Чӧҥӱрилери — христиандарга берилген некелте
«Слерди де эмди креске тӱжери [чӧҥӱрилери, ЈТ] аргадайт» (1 ПЕТ. 3:21).
1, 2. а) Балдары чӧҥӱрилерге турган ада-энелерде кандый сезимдер болот? б) Чӧҥӱрилерге тургандарга Иеговага учурланганаар ба деп, сурак нениҥ учун берилет? (Јӧрмӧлдиҥ бажындагы јурукты кӧрӱгер.)
ЈАШ сыйныбыс, ады Мария болзын, курултайда чӧҥӱрилерге тургандардыҥ ортозында турат. Оны ада-энези кӧрӱп туру. Ол јетирӱчиниҥ (куучын-эрмек айдар кижи) эки сурагына јарт, чокум каруу берет. Оноҥ барып, сууга чӧҥӱрилет.
2 Марияныҥ ада-энези кызыныҥ Иеговага јӱрӱмин бӱткӱлинче учурлап, чӧҥӱрилип јатканыла оморкойдылар. Је андый да болзо, мынаҥ озо энезине мындый сурактар амыр бербей туратан: «Марияга чӧҥӱрилерге эрте эмес пе? Ол бу алтамныҥ учурын чыннаҥ јакшы оҥдоп турган ба? Чӧҥӱрилерге меҥдебезе кайдар?» Мындый ла сурактар балдары чӧҥӱрилерге турган кӧп ада-энелерди база санааркадып јат (Јарл. 5:5). Нениҥ учун дезе христиан кижиниҥ јӱрӱминде учурланары ла чӧҥӱрилери эҥ јаан алтамдар болот. («Слер Иеговага учурланганаар ба?» деген рамканы кӧрӱгер.)
3, 4. а) Элчи Петр чӧҥӱрилериниҥ јаан учурын кандый темниҥ болужыла кӧргӱскен? б) Чӧҥӱрилерин нениҥ учун Нойдыҥ ӧйинде ковчегтиҥ тудулганыла тӱҥдештирерге јараар?
3 Элчи Петр чӧҥӱрилерин Нойдыҥ ковчегти тутканыла тӱҥдештирген. Ол мынайып бичиген: «Слерди де эмди креске тӱжери аргадайт». (Петрдыҥ 1-кы самаразы 3:20, 21 кычырыгар.) Ной ковчегти тутканыла бойыныҥ јӱрӱмин Кудайдыҥ табын бӱдӱрерге учурлап салганын кӧргӱскен. Ол Иегованыҥ берген јакылтазын кыйалта јогынаҥ бӱдӱрген. Ной ло оныҥ билези Кудайга бӱдӱп турганын керектериле кӧргӱскенинеҥ улам, Иегова олорды Чайык тушта аргадап алган. Петр бу темле бисти неге ӱредерге сананган?
4 Ной ковчегти тутканыла Кудайга бӱдӱп турганын кӧргӱскен. Анайып ла, чӧҥӱрилген кижи Иисус Христостыҥ тирилгенине бӱдӱп, јӱрӱмин Иеговага учурлаганын кӧргӱзет. Христиандар чӧҥӱрилген кийнинеҥ, Ной ло чылап, Кудайдыҥ сӧзин угат ла оныҥ јакылталарын бӱдӱрет. Канайып Иегова Нойго Чайыкты ӧдӧргӧ болушкан, анайып ла чӧҥӱрилген чындык христиандарга бу калју телекейдиҥ јоголтыларын ӧдӧргӧ болужар деп алаҥзыбай јадыс (Марк 13:10; Ачыл. 7:9, 10). Учурланары ла чӧҥӱрилери Кудайдыҥ кажы ла ишчизиниҥ јаан учурлу алтамы болот. Оныҥ учун јаан шылтак јогынаҥ сууга чӧҥӱрилбей, ӧйди чӧйип турган кижи, ӱргӱлји јӱрӱм јӱретен ижемјизин јылыйтардаҥ айабас.
5. Бис бу јӧрмӧлдӧ нени шӱӱп кӧрӧрис?
5 Чӧҥӱрилери јаан учурлу алтам болордо, мындый ӱч суракты кӧрӱп ийеектер: Чӧҥӱрилери керегинде Агару Бичик нени айдат? Чӧҥӱрилердеҥ озо кандый алтамдар эдер керек? Балазыла эмезе база кемле-кемле Агару Бичикле ӱредӱ ӧткӱрип тура, чӧҥӱрилер керек деп айдатанын, нениҥ учун ундыбас керек?
ЧӦҤӰРИЛЕРИ КЕРЕГИНДЕ АГАРУ БИЧИК НЕНИ АЙДАТ?
6, 7. а) Иоанныҥ чӧҥӱргениниҥ учуры кандый болгон? б) Иоаннга кандый кӱндӱ эдилген?
6 Улусты сууга чӧҥӱрген баштапкы кижи Крестеечи Иоанн болгон деп Агару Бичикте айдылат (Матф. 3:1—6). Ого келген улус Моисейдиҥ јасагына удура эткен кинчектерин алынганын кӧргӱзерге чӧҥӱрилген. Је бир катап Иоаннга јаан кӱндӱ болгон. Ол Кудайдыҥ толо кемдӱ уулын, Иисус Христосты, сууга чӧҥӱрген (Матф. 3:13—17). Је бу чӧҥӱрилиштиҥ учуры чек башка, не дезе, Иисус кинчек јок кижи болгон, оныҥ учун оныҥ чӧҥӱрилгени бойыныҥ кинчегин алынып јатканын кӧргӱспеген (1 Пет. 2:22). Айса Иисус нениҥ учун чӧҥӱрилген? Анайып, ол јӱрӱмин Кудайдыҥ табын бӱдӱрерге учурлап јатканын кӧргӱскен (Евр. 10:7).
7 Иисустыҥ јарлап баштаганыныҥ кийнинеҥ, ӱренчиктери улусты база чӧҥӱрип туратан (Иоан. 3:22; 4:1, 2). Бу чӧҥӱрилиш, Иоанныҥ чӧҥӱрип турганы ла чылап, Моисейдиҥ јасагына удура эткен кинчектерди алынганын темдектеген. Је Иисус божоп, тирилген кийнинде христиандардыҥ чӧҥӱрилериниҥ учуры чек башка болуп калган.
8. а) Иисус тирилген кийнинде ӱренчиктерине кандый јакылта берген? б) Христиан чӧҥӱрилиштиҥ учуры кандый?
8 Б. э. 33 јылында тирилген Иисусты 500-теҥ кӧп улус — эр улус, ӱй улус, керек дезе балдар да кӧргӧн болор. Шак бу ӧйдӧ Иисус бойыныҥ ӱренчиктерине бу јакылтаны берген болор: «Анайдарда, барыгар, ончо калыктарды ӱредигер. Олорды Аданыҥ, Уулыныҥ ла Агару Тынныҥ адыла крестеп, слерге јакарганымды ончозын бӱдӱрерге ӱредигер» (Матф. 28:19, 20; 1 Кор. 15:6). Айдарда, бу јакылтаны Иисустыҥ јӱстер тоолу ӱренчиктери уккан болор. Анайып Иисус, оныҥ јӱгин аларга кӱӱнзегендер, ол эмезе, ӱренчиктери болорго тургандар, чӧҥӱрилер учурлу деп кӧргӱскен (Матф. 11:29, 30). Је олорго бу алтамды эдерге, Иегова Иисусты бойыныҥ амадузында тузаланат деп, бӱдер керек болгон. Бу ӧйдӧҥ ала Кудай јӱк мындый чӧҥӱрилишти јарадат. Баштапкы чактагы Христостыҥ јаҥы ӱренчиктери, јаан шылтак ла болбозо, ӧйди чӧйбӧй чӧҥӱрилип туратан. Мындый темдер Агару Бичикте кӧп бичилген (Ап. ижи 2:41; 9:18; 16:14, 15, 32, 33).
ӦЙДИ ЧӦЙБӦГӦР
9, 10. Бис Эфиоп јериниҥ прозелит кижизиниҥ ле элчи Павелдиҥ темдерин шӱӱп, чӧҥӱрилери керегинде нени билип алдыс?
9 Апостолдордыҥ ижи 8:35, 36 кычырыгар. Кудайга бажырганыныҥ кийнинеҥ, Иерусалимнеҥ Эфиоп јерине јанып бараткан прозелит эр кижиниҥ темин кӧрӱп ийеектер. Филипп ангелдиҥ јакарузын угуп, абралу эфиоп кижини јаба једип, «Иисус керегинде Сӱӱнчилӱ Јар јарлады». Эфиоп нени этти? Ол ачылган чындык учун быйанду болуп, Иегованыҥ табын бӱдӱрерге кӱӱнзей берген, оныҥ учун капшай ла сууга чӧҥӱрилген.
10 Је эмди христиандарды истешкен бир иудей кижиниҥ учуралын сананып кӧрӱгер. Бу кижи Кудайга учурлалган, је соҥында туура јӱре берген албатынаҥ болгон. Ол иудейлердиҥ чӱм-јаҥдары учун тартыжатан. Је ол бир катап, оныҥ јӱрӱмин солыган јетирӱ уккан. Ого тирилген Иисус Христос баштанган. Бу јетирӱни ол канайып алынды? Ол Анания деген христиан кижиниҥ болужын тӱрген алып, сууга чӧҥӱрилген (Ап. ижи 9:17, 18; Гал. 1:14). Слер, бу куучын, соондо элчи Павел болуп калган Савл керегинде деп, оҥдоп ийген болорыгар. Павел Кудай Иисусты кандый амадулу тузаланып турганын оҥдоп ийеле, тургуза ла сууга чӧҥӱрилген. (Апостолдордыҥ ижи 22:12—16 кычырыгар.)
11. а) Агару Бичикти ӱренип турган улус недеҥ улам чӧҥӱрилерге кӱӱнзейт? б) Христостыҥ јаҥы ӱренчиктериниҥ сууга чӧҥӱрилгенин кӧрӱп турзагар, слерде кандый сезимдер болот?
11 Бӱгӱнги кӱнде мындый кӱӱн-санаа Агару Бичикти ӱренип турган јииттерде де, јажы јаанап калган улуста да болот. Бӱдери ле чындык учун акту јӱрегинеҥ быйанду болгоны олорды јӱрӱмин Иеговага учурлап, сууга чӧҥӱрилерге кӱӱнзедет. Сууга чӧҥӱрилери керегинде аҥылу куучын-эрмек — кажы ла курултайдыҥ эҥ јилбилӱ бӧлӱктериниҥ бирӱзи болот. Иегованыҥ Керечилери Агару Бичикти ӱренип турган улустыҥ кӧгӱс јанынаҥ ӧзӱп, сууга чӧҥӱрилгенин кӧрӱп, сӱӱнип јат. Ада-энелер балдарын сууга чӧҥӱрилерге јаткан Христостыҥ јаҥы ӱренчиктериниҥ тоозында турганын кӧрӱп, база сӱӱнет. 2017 служебный јылда 284000-наҥ кӧп кижи Иеговага учурланганын кӧргӱзерге, сууга чӧҥӱрилген (Ап. ижи 13:48). Јаҥы ӱренчиктер сууга чӧҥӱрилерин христиандарга берилген некелте деп оҥдоп јадылар. Је чӧҥӱрилердеҥ озо, кандый алтамдар эдер керек?
12. Чӧҥӱрилердеҥ озо, кандый алтамдар эдер керек?
12 Чӧҥӱрилердеҥ озо, кижиге Кудай керегинде, оныҥ амадузы керегинде, анайда ок улусты аргадаарга Кудай нени эткени керегинде чике билгирлер алар керек ле Кудайга бӱдӱп баштаар керек (1 Тим. 2:3—6). Анайып, кижи Кудайга јарабай турган керектердеҥ кыйарга ла оныҥ чындык нормаларыла јӱрерге кӱӱнзеп јат (Ап. ижи 3:19). Кижи Иеговага јарабай турган керектер эдип турза, оныҥ учурланганын Кудай јаратпас (1 Кор. 6:9, 10). Је Иегованыҥ ак-чек болорыныҥ бийик нормаларыла јӱреринеҥ башка, ӧскӧ дӧ некелтелерди бӱдӱрер керек: Кудайга јӱрӱмин учурлаарга турган кижи јуунныҥ туштажуларына јӱрер учурлу, анайда ок јаантайын јарлап, улусты библиялык чындыкка ӱредер учурлу, не дезе, јӱк андый кижи Христостыҥ ӱренчиги болор аргалу (Ап. ижи 1:8). Бу некелтелерди бӱдӱрип турган јаҥы ӱренчик мӱргӱӱлинде Иеговага јӱрӱмин учурлап, улус алдына чӧҥӱрилер аргалу.
ЧӦҤӰРИЛЕРИ ӰРЕНИП ТУРГАН КИЖИНИҤ АМАДУЗЫ БОЛЗЫН
Слер Агару Бичикти ӱренип турган кижиге, сууга чӧҥӱрилер керек деп айдарга, арга бедирейдигер бе? (13-чи абзацты кӧрӱгер.)
13. Агару Бичикле ӱредӱ ӧткӱрип тургандарга, чӧҥӱрилери — христиандарга берилген некелте деп, нениҥ учун ундыбас керек?
13 Бис Агару Бичикти ӱренип турган балдарыска эмезе ӧскӧ улуска ӧрӧги айдылган алтамдарды эдерге болужып турган болзоос, чӧҥӱрилбей јадып, Христостыҥ чындык ӱренчиги болор арга јок деп айдарга коркыбас учурлу. Оныҥ учун келишкен учуралда учурланар ла чӧҥӱрилер керек деп айдып турарыс. Не дезе, бистиҥ балдарыс та, Агару Бичикти ӱренип турган улузыс та кӧгӱс једимдерге једип, чӧҥӱрилзин деп кӱӱнзеп јадыс.
14. Кижини чӧҥӱрилзин деп, нениҥ учун албадаарга јарабас?
14 Кижини чӧҥӱрилзин деп, ада-энелер де, Агару Бичикле ӱредӱ ӧткӱрип турган кижи де — кем де албадабас учурлу. Не дезе, Иегова кемди де албадабай јат (1 Иоан. 4:8). Оныҥ учун бис ӱредӱ ӧткӱрип јаткан ӧйдӧ кажы ла кижиге таҥынаҥ Кудайла колбуларын тыҥыдар керек деп јартаар учурлу. Кижини чӧҥӱрилерге чындыкты оҥдоп турганы учун акту јӱрегинеҥ быйанду болгоны ла Христостыҥ јӱгин аларга турганы кӱӱнзедер учурлу (2 Кор. 5:14, 15).
15, 16. а) Чӧҥӱрилерге турган кижиге канча јаш болор керек? Јартап беригер. б) Иегованыҥ Керечизи болорго турган, је алдында ӧскӧ кудай јаҥда чӧҥӱрилген кижи, нениҥ учун ойто катап чӧҥӱрилер учурлу?
15 Кажы ла кижиниҥ кӧгӱс ӧзӱми башка. Кижи канча да јашту болзо, чӧҥӱрилер аргалу. Кӧп улус јиит тужында чӧҥӱрилип, бастыра јӱрӱмине Иеговага чындык артып јат. Је чындыкты билип, чӧҥӱрилер керек деп оҥдогон улустыҥ ортозында јажы јаанап та калган улус бар. Андый улустыҥ кезиги јӱс јаштаҥ ажа берген.
16 Бир јаан јашту ӱй кижи оныла Агару Бичикти ӱренип турган эјенеҥ: «Мен алдында ӧскӧ кудай јаҥдарда чӧҥӱрилген болзом, меге эмди ойто чӧҥӱрилер керек пе?» — деп сураган. Эје оныла јарагадый библиялык ӱлгерлерди шӱӱшкен. Бу ӱлгерлердиҥ болужыла ол ӱй кижи, Агару Бичик чӧҥӱрилери керегинде нени айдат деп оҥдоп, удабай ла Иегованыҥ Керечили болуп чӧҥӱрилген. Оныҥ јажы 80-ге јууктап калган да болзо, чӧҥӱрилбей јӱрерге јараар деп сананбаган. Чӧҥӱрилерге турган кижи Кудайдыҥ табы керегинде чике билгирлерлӱ болор учурлу. Иегова јӱк ле мындый чӧҥӱрилишти јарадып јат. Оныҥ учун алдында ӧскӧ кудай јаҥда чӧҥӱрилген кижи ойто чӧҥӱрилер учурлу. (Апостолдордыҥ ижи 19:3—5 кычырыгар.)
17. Сууга чӧҥӱрилген кӱнде не керегинде шӱӱп сананар керек?
17 Сууга чӧҥӱрилген кӱн сӱрекей сӱӱнчилӱ кӱн болот. Бу алтам тереҥ шӱӱп сананатан арга берет. Учурланганысла јӱрерге, тыҥ албаданар керек. Оныҥ учун Иисустыҥ сӧстӧриле болзо, оныҥ ӱренчиктери болорго кӱӱнзеп тургандар, бойына оныҥ јӱгин алып јадылар. Христостыҥ ӱренчиктери «бойлорына болуп јӱрбезин, олор учун ӧлӧлӧ тирилгенге болуп јӱрер» учурлу (2 Кор. 5:15; Матф. 16:24).
18. Келер јӧрмӧлдӧ бис кандый сурактарды шӱӱп кӧрӧрис?
18 Шак бу јӱк керегинде сананып, Марияныҥ энезине јӧрмӧлдиҥ бажындагы сурактар амыр бербеген болгон. Слерде балдар бар болзо: «Мениҥ балам чӧҥӱрилерге белен бе? Ол Иеговага јӱрӱмин учурлаарга турарда, оны јакшы билер бе? Эмезе озо ӱредӱ алып, јакшы иш табып алар керек пе? Чӧҥӱрилген кийнинеҥ уур кинчек эдип салза, не болор?» — деген сурактарды сананып турган болорыгар. Келер јӧрмӧлдӧ бис бу сурактарды кӧрӧрис ле ада-энелерге чӧҥӱрилерине канайып чын кӧрӱмдӱ болорын шӱӱжерис.
