1. Иегованыҥ ишчилери нениҥ учун ырысту улус? (Јӧрмӧлдиҥ бажындагы јурукты кӧрӱгер.)

ИЕГОВАНЫҤ КЕРЕЧИЛЕРИ — ырысту улус. Олор јуунныҥ туштажуларында, курултайларда эмезе најыларыла тушташкан ӧйдӧ јаантайын сӱӱнип, каткырыжып куучындажып јат. Олор нениҥ учун андый ырысту? Нениҥ учун дезе, озо ло баштап олор «алкышту [ырысту, ЈТ] Кудайды» Иегованы билер ле ого иштеп, оноҥ тем аларга албаданат (1 Тим. 1:11; Сар. 16:11). Иегова — ырысту Кудай, оныҥ учун бисти база ырысту болзын деп кӱӱнзейт. Мынаҥ улам бисте сӱӱнетен кӧп шылтактар бар (Јаҥ. т. 12:7; Јарл. 3:12, 13).

2, 3. а) Ырыс ол не? б) Ырысту болорго кезикте недеҥ улам кӱч болот?

² А слер керегинде нени айдарга јараар? Слер бойоорды ырысту кижи деп бодойдоор бо? Ырысту кижи јӱрӱминеҥ јаантайын сӱӱнчи ле токунал алып,  јакшызынып јӱрет. Агару Бичикле болзо, кижи јӱк Кудайдыҥ алкыжын алза, чыннаҥ ырысту болор аргалу. Је бӱгӱнги кӱнде ырысту болуп артарга јеҥил эмес болордоҥ айабас. Нениҥ учун?

³ Нениҥ учун дезе бистиҥ јӱрӱмисте уур-кӱчтер болордоҥ айабас: јуугыстыҥ божогоны, эш-нӧкӧриле айрылышканы, иш јок артканы. Анайда ок бистиҥ јуугысты эмезе најыбысты јууннаҥ чыгарып салза эмезе билегисте кӱчтер болуп турза, ырысту болуп артарга кӱч болот. Кӱчтердиҥ тоозына мындый да немелер кирет: кожо ӱренип турган балдардыҥ эмезе иштеп турган улустыҥ каткырышканы, истежӱлер эмезе Кудайга бӱткени учун тӱрмелеткени, су-кадыктыҥ уйадаганы, јазылбас оорула эмезе депрессияла ооруганы. Је Агару Бичикте «алкышту [ырысту, ЈТ] ла сок јаҥыс Башчы» деп адалган Иисус Христос бистерди токунадарга ла ырысту эдерге кӱӱнзейт деп ундыбагар (1 Тим. 6:15; Матф. 11:28—30). Иисус Кырдагы куучынында Сатананыҥ телекейинде јатканыстаҥ улам болуп турган кӱчтерде канайып ырысту артары керегинде куучындаган.

4, 5. Јаантайын ырысту болорго нени эдер керек?

⁴ Иисус Кырдагы куучыныныҥ бажында, ырыс озо ло баштап недеҥ камаанду деп кӧргӱзерге: «Кудайды керектегендер кежиктӱ: Теҥери Каандыгы — олордыйы» — деп айткан (Матф. 5:3, ЈК 2003). Мындый керексинижисти оҥдоп турган болзоос, бис кӧгӱс јанынаҥ јакшы ажанарыс, кӧгӱс байлыкты баалаарыс ла Иеговага иштеерин баштапкы јерге тургузарыс. Јӱк ле ол тушта бис чыннаҥ ырысту болорыс ла Кудай сӧзин удабас бӱдӱрер деп бӱдӱп турганысты тыҥыдарыс. Анайда ок Кудайдыҥ Сӧзи берип турган «кежиктӱ ижемји» биске ийде-кӱч берер (Тит. 2:13).

⁵ Бистиҥ ырызыс јӱк ле Кудайла колбуларысты тыҥытканыстаҥ камаанду. Элчи Павел мынайып бичиген: «Кайраканныҥ [Иегованыҥ] Бойында јаантайын сӱӱнигер, база айдадым: сӱӱнигер!» (Флп. 4:4). Бис Иеговага јууктаарга турган болзоос, биске Кудайдыҥ ойгоры керек. Агару Бичикте мындый сӧстӧр бар: «Ойгорды тапкан ла ӧткӱн болорына ӱренип алган кижи ырысту... Ойгор — јӱрӱмниҥ агажы болот. Бу ойгордоҥ бек тудунган улусты ырысту деп айдыжар» (Укаа 3:13, 18).

6. Чын ырыс недеҥ камаанду?

⁶ Је јаантайын ырысту болорго, Кудайдыҥ Сӧзин јӱк ле кычырар керек эмес, је ондо бичилгени аайынча јӱрер керек. Иисус бу шӱӱлтени аҥылаарга: «Слер мыны билип, эдип турган болзогор, кежиктӱ болгоныгар ол» — деп айткан (Иоанн  13:17; Иаков 1:25 кычырыгар). Мынаҥ ӧскӧ кӧгӱс керексиништерди јеткилдейтен ле чыннаҥ ырысту болотон арга јок. Је ижемји јок телекейде ырысту болуп канайып артар? Иисустыҥ Кырдагы куучынында база нени айтканын шӱӱп сананып ийектер.

7. Ачу-коронго бастырткандар нениҥ учун ырысту болор аргалу?

⁷ «Ыйлап јӱргендер [ачу-коронго бастырткандар] кежиктӱ: олорго коот болор» (Матф. 5:4). Је ачу-коронго бастырткандарды ырысту деп канайып айдатан? Иисус ончо ыйлап јӱргендерди айтпаган. Не дезе, бӱгӱнги «уур-кӱч ӧйлӧрдиҥ» кӱчтерине бастыртып, калју да улус тыҥ санааркап јат (2 Тим. 3:1). Је андый улустыҥ санааркаштары олорды Иеговала јууктатпай јат, не дезе, олор јаҥыс бойын сананып санааркайт, оныҥ учун олор ырысту эмес. Иисус бойыныҥ кӧгӱс керексиништерин оҥдоп, телекейдеги кӧгӱс јанынаҥ коомой айалганы кӧрӱп, кородоп турган улусты «ыйлап јӱргендер» деп айткан. Андый улус кинчектӱ болгонын оҥдоп јат ла кижиниҥ толо кемдӱ эмес болгоны коркышту коомой айалгага экелип турганын кӧрӱп јат. Ачык јӱректӱ андый улус Иегованыҥ кӧзинеҥ туура калбай јат. Ол олорды бойыныҥ Сӧзиле токунадып, ырысту болорго ло ӱргӱлји јӱрӱмге ижемјилӱ болорго болужат. (Иезекииль 5:11 *; Иезекииль 9:4 кычырыгар *.)

8. Јобош болорыныҥ ла ырысту болорыныҥ колбузы неде?

⁸ «Јобоштор кежиктӱ: олор јерди энчиленер» (Матф. 5:5). Јобош болорыныҥ ла ырысту болорыныҥ колбузы неде? Улус Агару Бичиктеҥ чындыкты билип алала, солынып јат. Темдектезе, качан да кату, казыр, кыйгас болгон улус, «јаҥы кижини кийип», «буурзашты, быйанзак, тӧп, јобош, узакка чыдамкай болорын кийимди чилеп кийип» алат (Кол. 3:9—12). Андый улустыҥ јӱреги амырла, сӱӱшле, сӱӱнчиле толуп калат. Анайда ок Кудайдыҥ Сӧзи олорды јерди энчиленер деп айдат (Сар. 37:8—10, 29).

9. а) Јобош улус јерди энчиленер дегенин канайып оҥдоор? б) «Чындыктаҥ аштап-суузап» јӱрген улус, нениҥ учун ырысту?

⁹ Христостыҥ майлаткан ӱренчиктери јерди энчиленер дегенин канайып оҥдоор? Олор јерле каандар ла абыстар болуп башкарар (Ачыл. 20:6). А миллиондор тоолу јерге јадатан ижемјилӱ улус, толо кемдӱ болуп, ӱргӱлјиге амыр ла ырысту јадар. Иисус бу улус керегинде: «Чындыктаҥ аштап-суузап јӱргендер кежиктӱ» — деп айткан (Матф. 5:6).  Олордыҥ чындыктаҥ аштап-суузап јӱргени келер јӱрӱмде бӱткӱлинче јеткилделип калар (2 Петр 3:13). Иегова јаманды јоголтып салза, акту улус јасак јогынаҥ улам база качан да шыралабас (Сар. 37:17).

10. Буурзак болоры дегени нени темдектейт?

¹⁰ «Буурзак улус кежиктӱ, нениҥ учун дезе олорго буурзаш једер» (Матф. 5:7, ЈТ). «Буурзак» деп кӧчӱрилип турган сӧслӧ колбулу еврей глагол «јылу, эрке сезимдерлӱ болорын... килемкей болорын» темдектейт. Бу еврей глаголго учурыла келижип турган грек глагол килеп турарын кӧргӱзет. Је буурзак болоры јӱк ле эрке сезим эмес. Агару Бичикте айдылганыла, буурзак кижи улусты јӱк ле килеп турган эмес, је олорго болужарга албаданып јат.

11. Јалакай самар кижи керегинде укаа сӧстӧҥ бис неге ӱренедис?

¹¹ Лука 10:30—37 кычырыгар. Иудей кижиге болушкан јалакай самар кижи керегинде Иисустыҥ укаа сӧзи бисти буурзак болорына ӱредет. Бу укаа сӧсти Иисус: «Бар, сен де анайда эдип јӱр» — деген сӧстӧрлӧ божоткон. Оныҥ учун бойыстаҥ сураарга јараар: «Мен анайып ла эдедим бе? Бу самар кижи чилеп улусты килейдим бе? Болуш керексип турган улуска, темдектезе јажы јаанап калган улуска, тул ӱй улуска эмезе ада-энези Иеговага иштебей турган балдарга кӧптӧдӧ болужар аргам бар ба? Кунугып калган улуска ајару эдип, олорды токунадар аргам бар ба?» (1 Фес. 5:14; Иак. 1:27).

12. Буурзак улус нениҥ учун ырысту?

¹² Буурзак улус нениҥ учун ырысту? Нениҥ учун дезе улуска буурзап турзаас, јаан сӱӱнчи аладыс. Анайда ок бис анайып Иегованы сӱӱндиредис (Ап. ижи 20:35; Еврейлерге 13:16 кычырыгар). Давид каан улуска болужып турган кижи керегинде мындый сӧстӧр бичиген: «Иегова оны корулаар ла тирӱ артырар. Андый кижи јер ӱстинде ырысту деп адалар» (Сар. 41:1, 2). Бис улуска буурзап турзаас, Иегова да  биске буурзаар, мынаҥ бистиҥ ӱргӱлји ырызыс камаанду болот (Иак. 2:13).

13, 14. «Ару јӱректӱлер» нениҥ учун ырысту?

¹³ «Ару јӱректӱлер кежиктӱ: олор Кудайды кӧрӧр» (Матф. 5:8). Ару јӱректӱ улустыҥ кӱӱн-санаазы да ару. Оныҥ учун Иеговага иштееринде ару артарга турган болзоос, биске санааларысты ару тудар керек. (2 Коринфтегилерге 4:2 кычырыгар; 1 Тим. 1:5.)

¹⁴ Ару јӱректӱ улус Иегованыҥ јарадузын алат, анайда ок Иеговала јуук колбуларлу болгонынаҥ улам ырысту болот. Агару Бичикте мындый сӧстӧр бар: «Кийимин арутап турган улус кежиктӱ» (Ачыл. 22:14, ЈК 2003). Майлаткан христиандар кийимин арутап алган дегенин канайып оҥдоор? Бу дезе, Иегова олорды ару деп кӧрӱп, олорго качан да ӧлбӧйтӧн јӱрӱм берерин темдектейт. Олор теҥериде ӱргӱлјиге Кудайла кожо сӱӱнип иштеер. Јерде јадатан кара-бајырт албаты Кудайдыҥ кӧзинде база чындык болуп, оныҥ најылары болуп калар аргалу. Агару Бичикте: «Олор кийимин јунуп, Кураанныҥ каныла ак эткендер» — деп айдылат (Ачыл. 7:9, 13, 14).

15, 16. «Ару јӱректӱлер» Кудайды кӧрӱп јат дегенин канайып оҥдоор?

¹⁵ Је «бир де кижи... [Кудайды] кӧргӧндӧ, тирӱ артып болбос» болордо, «ару јӱректӱлер» оны канайып кӧрӧтӧн? (Чыг. 33:20). «Кӧрӧр» деп кӧчӱрилген грек сӧс «санаазыла кӧрӧрин, оҥдоп аларын эмезе билгирлер аларын» темдектеер аргалу. Кудайды «јӱректериниҥ кӧстӧриле» кӧрӱп турган улус оны јакшы билип, оныҥ кылык-јаҥын баалап јат (Еф. 1:18). Иисус чике Адазындый кылык-јаҥду болгонынаҥ улам мынайып айдар аргалу болгон: «Мени кӧргӧни, Аданы кӧргӧни ол» (Иоанн 14:7—9).

¹⁶ Анайда ок чындык Кудайдыҥ ишчилери оныҥ болужына ајарып турза, олор база Кудайды «кӧрӱп» јат (Иов 42:5). Олор, Иегованыҥ кӧзинде ару артып, ого чындык иштеерге албаданып турган улуска арбынду берилетен кайкамчылу алкыштарды шӱӱп сананып јат. Је майлаткан христиандар теҥеридеги кайралын алза, Кудайды чыннаҥ ла кӧрӧр (1 Иоанн 3:2).

17. Амыр јайап јӱргендерди нениҥ учун ырысту деп айдарга јараар?

¹⁷ «Амыр јайап јӱргендер кежиктӱ» (Матф. 5:9). Иисустыҥ сӧстӧриле болзо, амырды јайаарга албаданып турган кижи ырысту болот. Христостыҥ ӱренчиги Иаков: «Чындыктыҥ ӱрени энчӱ тужында, энчӱни чеберлеген улуста ӱренделет» — деп бичиген (Иак. 3:18). Јуунда эмезе биледе кемле де колбуларыс соок болзо, бис Иегованаҥ амыр јайаарга болушсын деп сураар аргалу. Ол  тушта Иегова биске агару тынын берер. Бу тын биске христиан кылык-јаҥду болорго болужып, ырысту эдер. Иисус јаражып аларга албаданарын аҥылаарга мындый сӧстӧр айткан: «Анайдарда, Кудайга берӱ берейин деп, тагылга келеле, карындажыҥ сеге комыдалду болгоны санааҥа киргежин, берейин дегениҥди тагылдыҥ јанына салып кой; барып, озо карындажыҥла јаражып ал, оноҥ келип, берейин дегениҥди бер» (Матф. 5:23, 24).

18, 19. Христиандарды истежип те турза, олор нениҥ учун сӱӱнет?

¹⁸ Иисус: «Мен учун улуска јаман айттырып, сӱрдӱрип, јабарладып бурулатсагар, кежиктӱ болгоныгар ол» — деп айтканын мынайып јартаган: «Сӱӱнигер, јыргагар: теҥеридеги кайралыгар улу! Анайып ок слердеҥ озо јӱрген јарлыкчылар да истеткен эди» — деп јартаган (Матф. 5:11, 12). Элчилерди камчылап, јарлабазын деп кезедип саларда, олор «сӱӱнгилеп, оток-кӱреедеҥ чыгып бардылар». Је олор нениҥ учун сӱӱнген? Кату каруузына тургузылганынаҥ улам эмес, је «Иисус Кайраканныҥ ады учун» базындырганына сӱӱнген (Ап. ижи 5:41).

¹⁹ Бӱгӱнги кӱнде Иегованыҥ ишчилери Иисустыҥ ады учун истедип турза, уур-кӱч ченелтелерге де туштаза, база сӱӱнчизин јылыйтпай јат. (Иаков 1:2—4 кычырыгар.) Бистер де, элчилер чилеп, уур-кӱчтердиҥ бойына сӱӱнбей јадыс, је ченелтелерде Кудайга чындык артсаас, Ол биске турумкай болорго болужар. Бир тем кӧрӱп ийектер. 1944 јылдыҥ куран айында тоталитарный режимде јаткан Хенрик Дорникти ле оныҥ аказын концентрационный лагерьдӧӧн аткарып ийген. Олорды истешкен улус јилбилӱ мындый сӧстӧр айткан: «Олордыҥ санаазын солып болбозыҥ. Кыйналганынаҥ олор сӱӱнчи алат». Дорник ака айдат: «Мен кыйналарга кӱӱнзебегем, је Иеговага чындык артарга ончо уур-кӱчтерди јалтанбай ӧдӱп чыкканым меге чыннаҥ ла сӱӱнчи экелип туратан. Иеговага тыҥ мӱргӱгенимнеҥ оныла колбуларым тыҥыган ла Кудай мениҥ чындык Болушчым деп бӱдӱмјиленгем».

20. Бис нениҥ учун «ырысту Кудайга» сӱӱнип иштейдис?

²⁰ Бисте «ырысту Кудайдыҥ», Иегованыҥ, јарадузы болзо, бис јаҥда отурган улуска да истедип турзаас, јууктарыска да јамандадып турзаас, су-кадыгыс уйадап та турза эмезе јажыс та јаанап калза, ырысту болор аргалу (1 Тим. 1:11). Анайда ок «тӧгӱндебес» Кудайдыҥ берген сӧзи биске база сӱӱнчи экелет (Тит. 1:2). Ол бойыныҥ сӧзин бӱдӱрип салза, болгон кӱчтерис ле ченелтелерис санаабыска да келбес. Иегованыҥ берер алкыштары бистиҥ сананганыстаҥ канча катапка артык болор. Ол тушта бис эҥ ле ырысту улус болорыс! Кудайдыҥ чындык ишчилери «толо амыр-энчӱле јакшызынып јӱрер» (Сар. 37:11).