1, 2. а) Јиит христиандар Сатананы ла кӧрмӧстӧрди нениҥ учун јеҥип алар аргалу? (Јӧрмӧлдиҥ бажындагы јурукты кӧрӱгер.) б) Бис бу јӧрмӧлдӧ нени шӱӱп кӧрӧрис?

ЭЛЧИ Павел христиандарды Римниҥ јуучылдарына тӱҥдештирген. Бистиҥ туружып турган јуу-согуш кӧскӧ кӧрӱнбей јат, не дезе, бис ич-кӧгӱс јуу-согушта туружадыс. Андый да болзо, бисте чын ӧштӱлер бар. Сатана ла кӧрмӧстӧр — кӧп јылдарга јуулажып турган јаан ченемелдӱ јуучылдар. Оныҥ учун тууразынаҥ кӧрзӧ, бисте, анчада ла јииттерде, олорго удурлажар арга јок деп билдирер. Андый болзо, јииттер јаан кӱчтӱ кӧскӧ кӧрӱнбес калју тындарды јеҥип болор бо? Эйе! Нениҥ учун дезе Иегова олорго ийде-кӱч берет. Анайда ок олор, јакшы таскадылган јуучылдар чылап, «Кудайдыҥ берген јуулажатан јепселдерин» кийип алат. (Ефестегилерге 6:10—12 кычырыгар.)

² Павел бу темди куучындап тура, Римниҥ јуучылдарыныҥ јепселдери керегинде айткан болор  (Ап. ижи 28:16). Бис бу темниҥ болужыла јииттерге кӧгӱс јепселдерди кийип јӱрерге нениҥ учун кӱч болот ло бу јепселдер олорго канайып болужып турганын билип аларыс.

3, 4. Кудайдыҥ Сӧзиндеги чындыкты нениҥ учун Римниҥ јуучылыныҥ курына тӱҥдештирерге јараар?

³ Ефестегилерге 6:14 кычырыгар. Римниҥ јуучылыныҥ белин корулап турган кур јалбак темирлерлӱ болгон. Бу курла јуучылдыҥ јарындарына уур болбозын деп «кӧӧ-куйакты» курчап салатан. Кезикте курда кылыш ла узун бычак илетен јазал болотон. Јуучыл курды тыҥ курчанып алган болзо, јуулажып барарга белен болгон.

⁴ Анайып ла ок Кудайдыҥ Сӧзиндеги чындыктар бисти каршу экелгедий тӧгӱн ӱредӱлердеҥ корулап јат (Иоанн 8:31, 32; 1 Иоанн 4:1). Оныҥ учун курды канча ла кире тыҥ курчанзаас, «кӧӧ-куйакты» кийип јӱрерге ончо ло кире јеҥил болот, ӧскӧртӧ айтса, Кудайдыҥ чындыгын канча ла кире тыҥ сӱӱзеес, Кудайдыҥ чындык нормаларыла јӱрерге ончо ло кире јеҥил болот (Сар. 111:7, 8; 1 Иоанн 5:3). Анайда ок Кудайдыҥ Сӧзиндеги чындыктарды јарт оҥдоп турзаас, бӱдӱп турганыстаҥ јана баспазыс, керек дезе ӧштӱлерге каруу берерге белен болорыс (1 Петр 3:15).

5. Биске нениҥ учун јаантайын чынды айдар керек?

⁵ Бис, сӱрлеп айтса, Агару Бичиктиҥ чындыгыла курчанып алган болзоос, чындык аайынча јӱрерис ле јаантайын чынды айдарыс. Бис нениҥ учун тӧгӱндебеске кӱӱнзейдис? Нениҥ учун дезе тӧгӱн Сатананыҥ эҥ једимдӱ јепселдерине кирет. Ол тӧгӱнчиге де, тӧгӱнге бӱдӱп калган кижиге де каршу јетирет (Иоанн 8:44). Оныҥ учун бис толо кемдӱ эмес те болзоос, тӧгӱндебеске албаданып јадыс (Еф. 4:25). Кезикте тӧгӱндебеске јеҥил эмес болот. 18 јашту Абигейл айдат: «Кезикте кандый бир кӱчтердеҥ кыйарга болуп, чынды айтпай, тӧгӱндеп ийзеҥ торт болор ошкош». Је Абигейл качан да тӧгӱндебей јат. Нениҥ учун? «Тӧгӱндебей турганымнаҥ улам Иегованыҥ алдына ару уйатту артадым ла ада-энемниҥ ле најыларымныҥ меге бӱдӱп турганын кӧрӧдим» — деп, ол јартайт. 23 јашту Виктория: «Сен чынды айдып, бӱдӱп турганыҥ аайынча јӱрӱп турзаҥ, улус сеге каткырыжардаҥ айабас. Је андый да болзо, сен јаан туза аладыҥ: бойыҥа бӱдӱмјилӱ болуп каладыҥ, Иеговага јууктап јадыҥ ла сени сӱӱп турган улус сени тооп баштайт» — деп айдат. Айдарда, чындыктыҥ курын качан да уштыбай јӱреектер.

6, 7. Иегованыҥ чындык нормаларын нениҥ учун Римниҥ јуучылдарыныҥ кийген кӧӧ-куйагына тӱҥдештирерге јараар?

⁶ Баштапкы чакта Римниҥ јуучылдарыныҥ кийген кӧӧ-куйагыныҥ бӱдӱмдериниҥ бирӱзи бой-бойына тууразынаҥ кийдириштирип салган јалбак темирлердеҥ турган. Јуучылдыҥ кӧксин курчаган јалбак темирлер илмектердиҥ  ле кайыш буулардыҥ болужыла бириктирилген. Јуучылдыҥ јарындары кайыш курларла бириктирилген јалбак темирлерле бӧктӧлгӧн. Мындый јепселдеҥ улам јуучылга кыймыктанарга кӱч болгон ло јалбак темирлерди бириктире буулаган буулар чечилбезин деп, кӧрӱп турар керек болгон. Је мындый јепселдер јуучылдыҥ јӱрегин ле ӧскӧ дӧ органдарын согоонноҥ ла кылыштаҥ корулаган.

⁷ Бу тем Иегованыҥ чындык нормалары бистиҥ кӧгӱс јӱрегисти корулап турганын сӱреен јакшы кӧргӱзет (Укаа 4:23). Јуучыл темир јепселдерин бортык темирдеҥ эдилген јепселдерге качан да солыбас эди. Анайып ла бис Кудайдыҥ чындык нормаларын бойыстыҥ нормаларысла солыбай јадыс. Нениҥ учун дезе бис толо кемдӱ эмезистеҥ улам јӱрегисти корулап болбозыс (Укаа 3:5, 6). Оныҥ учун Иегованаҥ берилген сӱрлеп айдылган јепселдер јӱрегисти корулап турган ба деп, јаантайын кӧрӧр керек.

8. Бис нениҥ учун Иегованыҥ нормаларыла јӱрер учурлу?

⁸ Кезикте сеге Иегованыҥ чындык нормаларыла јӱрерге ӧйинеҥ ӧткӱре кӱч ле бу нормалар сениҥ јайымыҥды айрыйт деп, билдирип турган болор. 21 јашту Дэниел айдат: «Ӱредӱчилер ле кожо ӱренип турган балдар, библиялык нормаларла јӱрӱп турганым учун, меге каткырыжып туратан. Мынаҥ улам мен кунугып баштагам». Бу ӧйдӧ ого не болушкан? Ол айдат: «Мениҥ „најыларымныҥ“ кезиги наркомандар болуп калган, кезиги школды таштап ийген. Олордыҥ јаман јӱрӱмин кӧрӱп, ичим ачыган. Анайып мен Иегованыҥ нормалары тузалу деп оҥдоп ийгем. Иегова чыннаҥ ла бисти корулап јат». 15 јашту Мадисон куучындаган: «Меге Иегованыҥ нормаларыла јӱрерге ле балдарга јарап турган керектер этпеске кӱч. Бу меге јаан ченелте». Ого не болужат? Мадисон айдат: «Мен Иегованыҥ адын аданып тургам деп ле ченелтени — Сатананыҥ согоондоры деп ундыбай јӱредим. Ченелтени ӧдӧ берзем, бойымга бӱдӱмјим там тыҥыйт».

9—11. а) Христиандар сӱрлеп айдылган кандый ӧдӱкти кийип алар учурлу? б) Сӱӱнчилӱ јарды коркыбай јарлаарга, нени эдер керек?

⁹ Ефестегилерге 6:15 кычырыгар. Римниҥ јуучылы ӧдӱк кийбеген болзо, јуулажарга белен эмес болгон. Оныҥ ӧдӱгиниҥ таманы ӱч кат теренеҥ кӧктӧлӧтӧн. Мындый кату таманду ӧдӱк узакка јыртылбас ла эптӱ болгон.

¹⁰ Сӱрлеп айдылган ӧдӱк христиандарга амыр керегинде јарлаарга болужат (Иса. 52:7; Рим. 10:15). Је јарлайтан арга боло берзе, чындыкты улуска куучындаарга јалтанбас болор керек. 20 јашту Бо айдат: «Мен алдында кожо ӱренип турган балдарга јарлаарга коркып туратам. Сананзам, куучындаарга уйалган болбойым. Је эмди меге Кудай керегинде јажыт балдарла куучындажарга јарап јат. Уйалар ла неме јок болгон эмтир».

 ¹¹ Кӧп саба јиит христиандардыҥ айтканыла болзо, улуска сӱӱнчилӱ јарды куучындаарга озодоҥ јакшы белетенип турза, јарлаарга коркымчылу болбой јат. Јарлаарга белен болорго сеге не болужар? 16 јашту Джулия айдат: «Мениҥ сумкамда бистиҥ бичиктердеҥ бир-бирӱзи јаантайын болот. Анайда ок кожо ӱренип турган балдардыҥ куучынын ла неге бӱдӱп турганын лаптап угуп, олорго канайып болужарын сананадым. Белетенип алзам, олорго јарагадый теманы куучындаар арга болот». 23 јашту Макензи куучындайт: «Сен бойыҥла јажыт јииттерге јакшы баштанып, олорды угарга белен болзоҥ, олордыҥ јӱрӱминде не болуп турганын билип аларыҥ. Мен бистиҥ организация јииттерге чыгарып турган материалдардыҥ ончозын кычырарга албаданадым. Мынаҥ улам меге бойымла јажыт јииттерге тузалу болгодый библиялык ӱлгер эмезе бистиҥ интернет-материалдар кӧргӱзип берер арга ачылат». Бу сыйындардыҥ сӧстӧрин кӧрзӧ,  јарлаарга канча ла кире јакшы белетенип турзаҥ, сӱрлеп айдылган ӧдӱк бутка анча ла кире эптӱ болор.

12, 13. Сатана кызыган кандый согоондор тузаланат?

¹² Ефестегилерге 6:16 кычырыгар. Римниҥ јуучылыныҥ куйагы тӧрт толукту болгон. Куйак оны јарындарынаҥ ала тизезине јетире бӧктӧп, ӧштӱниҥ согоондорынаҥ ла кылыжынаҥ корулаган.

¹³ Сатананыҥ «кызыган... согоондорыныҥ» бирӱзи — Иегова керегинде тӧгӱн. Темдектезе Кудай сени керектебей де јат, сӱӱбей де јат деген санаалар келет. Андый санаалар 19 јашту Ида сыйында болот. Ол айдат: «Иегова менеҥ ыраак, ол меге најы болорго кӱӱнзебей јат деп билдирет». Ида мындый сезимдериле канайып тартыжат? Оныҥ айтканыла: «Туштажулар мениҥ бӱдӱмјимди сӱрекей тыҥ тыҥыдат. Алдында мен јартамалдар бербей тегин ле отурар болгом. Мениҥ карууларым кемге де јилбилӱ эмес деп сананатам. Је эмди мен туштажуларга белетенип, эки-ӱч јартамал айдарга албаданадым. Меге мыны эдерге јеҥил эмес те болзо, јӱрегиме сӱӱнчи келет. Анайда ок јуунда ака-эјелер мениҥ кӱӱн-санаамды кӧдӱрип салат. Анайып, кажы ла туштажуныҥ кийнинеҥ Иегованыҥ сӱӱжин сезедим».

14. Иданыҥ теминеҥ бис нени билип алдыс?

¹⁴ Римниҥ черӱчилиниҥ куйагы јаандабай да јат, кичинектебей де јат. Је черӱчилдиҥ куйагына кӧрӧ, бистиҥ «бӱдеристиҥ куйагы» тыҥыыр ба эмезе уйадаар ба бистеҥ камаанду. Бу шӱӱлте Иданыҥ теминеҥ јарт кӧрӱнет (Матф. 14:31; 2 Фес. 1:3.) Оныҥ учун биске бӱдеристи тыҥыдар керек.

15, 16. Ижемјини нениҥ учун јуучыл бӧрӱкке тӱҥдештирерге јараар?

¹⁵ Ефестегилерге 6:17 кычырыгар. Римниҥ јуучылыныҥ бӧрӱги оныҥ бажын, мойнын ла јӱзин ӧштӱниҥ табаруларынаҥ корулаган. Јуучылга бӧрӱгин колына алып јӱрерге эптӱ болзын деп, кезик бӧрӱктер туткалу болгон.

¹⁶ Јуучылдыҥ бӧрӱги оныҥ бажын канайып корулаган, анайып ла бистиҥ «аргадаларыс деп... ижемји» санааларысты корулайт (1 Фес. 5:8; Укаа 3:21). Ижемји Кудайдыҥ берер болгонын ундыбай јӱрерге ле кӱчтерге чын кӧрӱмдӱ артарга болужат (Сар. 27:1, 14; Ап. ижи 24:15). Је «аргадаштыҥ јуучыл бӧрӱги» бисти корулазын деп, оны колыска тудунып јӱрбей, бажыска кийип алар керек.

17, 18. а) Сатана бисти «аргадаштыҥ јуучыл бӧрӱгин» уштып ийзин деп нени эдет? б) Сатананыҥ тӧгӱнине кирбей турганыс недеҥ кӧрӱнет?

¹⁷ Сатана бисти «аргадаштыҥ јуучыл бӧрӱгин» уштып ийзин деп нени эдет? Иисусла болгон учуралды сананып ийеектер. Сатана Иегованыҥ Иисуска бастыра јерле башкаратан јаҥ беретенин билер болгон. Је Иисуска бу јаҥды аларга, ол ӧйди сакыыр керек. Озо баштап Иисус кыйын-шыраны ӧдӱп, божоор учурлу болгон. Оныҥ учун  Сатана Иисуска јаҥды тӱрген алатан јеҥил арга берген: Иисус Сатанага бажырып ла ийзе, бастыра јерле башкарар јаҥды алып ийер эди (Лука 4:5—7). Бӱгӱнги кӱнде Сатана Иегованыҥ биске јаҥы јӱрӱмде алкыштар берерге турганын база билер. Је эм тургуза биске ол ӧйди сакып, чыдажар керек. Оныҥ учун Сатана бисти јакшы јӱрӱмди эмди ле алзын деп кӱӱнзейт. Ол бисти Каандык керегинде сананбай, озо баштап акча-јӧӧжӧни сананзын деп албаданат (Матф. 6:31—33).

¹⁸ 20 јашту Киана јиит христиандар чылап, бойын тӧгӱндетпей јат. Ол айдат: «Бистиҥ ончо уур-кӱчтеристиҥ аайына јӱк ле Кудайдыҥ Каандыгы чыгар». Мындый ижемји Киананыҥ санааларына ла керектерине кандый камаанын јетирет? Ол оноҥ ары айдат: «Райга иженгеним бу телекейде берилип турган аргаларга чын кӧрӱмдӱ болорго болужат. Бойымныҥ јайалтамла кӧп акча иштеерге эмезе карьера эдерге албаданбай јадым. Оныҥ ордына мен ӧйимди ле ийде-кӱчимди кӧгӱс амадуларыма тузаланадым».

19, 20. Кудайдыҥ Сӧзиле јакшы тузаланып билерге, нени эдер керек?

¹⁹ Римниҥ јуучылыныҥ јепселдериниҥ база бирӱзи — кылыш. Оныҥ узуны 50 сантиметр кире болгон. Јуучылдар бойыныҥ кылыжыла сӱрекей јакшы тузаланып билер болгон, не дезе, олор кажы ла кӱн тазыктырынган.

²⁰ Павел Кудайдыҥ Сӧзин кылышка тӱҥдештирген. Је биске бойыстыҥ бӱдӱмјисти корулаарга ла бойыстыҥ јастыра кӧрӱмисти тӱзедерге, оныла тузаланарга ӱренер керек (2 Кор. 10:4, 5; 2 Тим. 2:15). Бу «тынныҥ кылыжыла» јакшы тузаланып билерге, нени эдер керек? 21 јашту Себастиан айдат: «Агару Бичик кычырып јатсам, кажы ла бажалыктаҥ бир ӱлгерди чыгара бичип аладым. Анайып меге јарап турган ӱлгерлер јуулат ла мен Иегованыҥ кӧрӱмин оноҥ јакшы оҥдойдым». Ӧрӧги айдылган Дэниел мынайып айдат: «Агару Бичикти кычырып тура, јарлаар ишке тузалангадый ӱлгерлерди темдектеп аладым. Улус сениҥ Агару Бичик керегинде кӧдӱриҥилӱ куучындаганыҥды ла улуска болужарга турганыҥды кӧрӱп, јарды јакшы угат деп ајаруга алдым».

21. Биске Сатананаҥ ла кӧрмӧстӧрдӧҥ нениҥ учун коркыбас керек?

²¹ Бу јӧрмӧлдӧ бичилген јииттердиҥ сӧстӧринеҥ, биске Сатананаҥ ла кӧрмӧстӧрдӧҥ коркыбас керек деп кӧрӱнет. Бу ӧштӱлер калју да болзо, олорды јеҥип аларга јараар. Анайда ок олор ӱргӱлјиге јӱрбес. Удабас Христостыҥ бир муҥ јылга башкарар ӧйи башталза, олор кынјыладып, улуска салтарын јетирип болбос. Олор бир муҥ јылдыҥ учында јоголтылып калар (Ачыл. 20:1—3, 7—10). Бис бойыстыҥ ӧштӱбисти, оныҥ умзаныштарын ла амадуларын јакшы билерис. Бу јуу-согушты јеҥип аларга Иегова биске кыйалта јогынаҥ болужар!