1. Ойгор ада-энелер балдарыныҥ чӧҥӱрилеринеҥ озо, неде бӱдӱмјиленип аларга кӱӱнзейт?

БЛОССОМ БРАНДТ деген эје 1934 јылда јаҥар айдыҥ 31-чи кӱнинде сууга чӧҥӱрилген. Ол чӧҥӱрилерге турганын ада-энезине канча айдыҥ туркунына айдып туратанын эске алат. Оныҥ ада-энези балазыныҥ чӧҥӱрилери јаан учурлу алтам деп оҥдоп турганына бӱдӱмјиленерге, оныла јаантайын куучындажып туратан. Бӱгӱнги де кӱнде ада-энелер балдары ойгор алтамдар этсин деп кӱӱнзейт. Балага јаан шылтак јогынаҥ: «Сеге чӧҥӱрилерге эрте» — деп айдып турза, оныҥ Кудайла колбулары ӱрелип калардаҥ айабас (Иак. 4:17). Је ойгор ада-энелер балдарыныҥ чӧҥӱрилеринеҥ озо, олор Христостыҥ јӱгин аларга белен бе деп, бӱдӱмјиленип аларга кӱӱнзейт.

2. а) Кезик аймак кӧрӧӧчилер нени ајаруга алат? б) Бу јӧрмӧлдӧ бис нени шӱӱп кӧрӧрис?

 ² Кезик аймак кӧрӧӧчилер јуундарда 20 јаш кирелӱ јииттердиҥ, христиан биледе де ӧскӧн болзо, сууга чӧҥӱрилбегенин ајаруга алат. Олордыҥ кӧбизи јуундарга да јӱрет, јарлап та јат. Анайда ок, олор бойлорын Иегованыҥ Керечизи де деп сананып јат, је кандый да шылтактаҥ улам Кудайга јӱрӱмин учурлап, сууга чӧҥӱрилерге меҥдебей јат. Шылтагы неде болот? Кезик учуралдарда чӧҥӱрилерге меҥдебезин деп, олорды ада-энези кӱӱнзедет. Бу јӧрмӧлдӧ андый ада-энелерге кандый тӧрт сурак амыр бербей турганын шӱӱп кӧрӧрис.

3. Блоссом эјениҥ ада-энези не керегинде санааркаган?

³ Баштапкы абзацта айдылган Блоссом эјениҥ ада-энези, олордыҥ кызы чӧҥӱрилериниҥ јаан учурын јетире оҥдоп турарга јажы јеткен бе деп, санааркап туратан. Олор анайып санааркаар јолду. Ада-энелерге балазы Иеговага јӱрӱмин учурлаарга белен бе деп билерге, нени эдер керек?

4. Матфей 28:19, 20-де бичилген Иисустыҥ јакарузы, ада-энелерге балдарын ӱредерге канайып болужат?

⁴ Матфей 28:19, 20 кычырыгар. Ӧткӧн јӧрмӧлдӧ, канча јаштуда сууга чӧҥӱрилер керек деп, Агару Бичикте айдылбай турганын кӧргӧнис. Је ада-энелерге «калыктарды ӱредигер [ӱренчиктерди белетегер, ЈТ]» деген сӧстӧрдиҥ учурын шӱӱп сананары тузалу болор. Матфей 28:19-тагы грек сӧстӧҥ кӧчӱрилген сӧстӧр, кижини ӱренчик болзын деп амадап ӱредерин темдектейт. Ӱренчик — ол Иисус Христостыҥ ӱредӱлериле таныжып, олорды оҥдоп, јӱрӱмине тузаланарга шӱӱп алган кижи. Оныҥ учун ада-энелер балдарын јаштаҥ ала Христостыҥ чӧҥӱрилген ӱренчиктери болорго болужатан амадулу болор учурлу. Је јаш балдар сууга чӧҥӱрилбей јат. Андый да болзо, Агару Бичиктиҥ айтканыла, балдар да чындыкты оҥдоп, оны сӱӱр аргалу.

5, 6. а) Агару Бичикте бичилгениле болзо, Тимофей канча јаштуда чӧҥӱрилген болор? б) Ӧткӱн ада-энелер балдарына канайып болужып турза, јакшы болор?

⁵ Тимофей Иеговага иштеерге јиит тужында шӱӱп алган. Элчи Павелдиҥ сӧстӧриле болзо, Тимофей «кичӱдеҥ ала Агару Бичиктерди билер» болгон. Оныҥ адазы Иеговага иштебеген де болзо, оны еврей укту энези ле карган энези Кудайдыҥ Сӧзин сӱӱрине ӱредип салган. Мынаҥ улам ол Кудайга тыҥ бӱткен (2 Тим. 1:5; 3:14, 15). Тимофейге 20 јаш кире болордо, ол јуунныҥ аҥылу јакылталарын аларына јарадылган Христостыҥ ӱренчиги болгон (Ап. ижи 16:1—3).

⁶ Ӱзе балдар башка, олордыҥ кӧгӱс ӧзӱми де башка болот. Кезиги библиялык чындыкты јиит тужында јакшы оҥдоп, ойгор шӱӱлтелер эдип, чӧҥӱрилерге кӱӱнзейт. Је кезигине эмеш ӧй керек болот. Оныҥ учун ӧткӱн (проницательный) ада-энелер балдарын капшай ла чӧҥӱрилзин деп албадабай јат. Карын балдарыныҥ кӧгӱс  ӧзӱмин ајаруга алып, чӧҥӱрилерине белетенерге болужат. Олордыҥ балдары Укаа сӧстӧр 27:11 (кычырыгар *) тузаланып турза, ада-энелер сӱӱнчи алат. Олор балдарына Христостыҥ ӱренчиги болорго болужатан амадузын ундыбас учурлу. Оныҥ учун ада-энелерге бойлорынаҥ сураар керек: «Мениҥ балам Кудайга учурланып чӧҥӱрилерге, билгирлерди јеткилинче алган ба?»

7. Чӧҥӱрилерге турган кижиниҥ билгирлери тереҥ болор учурлу ба? Јартап беригер.

⁷ Ада-энелерге балдарын ӱредетен молју берилген. Оныҥ учун олор Агару Бичиктеги билгирлерди балдары јакшы билзин деп кӱӱнзейт. Је Кудайга учурланып чӧҥӱрилерге, ончо немени билери некелбей јат, не дезе, кажы ла христиан кижи чӧҥӱрилген кийнинеҥ бойыныҥ билгирин тереҥжидер учурлу. (Колоссыдагыларга 1:9, 10 кычырыгар.) Айдарда, чӧҥӱрилерге канча кире билгирлерлӱ болор керек?

8, 9. Филиппыдагы тӱрмениҥ ишчизиле болгон учуралдаҥ бис кандый ӱредӱ аладыс?

⁸ Баштапкы чакта јаткан бир билениҥ темин кӧрӱп ийеектер (Ап. ижи 16:25—33). Элчи Павел б. э. 50-чи јылында, миссионер ижиниҥ экинчи јорыгында, Филиппы деген калада болгон. Ондо Павел ле оныла кожо иштенип јӱрген Сила актуга ла буруладып, тӱрмеге таштаткандар. Је тӱнде кенетийин јер силкинерде, тӱрмениҥ ончо эжиктери ачыла берген. Тӱрмениҥ ишчизи отурган улустыҥ ончозы кача берди деп бодойло, бойына кол салынарга јадарда, Павел оны токтодып алган. Анайып Павелге ле Силага сӱрекей јакшы арга ачылган. Олор тӱрмениҥ ишчизине ле оныҥ јууктарына Иисус керегинде куучындап берген. Олордыҥ јӱрегине чындык томула берерде, олор тургуза ла чӧҥӱрилген. Бу учуралдаҥ кандый ӱредӱ аладыс?

⁹ Тӱрмениҥ ишчизи пенсияга чыгып калган военный кижи болгон болор. Ол Агару Бичикле таныш эмес болгон, оныҥ учун христиан кижи болорго, ого оныҥ тӧс ӱредӱлерин билип, Кудайдыҥ ишчизи кандый болор учурлу деп оҥдоп, Христостыҥ ӱредӱлериле јӱрерге шӱӱп алар керек болгон. Ол Агару Бичиктиҥ тӧс билгирлерин кыска ӧйгӧ алып, оны баалап, ӧйди чӧйбӧй чӧҥӱрилер керек деп оҥдоп ийген. Ол чӧҥӱрилген кийнинеҥ билгирлерин оноҥ ло ары кӧптӧткӧн деп алаҥзыбай јадыс. Эмди, балагар библиялык чындыкты јакшы билип ле сӱӱп, анайда ок учурланарыныҥ ла чӧҥӱрилериниҥ учурын оҥдоп турганын кӧрӱп турган болзогор, нени эдеригер деп сананып ийзеер. Слер оны јуунныҥ аксагалдарына баштанзын деп айдар болорыгар. Олор оны чӧҥӱрилериниҥ некелтелерине келижип турган ба деп айдып берер *.  Чӧҥӱрилген кийнинеҥ слердиҥ балагар, ӧскӧ христиандар ла чылап, Иегова керегинде билгирлерин бастыра јӱрӱмине, керек дезе ӱргӱлјиге де тереҥжидер (Рим. 11:33, 34).

10, 11. а) Кезик ада-энелер кандый кӧрӱм-санаалу болот? б) Ада-энелерге нени ундыбас керек?

¹⁰ Кезик ада-энелер балдарын кандый бир ӱредӱ алып, јакшы иш тапкан кийнинеҥ чӧҥӱрилзе јакшы болор деп сананат. Олор балдарына эҥ јакшыны кӱӱнзеп турган болор, је олордыҥ мындый јӧптӧри балдарына чыннаҥ тузалу болор деп айдарга јараар ба? Олордыҥ јӧптӧри Агару Бичиктиҥ принциптерин буспай јат па? Агару Бичик кандый јӧп берет? (Јарлыкчы 12:1 кычырыгар *.)

¹¹ Бу телекейдиҥ берип турганы Иегованыҥ кӧрӱм-санаазына чек келишпей јат деп ундыбас керек (Иак. 4:7, 8; 1 Иоан. 2:15—17; 5:19). Балдарга Сатананаҥ, оныҥ телекейинеҥ ле Кудайга јарабас санаанаҥ коруланатан эҥ јакшы арга — Иеговала најылажары. Је ада-энелер ӱредӱни, јакшы ишти баштапкы јерге тургузарга кӱӱнзедип турза, балдар бу телекейде бар немелерди Иеговала јуук колбулардаҥ артык деп сананып баштаардаҥ айабас. Мындый санаа јаан каршу экелер. Сӱӱштӱ ада-энелер балдарын бу телекейдиҥ кӧрӱмиле јӱрзин деп кӱӱнзеер бе? Бис јӱрӱмисте јӱк ле Иегованы баштапкы јерге тургузып турзаас, чыннаҥ ырысту болорыс. (Сарын 1:2, 3 кычырыгар *.)

12. Кезик ада-энелер нениҥ учун балдарын чӧҥӱрилерге меҥдебезин деп сананат?

 ¹² Кызын чӧҥӱрилбезин деп кӱӱнзеген эје мынайып айткан: «Баламды јууннаҥ чыгарып салар болор деп тыҥ коркыганымды айдарга да уйатту». Кезик ада-энелер, бу христиан эје чылап, балдарыныҥ јастыралар эдетен ӧйи ӧтпӧгӧнчӧ, чӧҥӱрилбезе јакшы деп бодойт (Баш. 8:21; Укаа 22:15). Олор: «Балам чӧҥӱрилбеген болзо, оны јууннаҥ чыгарбас» — деп сананар болор. Је мынайып сананары нениҥ учун јастыра? (Иак. 1:22).

13. Чӧҥӱрилбеген кижини Иегованыҥ алдына каруулу эмес деп айдарга јараар ба? Јартап беригер.

¹³ Ада-энелер балдарын Иеговага јӱрӱмин учурлайтан ӧйи јеткелекте чӧҥӱрилбезин деп санангылайт. Је чӧҥӱрилбеген кижи Кудайдыҥ алдында каруулу эмес деп сананары јастыра болот. Нениҥ учун? Нениҥ учун дезе бис чӧҥӱрилбеген де болзоос, Иегованыҥ алдында эткен керектерис учун каруулу болуп јадыс. Бала Иеговага не јарап турган, не јарабай турганын оҥдоп баштаганынаҥ ла ала Кудайдыҥ алдында каруулу болот. (Иаковтыҥ самаразы 4:17 кычырыгар.) Оныҥ учун ада-энелер балдарына чӧҥӱрилбезин деп айдардыҥ ордына бойлоры јакшы тем кӧргӱзер учурлу. Ойгор ада-энелер балдарын јаштаҥ ала Кудайдыҥ ак-чек болоры јанынаҥ бийик нормаларын сӱӱзин деп ӱредип јат (Лука 6:40). Анайып бала кинчек этпей, Иегованыҥ табыла јӱрерге бойы албаданар (Иса. 35:8).

14. Аксагалдар балдарына чӧҥӱрилерге болужып турган ада-энелерге канайып болужар аргалу?

¹⁴ Аксагалдар, кӧгӱс кӱдӱчилер болуп, балдарла кӧгӱс амадулар  керегинде куучындажып турганыла ада-энелерге болужар аргалу. Бир эје эске алат: «6 јашту болорымда мениле Рассел ака 15 минуттыҥ туркунына кӧгӱс амадуларым керегинде куучындашкан». Бу куучыннаҥ туза болгон бо? Соондо, бу эје 70 јылдаҥ ажыра пионер болуп иштеген. Чын, јылу сӧстӧр айтканы ла мактаганы кижиниҥ бастыра јӱрӱмине јаан камаанын јетирет (Укаа 25:11). Анайда ок аксагалдар, ада-энелерди ле балдарды Каандыктыҥ Туразында иштенерге кычырып јат. Олор балдарга кӱчи јеткедий иш берер аргалу.

15. Ака-эјелер јииттерге канайып болужар аргалу?

¹⁵ Ака-эјелер јуунныҥ јииттериле куучындажып, олордыҥ кӧгӱс једимдериле јилбиркеер аргалу. Бала јакшы белетеп алган јартамалын акту кӱӱнинеҥ берген эмезе туштажуда јакылтазын бӱдӱрген болор. Ол эмезе школдо јарлаган эмезе ченелте болордо чындык арткан. Андый баланы капшай ла мактап ийигер. Слер јууннаҥ озо эмезе кийнинеҥ кажы бир балала акту јӱрегеердеҥ јилбиркеп, куучындажып турар аргалу. Анайып балдар бойлорын «јаан јуунга» кирип турганын сезер (Сар. 35:18).

16, 17. а) Балдарга нениҥ учун чӧҥӱрилер керек? б) Ада-энелер неге тыҥ сӱӱнерге кӱӱнзегилейт? (Јӧрмӧлдиҥ бажындагы јурукты кӧрӱгер.)

¹⁶ Баланы Кайраканныҥ ӱреткени ле јакыганы аайынча таскадары — ада-энелерге берилген кӱндӱлӱ молју (Еф. 6:4; Сар. 127:3). Јебрен ӧйдӧ Израиль албатыныҥ балдары чыкканынаҥ ла ала Иеговага учурлалып калган болотон. Је бӱгӱнги кӱнде андый неме болбой јат. Анайда ок ада-энези Кудайды ла чындыкты сӱӱп турган болзо, бала база андый ок болор деп сананбас керек. Оныҥ учун ада-энелер бала чыкса ла мындый амадузын ундыбас учурлу: баланы Христостыҥ ӱренчиги болзын деп ӱредип саларын ла Иеговага јӱрӱмин учурлап, чӧҥӱрилерге болужарын. Мынаҥ артык неме бар эмеш пе? Кижи јӱк ле учурланган ла чӧҥӱрилген болзо, анайда ок учына јетире Кудайга чындык артса, улу тӱбектиҥ ӧйинде аргаданып алар (Матф. 24:13).

¹⁷ Блоссом Брандт эје сууга чӧҥӱрилерге турарда, оныҥ кудайзак ада-энези, кызы эҥ јаан учурлу алтамды эдерге белен бе деп, бӱдӱмјиленерге кӱӱнзеген. Бӱдӱмјиленип алала, олор кызыныҥ чӧҥӱрилерге турганын јараткан. Ол айдат: «Чӧҥӱрилердеҥ озо эҥирде адам бастырагысты тизеленип алзын деп сурап, мӱргӱген. Ол мӱргӱӱлинде кызы јӱрӱмин Иеговага учурлап јатканына тыҥ сӱӱнип турганын айткан». Бу эҥирди, 60 јыл ӧдӱп те каларда, Блоссом эје ундыбай јӱрет. Кару ада-энелер, балдарыгардыҥ Иеговага учурланып, сууга чӧҥӱрилип јатканын кӧрӱп, слер де тыҥ сӱӱнеригер деп иженип јадыс!