1. Кудайдыҥ ончо ишчилери нени эдерге кӱӱнзеп јат? Нениҥ учун? (Кадарындагы јурукты кӧрӱгер.)

ИИСУС ХРИСТОС ӱренчиктерине: «Барыгар, ончо калыктарды ӱредигер» — деп јакарган (Матф. 28:19). Кудайдыҥ ончо чындык ишчилери бу јакаруны «толо бӱдӱрерине» ӱренип аларга кӱӱнзеп јат (2 Тим. 4:5). Бу иш биске удатпай бӱдӱретен эҥ керектӱ иш болот. Је кӱӱнис бар да болзо, кӧп јарлап болбой турган болорыс.

2. Бистерде кандый кӱчтер болот?

² Бистиҥ ӧйис ле ийде-кӱчис ӧскӧ дӧ немеге барат. Кем де бойыныҥ билезин эҥ керектӱзиле јеткилдеерге, кӧп иштеп јат. Кем де билезинде оноҥ ӧскӧ молјулар бӱдӱрет, оору-јоболло тартыжат, депрессияла эмезе јажы јаанаган сайын болуп турган кӱчтерле тартыжат. Андый да болзо, агару ишти бӱдӱреринде толо туружарга нени эдер керек?

3. Матфей 13:23-те бичилген Иисустыҥ сӧстӧринеҥ кандый тӱп-шӱӱлте эдерге јараар?

³ Кандый бир айалгалардаҥ улам јарлаар ишке кӧп туружарга келишпей турган болзо, санааркабагар. Ончо улус Каандыктыҥ тӱжӱмин бир тӱҥей экелип болбос деп, Иисус билер болгон. (Матфей 13:23 кычырыгар.) Иегова бистиҥ бастыра кӱчистеҥ албаданып эткен ижисти баалап јат (Евр. 6:10—12). Је биске јарлаар ишке тӱҥей ле кӧптӧдӧ туружар керек деп санаалар келип турган болор. Оныҥ учун бу јӧрмӧлдӧ мындый сурактар шӱӱжилер: јарлаар ишти баштапкы јерге канайып тургузар? Јӱрӱмди јеҥилтерге нени эдер? Јарлайтан  ла улусты чындыкка ӱредетен темигӱлеристи канайып тыҥыдар? Је озо баштап Кудайдыҥ ижин толо бӱдӱрери дегени нени темдектеп турганын билип алактар.

4. Агару ишке толо туружары дегени нени темдектейт?

⁴ Агару ишке толо туружарга турган болзоос, јарлаарында ла ӱренчиктер белетееринде бастыра бар аргаларысты тузаланар керек. Је Иегова агару ишке јӱк ле канча кире ӧй берип турганысты эмес, је бу ишти недеҥ улам эдип турганысты баалап јат. Бис христиан агару ишке * акту јӱрегистеҥ туружадыс, нениҥ учун дезе Иегованы ла јууктарысты сӱӱп јадыс (Марк 12:30, 31; Кол. 3:23). Иеговага акту јӱректеҥ иштеери дегени нени темдектеп јат? Бу дезе, оныҥ биске берген јакылтазын јакшы бӱдӱрерге, бастыра ийде-кӱчисти берерин темдектейт. Бу ишти баалап турган болзоос, јарлаарга келиже берген кандый ла арганы божотпой јадыс.

5, 6. Јарлаар ишке кӧп ӧйин берип болбой турган кижи, бу ишти тӱҥей ле баштапкы јерге тургузар аргалу деп кӧргӱзип турган тем куучындап беригер.

⁵ Темдектезе, јиит уул гитарала ойноорго сӱӱп турган болзын. Ол гитарала тӱни-тӱжи де ойноорго белен. Оныҥ учун бу уул амыраар кӱндерде гитарист болуп иштеерге кафеге кирип алган. Је кафениҥ иш-јалы коркышту ас болордо ол понедельниктеҥ ала пятницага јетире магазинде кассир болуп иштейт. Бу уул кӧп саба ӧйин магазинде ӧткӱрип турган да болзо, оныҥ бастыра санаазы музыкада. Оныҥ учун ол профессиональный кӱӱчи болорго кӧп тазыктырынат. Бош ло боло берзе, гитараны алып, тоолу минутка да болзо ойноп јат.

⁶ Анайып слер де айалгалараардаҥ улам јарлаар ишке кӧп туружып болбой турган болорыгар. Је јарлаар ишти слер сӱӱп јадыгар. Слер улустыҥ јӱрегин сӱӱнчилӱ јарла томултарга бойыгардыҥ темигӱлеригерди тыҥыдарга албаданадыгар. Је тӱҥей ле керектереер кӧп болгонынаҥ улам слерде мындый сурак чыгып турган болор: јарлаар ишти канайып баштапкы јерге тургузар?

7, 8. Јарлаар ишке Иисустыҥ кӧрӱми кандый болгон, бис оноҥ кандый тем алар аргалу?

⁷ Иисус Христос јарлаар ишке кандый кӧрӱмдӱ болорыныҥ эҥ јакшы темин кӧргӱскен. Јарлаар ишти ол баштапкы јерге тургускан (Иоанн 4:34, 35). Иисус сӱӱнчилӱ јарды канча ла кире кӧп улус уксын деп, јойу канча јӱс километр јер ӧткӧн. Ол улуска куучындайтан арга келиже ле берзе, јарлап туратан. Кудайдыҥ Каандыгы керегинде јарлаар иш оныҥ јӱрӱминде эҥ учурлу иш болгон.

⁸ Бис келишкен ле тушта јарлап турзаас, Иисустаҥ тем аладыс. Јарлаар ишке болуп, бис бойыстыҥ кӱӱнисти экинчи јерге тургузарга белен (Марк 6:31—34; 1 Петр 2:21). Кезик ака-эјелер подсобный пионер, пионер, керек дезе специальный пионер болуп иштейт. Кезиги ӧскӧ тил ӱренип, јарчылар јетпей турган јерге кӧчӱп барат. Је кӧп саба ишти Кудайга иштееринде бастыра ийде-кӱчин берип турган јарчылар бӱдӱрип јат. Бис пионер де, пионер эмес те болзоос, Иегова бистеҥ кӱчис јетпес неме некебей јат. Иегова бистиҥ ончобысты «алкышту Кудайдыҥ мактулу Сӱӱнчилӱ Јарын» јарлап, сӱӱнчи алзын деп кӱӱнзейт (1 Тим. 1:11; Јаҥ. т. 30:11).

9. а) Павел јарлаар ишти баштапкы јерге тургускан деп, нениҥ учун айдарга јараар? б) Апостолдордыҥ ижи 28:16, 30, 31-де айдылганыла болзо, Павел јарлаар ишке кандый кӧрӱмдӱ болгон?

⁹ Элчи Павел јарлаар ишти баштапкы јерге тургузарыныҥ сӱрекей јакшы темин кӧргӱскен. Павел экинчи миссионер јорыгында Коринфте јаткан. Ол тушта оныҥ акчазы јетпей турарда, ого палаткалар кӧктӧӧргӧ келишкен. Је бу ишти Павел баштапкы јерге тургуспаган. Ол Коринфтеги улуска сӱӱнчилӱ јарды јарлаарга ла олорго јӱк болбоско бойын јеткилдеген (2 Кор. 11:7). Је јарлаар иш ого тӱҥей ле баштапкы јерде болгон, оныҥ учун ол кажы ла субботто јарлап туратан. Кийнинде айалга солына берерде, Павел кӧп јарлап, бастыра кӱчиле «Иисус — ол Христос деп, иудейлерге кереледи» (Ап. ижи 18:3—5; 2 Кор. 11:9). Канча да ӧйдиҥ туркунына, Павел Римде айылда эки јылга каруулда болордо, самаралар бичиген, анайда ок келген улуска јарлаган. (Апостолдордыҥ ижи 28:16, 30, 31 кычырыгар.) Павелдиҥ јарлаар ижине не де буудактап болбойтон. Ол мынайып бичиген: «Кудайдыҥ быйаныла анайда јалчы болуп, чӧкӧбӧйдис» (2 Кор. 4:1). Биске Павел чылап кӧп иштеерге келижип турган да болзо, бис Каандыктыҥ ижин тӱҥей ле баштапкы јерге тургузар аргалу.

10, 11. Су-кадыгыс уйан болзо, јарлаар ишке канайып толо туружарга јараар?

¹⁰ Јажаар јаанаган сайын эмезе уйан су-кадыгардаҥ улам айылдар сайын јарлаарга кӱч болуп турган болзо, слер ӧскӧ аргала јарлаар аргалу. Баштапкы чакта христиандар кайда ла улус бар јерлерде јарлаган. Олор Каандык керегинде «ончо улус алдында ла айылдар сайын» ӱредип, арга ла боло берзе, улусла куучындажып туратан (Ап. ижи 17:17; 20:20). Слерге узак ӧйгӧ базарга кӱч болзо, улусту јерде отурып, ары-бери ӧткӧн улуска јарлаарга јараар. Анайда ок керектерле јӱрӱп јарлаарга (неформально), самаралар бичиирге ле телефонло јарлаарга јараар. Айылдар сайын кӧп јарлап болбой турган кезик ака-эјелер јарлаар иште канайып та болзо туружар аргалу болгонына тыҥ сӱӱнип јадылар.

¹¹ Су-кадыгар уйан да болзо, слер Кудайдыҥ ижин толо бӱдӱрер аргалу. Тем эдип, элчи Павелдиҥ айткан сӧстӧрин такып кӧрӱп ийектер. Ол айткан: «Бу артыкташкан кӱч бистийи эмес, Кудайдыйы болгоны јарт» (2 Кор. 4:7). Бу ийде-кӱч Павелге миссионер јорыгында ооруп каларда керек болгон. Ол Галаттагы христиандарга бичиген: «Слерге  баштапкы катап Сӱӱнчилӱ Јар јарлаарымда, эди-канымда чине јок болгонын билеригер» (Гал. 4:13). Слер Павелдеҥ кандый тем алар эдигер? Андый айалгада медперсоналга јарлагар, темдектезе эмчилерге ле медсестраларга, не дезе, айылдар сайын јарлаган ӧйдӧ андый улусты тударга кӱч келижет.

12. Кӧс ару болор учурлу дегени нени темдектейт?

¹² «Эт-кан јарыткыжы — кӧс. Анайдарда, кӧзиҥ ару болзо, ончо эди-каныҥ јарык болор» — деп, Иисус айткан (Матф. 6:22). Бу сӧстӧрлӧ ол биске тургузып алган амадубыстаҥ туура чыкпас керек деп айдарга сананган. Ол Кудайга иштеерин баштапкы јерге тургузып, биске сӱреен јакшы тем кӧргӱскен. Иисус бойыныҥ ӱренчиктерин Иеговага иштеери ле оныҥ Каандыгын бедиреери эҥ учурлу деп ӱреткен. Иисустаҥ тем аларга турган болзоос, «элдеҥ озо Оныҥ Каандыгын ла чынын» бедиреп, сӱӱнчилӱ јарды јарлаарын баштапкы јерге тургузарыс (Матф. 6:33).

13. Јарлаар ишке кӧп туружарга не болужар?

¹³ Је улусты Иеговала таныштырып, оны сӱӱп баштазын деп болужарга кӧп ӧйди канайып табар? Јӱрӱмди јеҥилтерге јараар *. Темдектезе, иштеер кӱндерде кӧп јарлаарга  графигерди солып болорыгар ба? Эмезе кӧп ӧйигер соот-јыргалга ла амырашка барып турган болзо, слер нени солыыр эдигер?

14. Бир биле јарлаар ишке кӧп туружарга нени солыган?

¹⁴ Элайас деп аксагал ла оныҥ ӱйи нени солыганын кӧрӱп ийектер. Ол ака куучындайт: «Бисте пионерлер болуп иштейтен арга јок болгон, је та нени де солыыр керек деп оҥдоп турала, кӧп јарлайтан амаду тургузып, оны араайынаҥ бӱдӱрип баштаганыс. Бис чыгымдарысты астадып, соот-јыргалга ла амырашка (бого ӧйинеҥ ӧткӱре кӧп ӧй бергенис) барып турган ӧйди база астадып ийгенис. Анайда ок иштеер график эптӱ болзын деп, иштиҥ јааныла куучындажып алганыс. Анайып бисте эҥирлер сайын јарлайтан, Агару Бичикле кӧп ӱредӱлер ӧткӱретен, керек дезе иштеер кӱнде айына эки катап тӱште јарлайтан арга ачылган. Бу биске јаан сӱӱнчи экелген!»

15, 16. 1 Тимофейге 4:13, 15-те берилген јӧпти тузаланзаас, јакшы јарлаарга канайып ӱренип аларыс? (« Јарлаар ишке толо туружарга болужатан амадулар» деген рамканы кӧрӱгер.)

¹⁵ Јарлаар ишке толо туружарга база нени эдер керек? Кезик иштерде улусты јаантайын квалификациязын бийиктедер ӱредӱлерге аткарып јат. Каандык керегинде јарлаар иш бого тӱҥей. Оныҥ учун биске јарлайтан темӱгилерди ле ченемелди јаантайын тыҥыдар керек (Укаа 1:5; 1 Тимофейге 4:13, 15 кычырыгар).

¹⁶ Мында биске не болужар? «Јӱрӱмис ле ижибис» деген неделе сайынгы туштажуда берилип турган јӧптӧрди тузаланар керек. Бу туштажуда бис јакшы јарлаарына ӱренедис. Темдектезе, туштажуныҥ председатели јарчылардыҥ бӱдӱрген јакылталарына јӧп берзе, оны јарлаар иште тузаланарга јараар.  Анайда ок бойыгардыҥ бӧлӱгердиҥ јарлаар иштиҥ кӧрӧӧчизинеҥ болуш сурап, оныла эмезе ченемелдӱ јарчыла, пионерле эмезе аймак кӧрӧӧчиле јарлап барарга јараар. Јарлаар иштиҥ јепселдериле канча ла кире јакшы тузаланарга ӱренип алзаас, јарлаар иш ле улусты чындыкка ӱредери ончо ло кире јаан сӱӱнчи экелер.

17. Иегованыҥ ижин толо бӱдӱрзеес, кандый алкыштар аларыс?

¹⁷ «Кудайга [Кудайла, ЈТ] кожо иштеп јӱргенибис» сӱрекей јаан кӱндӱ! (1 Кор. 3:9). Бис «эҥ артыгын талдап», јарлаар ишти баштапкы јерге тургузып турзаас, јаан сӱӱнчи аларыс (Флп. 1:9; Сар. 100:2). Бис — Кудайдыҥ ишчилери, оныҥ учун бисте кӱчтер де болуп турза, јарлаар ишке туружатан ийде-кӱчти Иегова берер деп алаҥзыбай јадыс (2 Кор. 4:1, 7; 6:4). Јарлаар ишке ас та болзо, кӧп тӧ болзо, је акту јӱрегистеҥ туружып турган болзоос, сӱӱнчи аларыс (Гал. 6:4). Иегованыҥ ижин толо бӱдӱргенисле, Кудайды ла јуугысты сӱӱп турганысты кӧргӱзедис. Анайып бойысты да, бисти угуп турган улусты да аргадап аларыс (1 Тим. 4:16).