1. Элчи Павел еврей укту христиандарды нениҥ учун бой-бойыныҥ кӱӱнин оноҥ артык кӧдӱрзин деп кӱӱнзеткен?

БОЙ-БОЙЫСТЫҤ кӱӱнисти кӧдӱрерге, биске ончобыска албаданар керек. Нениҥ учун? Бу сурактыҥ каруузы элчи Павелдиҥ еврейлерге бичиген самарада бар. Ол мынайып бичиген: «Сӱӱрге ле јакшы керектер эдерге кӧкӱдижип, бой-бойыбыска ајарыҥкай бололы. Јуундарыстаҥ туура артпайлыктар, кезик улуста андый темигӱ бар. Оныҥ ордына Кайраканныҥ кӱни јууктап келеткенин кӧрӱп, бой-бойыбысты мынаҥ артык сергидектер» (Евр. 10:24, 25). Беш ле јыл ӧдӧ берерде Иерусалимде јаткан еврейлер «Кайраканныҥ [Иегованыҥ] кӱни» јууктап келеткенин ле Иисустыҥ јакарганы аайынча, каладаҥ чыгар керек деп оҥдоп ийген (Ап. ижи 2:19, 20; Лука 21:20—22). Иегованыҥ кӱни б. э. 70-чи јылында Римниҥ черӱзи Иерусалимди јуулап келерде келген.

2. Бой-бойыстыҥ кӱӱнисти кӧдӱрерге, нениҥ учун оноҥ артык албаданар керек?

 ² Бӱгӱнги кӱнде бис Иегованыҥ улу ла коркышту кӱниниҥ јууктап келеткенин база кӧрӧдис (Иоиль 2:11). Судурчы Софония: «Иегованыҥ улу кӱни јуук. Бу кӱн тӱрген јууктап келип јат» — деп айткан (Соф. 1:14). Бу сӧстӧр бӱгӱнги кӱнде јадып турган улустыҥ ончозына айдылат. Оныҥ учун Павелдиҥ: «Сӱӱрге ле јакшы керектер эдерге кӧкӱдижип, бой-бойыбыска ајарыҥкай бололы» — деп айткан сӧстӧрин биске угар керек (Евр. 10:24). Айдарда, кунуккан ака-эјелеристиҥ кӱӱнин кӧдӱрерге, олорго оноҥ артык ајару эдер керек.

3. Элчи Павел кӱӱн кӧдӱрери керегинде нени бичиген? (Јӧрмӧлдиҥ бажындагы јурукты кӧрӱгер.)

³ Укаа сӧстӧрдӧ 12:25-те мынайып айдылат: «Санааркаш јӱректи сыстадат, је јакшы сӧс јӱректи сӱӱндирет». Бу сӧстӧрлӧ кажы ла кижи јӧпсинер. Кезикте кажыбыска ла кӱӱнисти кӧдӱретен јакшы сӧстӧр угар кӱӱн келет. Павелдиҥ айтканыла, улустыҥ кӱӱнин кӧдӱретен молјулу да улус кӱӱн кӧдӱретен сӧстӧр угарга кӱӱнзейт. Римдеги христиандарга ол мындый сӧстӧр бичиген: «Агару Тыннаҥ алган јайалтаны берейин, слерди тыҥыдайын деп, слерди кӧрӱксеп јадым. Ӧскӧртӧ айтса, ортогордо болзом, бӱдӱп турганыс ажыра бой-бойыстаҥ кӧкӱдӱ аларыс, слер менеҥ, мен слердеҥ аларым» (Рим. 1:11, 12). Керек дезе улустыҥ кӱӱнин јаантайын кӧдӱрип турган Павелге де кезикте болуш керек болгон. (Римдегилерге 15:30—32 кычырыгар.)

4, 5. Биске кемниҥ кӱӱнин кӧдӱрер керек ле нениҥ учун?

⁴ Кудайдыҥ ижине бойын килебей иштенип тургандардыҥ ончозын мактаар керек. Олордыҥ тоозына, Кудайга иштеерге кӧп немезин артыргыскан пионерлер, миссионерлер, аймак кӧрӧӧчилер ле олордыҥ ӱйлери, Бет-Элдердиҥ ле кӧчӱрер офистердиҥ ишчилери кирет. Олордыҥ ончозына агару ишке кӧп туружарга, јӱрӱмин солыырга келишкен. Бу учун олорды не мактап ийбес? Је кандый бир айалганаҥ улам пионердиҥ ижин улалтар аргазы јок улусты база мактаар керек.

⁵ База кемниҥ кӱӱнин кӧдӱрер керек? Темдектезе, эш-нӧкӧри «Кайракандыйы болор учурлу» деген јакаруны угуп, биле тӧзӧбӧй турган ака-эјелердиҥ кӱӱнин кӧдӱрер керек (1 Кор. 7:39). Анайда ок ӱйлери эдип турган ижи учун ӧбӧӧндӧринеҥ мактулу сӧстӧр угарга кӱӱнзейт! (Укаа 31:28, 31). Кӱӱн кӧдӱрер сӧстӧр истежӱлерге эмезе ооруга табартып, је Кудайга чындык арткан улуска да керек болот (2 Фес. 1:3—5). Бу тоололгон чындык ишчилердиҥ ончозын Иегова ла Иисус токунадып јат. (2 Фессалоникадагыларга 2:16, 17 кычырыгар.)

6. Исаия 32:1, 2-ле болзо, аксагалдар кандый иш бӱдӱрет?

⁶ Исаия 32:1, 2-ни кычырыгар *. Эмдиги кӱч ӧйлӧрдӧ Иисус Христос кунугып тургандардыҥ кӱӱнин «јайзаҥдар»  ажыра, ӧскӧртӧ айтса, майлаткан акалар ла ӧскӧ койлорго кирип турган чындык аксагалдар ажыра кӧдӱрет. Аксагалдар ака-эјелерге бийиркенбей, карын олорго сӱӱнчи экелерге албаданат (2 Кор. 1:24).

7, 8. Аксагалдар јуунныҥ улузына канайып болужар аргалу?

⁷ Элчи Павел аксагалдарга сӱреен јакшы тем кӧргӱскен. Ол истежӱлерге табартып турган Фессалоникадагы ака-эјелерге мындый сӧстӧр бичиген: «Слерди анайда сӱӱп, слерге јаҥыс та Кудайдыҥ Сӱӱнчилӱ Јарын эмес, јӱрӱмисти де берерге белен болгоныс, нениҥ учун дезе биске кару болгоныгар» (1 Фес. 2:8).

⁸ Јӱк ле јылу сӧстӧр айтканы кезикте јаан туза экелбей јат, оныҥ учун Павел Эфестеги аксагалдарга мынайып айткан: «Арга-чыдал јок улусты јӧмӧӧр керек, Иисус Кайраканныҥ Бойыныҥ „Алып турганы эмес, берип турганы оноҥ артык кежиктӱ“ деген сӧзин ундыбас керек» (Ап. ижи 20:35). Павел јӱк ле сӧстӧр айдып, ака-эјелердиҥ кӱӱнин кӧдӱрип јӱрбеген, ол эткен керектериле «слерге болуп бойымды бойым кородып койорым» деп кӧргӱскен (2 Кор. 12:15). Айдарда, аксагалдар Павелдеҥ тем алып, ака-эјелердиҥ кӱӱнин јылу сӧстӧр айдып кӧдӱрер учурлу, је анайда ок олорды кичееп турганын керектериле кӧргӱзер учурлу (1 Кор. 14:3).

9. Аксагалдар кӱӱн кӧдӱретен јӧпти канайып берер аргалу?

⁹ Кезикте аксагалдар ака-эјелерге болужарга, јӧптӧр берет. Олордыҥ јӧби ака-эјелердиҥ кӱӱнин кӧдӱрип турза, јакшы. Оныҥ учун олорго Агару Бичиктеҥ кӱӱн кӧдӱретен јӧпти канайып берерине ӱренер керек. Аксагалдарга јакшы темди Иисус Христос кӧргӱскен. Ол тирилгениниҥ кийнинеҥ Кичӱ Азиядагы кезик јуундарга кату јӧп берген. Ол мыны канайып эткен? Эфестеги, Пергамдагы ла Фиатирдеги јуундарды тӱзедердеҥ озо, ол олорды акту јӱрегинеҥ мактаган (Ачыл. 2:1—5, 12, 13, 18, 19). Лаодикиядагы јуунга ол мынайып айткан: «Карузып турган улузымныҥ кинчектерин ачып, кезедедим. Анайдарда, кичееҥкей бол, кинчегиҥ алын» (Ачыл. 3:19). Оныҥ учун аксагалдар Иисустаҥ тем алар аргалу.

10. Бой-бойыбыстыҥ кӱӱнисти кӧдӱрерге, кажыбыс ла нени эдер аргалу?

¹⁰ Ака-эјелердиҥ кӱӱнин јаҥыс ла аксагалдар кӧдӱрер учурлу эмес. Павел бастыра христиандардаҥ «бӱдерине ӱредер ле угуп турган улуска јакшылык береечи сӧстӧр чыксын» деп айткан (Еф. 4:29). Кижиге не јанынаҥ болужып ийерге јараарын кажыбыс ла билип турар учурлу. Павел еврейлерге мындый самара бичиген: «Бош салынган колдорыгарды ла уйадай берген тизегерди тыҥыдыгар. Аксак бут бертинбезин, карын, јазылзын деп, будыгардыҥ алдында јолды тӱс эдигер» (Евр. 12:12, 13). Бис ончобыс, керек дезе балдар да, јакшы сӧстӧрлӧ бой-бойыбыстыҥ кӱӱнисти кӧдӱрер аргалу.

11. Депрессияла ооруган Мартага не болушкан?

¹¹ Депрессияла ооруган Марта * деп эје мынайып куучындайт: «Бир катап,  кӱӱнимди кем-кем кӧдӱрген болзо, деп мӱргӱгем. Ол ло кӱн јажы јаанап калган эјеге туштагам, ол эјениҥ мениҥ сезимдеримди оҥдоп, меге јалакай баштанганы сӱрекей керектӱ болгон. Кӧрӧр болзо, ол эједе мендий ле ок сезимдер качан да база болгон. Бу куучынныҥ кийнинде тыҥ јаҥысканзырабай баргам». Айткан сӧстӧри Мартага тузазын јетирген деп, ол эје билбеген де болор.

12, 13. Филиппыдагыларга 2:1—4-тӧги јӧпти бис канайып тузаланар аргалу?

¹² Павел Филиппыдагы јуунныҥ улузына кажызына ла мындый јӧп берген: «Анайдарда, слерде Христостыҥ Бойында кӧкӱдӱ бар болзо, сӱӱштеҥ токынал бар болзо, Агару Тынла бирлик бар болзо, быйанзыш ла буурзаш бар болзо, сӱӱнчимди толо эдигер: шӱӱлтегер јаҥыс, сӱӱжигер јаҥыс болзын, тыныгар јаҥыс, санаагар јаҥыс болзын. Сӧс блаажарга кӱӱнзеп эмезе бийиркеп, нени де этпегер, карын, бойыгар керегинде јобош сананып, ӧскӧ улусты бойыгардаҥ бийик деп бодогор. Кажыгар ла бойындыйын эмес, је кажыгар ла ӧскӧ дӧ улустыйын сананзын» (Флп. 2:1—4).

¹³ Оныҥ учун биске кажыбыска ла ака-эјелерге болужатан аргалар бедиреп турар керек. Бис олорды токунадып, кичееп, олорго буурзап, сӱӱжисти кӧргӱзер учурлу.

14. Иегованыҥ ишчилериҥ кӱӱнин не кӧдӱрер аргалу?

¹⁴ Алдында Агару Бичик ӱренген улузыстыҥ чындыкта бек турганын уксаас, бистиҥ кӱӱнис кӧдӱрилет. Андый ла сезимдер элчи Иоаннда база болгон. Ол: «Балдарым чындыкта базып јӱргендерин угарынаҥ јаан сӱӱнчи менде јок» —  деп бичиген (3 Иоанн 4). Агару Бичик ӱренген улус эмди кӧп јылдардыҥ туркунына Кудайга чындык иштеп јӱргенин, кезиги пионерлер де болуп калганын угарга сӱӱнчилӱ деп, кӧп пионерлер јӧпсинер. Оныҥ учун кунугып калган пионерге улуска эткен јакшызын эске алындырып ийзе, оныҥ кӱӱни кӧдӱрилип келер.

15. Кудайга чындык иштеп јӱрген улустыҥ кӱӱнин бис канайып кӧдӱрер аргалу?

¹⁵ Кӧп аймак кӧрӧӧчилердиҥ айтканыла болзо, јуундарга келген ӧйдӧ олорго ло олордыҥ ӱйлерине быйанын айдып бичиген јарчылардыҥ открыткалары кӱӱнин кӧдӱрет деп айдыжат. Анайда ок аксагалдарды, миссионерлерди, пионерлерди ле Бет-Элдиҥ ишчилерин Кудайга чындык иштеп јӱргени учун мактаганы, олордыҥ кӱӱнин кӧдӱрет.

16. Кижиниҥ кӱӱнин кӧдӱретен јеҥил кандый арга бар?

¹⁶ Бис куучынчы эмес болзоос, кемниҥ де кӱӱнин кӧдӱрип болбозыс деп сананбас керек. Нениҥ учун дезе улустыҥ кӱӱнин кӧдӱрерге кезикте јылу кӱлӱмзиренип ийерге јараар. Је кижи биске удура кӱлӱмзиренбезе, ол та недеҥ де улам кунугып калган болор. Оныҥ учун кижиге базып келеле, оныҥ айтканын јӱк укканыс та оныҥ кӱӱнин кӧдӱрердеҥ маат јок (Иак. 1:19).

17. Аймак кӧрӧӧчи тыҥ кунугып калган акага канайып болушкан?

¹⁷ Анри деген јиит ака, оныҥ јуук тӧрӧӧндӧри, анайда ок аксагал болгон адазы чындыкты артыргызып саларда, коркышту тыҥ кунуккан. Бу ӧйдӧ ого аймак кӧрӧӧчи болушкан. Ол  оны кафеге чай ичерге кычырып, ого ичинде не барын чыгара айдынатан арга берген. Бу куучынныҥ кийнинеҥ, ол Иеговага чындык артса, чындыктаҥ туура барган јууктарына кайра келерге болужар деп оҥдогон. Анайда ок 46 Сарынды, Софония 3:17-ни ле Марк 10:29, 30-ты кычырганы ого токунал берген.

18. а) Соломон каан неге ајару эткен? б) Элчи Павел христиандарга кандый јӧп берген?

¹⁸ Марта ла Анриниҥ учуралдарынаҥ бис нени билип алдыс? Ака-эјелерди токунадып, олордыҥ кӱӱнин кӧдӱретен арга, бистиҥ кажыбыста ла бар. Соломон каан мындый сӧстӧр бичиген: «Ӧйинде айдылган сӧс кандый јакшы! Јарык чырайлу кижи улустыҥ јӱрегин сӱӱндирет. Јакшы јетирӱ ӱйе-сӧӧкти тыҥыдат» (Укаа 15:23, 30). Кунугып калган кижиниҥ кӱӱнин кӧдӱрерге, бистиҥ бичиктердеҥ нени-нени кычырып берерге јараар. Павелдиҥ сӧстӧриле болзо, база бир токунал беретен арга — Каандык кожоҥдорды кожоҥдогоны. «Бой-бойыгарды ончо ойгорлыкла ӱредигер ле бӱдӱндиригер; јӱректеригерде Кайраканга алкыш-быйанду болуп, Ого сарындар, мак јаҥарлар, тыннаҥ берилген јаҥарлар айдыгар» — деп, Павел бичиген (Кол. 3:16; Ап. ижи 16:25).

19. Бой-бойыстыҥ кӱӱнисти нениҥ учун оноҥ тыҥ кӧдӱрер керек, бис бу јӧпти канайып бӱдӱрер аргалу?

¹⁹ Иегованыҥ кӱӱни јууктаган сайын бой-бойыстыҥ кӱӱнисти оноҥ тыҥ кӧдӱрер керек (Евр. 10:25). Айдарда, Павелдиҥ христиандарга берген јӧбин бӱдӱрип јӱреектер: «Эмди эдип турганыгар чылап, бой-бойыгарды кӧкӱдип, бой-бойыгарды тыҥыдыгар» (1 Фес. 5:11).