1. Бу телекейде таркап калган јаҥыс бойын сананар кылык-јаҥ биске кандый салтарын јетирер аргалу?

КУДАЙДЫҤ Сӧзинеҥ билип алганысты тузаланарга нениҥ учун коркышту кӱч болот? Нениҥ учун дезе Кудайдыҥ сӧзин бӱдӱрерге биске јобош болор керек. А јобош болорго јеҥил эмес. Бис «калганчы кӱндерде» јададыс, оныҥ учун Агару Бичикте айдылганыла, «јаҥыс бойын сӱӱр, акчага ӱстӱгер, мактанчак, бийиркек» ле «тудунбас» улустыҥ ортозында јададыс (2 Тим. 3:1—3). Мындый кылык-јаҥныҥ Кудайга јарабай турганын оҥдоп турган да болзоос, андый улус ырысту јӱрет деп билдирер болор (Сар. 37:1; 73:3). Керек дезе биске мындый санаалар келердеҥ айабас: «Озо баштап бойын сананбай улусты сананарында туза бар ба? Мен олордоҥ „кичӱ“ эдип тудунзам, олор мени тообой барбас па?» (Лука 9:48). Јаҥыс бойысты сананып турзаас, бис ака-эјелерисле колбуларысты ӱреп, бу телекейдиҥ улузынаҥ аҥыланбай јадыс. Је Агару Бичиктеги Кудайдыҥ јобош ишчилериниҥ теми керегинде шӱӱп сананып, олордоҥ тем алып турзаас, бис кӧп алкыштар аладыс.

2. Иегованыҥ чындык ишчилериниҥ темин шӱӱп сананары нениҥ учун тузалу?

² Бис Иегованыҥ чындык ишчилеринеҥ тем аларга турган болзоос, биске мындый сурактарды шӱӱп сананар керек:  Кудайдыҥ најызы болорго ло оныҥ јарадузын аларга, олорго не болушкан? Кудайдыҥ табын бӱдӱрерге, олор ийде-кӱчти кайдаҥ алган? Анайып, бистиҥ бӱткенис тыҥыыр.

3, 4. а) Иегова биске кӧгӱс курсакты канайып берет? б) Бӱткенис бек артсын деп, нениҥ учун јаҥыс билгирлерле болорзынбас керек?

³ Агару Бичик ле ого тӧзӧлӧнгӧн бичиктер, јуунныҥ туштажулары ла курултайлар, анайда ок бистиҥ сайт ла интернет-телевидение — кӧгӱс билгирлер ле тузалу јӧптӧр берет. Је Иоанн 4:34-тӧ бичилген Иисустыҥ сӧстӧриле болзо, бис кӧгӱс курсакты јӱк ле билгирлер аларга болуп албай јадыс. Иисус: «Мениҥ курсагым — Мени Ийгенниҥ табыла эдери ле Оныҥ керегин бӱдӱрери» — деп айткан.

⁴ Иисуска Кудайдыҥ табын бӱдӱрери курсак ошкош болгон. Нениҥ учун? Нениҥ учун дезе јакшы курсак кижиниҥ кӱӱнин кӧдӱрет ле ийде-кӱч берет. Анайып ла Кудайдыҥ табын бӱдӱрип тура, бис бӱткенисти тыҥыдадыс. Темдектезе, слер арып-чылап калган да болзогор, је јарлаар ишке барып келеле, канаттараар јайылып калган јанып келедеер. Андый учуралдар слерде де болгон болбой.

5. Ойгор јӱрген улусты кандый кайрал сакыйт?

⁵ Кудайдыҥ табын бӱдӱрерге албаданып турган болзоос, ойгор болодыс (Сар. 107:43). Ол тушта бисти кандый кайрал сакыйт? Агару Бичикте мынайып айдылат: «Ойгорды тапкан кижи ырысту... Бу ойгор кораллдаҥ да, сеге баалу болуп турган немедеҥ де баалу. [...] Ол — ойгордоҥ бек тудунган улуска јӱрӱмниҥ агажы болот. Олорды ырысту улус деп айдыжар» (Укаа 3:13—18). А Иисус: «Слер мыны билип, эдип турган болзогор, кежиктӱ болгоныгар ол» — деп айткан (Иоанн 13:17). Оныҥ учун Христостыҥ ӱренчиктерине ырысту болорго, Ӱредӱчиниҥ айтканын бӱдӱрер керек болгон. Олор Иисустыҥ ӱреткени аайынча јӱрӱп, јӱк ле бир кезек ӧйгӧ эмес, је бастыра јӱрӱмине оноҥ тем алар учурлу болгон.

6. Биске нениҥ учун Агару Бичиктиҥ билгирлерин оноҥ ло ары тузаланар керек?

⁶ Бӱгӱнги кӱнде биске де Кудайдыҥ айтканы аайынча јӱрер керек. Тем кӧрӱп ийектер. Машина јазап турган кижиде керектӱ билгирлер ле јепселдер бар болот. Је ол олорло тузаланбай турза, јепселдеринеҥ ле билгирлеринеҥ туза јок болор. Керек дезе, бу кижи кӧп јылдардыҥ туркунына јаан ченемелдӱ де болуп калган болзо, ченемели ундылып калбазын деп, ого јаантайын ижин эдип турар керек. Анайып ла Агару Бичиктиҥ билгирлерин тузаланып баштаарыста, једимдериске сӱӱнип турган болгоныс. Је оноҥ ло ары ырысту артарга, биске кӱнӱҥ сайын Иегованыҥ ӱреткениле јӱрер керек.

7. Агару Бичиктеги темдерди шӱӱп сананганы кандый туза берет?

⁷ Биске кандый учуралдарда јобош болорго јеҥил эмес болот ло мындый учуралдарда јебрен ӧйдӧги Иегованыҥ ишчилери нени эткенин кӧрӱп ийектер. Је бис кӧгӱс ийде-кӱч аларга турган болзоос, биске бу учуралдарды јӱк ле кычырар керек эмес, бу билгирлерди јӱрӱмисте канайып тузаланарын тереҥ шӱӱп сананар керек.

8, 9. Павел Апостолдордыҥ ижи 14:8—15-те бичилген учуралда, бойын канайып јобош тудунган? (Јӧрмӧлдиҥ бажындагы јурукты кӧрӱгер.)

⁸ Кудай «ончо улус аргадалып, чындыкты билип алзын деп јат» (1 Тим. 2:4). Слер чындыкты билгелек улуска канайып баштанадыгар? Элчи Павел синагогаларда Иегова керегинде бир эмеш билгирлерлӱ улусты бедиреген де болзо, ол Каандык керегинде јарды еврей эмес те улуска куучындаган.  Ӧскӧ кудайларга бажырып турган улуска јарлаарга, Павелдиҥ јобожы ченелген.

⁹ Мындый учурал болгон. Павел ле Варнава баштапкы миссионер јоругыныҥ ӧйинде Листра деген калада јарлап турарда, каланыҥ улузы олорды — кижи болуп калган Зевс ле Гермес деп бодогон. Мынаҥ улам Павел ле Варнава јакшызынып, бийиркене берди бе? Кенетейин јарлу боло бергенин, ченелтелердиҥ кийнинеҥ эмеш амырап ийетен арга деп, олор сананды ба? Јок эмей! Павел ле Варнава кийимин јырта тартып, улустыҥ ортозына кийдире јӱгӱреле: «Слер нени эдип тураар? Бис слердий ле улус эдибис» — деп кыйгырыжа бердилер (Ап. ижи 14:8—15).

10. Павел ле Варнава Листраныҥ улузына нениҥ учун бийиркенбеген?

¹⁰ Павел ле Варнаваныҥ Листраныҥ улузына: «Бис слердий ле улус эдибис» — деп айтканы олорды база тӧгӱн кудайларга бажырып турганын кӧргӱспей јат. Олор Кудайдаҥ аҥылу јакылта алган миссионерлер болгон (Ап. ижи 13:2). Бу акалар агару тынга майладып, сӱрекей јакшы ижемји алган да болзо, бийиркенбеген. Не дезе, Павел ле Варнава, Листраныҥ улузы сӱӱнчилӱ јарды укса, олор до теҥериде јӱретен ижемјилӱ болор деп оҥдоп туратан.

11. Бис сӱӱнчилӱ јарды јарлаган тушта Павелдиҥ јобожынаҥ кандый тем аларыс?

¹¹ Павел биске јобош болорыныҥ сӱрекей јакшы темин кӧргӱскен. Бис оноҥ кандый тем алар аргалу? Баштапкызында, јарлаар иште Иегованыҥ болужыла кандый бир једимдерге јединген болзоос, улустаҥ мак сакыбас керек. Экинчизинде, биске кажыбыска ла бойыстаҥ мындый сурактар сураарга јараар: «Јарлаар иште улуска канайып баштанадым? Мен бистиҥ јердиҥ улузыныҥ кӧрӱмине кирип, кандый бир улусты јаман кӧрбӧйдим бе?» Иегованыҥ Керечилери улуска сӱӱнчилӱ јарды јакшы оҥдоп алзын деп болужарга, јууныныҥ јарлап турган јеринде јаткан улус кандый тилге куучындап турганын билип аларга албаданат. Оныҥ учун кезиги ӧскӧ тил ӱренип, јабыс кӧрдӱрип турган улустыҥ чӱм-јаҥдарыла таныжып алат. Андый христиандарда бийиркенетен санаа да келбей јат. Карын олор кажы ла кижини оҥдоорго ло улуска Каандык керегинде јарды алынарга болужат.

12. Епафрас улус керегинде сананып турганын канайып кӧргӱскен?

¹² Бистиҥ јобожыс «бис чилеп акту јӱректеҥ бӱдӱп турган улус» учун мӱргӱп турганыстаҥ база кӧрӱнет (2 Петр 1:1). Епафрас база анайып мӱргӱп туратан. Агару Бичикте элчи Павелдиҥ самараларында, ол керегинде јӱк ле ӱч катап айдылган. Павел Римде айылында каруулдадып турарда, ол Колоссыда јаткан христиандарга, Епафрас олор учун мӱргӱп турган деп бичиген (Кол. 4:12). Епафрас ака-эјелерди јакшы билер болгон ло олорго акту јӱрегинеҥ болушкан. Керек дезе, оны Павелле кожо кижендеп те саларда, ол ака-эјелердиҥ кӧгӱс керексиништерин ундыбайтан (Флм. 23, 24). Епафрас ӧскӧ улусты ундыбай турарыныҥ сӱрекей јакшы темин кӧргӱскен! Бистиҥ де ака-эјелер учун, анчада ла олордыҥ ады-јолын адап мӱргӱгенис јаан ийделӱ болот (2 Кор. 1:11; Иак. 5:16).

13. Слер Епафрастаҥ мӱргӱӱлдер јанынаҥ кандый тем алар аргалу?

¹³ Слер кемниҥ адын адап мӱргӱӱр эдигер? Епафрастаҥ тем алып турган христиандар, кӱчтер ӧдӱп турган ака-эјелер учун мӱргӱп јат. Кезик ака-эјелерге кандый бир јеҥил эмес талдаш эдерге келижет, кемге де ченелтелерле тартыжарга келижет. Кӧбизис jw.org деген сайтта, «Страны,  где Свидетели Иеговы находятся в заключении за веру» деген јӧрмӧлдӧ бичилген улус керегинде мӱргӱп јат. (НОВОСТИ > ЮРИДИЧЕСКАЯ СИТУАЦИЯ.) Анайда ок јуук кижизин јылыйткан, јуу-согуштар ӧткӧн, ар-бӱткенниҥ тӱбегине табарткан эмезе акча-манатка јединбей турган ака-эјелер учун мӱргӱӱрин база ундыбай јадыс. Бистиҥ мӱргӱӱлдерис кӧп ака-эјелерге керектӱ болот. Олор учун мӱргӱгенисле «кажыгар ла бойындыйын эмес, је кажыгар ла ӧскӧ дӧ улустыйын сананзын» деген сӧстӧрди бӱдӱрип турганысты кӧргӱзип јадыбыс (Флп. 2:4). Иегова мындый мӱргӱӱлдерди угуп јат.

14. Улусты угары јанынаҥ Иегова биске кандый тем кӧргӱзет?

¹⁴ Јобош болгонысты кӧргӱзетен база бир арга — улусты лаптап угары. Иаков 1:19-та мынайып айдылат: «Кандый ла кижи угарга јылгыр болзын». Иегова бу јанынаҥ биске сӱрекей јакшы тем кӧргӱзет (Баш. 18:32; Иис. Н. 10:14). Чыгыш 32:11—14-тӧ (кычырыгар *) бичилген учуралдаҥ бис неге ӱренип алар аргалу? Иегова Моисейле јӧптӧжӧр учурлу болбогон до болзо, ол ого бойыныҥ санаа-шӱӱлтезин айдар арга берген. Слер Иегованыҥ ордына болгон болзоор, јастыра сананып турган кижини угуп, оныҥ айтканы аайынча эдер бедигер? Јок болбой. А Иегова ого бӱдӱп турган улустыҥ мӱргӱӱлин чыдамкай болуп угат.

15. Бис Иегованаҥ тем алып, улуска канайып тоомјылу баштанар эдис?

¹⁵ Кажыбыска ла бойыстаҥ сураар керек: «Иегова, темдектезе, Авраамды, Рахильди, Моисейди, Иисус Навинди, Манойды, Ильяны ла Езекияны јобош болуп уккан болзо, мен де ака-эјелеримге тоомјылу  баштанып, керек дезе олордыҥ ойгор шӱӱлтелерин угар учурлу эмес бедим? Мен тӧрӧӧндӧримниҥ эмезе јуундагы ака-эјелеримниҥ кемизине кӧптӧдӧ ајару эдер эдим? Олорго неле болужар эдим?» (Баш. 30:6; Јарг. 13:9; 1 Каан. 17:22; 2 Лет. 30:20).

16. Шимейле болгон учуралда Давид бойын канайып тудунган?

¹⁶ Анайда ок јобош болгоныс, бисти кем-кем ачындырып турза, биске бойысты тудунып билерге болужат (Еф. 4:2). Бир сӱреен јакшы тем кӧрӱп ийектер. (2 Самуил 16:5—13 кычырыгар *.) Саул каанныҥ тӧрӧӧни, Шимей деген кижи, Давидти ле оныҥ ишчилерин јамандап, ташла шыбалаган. Је Давид оныҥ аайы-бажына чыгып ийер аргалу да болгон болзо, ого каршу этпеген. Давидке бойын тудунарга не болушкан? Каруузын 3-чи Сарыннаҥ таап аларга јараар.

17. Давидке бойын тудунарга не болушкан? Бис оноҥ кандый тем алар аргалу?

¹⁷ 3-чи Сарынга бичилген адакы сӧстӧрди кӧрзӧ, Давид бу сарынды «Авессалом уулынаҥ качып бараткан» ӧйдӧ бичиген. Бу сарынныҥ баштапкы эки ӱлгери Самуилдиҥ экинчи бичигиниҥ 16-чы бажалыгына келижип јат. А Сарын 3:4-тӧ Давидтиҥ Иеговага алаҥзу јогынаҥ иженип турганы кӧрӱнет: «Тыҥ кыйгырып, Иеговага мӱргӱрим. Ол меге агару туузынаҥ каруу берер». Оныҥ учун бис те тӧгӱн јерге буруладып турзаас, Кудайга мӱргӱӱр аргалу. Ол тушта Иегова биске кӱчтерди ӧдӱп чыгатан агару тынын берер. Оныҥ учун слерге кандый учуралдарда кижиниҥ јаманын таштаарга ла бойыгарды тудунарга келижер болор деп сананып кӧрӱгер. Иегова слердиҥ кӱчтереерди кӧрӱп турган ла слерге болужар деп бӱдӱп турганаар ба?

18. Кудайдыҥ сӧзин бӱдӱрип јӱрзеес, бис кандый алкыштар аларыс?

¹⁸ Бис Кудайдыҥ айтканы аайынча јӱрзеес, арбынду алкыштар аларыс. Оныҥ да учун Укаа сӧстӧр 4:7-де: «Эҥ керектӱзи — ойгор болоры» — деп айдылат. Ойгор болорго, јаҥыс билгирлерле болорзынбас керек. Бистиҥ ойгорыс эткен тӱп-шӱӱлтелеристеҥ кӧрӱнет. Агару Бичикле болзо, чымалыларга да ойгор берилген: олор курсагын јайгы ӧйдӧ јууп алат (Укаа 30:24, 25). Христос, «Кудайдыҥ ойгорлыгы», јаантайын Адазын сӱӱндирген (1 Кор. 1:24; Иоанн 8:29). Бистерге јаҥыс ла чын тӱп-шӱӱлтелер эдер керек эмес, је шӱӱп алганысла јӱрер керек. Јобош болгон ло Кудайдыҥ јакарузыла јӱрӱп турган ишчилерге Иегованыҥ алкыжы једет. (Матфей 7:21—23 кычырыгар.) Айдарда, јуундагы кажы ла кижиге мындый кылык-јаҥду болорго јеҥил болзын деп, јобош болуп јӱректер. Је Кудайдыҥ сӧзин бӱдӱрип јӱрерге, јаантайын јеҥил болбой јат, бого ӧй лӧ чыдажыш керек. Андый да болзо, анайып бис јобош болгонысты кӧргӱзерис ле ӱргӱлјиге ырысту болорыс.