1. Иегова Эдемде болгон тӱймеенниҥ кийнинеҥ бистиҥ ӧштӱ керегинде нени ачкан?

БАШТАПКЫ кижи Адам јыландар куучынданбай турган деп јакшы билген. Ол оныҥ учун Евала кӧскӧ кӧрӱнбес кандый да тын куучындашкан деп, оҥдоп ийген болор (Баш. 3:1—6). Бу тын керегинде Адам да, Ева да нени де билбес болгон. Је Адам биле тура таныш эмес тӱймеечиге биригип, теҥеридеги сӱӱштӱ Адазынаҥ туура барган (1 Тим. 2:14). Иегова тургуза ла Адам ла Еваны тӧгӱндеп салган ӧштӱ керегинде кӧптӧдӧ ачып баштаган. Кудай бу ӧштӱ учы-учында јоголтылар деп сӧзин берген. Је јылан ажыра куучынданган кӧскӧ кӧрӱнбес јайаан кандый да ӧйдиҥ туркунына Кудайды сӱӱп турган улуска удурлажу эдер деп, Иегова озодоҥ айдып салган (Баш. 3:15).

2, 3. Сатана керегинде јетирӱ Мессия келер алдында нениҥ учун ас болгон?

² Иегова — ойгор Кудай, оныҥ учун тӱймеен кӧдӱрген ангелдиҥ адын биске ачпаган *. Је оныҥ эткен  керегинеҥ улам алган Сатана («удурлажаачы») деген адын, Иегова Эдемде болгон тӱймеенниҥ кийнинеҥ јӱк ле 2500 јыл ӧдӧ берерде ачкан (Иов 1:6). Бу ат Еврей Бичимелдердиҥ јӱк ле ӱч бичигинде айдылган: 1 Летописьте, Иовто ло Захарияда. Улус бу ӧштӱ керегинде Мессия келер алдында нениҥ учун коркышту ас билген?

³ Иегова Сатана ла оныҥ керектери керегинде Еврей Бичимелдерде кӧп јетирӱ айтпаган. Агару Бичиктиҥ бу бӧлӱги озо ло баштап Кудайдыҥ ишчилери Мессияны танып, ого бӱтсин деп бичилген (Лука 24:44; Гал. 3:24). Мессия келген кийнинде, Иегова ол ажыра ла оныҥ элчилери ажыра Сатана ла ого бириккен ангелдер керегинде јетирӱни кӧптӧдӧ ачкан *. Мынайып эткени чын, нениҥ учун дезе Иегова Сатананы ла оныҥ болушчыларын јоголтор јакаруны шак Иисуска ла оныла кожо башкаратан майлаткандарга берген (Рим. 16:20; Ачыл. 17:14; 20:10).

4. Биске нениҥ учун Дьяволдоҥ коркыбас керек?

⁴ Элчи Петр Сатана Дьяволды «ыркыранган каракула» деп адаган, элчи Иоанн «јелбеген» ле «јылан» деп адаган (1 Петр 5:8; Ачыл. 12:9). Је биске Дьяволдоҥ коркыбас керек, не дезе, оныҥ ийде-кӱчи Кудайдыйынаҥ ас. (Иаков 4:7 кычырыгар.) Иегова ла Иисус, анайда ок Кудайдыҥ чындык ангелдери биске болужарга јаантайын белен. Бис олордыҥ болужыла ӧштӱге удура турар аргалу. Андый да болзо, ӱч јаан учурлу сурактыҥ каруузын билип алар керек: Сатананыҥ салтары канча кире јаан? Сатана улуска салтарын јетирерге нени эдет? Ол нени эдип болбос? Бу сурактарды шӱӱжип тура, бистерге кандый ӱредӱ барын кӧрӱп ийеектер.

5, 6. Улустыҥ башкарузы нениҥ учун качан да эҥ керектӱзин берип болбос?

⁵ Сатананыҥ тӱймеенине кӧп ангелдер бириккен. Чайык болордоҥ озо, Сатана ол ангелдердиҥ кезигин јердеги ӱй улусла кожо уйуктаарга кӱӱнзеткен. Бу керегинде јетирӱ Агару Бичикте сӱрлеп айдылган. Ондо јерге тӱшкен јелбеген бойыныҥ кийнинеҥ «теҥеридеҥ јылдыстардыҥ ӱчинчи ӱлӱзин јалмай» алып барган деп бичилет (Баш. 6:1—4; Иуда 6; Ачыл. 12:3, 4). Бу ангелдер Кудайдыҥ билезинеҥ јӱре береле, Сатананыҥ колына кирген. Оныҥ учун олорды алдынаҥ бойы башкару јок јӱрген деп сананбас керек. Сатана Кудайдыҥ башкарузындый ок башкару тургузып, бойы каан болуп алган. Оныҥ кӧскӧ кӧрӱнбес башкарузы кӧрмӧстӧрдӧҥ турат. Ол олорго јаҥ берип, олорды телекейдиҥ башчылары эдип салган (Еф. 6:12).

⁶ Сатана бойыныҥ кӧскӧ кӧрӱнбес башкарузыла тузаланып, јердеги  башкаруларга салтарын јетирет. Ол Иисуска «орчылаҥныҥ ончо каандыктарын... кӧргӱзип», айткан: «Бастыра мыныҥ бажын билериҥ, оныҥ магын Сеге берейин. Мыныҥ ончозы меге берилген ине, кемге берейин дезем, берерим» (Лука 4:5, 6). Телекей Сатананыҥ колында да болзо, кӧп башкарулар улуска јакшыны эдет, олордыҥ кезиги мыны чын ла акту јӱректеҥ эдет. Је улустыҥ башкарузы качан да эҥ керектӱзин берип болбос (Сар. 146:3, 4; Ачыл. 12:12).

7. Сатана јаҥыс ла башкаруларды эмес, анайда ок тӧгӱн кудай јаҥды ла коммерцияны канайып тузаланат? (Јӧрмӧлдиҥ бажындагы јурукты кӧрӱгер.)

⁷ Сатана ла оныҥ кӧрмӧстӧри «бастыра телекейди» мекелеерге, јаҥыс ла башкаруларды эмес, анайда ок тӧгӱн кудай јаҥды ла коммерцияны база тузаланат (Ачыл. 12:9). Ол тӧгӱн кудай јаҥныҥ болужыла Иегова керегинде тӧгӱн ӱредӱ таркадып, кӧп улус Кудайдыҥ адын билбезин деп албаданат (Иер. 23:26, 27). Мынаҥ улам, Кудайга бажырып турган деп сананган ачык јӱректӱ улус, чынынча болзо, кӧрмӧстӧргӧ бажырат (1 Кор. 10:20; 2 Кор. 11:13—15). Анайда ок Сатана коммерцияныҥ болужыла улусты акча-јӧӧжӧлӱ болзо, ырысту болор деп тӧгӱндеп јат (Укаа 18:11). Мындый тӧгӱнге кирип калган улус Кудайга иштеердиҥ ордына бастыра јӱрӱмине акча-јӧӧжӧниҥ кулы болуп калат (Матф. 6:24). Олор Кудайды качан да сӱӱген болор, је акча-манатка тартылганы олордыҥ сӱӱжин туй базып койот (Матф. 13:22; 1 Иоанн 2:15, 16).

8, 9. а) Адам ла Евала, анайда ок ангелдерле болгон учуралдаҥ кандый ӱредӱ аларга јараар? б) Сатананыҥ салтары канча кире јаан деп, биске нениҥ учун билер керек?

⁸ Адам ла Евала, анайда ок тӱймеечи ангелдерле болгон учуралдаҥ јаан учурлу эки ӱредӱ аларга јараар. Баштапкы ӱредӱ, бис эмезе Иегованыҥ эмезе Сатананыҥ јолын талдаар аргалу, ӱчинчи јол јок (Матф. 7:13). Экинчи ӱредӱ, кижи Сатананыҥ јолын талдап алза, кӱӱнзегенин качан да толо албас. Адам ла Евага јакшыны ла јаманды талдаар арга берилген болгон, а кӧрмӧстӧргӧ улустыҥ башкаруларына канча да кире салтарын јетиретен арга берилген (Баш. 3:22). Сатананыҥ берип турганы качан да јакшыга экелбей јат (Иов 21:7—17; Гал. 6:7, 8).

⁹ Сатананыҥ салтары канча кире јаан деп, биске нениҥ учун билер керек? Мыны билип турганыс биске башкаруларга чын кӧрӱмдӱ болорго болужат ла бисти јарлаар ишке туружарга кӱӱнзедет. Иегова бистерди јаҥда отурган улусты тооп јӱрзин деп кӱӱнзейт (1 Петр 2:17). Анайда ок јадып турган орооныстыҥ јасактары Кудайдыҥ нормаларын буспай турган болзо, олорды бӱдӱрзин деп айдат (Рим. 13:1—4). Је бу ла ӧйдӧ бис политикага киришпес ле кандый бир партияны эмезе башчыны талдабас учурлу (Иоанн 17:15, 16; 18:36). Сатана улусты Кудайдыҥ  адын билбезин деп албаданып, оны јамандап јат. Мыны билгенис бисти Кудай керегинде чындыкты улуска куучындаарга оноҥ тыҥ кӱӱнзедет. Бис Кудайдыҥ адын билип турганысла, анайда ок оныҥ адын аданып турганысла оморкоп јадыс. Кудайды сӱӱгени акча-јӧӧжӧни сӱӱгенинеҥ канча катапка артык (Иса. 43:10; 1 Тим. 6:6—10).

10—12. а) Сатана кӧп ангелдерди кӱрчекке илип аларга нени эткен? б) Ангелдерле болгон учурал бисти неге ӱредет?

¹⁰ Сатана улуска салтарын канайып јетиретенин сӱреен јакшы билер. Ол улусты кӱрчекке илинип калзын деп, кандый ла аргалар тузаланат. Анайда ок улусты бактырып аларга, олорды коркыдарга албаданат.

¹¹ Сатананыҥ кӱрчегине кӧп ангелдер илинип калган. Ол, ангелдерди бойыныҥ јанына тартып аларга, олорды узак ӧйгӧ шиҥдеген. Олордыҥ кезиги Сатананыҥ кӱрчегине илинип, ӱй улусла кожо уйуктаган. Анайып, олордоҥ улусты базынып туратан калју балдар — алып-кезерлер чыккан (Баш. 6:1—4). Сатана ангелдерди јаҥыс ла ӱй улусла уйуктаарыла эмес, је улусла башкаратан јаҥ берериле јилбиркеткен. Анайып Сатана «ӱй кижиниҥ» калдыгы керегинде судур бӱтпезин деп албаданган болор (Баш. 3:15). Је Иегова јердиҥ ӱстине Чайык эдерде, Сатана ла оныҥ кӧрмӧстӧриниҥ умзаныжы бӱтпей калган.

¹² Бу учурал бисти неге ӱредет? Балыр кӱӱн ле улуркак болоры — Сатананыҥ једимдӱ јемдери (приманка) деп ундыбас керек. Сатананыҥ јанына јайылган ангелдер узак ӧйгӧ Кудайга иштеген. Је андый да болзо, олор јаман кӱӱнге алдырып ийген. Бис те Иеговага узак јылдарга иштеп турган болзоос, јӱрегисте јастыра кӱӱн болбос деп сананбас керек (1 Кор. 10:12). Оныҥ учун јӱрегисте  не барын јаантайын шиҥдеп, балыр санааларды бир де јууктатпай, улуркак ла бийиркек болорыла тартыжар керек (Гал. 5:26; Колоссыдагыларга 3:5 кычырыгар).

13. Сатана база кандый јемле једимдӱ тузаланат, биске бу кӱрчекке илинбеске нени эдер керек?

¹³ Сатананыҥ база бир једимдӱ јеми — оккультизмле јилбиркеери. Бу јилбӱни тыҥыдарга, Сатана тӧгӱн кудай јаҥнаҥ башка, јӱзӱн-јӱӱр соот-јыргалдар тузаланат. Кинолордо, электронный ойындарда, бичиктерде, телеберилтелерде спиритизмди јилбилӱ эдип кӧргӱзет. Мындый кӱрчекке илинбеске нени эдер керек? Кудайдыҥ организациязы јакшы ла јаман соот-јыргалдардыҥ тисмезин тургуспай јат. Оныҥ учун бистиҥ кажыбыска ла Кудайдыҥ нормаларыла јӱрерге, уйадысты ӱредер керек (Евр. 5:14). Ойгор талдаш эдерге, биске элчи Павелдиҥ: «Сӱӱжигер ару болзын» — деген јӧби болужар (Рим. 12:9). Бойыгардаҥ сурагар: «Талдап алган соот-јыргалым мени эки јӱстӱ деп кӧргӱзет пе? Менеҥ Агару Бичикле ӱредӱ алып турган кижи эмезе мениле Агару Бичик керегинде куучындажып турган кижи, нени кӧрӱп, кычырып турганымды билип ийзе, мен керегинде нени сананар эди? Олор мени јарлап турганым аайынча јӱрген кижи деп кӧрӧр эди бе?» Јарлап турганыс аайынча јӱрзеес, биске Сатананыҥ кӱрчегине илинбеске јеҥил болор (1 Иоанн 3:18).

14. Сатана бисти коркыдарга нени эдет, ого бакпаска биске не болужар?

¹⁴ Анайда ок Сатана бисти Иегованаҥ јана болзын деп, коркыдып ийерге албаданат. Темдектезе, башкарулар ажыра бистиҥ јарлаар ижисти токтодып салат. Анайда ок бисле кожо иштеп турган улус ажыра эмезе кожо ӱренип турган балдар ажыра бистиҥ библиялык ак-чек болорыныҥ принциптериле  јӱрӱп турганысты шоодып јат (1 Петр 4:4). Кезикте Сатана бистиҥ тӧрӧӧндӧрис те ажыра салтарын јетирет: олор биске јакшыны кӱӱнзеп, бисти јуунга барбазын деп токтодот (Матф. 10:36). Сатанага бакпаска биске не болужар? Баштапкызында, мындый коркыдышты кайкабас керек, не дезе, Сатана бисле јуулажып јат (Ачыл. 2:10; 12:17). Экинчизинде, биске Сатананыҥ кӧдӱрген блаашту сурагын ундыбас керек. Ол, улус Иеговага јӱк ле јеҥил болзо, бажырып јат, је кӱчтер боло берзе, Кудайдаҥ туура јӱре берер деп айткан (Иов 1:9—11; 2:4, 5). Ӱчинчизинде, биске Иегованаҥ јаантайын ийде-кӱч сураар керек. Ол слерди качан да таштабас деп ундыбагар (Евр. 13:5).

15. Сатана улусты кӱӱнзебей турган немени этсин деп албадап болор бо? Јартап беригер.

¹⁵ Сатана улусты кӱӱнзебей турган немени этсин деп албадап болбос (Иак. 1:14). Кӧп улус Сатананыҥ кӱӱнин бӱдӱрип турганын билбей де јат. Је чындыкты билип алза, кемниҥ кӱӱнин бӱдӱрерин кажы ла кижи бойы талдайт (Ап. ижи 3:17; 17:30). Кудайдыҥ табын бӱдӱрерге бек шӱӱп алзаас, Сатана бисти Иегованы артырып салзын деп албадап болбос (Иов 2:3; 27:5).

16, 17. а) Сатана ла кӧрмӧстӧр база нени эдип болбос? б) Биске нениҥ учун угуза мӱргӱӱрге коркыбас керек?

¹⁶ Сатана ла кӧрмӧстӧр база нени эдип болбос? Темдектезе, олор бистиҥ санаабыста ла јӱрегисте не барын билип ийер аргалу деп, Агару Бичикте кайда да айдылбай јат. Мындый арга јӱк Иегова ла Иисуста бар (1 Сам. 16:7; Марк 2:8). Је бис не-не керегинде айдып, эмезе угуза мӱргӱп турзаас, Дьявол ло кӧрмӧстӧр бистиҥ мӱргӱӱлисти угуп, биске буудактар тургузар деп коркыырыс па? Јок. Нениҥ учун? Не дезе Сатана бисти кӧрӱп турган ла дейле, бис чын керектер эдерге канайып коркыбай јадыс, анайып ла Дьявол бистиҥ угуза мӱргӱгенисти угуп ийер деп коркыбас керек. Агару Бичикте угуза мӱргӱген Кудайдыҥ ишчилериниҥ темдери ас эмес. Олордыҥ кемизи де мӱргӱӱлди Дьявол угуп ийер деп коркыбаган (1 Каан. 8:22, 23; Иоанн 11:41, 42; Ап. ижи 4:23, 24). Бистиҥ керектерис ле сӧстӧрис Иегованыҥ табы аайынча болзо, Дьявол биске јаан каршу јетирип болбос. (Сарын 34:7 кычырыгар *.)

¹⁷ Биске бойыстыҥ ӧштӱбисти јакшы билер керек, је ӧйинеҥ ӧткӱре оноҥ коркыбас керек. Иегованыҥ болужыла Сатананы, керек дезе толо кемдӱ эмес кижи де, јеҥип алар аргалу (1 Иоанн 2:14). Кӧрмӧскӧ удура турзаас, ол бистеҥ кача берер (Иак. 4:7; 1 Петр 5:9). Сатана анчада ла јииттерди истежип јат. Оныҥ кӱрчегине илинбеске, олорго не болужар? Бу сурак келер јӧрмӧлдӧ шӱӱжилер.