1. Ефестегилерге 6:10—13-ле болзо, Иегова биске канайып болужат?

ИЕГОВА биске башка-башка аргаларла ӧштӱлерге удура турарга болужат. Эҥ јаан ӧштӱлер — Сатана ла оныҥ кӧрмӧстӧри. Иегова биске олордыҥ каршузы керегинде чынды озодо ачып, олорло тартыжатан ончо керектӱ немени берет. (Ефестегилерге 6:10—13 кычырыгар.) Оныҥ учун бис Иегованыҥ болужын алып, ого иженип турзаас, Дьяволго удура турар аргалу болорыс. Ол тушта бис те элчи Павел чилеп алаҥзу јогынаҥ: «Кудай бис учун болзо, кем биске удура?» — деп айдарыс (Рим. 8:31).

2. Бу јӧрмӧлдӧҥ нени билип аларыс?

² Бис Сатана ла оныҥ кӧрмӧстӧриле јилбиркебей јадыс. Карын, чындык христиандар болуп, Иегова керегинде билерге ле ого иштеерге кӱӱнзейдис (Сар. 25:5). Је андый да болзо, Сатанага тӧгӱндетпеске, оныҥ улусты канайып тӧгӱндеп турганын билип алар керек (2 Кор. 2:11). Бу јӧрмӧлдӧ Сатана ла оныҥ кӧрмӧстӧри кӧп сабада кандый тузакты тузаланып турганын ла олорго канайып удура турарын билип аларыс.

3, 4. а) Спиритизм ол не? б) Спритизмге кӧп улус бӱдет пе?

³ Сатананыҥ ла кӧрмӧстӧрдиҥ сӱӱген тузагы — спиритизм. Спиритизмле уружып тургандар бойлорын, тегин улустыҥ кӧрӱп болбозын кӧрӱп ийер эмезе эдип болбозын эдип ийер аргалу деп айдыжат. Олордыҥ кезиги келер ӧйдӧ не болорын  ырым-белгениҥ (гадание) эмезе астрологияныҥ болужыла айдып берет. Кезиги божоп калган улусла куучындажар аргалу болот. Ӧскӧлӧри улусты тармалап салат *.

⁴ Спиритизмге кӧп улус бӱдет пе? Бир шиҥжӱле болзо, Латинский Американыҥ ла Карибский талайдыҥ ороондорына кирип турган 18 ороонныҥ ӱчинчи бӧлӱк кире албатызы тармага ла ырым-белгеге бӱдӱп јат, анайда ок ончо ло кире улус сӱнелерле куучындажарга јараар деп сананат. Африканыҥ 18 ороонында ӧткӱрилген шиҥжӱле болзо, албатыныҥ јарымызынаҥ кӧп улус тармага бӱдӱп јат. Је бис кайда да јадып турган болзоос, биске спиритизмнеҥ коруланар керек, не дезе, «бастыра телекейди мекелеечи» Сатана улусты тӧгӱндеерге албаданып јат (Ачыл. 12:9).

5. Спиритизмге Иегова Кудайдыҥ кӧрӱми кандый?

⁵ Иегова — «чынныҥ Кудайы» (Сар. 31:5). Спиритизмге Иегова Кудайдыҥ кӧрӱми кандый? Ол оны кӧрӧр кӱӱни јок. Иегова Израиль албатыга мынайып айткан: «Слердиҥ ортогордо кем де бойыныҥ уулын эмезе кызын отко салбас, белгелебес, тармала урушпас, ырымдабас, улусты тармалап бириктирбес, калју тындарла куучындажып тургандарга баштанбас, аайлаткыштабас эмезе ӧлгӧндӧрдӧҥ нени де сурабас учурлу. Нениҥ учун дезе бу керектерди эдип турган кандый ла кижи Иеговага јескинчилӱ болот» (Јаҥ. т. 18:10—12). Христиандардаҥ Израиль албатыга берилген Јасакты бӱдӱрери некелбей де турган болзо, олор спиритизмге Кудайдыҥ кӧрӱми солынбаганын билип јат (Мал. 3:6).

6. а) Спиритизмде кандый каршу бар? б) Јарлыкчы 9:5-ле болзо, божогон улусла не болот?

⁶ Иегова спиритизмниҥ каршузын билип, бисти оныла урушпазын деп кӱӱнзейт. Нениҥ учун дезе Сатана спиритизмниҥ болужыла улусты тӧгӱндеп јат. Темдектезе, божогон улус ол јерде оноҥ ары јӱрет деп ӱредет. (Јарлыкчы 9:5 кычырыгар *.) Анайда ок Сатана спиритизмниҥ болужыла улусты коркыдып, Иегованаҥ туура апарарга албаданат. Ол, спиритизмле уружып турган улусты Иеговага эмес, је калју тындарга ижензин деп кӱӱнзейт.

7. Иегова бистерге Сатана ла оныҥ кӧрмӧстӧриниҥ тӧгӱнине удура турарга канайып болужат?

⁷ Ӧрӧги айдылганыла, Иегова бистерге Сатананыҥ ла оныҥ кӧрмӧстӧриниҥ тӧгӱнине кирбеске нени эдерин јартап берген. Эмди, олорго удура турарга болужатан тузалу јӧптӧр кӧрӱп ийектер.

8. а) Калју тындарга удура турарга, озо ло баштап биске не болужар? б) Сарын 146:4 божогон улус керегинде Сатананыҥ тӧгӱнин канайып илезине чыгарат?

⁸ Агару Бичикти кычырып, шӱӱп сананып турыгар. Бу арга калју тындардыҥ тӧгӱнинеҥ коруланатан эҥ јакшы арга болот. Агару Бичик, курч кылыш чылап, Сатананыҥ тӧгӱнин Кудайдыҥ чындыгынаҥ ылгаштырарга болужат (Еф. 6:17). Анайып, божогон улус тирӱ улусла куучындажып турган деп тӧгӱнди, Кудайдыҥ Сӧзи илезине чыгарып јат. (Сарын 146:4 кычырыгар *.) Агару Бичикте айдылганыла, келер ӧйдӧ не болорын јӱк ле Иегова билер аргалу (Иса. 46:10). Калју тындардыҥ тӧгӱнин јаман кӧрӧргӧ лӧ олорго удура турарга, Агару Бичикти јаантайын кычырып, шӱӱп сананып турар керек.

9. Биске недеҥ кыйып турар керек?

 ⁹ Спиритизмниҥ кандый ла бӱдӱмдеринеҥ кыйыгар. Бис чындык христиандар, оныҥ учун спиритизмле тудуш не ле немедеҥ кыйып јадыс. Темдектезе, божогон улусла колбу тударга, неме билер улуска эмезе ӧскӧ кандый бир аргага баштанбай јадыс. Ӧткӧн јӧрмӧлдӧ айдылганыла, бис божогон улусты јууйтаныла колбулу чӱм-јаҥдарга турушпай јадыс. Нениҥ учун дезе андый чӱм-јаҥдар божогон кижиниҥ сӱнези оноҥ ары јӱрет деген ӱредӱге тайанат. Анайда ок келер ӧйди билип аларга, астрологторго ло ырым-белгеечилерге баштанбай јадыс (Иса. 8:19). Нениҥ учун дезе анайып Сатана ла оныҥ кӧрмӧстӧриле чике колбу боло берердеҥ айабас. Бу јаан каршуга экелер деп оҥдоп јадыс.

10, 11. а) Эфестеги христиандар чындыкты билип алала, нени эткен? б) 1 Коринфтегилерге 10:21-ле болзо, бистерге нениҥ учун олордоҥ тем алар керек, тем аларга нени эдер керек?

¹⁰ Оккультизмле колбулу немелердеҥ айрылыгар. Баштапкы чакта Эфестиҥ кезик улузы магияла урушкан. Је олор чындыкты оҥдоп ийеле, тӱрген ле керектӱ алтамдар эткен. Апостолдордыҥ ижинде 19:19-та мынайып айдылат: «Илбизиндеп јӱргендердиҥ тапту кӧбизи тӱрбектерин чогуп, ончо улус кӧзинче ӧртӧдилер». Магияныҥ бичиктериниҥ баазы ас эмес те болгон болзо, је Эфестеги христиандар олорды ӧскӧ улуска бербеген де, акчага болуп сатпаган да — карын олорды ӧртӧп салган. Нениҥ учун дезе олор калју тындарга удура турар керек деп оҥдогон, анайда ок Иегованы сӱӱндирерге кӱӱнзеген.

¹¹ Бу христиандардаҥ кандый тем аларга јараар? Оккультизмле колбулу ончо немелерди: амулеттерди, талисмандарды, калју тындардаҥ коруланарга тузаланылып турган не ле немелерди јоголтып салза, ойгор болор эди. (1 Коринфтегилерге 10:21 кычырыгар.)

12. Соот-јыргалдар талдаарга, кандый сурактар болужар?

¹² Соот-јыргалдарды талдаарында ойгор болугар. Бойыгардаҥ сурагар: «Мен оккультизм  керегинде бичиктер, журналдар эмезе интернет-јӧрмӧлдӧр кычырбайдым ба? Анайда ок андый кожоҥдорды, кинолорды, телеберилтелерди ле видеоойындарды канайып талдайдым? Анда вампирлерле, зомбиле эмезе спиритизмле колбулу неме јок по? Эмезе анда магия, тарма, каргыш јилбилӱ ле јакшы эдип кӧргӱзилбейт пе?» Кезик соот-јыргалдарда фантастика эмезе чӧрчӧктӧр спиритизмле колбулу болбой турган да болзо, олорды талдаарында ойгор болугар. Слердиҥ тӱп-шӱӱлтегер Иегованыҥ кӧрӧр кӱӱни јок немелердеҥ кыйып турарга болушсын. Биске Кудайдыҥ алдында «ару уйатту болорго, ЈТ», албаданар керек (Ап. ижи 24:16) *.

13. Бис не керегинде куучындажарга кӱӱнзебейдис?

¹³ Кӧрмӧстӧр керегинде учуралдар куучындабагар. Бис Иисустаҥ тем аларга кӱӱнзейдис (1 Петр 2:21). Иисус јерге келердеҥ озо теҥериде јӱрген, оныҥ учун Сатана ла оныҥ кӧрмӧстӧри керегинде кӧпти билер болгон. Је Иисус калју тындар керегинде учуралдар куучындабаган. Ол Сатананы эмес, је Иегованы јарлаарга кӱӱнзеген. Айдарда бис Иисустаҥ тем алып турган болзоос, кӧрмӧстӧр керегинде учуралдар куучындашпазыс. Карын, бистиҥ куучыныстаҥ, јӱрегис «чындыктыҥ јакшы сӧзинеҥ ӧкпӧрип» турган деп кӧрӱнип турзын (Сар. 45:1).

14, 15. а) Биске нениҥ учун калју тындардаҥ коркыбас керек? б) Иегова бойыныҥ албатызын корулап турганы недеҥ кӧрӱнет?

¹⁴ Калју тындардаҥ коркыбагар. Бӱгӱнги кӱнде јеткерлӱ учуралдар, оорулар, керек дезе ӧлӱм де сакыбаган јанынаҥ келет. Је ӱзе немеде калју тындарды бурулабас керек. Нениҥ учун дезе Агару Бичикле болзо, бистиҥ кажыбыс ла «ӧйдӧҥ лӧ учуралдаҥ» камаанду  болуп калардаҥ айабас (Јарл. 9:11). Кандый да болзо, Иегова кӧрмӧстӧрдӧҥ канча киреге кӱчтӱ. Темдектезе, Иегова Сатанага Иовты ӧлтӱрерге бербеген (Иов 2:6). Моисейдиҥ ӧйинде Иегова Египеттиҥ тармаачы улузынаҥ кӱчтӱ болгонын кӧргӱскен (Чыг. 8:18; 9:11). Анайда ок Иегова Иисуска Сатананы ла оныҥ кӧрмӧстӧрин теҥеридеҥ јердӧӧн таштап ийетен јаҥ берген. Удабас Иисус Сатананы ла оныҥ кӧрмӧстӧрин тӱби јок јерге (бездна) таштап ийзе, олор кемге де јаманын јетирип болбос (Ачыл. 12:9; 20:2, 3).

¹⁵ Иегова бойыныҥ албатызын корулап турганыныҥ сӱрекей кӧп керелери бар. Сананып кӧрӱгер: бис бастыра јердиҥ ӱстине јарлап, улусты чындыкка ӱредедис (Матф. 28:19, 20). Анайып Дьяволдыҥ куурмакту керектерин илезине чыгарадыс. Ол ийде-кӱчтӱ де болзо, је бисти токтодып болбос. Оныҥ учун биске калју тындардаҥ коркыбас керек. «Иегованыҥ кӧзи бастыра јӱрегиле Кудайга беринген кижиге ийдезин берерге, бастыра јерди ајыктап кӧрӧт» — деп, бис билерис (2 Лет. 16:9). Бис Иеговага чындык артсаас, кӧрмӧстӧр биске јаан каршу јетирип болбос.

16, 17. Калју тындардаҥ коркыбай, олорго удура турган кижиниҥ учуралын куучындап беригер.

¹⁶ Калју тындарга удура турарга, анчада ла таныштар ла тӧрӧӧндӧр ажыра табарулар болуп турза, јалтанбас болор керек. Иегова јалтанбас улуска алкыжын берет. Ганадагы Эрика деп эјеле мындый учурал болгон. Ол 21 јаштуда Агару Бичикти ӱренип баштаган. Кам кижиниҥ кызы болгоны учун, ого спиритический чӱм-јаҥга туружар керек болгон. Бу чӱм-јаҥла болзо, божогон ада-ӧбӧкӧлӧрдиҥ сӱнелери каршу јетирбезин деп, тайылгага берилген этти јиир керек. Эрика этти јибей турарда, тӧрӧӧндӧри оны сӱнелерди ачындырган деп бурулап, эмди сӱнелер атыйланып, оору-јобол ийер деп коркып турган.

¹⁷ Тӧрӧӧндӧри Эриканы албан кӱчле бу чӱм-јаҥды бӱдӱрзин деп албадап турарда, ол тӱҥей ле болбогон. Мынайып ого айылынаҥ јӱре берерге келишкен. Андый да болзо, ол тышкары артпады, оны Керечилер айылына јатыргызып алган. Анайып Иегова ого ака-эјелердеҥ турган кӧгӱс јаҥы биле сыйлаган  (Марк 10:29, 30). Тӧрӧӧндӧри Эрикала колбуларын ӱзӱп, керек дезе кийимин ӧртӧп тӧ койордо, Эрика Иеговага чындык артып, сууга чӧҥӱрилген. Эмди ол пионердиҥ ижин бӱдӱрет. Эрика кӧрмӧстӧрдӧҥ коркыбай јат. Тӧрӧӧндӧри керегинде Эрика айдат: «Мениҥ јууктарым, Иеговага бӱдӱп, сӱӱштӱ Кудайыска иштегенинеҥ берилип турган јайымды алзын деп, кажы ла кӱн мӱргӱп јадым».

18. Бис Иеговага иженип турзаас, кандый алкыштар аларыс?

¹⁸ Бистер мындый ченелтелерди ончобыс ӧтпӧс тӧ болорыс. Је кажыбыска ла калју тындарга удура туруп, Иеговага иженер керек. Анайып бис кӧп алкыштар аларыс ла Сатананыҥ тӧгӱнине кирбезис. Анайда ок кӧрмӧстӧрдӧҥ коркып, Иегованаҥ јана баспазыс. Је эҥ керектӱзи — Иеговала колбуларыс тыҥыыр. Иаков 4:7, 8-те айдылган: «Кудайга багыгар. Кӧрмӧскӧ удура турыгар, ол слердеҥ кача берер. Кудайга јууктагар, Ол слерге јууктаар».