1, 2. а) Сатана улусты канайып тӧгӱндеп јат? б) Бу јӧрмӧлдӧ нени шӱӱп кӧрӧрис?

САТАНА — «тӧгӱнниҥ адазы». Ол озодоҥ бери кижиликти тӧгӱндеп јат (Иоанн 8:44). Темдектезе, оныҥ тӧгӱниле болзо, кижи божогон кийнинде оноҥ ары јӱрет. Бӱгӱнги телекейдиҥ јӱзӱн-башка чӱм-јаҥдары ла байланыштары бу тӧгӱнге тайанат. Мынаҥ улам, ака-эјелердиҥ кожо чыккандары эмезе айылдаштары божозо, олордыҥ бӱдери ченелип јат (Иуда 3).

² Слерде мындый ченелте болзо, божогон улус керегинде Агару Бичиктиҥ ӱредӱзинеҥ бек тудунарга не болужар? (Еф. 6:11). Кудайга јарабай турган чӱм-јаҥдарды бӱдӱрерине албададып турган ака-эјени токунадарга нени эдерге јараар? Бу јӧрмӧлдӧ кезик библиялык принциптер кӧрӱлер. Је озо баштап Агару Бичик ӧлӱм керегинде нени айдып турганын шӱӱжип ийектер.

3. Баштапкы тӧгӱн неге экелген?

³ Кудай улусты ӱргӱлјиге јӱрзин деп јайаган. Кудайдыҥ амадузыла болзо, улус качан да ӧлбӧс учурлу болгон. Је ӱргӱлјиге јӱрерге, Адам ла Евага Иегованыҥ: «Јакшыны ла јаманды билип алар агаштыйын јибе. Јизеҥ, ол ло кӱн ӧлӱп каларыҥ» — деген јеҥил јакарузын бӱдӱрер керек болгон (Баш. 2:16, 17). Је Сатана јылан ажыра Евага: «Ӧлбӧзигер» — деген. Ева бу тӧгӱнге бӱдӱп, јиилекти јип ийген. Соондо Адам ого база бириккен (Баш. 3:4, 6). Анайып кинчектӱ ле ӧлӱмдӱ јӱрӱм башталган (Рим. 5:12).

4, 5. Сатана улусты оноҥ ло ары канайып тӧгӱндеген?

 ⁴ Кудайдыҥ айтканыла Адам ла Ева божоп калган. Сатана дезе улусты оноҥ ло ары тӧгӱндеген. Соондо, кижи божой берзе, оныҥ сӱнези кӧскӧ кӧрӱнбес тын болуп, оноҥ ары јӱрет деп тӧгӱн табылган. Бу тӧгӱн башка-башка бӱдӱмдер алынган. Ого коркышту кӧп улус бӱдет (1 Тим. 4:1).

⁵ Мындый тӧгӱнге нениҥ учун коркышту кӧп улус бӱдӱп јат? Нениҥ учун дезе улус ӧлӱмнеҥ коркып јат. Сатана дезе мыны билип, улустыҥ сезимдериле ойнойт. Бис ӱргӱлјиге јӱрер эдип јайалганыстаҥ улам божоорго кӱӱнзебей јадыс (Јарл. 3:11). Ӧлӱм — бистиҥ ӧштӱ (1 Кор. 15:26).

6, 7. а) Сатана ӧлӱм керегинде чынды јажырып болгон бо? Јартап беригер. б) Библиялык чындык божогон улустаҥ бодоп ло коркыырынаҥ канайып јайымдайт?

⁶ Је Сатана ӧлӱм керегинде чынды јажырып болбогон. Агару Бичик божогон улусла не болуп турганы керегинде ле божогондордо кандый ижемји бары керегинде нени айдып турганын бӱгӱнги кӱнде сӱрекей кӧп улус билип алган, анайда ок олор бу керегинде улуска куучындап јат (Јарл. 9:5, 10; Ап. ижи 24:15). Бу билгирлердеҥ бис токунал алып, божогон улустаҥ коркыбай јадыс ла олор учун санааркабай јадыс. Кижи божоп калза, јок болуп калат. Андый кижи тереҥ уйуктап јаткан кижидий болот (Иоанн 11:11—14). Анайда ок олорго ӧй дӧ токтоп калат. Оныҥ учун тирилиш башталза, канча јӱс јылдар кайра божогон улуска да узак ӧй ӧтпӧгӧн деп билдирер.

⁷ Божогон улус керегинде чындыкты оҥдоорго јеҥил ле јарт. Бу чындык Сатананыҥ булгакту тӧгӱнинеҥ чек башка! Мындый тӧгӱниле Сатана јӱк улусты тӧгӱндеп турган эмес, је Јайаачыны јабарлап јат. Сатананыҥ тӧгӱниниҥ каршузын оҥдоорго, мындый сурактарга каруу берип кӧрӧктӧр: оныҥ тӧгӱни Иегованы канайып јабарлайт? Бу тӧгӱн Христостыҥ толынты тайылгазына кандый каршу јетирет? Улустыҥ кыйын-шыразын канайып тыҥыдат?

8. Сатананыҥ ӧлӱм керегинде тӧгӱни Иегованы нениҥ учун јабарлайт? Бу Иеремия 19:5-теҥ канайып кӧрӱнет?

⁸ Сатананыҥ ӧлӱм керегинде тӧгӱни Иегованы јабарлап јат. Темдектезе, кижи божогон кийнинде отту таамыда кыйналат деп тӧгӱн ӱредӱ бар. Бу ӱредӱ Кудайды јабарлап јат, нениҥ учун дезе анайып улус сӱӱштӱ Ада Кудайды Дьяволдый ок калју деп сананат (1 Иоанн 4:8). Мындый санаадаҥ улам  слерде кандый сезимдер болот? Је эҥ учурлузы Иеговага кандый сезимдер келет? Ол калју керектердиҥ кажызын да кӧрӧр кӱӱни јок. (Иеремия 19:5 кычырыгар *.)

9. Сатананыҥ тӧгӱнинеҥ улам Иоанн 3:16 ла 15:13-те айдылган Христостыҥ толынты тайылгазына улус нениҥ учун бӱтпей јат?

⁹ Сатананыҥ тӧгӱнинеҥ улам улус Христостыҥ толынты тайылгазына бӱтпей јат (Матф. 20:28). Анайда ок Сатана улусты кижиде сӱне бар деп тӧгӱндеп јат. Кижиде сӱне бар болгон болзо, улус Иисустыҥ толынты тайылгазы јогынаҥ да ӱргӱлјиге јӱрер эди. Је Христос јӱрӱмин бергениле улусты тыҥ сӱӱп турганын кӧргӱскен деп, ундыбас керек. (Иоанн 3:16; 15:13 кычырыгар.) Сатананыҥ тӧгӱн ӱредӱлеринеҥ улам бу сӱрекей баалу сыйды улустыҥ не де кире бодобой турганы Иеговага ла Иисуска кандый ачу јетирип турганын сананып ийзеер.

10. Сатананыҥ тӧгӱни улустыҥ кыйын-шыразын канайып тыҥыдат?

¹⁰ Сатананыҥ тӧгӱни улустыҥ кыйын-шыразын тыҥыдат. Кезикте балазын јылыйткан ада-энеге улус: «Слердиҥ балагарды Кудай бойына ангел эдип апарган» — деп айдат. Бу тӧгӱн ада-энениҥ ачузын арайладат па эмезе тыҥыдат па? Отту таамы керегинде тӧгӱн ӱредӱ улусты кыйнаарын, темдектезе еретиктерди ӧртӧӧрин актаган. «Испанский инквизиция» деген бичикте улусты кыйнап ӧлтӱрип тургандар мындый немеге бӱткен болор деп айдылган: «Кинчегин алынбай турган еретиктер отко кӱйдӱрилип јаткан тушта, тыны ӱзӱлердеҥ озо јастыразын алынза, сӱнези отту таамыдаҥ аргадалар». Кезик ороондордыҥ улузы божогон улусты тооп, олорго бажырып јат ла олордоҥ алкыш аларга албаданат. Је кезик ороондордыҥ улузы божогон улустаҥ коркып, јӱзӱн-башка чӱм-јаҥдар ӧткӱрип, олорго тайылгалар эдет. Сатананыҥ мындый тӧгӱн ӱредӱлери кижиге чыннаҥ токунал бербей јат. Бу ӱредӱлер јӱк коркыш ла санааркаш экелет.

11. Тӧрӧӧндӧр эмезе таныштар бисти Агару Бичикке удура барзын деп, канайып албадаардаҥ айабас?

¹¹ Кудайды ла оныҥ Сӧзин сӱӱп турганыс, тӧрӧӧндӧр эмезе таныштар бисти Агару Бичикке келишпей турган чӱм-јаҥдарды бӱдӱрерине албадап турза, Иегованыҥ сӧзинеҥ чыкпаска болужар. Олор бисти божоп калган јуугысты сӱӱбей ол эмезе тообой турган деп бурулаар болор. Анайда ок божогон кижиниҥ сӱнези бистеҥ улам тирӱ улуска каршу јетирер деп айдардаҥ айабас. Мындый айалгада библиялык чындыкты канайып јартап берерге јараар? Кудайдыҥ Сӧзинеҥ кезик принциптер кӧрӱп ийектер.

12. Агару Бичикке кандый чӱм-јаҥдар келишпей јат?

¹² Агару Бичикке келишпей турган чӱм-јаҥдарга турушпагар (2 Кор. 6:17). Карибский талайдыҥ ороондорыныҥ бирӱзинде јадып турган улус кижи божозо, оныҥ сӱнези јанында јӱрӱп, тирӱ јӱрген тужында ого јаман эткен улустыҥ ӧчин алардаҥ айабас деп бӱткилейт. Бир справочникте айдылганыла «бу сӱне улуска каргыжын да јетирердеҥ айабас». Африканыҥ кезик ороондорыныҥ улузы, божогон кижи бойын кӧрӱп ийбезин деп, кӱскӱлерди бӧктӧп, фотолорды стенеге айландырып салат. Је бис, Иегованыҥ Керечилери, мындый байланышка бӱтпей јадыс ла Сатананыҥ тӧгӱнине тӧзӧлгӧн чӱм-јаҥдарга турушпай јадыс (1 Кор. 10:21, 22).

13. Кандый бир чӱм-јаҥ Агару Бичикке келижип турган ба деп билбей турган болзогор, Иаков 1:5-ле болзо нени эдер керек?

¹³ Кандый бир чӱм-јаҥ Агару Бичикке келижип турган ба деп билбей турган болзогор, Иеговага мӱргӱп, ойгор сурагар. (Иаков 1:5 кычырыгар.) Анайда ок бистиҥ бичиктер бу  јанынаҥ нени айдып турганын кӧрӱп алыгар. Керек болзо, бу суракты јууныгардыҥ аксагалдарыла шӱӱжип ийигер. Олор слерге нени эдерин чике айдып бербес те болзо, је слердиҥ сурагарга келижип турган библиялык принциптерди, темдектезе бу јӧрмӧлдӧ берилген принциптерди, таап аларга болужар. Анайып слер «јакшыны јаманнаҥ ылгаштырар[га]» ӱренип аларыгар (Евр. 5:14).

14. Улуска бӱдӱрилер шылтак болбоско не болужар?

¹⁴ «Нени де эдип турган болзогор, Кудай макталзын деп эдигер» анайда ок «бӱдӱрилер шылтак болбо[гор]» (1 Кор. 10:31, 32). Кандый бир чӱм-јаҥды бӱдӱретен бе, јок по деп сананып тура, бистиҥ эткен тӱп-шӱӱлтегис ӧскӧ улустыҥ уйадына, анчада ла ака-эјелердиҥ уйадына, тийбес пе деп сананар керек. Нениҥ учун дезе бис ака-эјелериске бӱдӱрилетен таш болорго кӱӱнзебейдис (Марк 9:42.) Анайда ок Иеговага бӱтпей турган улусты да билбес аразынаҥ ачындырып ийерге кӱӱнзебей јадыс. Олорло керишпес керек эмезе олордыҥ чӱм-јаҥдарына каткырбас керек. Ундыбагар: сӱӱштӱ баштанганы јаан тузалу болот. Сӱӱш бисти улусла тоомјылу куучындажарга кӱӱнзедер, анайып бис Иегованы макка чыгарарыс. Бис удурлажаачыларга сӱӱштӱ баштанзаас, олордыҥ јӱреги јымжай берердеҥ айабас.

15, 16. а) Улус бисти Иегованыҥ Керечизи деп билип турза, кандый туза болот? Тем куучындап беригер. б) Римдегилерге 1:16-да айдылган Павелдиҥ сӧстӧрин бис канайып тузаланар аргалу?

¹⁵ Иегованыҥ Керечизи болгоноорды улуска јартап турыгар (Иса. 43:10). Слердиҥ тӧрӧӧндӧрӧӧр лӧ айылдаштараар слерди Иегованыҥ Керечизи деп билер болзо, катулана берген айалганы ӧдӧргӧ јеҥил болор. Мозамбикте јадып турган Франсишку ака мынайып бичиген: «Каролина эжимле чындыкты билип алала, улустыҥ божогоныла колбулу чӱм-јаҥдарга турушпазыс деп, тӧрӧӧндӧриске айдып салганыс. Је Каролинаныҥ эјези божой берерде, бӱткенис тыҥ ченелген. Не дезе, бистиҥ јерде кудай-јаҥла колбулу бир чӱм-јаҥ бар: божогон кижини јунып, јунган сууны тӧгӱп ийедилер. Бу сууны тӧккӧн јерге эҥ јуук тӧрӧӧн кижи ӱч тӱн конор учурлу. Анайып, божогон кижиниҥ сӱнези улуска каршу јетирбес деп иженип јадылар. Оныҥ учун тӧрӧӧндӧр бу чӱм-јаҥды Каролина эдер учурлу деп айткан».

¹⁶ Мындый айалгада бу эш-нӧкӧрлӧр нени этти? Франсишку јартайт: «Бис Иегованы сӱӱп јадыс, оны сӱӱндирерге кӱӱнзейдис.  Оныҥ учун бу чӱм-јаҥга турушпазыс деп айдарыста, Каролинаныҥ тӧрӧӧндӧри коркышту тыҥ ачынып, бисти: „Божогон кижини тообой турганаар“ — деп, бурулап турдылар. Оныҥ учун олор биске: „Айылыгарга качан да кирбезис те, болушпазыс та“ — деп айткан. Бис олорло бу теманы озо куучындашкан болгоныс, оныҥ учун олордыҥ ачынып калган тужында, бойыстыҥ кӧрӱмисти такып јартаарга албаданбаганыс. Је бу ӧйдӧ тӧрӧӧндӧристиҥ бирӱзи биске болужып: „Олор биске кӧрӱмин јартап салган эмес пе?“ — деп айткан. Соондо тӧрӧӧндӧр эмеш токунай берерде, бис ойто јакшы колбуларлу болуп калганыс. Керек дезе кезик тӧрӧӧндӧрис айылыска келип, библиялык бичиктер де сураган». Айдарда, божогон улус керегинде чындыкты улуска јартаарынаҥ качан да уйалбай турыгар! (Римдегилерге 1:16 кычырыгар.)

17. Јуундагы ака-эјелеристиҥ јуук кижизи божогон болзо, биске нени эдер керек?

¹⁷ Ака-эјелердиҥ кемизи-кемизи јуугын јылыйтса, биске олорго «кыйын-шыраныҥ ӧйине чыккан акадый» «чын најы» болорго албаданар керек (Укаа сӧстӧр 17:17). Бистиҥ аканы эмезе эјени Кудайга јарабас чӱм-јаҥдарда турушсын деп албадап турган болзо, олорго канайып болужар? Библиялык эки принцип кӧрӱп ийектер.

18. Иисус нениҥ учун ыйлай берген, бу бисти неге ӱредет?

¹⁸ «Ыйлап јӱргендерле кожо ыйлагар» (Рим. 12:15). Ачу-коронго тӱшкен кижини токунадатан сӧстӧр табарга, кезикте кӱч келижет. Је мындый ӧйдӧ кӧстиҥ јаажы кандый ла сӧстӧрдӧҥ артык болот. Иисустыҥ јуук најызы Лазарь божоп каларда, Мария, Марфа ла оныҥ јуук најылары ачу-коронго тӱшкендер. Тӧрт кӱн ӧдӱп каларда Иисус келген. Ол, Лазарьды тирилтип ийерин билген, је андый да болзо, ыйлажып тургандарды кӧрӱп, кӧстӧри јааштала берди (Иоанн 11:17, 33—35). Иисустыҥ ыйлай бергенинеҥ, Адазыныҥ сезимдери кӧрӱнген. Анайда ок оныҥ кӧзи јаашталганынаҥ бу билени тыҥ сӱӱп турганы кӧрӱнген. Мыны кӧрӱп, Мария ла Марфа јаан токунаду алган болор. Анайып ла бистиҥ ака-эјелер сӱӱжисти ле болужысты кӧрӱп турза, олор јаҥыскан  эмес, олордыҥ јанында сӱӱп турган најылары бар деп оҥдоп јадылар.

19. Јуугын јылыйткан кижини Јарлыкчы 3:7-деги айдылганыла канайып токунадарга јараар?

¹⁹ «Унчукпай јӱретен ӧй бар, айдатан ӧй бар» (Јарл. 3:7). Јуугын јылыйткан кижини база канайып токунадарга јараар? Андый кижини лаптап угыгар. Јӱрегинде не барын ачыгынча айдынып алзын. Ачу сӧстӧр айтса, ачынбагар (Иов 6:2, 3). Не дезе, ого оныҥ кӧрӱмин јаратпай турган тӧрӧӧндӧриниҥ албадажынаҥ оноҥ кӱч келижип турган болор. Эмезе оныла кожо мӱргӱп, «мӱргӱӱлдердиҥ Угаачызынаҥ» ийде-кӱч ле ару санаа сурагар (Сар. 65:2). Јараар болзо, Агару Бичикти эмезе бистиҥ бичиктердеҥ јарагадый јӧрмӧлди, темдектезе кӱӱн кӧдӱргедий биографияны, кожо кычырып ийерге јараар.

20. Келер јӧрмӧлдӧ кандый сурак шӱӱжилер?

²⁰ Божогон улус керегинде чынды ла «сӧӧк салар јерде јаткандарда [Кудайдыҥ сагыжында арткан улуста, ЈТ]» кандый ижемји барын билгенистеҥ јаан сӱӱнчи аладыс! (Иоанн 5:28, 29). Оныҥ учун айткан сӧстӧрисле де, эткен керектерисле де библиялык чындыкты улуска јалтанбай јартап туралы, анайда ок бу чындыкты куучындаарга келишкен учуралдарды бирӱзин де божотпой туралы. Келер јӧрмӧлдӧ Сатана улусты кӧгӱс јанынаҥ караҥуйда тударга, база кандый тузак тузаланып турганы керегинде шӱӱжилер. Бу тузак — спиритизм. Бистерге спиритизмле колбулу керектерге ле соот-јыргалдарга нениҥ учун киришпес керек деп билип аларыс.