыска сӱри тӱжӱп калган улуска чыдамкай болуп, олорды оҥдоп, токунадар керек. Слер андый ака-эјелерге болужарга албаданадыгар ба? Эйе болзо, олорго болужатан база кандый аргалар бар?

12. Бир эјеге јуунныҥ канайып болушканын куучындап беригер.

¹² Европада јадып турган бир эје бойыныҥ сезимдерин куучындайт: «Кезикте бойыма кол салынып ийетен санаалар келет. Је менде кӱчтӱ болушчыларым бар. Јуун эмес болзо, мен бойыма туку качан кол салынып салар эдим. Ака-эјелер меге јаантайын болужып јат. Мени депрессиялу деп кӧп ака-эјелер билбес те болзо, је ончозы болужарга белен. Бир биле меге кӧгӱс ада-эне болуп калган. Олор меге јаантайын болужарга белен, оныҥ учун мен олорго тӱн де, тӱш те болзо, баштанар аргалу». Је мындый болушты кажы ла ака-эје јетирип болбос. Андый да болзо, бистиҥ кажыбыс ла болуш керексип турган ака-эјелерге болужар аргалу *.

13. Улуска болужып тура, нени ундыбас керек?

¹³ Лаптап угугар (Иак. 1:19). Бис кӱчтерге бастырткан аканы эмезе эјени лаптап угуп турганысла олорго сӱӱжисти кӧргӱзедис. Биске олордыҥ сезимдерин оҥдоорго, черчеҥ сурактар болужар. Анайып бис олорды килеп, олорго болужатан эбин табып аларыс. Олорды килеп турганыс бистиҥ јӱзистеҥ ле кӧстӧристеҥ кӧрӱне берер. Ака эмезе эје сезимдерин чыгара айдарга турза, чыдамкай болуп, сӧс блаашпай угугар. Айтканын лаптап уксагар, оныҥ јӱрегинде не барын јакшы оҥдоп аларыгар. Анайып ол слердиҥ акту кӱӱнигердеҥ болужарга турганаарды кӧрӱп, слердеҥ токунал аларга кӱӱнзеер болор.

14. Депрессиялу кижини нениҥ учун јаргылабас керек?

¹⁴ Јаргылабагар. Сананбай айткан сӧстӧрисле депрессияла ооруп турган кижиге болужардыҥ ордына, ого оноҥ јаан ачу јетирердеҥ айабазыс. Укаа сӧстӧр 12:18-те мынайып айдылат: «Кем де, сананбай айткан сӧстӧриле, кылыш чылап шыркалап јат, је ойгор кижиниҥ айткан сӧстӧри эмдеп јат». Депрессиялу кижиге бис ӧнӧтийин ачу сӧстӧр айдарга сананбай да турган болзоос, је бистиҥ сӧстӧрис оныҥ јӱрегине тӱҥей ле ачу-сыс экелердеҥ айабас. Оныҥ учун андый кижиниҥ сезимдерин оҥдоп, ого болужарга бастыра кӱчисти салар керек (Матф. 7:12).

15. Ака-эјелерди токунадарга биске не болужар?

¹⁵ Агару Бичиктиҥ болужыла токунадыгар. (Римдегилерге 15:4, 5 кычырыгар.) Агару Бичик — чыннаҥ ла токунал беретен шӱӱлтелерле байлык бичик. Оны биске «чыду ла кӧкӱдӱ  берип турган Кудай» сыйлаган. Анайда ок бисте шиҥдейтен јепселдер бар темдектезе: «Индекс публикаций Сторожевой Башни» ле «Путеводитель по публикациям Свидетелей Иеговы». Олордыҥ болужыла јӱзӱн-јӱӱр кӱчтерге бастырткан кижиниҥ кӧгӱзин тыҥыдарга болужатан шӱӱлтелер ле јарагадый библиялык ӱлгерлер таап аларга јараар.

16. Биске сӱри тӱшкен кижиге болужарга, кандый кылык-јаҥ болужар?

¹⁶ Буурзак ла јалакай болугар. Акту јӱрегинеҥ сӱӱп турган кижи буурзак ла јалакай болот. Бу кылык-јаҥ бистерге улустыҥ кӱӱнин кӧдӱрип турарга болужып јат. Иегова — «буурзак Ада» ла «кандый ла коот [токунал] береечи Кудай». Ол бойыныҥ ишчилерине буурзап јат. (2 Коринфтегилерге 1:3—6 кычырыгар; Лука 1:78; Рим. 15:13). Павелдиҥ ака-эјелерге шак ла мынайып баштанганы бистерге сӱреен јакшы тем болот. Ол: «Балдарын эркелеткен энедий болгоныс. Слерди анайда сӱӱп, слерге јаҥыс та Кудайдыҥ Сӱӱнчилӱ Јарын эмес, јӱрӱмисти де берерге белен болгоныс, нениҥ учун дезе биске кару болгоныгар» — деп бичиген (1 Фес. 2:7, 8). Бис сӱри тӱшкен кижиге буурзап, ого јалакай баштанзаас, Кудай оныҥ јайнап мӱргӱгенине бис ажыра болужар болор.

17. Биске улустыҥ кӱӱнин кӧдӱрерге, олорго канайып баштанар керек?

¹⁷ Ака-эјелер бир де јастырбас деп сананбагар. Ака-эјелерге чын кӧрӱмдӱ болугар. Олордоҥ чӧкӧй бербеске, олор качан да јастырбас деп сананбас керек, не дезе олор толо кемдӱ эмес (Јарл. 7:21, 22). Иегова улуска чын кӧрӱмдӱ болот, оныҥ учун бис оноҥ тем алзаас, улустыҥ јастыралары бисти кайкатпас (Еф. 4:2, 32). Ака-эјелерге, ӧскӧ улуска кӧрӧ, Кудайга ас иштеп турган деп сезимдер келбезин деп, олорды мактаар керек. Анайып акту кӱӱннеҥ мактаганы олордыҥ кӱӱн-санаазын кӧдӱрип, Иеговага сӱӱнип иштеерге ийде-кӱч берет (Гал. 6:4).

18. Бой-бойыска болужарга, бисти не кӱӱнзедет?

¹⁸ Иегова ла јӱрӱмин улус учун берген Иисус бистиҥ кажыбысты ла баалап јат (Гал. 2:20). Бис јуундагы ака-эјелеристи сӱӱп јадыс ла олорго јалакай баштанып, болужарга кӱӱнзейдис. Оныҥ учун «амырды экелип, бой-бойыбысты тыҥыдып турганга [турарга, ЈТ] јӱткӱйли» (Рим. 14:19). Удабас, амыр бербей турган санаалар база кемди де кыйнабас. Бу ӧйди бис энчикпей сакып јадыбыс! Оору-јобол, јуу-согуш, Кудайга бӱдӱп турганы учун истедери, чӧкӧниш ле биледеги уур-кӱчтер база качан да болбос. Адамнаҥ энчиленген кинчеги учун кем де божобос. Христостыҥ Бир муҥ јылдыҥ туркунына башкарганыныҥ учында ончо улус толо кемдӱ болуп калар. Оноҥ калганчы ченелтеде Кудайга чындык арткандарды, Иегова бойыныҥ балдары эдип алар. Олор Кудайдыҥ јердеги балдары болор ло «Кудайдыҥ балдарыныҥ јайымын» алар (Рим. 8:21). Айдарда, бу сӱрекей јакшы кайралды аларга, биске ончобыска бой-бойысты сӱӱр керек!