1, 2. Иисус јердеги калганчы кӱнинде нениҥ учун тыҥ санааркаган?

ИИСУСТЫҤ јердеги калганчы кӱни коркышту санааркашту болгон. Нениҥ учун дезе ол калју улуска кыйнадып, олордыҥ колынаҥ ӧлӧр учурлу болгон. Је Иисусты ӧскӧ неме тыҥ санааркаткан — ол Адазын тыҥ сӱӱген ле оны сӱӱндирерге кӱӱнзеген. Бу јаан ченелтеде ол Иеговага чындык артса, Кудайдыҥ ады акталар деп билер болгон. Анайда ок Иисус улусты сӱӱген. Оныҥ Кудайга чындык артканынаҥ улустыҥ ӱргӱлји јӱрӱми камаанду болгонын билер болгон.

² Иисус коркышту јаан стрессте болгон до болзо, јӱрегиндеги амырын јылыйтпаган. Ол: «Слерге амыр берип... јадым» — деп, элчилерине айткан (Иоанн 14:27). Иисуста «Кудайдыҥ... амыры» болгон. Бу амыр кижиге токунал берип јат. Мындый амыр Иеговала јуук колбуларлу кижиге берилет. «Кудайдыҥ... амыры» Иисустыҥ јӱрегиндеги санааркаштарын јоголтып салган (Флп. 4:6, 7).

3. Бу јӧрмӧлдӧ бис нени шӱӱп кӧрӧрис?

³ Бисте Иисуска тӱшкен кӱчтер болбозо до, је ӧскӧ ченелтелер тӱҥей ле болор (Матф. 16:24, 25; Иоанн 15:20). Кезикте биске, Иисуска чылап, чочыдылу санаалар келердеҥ айабас. Биске мындый санаалардаҥ айрылып, јӱректеги амырды јылыйтпаска не болужар? Иисуска јерде Кудайдыҥ ижин бӱдӱрип јӱрерде не болушканын кӧрӱп ийектер, анайда ок бис ченелтелерге туштап турзаас, оноҥ кандый тем алар аргалу деп сананып ийектер.

4. Иисус јердеги калганчы кӱнинде кӧп мӱргӱген деп, недеҥ кӧрӱнет? 1 Фессалоникадагыларга 5:17-де христиандарга кандый јӧп берилет?

⁴ 1 Фессалоникадагыларга 5:17 кычырыгар. Иисус јердеги калганчы кӱнинде кӧп мӱргӱген. Ол бойыныҥ ӧлӱмин эске алатан Эҥирди кийдирип јаткан тужында, элчилерге сӱр-темдектерди, калаш ла кызыл аракыны, берердеҥ озо мӱргӱп ийген (1 Кор. 11:23—25). Иисус анайда ок Пасханы ӧткӱрген туранаҥ јӱрердеҥ озо ӱренчиктериле кожо база мӱргӱген (Иоанн 17:1—26). Олор Гефсимания деп јерге једип келерде, ол ойто ло канча катап мӱргӱген (Матф. 26:36—39, 42, 44). Анайда ок Иисус божоор ло алдында Адазына ойто ло катап баштанган (Лука 23:46). Ол бу јаан учурлу кӱнде болгон ончо немени Иеговага куучындаган.

5. Элчилер нениҥ учун коркый бергендер?

⁵ Иисус кӧп мӱргӱп, Адазынаҥ болуш сураган, оныҥ учун ченелтелерди ӧдӱп чыккан. Је элчилер тӱниле сергелеҥ артып, мӱргӱп болбогон. Мынаҥ улам ченелтениҥ ӧйинде олор коркый бергендер (Матф. 26:40, 41, 43, 45, 56). Анайып, бис кӱч ӧйлӧрдӧ Иисустаҥ тем алып, кӧп мӱргӱп турзаас, Кудайга чындык артарыс. Је бис не керегинде мӱргӱӱр аргалу?

6. Кудайга бӱдӱп турганыс јӱректеги амырысты кичеерге канайып болужат?

⁶ Мӱргӱӱлде бис Иегованаҥ: «Бӱдер кӱӱнибисти [бӱткенисти] тыҥыдарга болуш» — деп, сураар аргалу (Лука 17:5; Иоанн 14:1). Бӱдери биске керектӱ болот, не дезе, Сатана Христостыҥ бастыра ӱренчиктерин ченеп јат (Лука 22:31). Ченелтелердиҥ учы-кыйузы кӧрӱнбей де турза, Кудайга бӱдӱп турганыс  јӱректеги амырды кичеерге канайып болужар? Иеговага бӱдӱп турганыс, ченелтелерди ӧдӧргӧ бойыстыҥ јаныстаҥ ӱзени эдип, Кудайга иженерге болужар. Нени этсе јакшы болорын ол бистеҥ јакшы билер деп бӱдӱп турганыс јӱрегиске амыр берет (1 Петр 5:6, 7).

7. Роберт аканыҥ теминеҥ бис неге ӱренер аргалу?

⁷ Кандый ла кӱчтердиҥ ӧйинде мӱргӱп турзаас, јӱректеги амырды кичееп аларыс. Кудайдыҥ чындык ишчизиниҥ, 80 јаштаҥ ажа берген Роберт деп аксагалдыҥ, темин кӧрӱп ийектер. Бу ака мынайып куучындайт: «Филиппыдагыларга 4:6, 7-де айдылган сӧстӧр јӱрӱмниҥ кӧп кӱчтерин ӧдӧргӧ болушкан. Менде акча-манатла кӱчтер болгон. Мен кандый да ӧйгӧ аксагал да болбой баргам». Роберт јӱректеги амырын кичеерге нени эдет? «Токунабай ла турзам, капшай ла мӱргӱп јадым. Канча ла кире кӧп мӱргӱзеҥ, јӱрегиҥе ончо ло кире амыр келет» — деп, ол айдат.

8. Иоанн 8:29-ла болзо, Иисуска јӱректеги амырын кичеерге не болушкан?

⁸ Иоанн 8:29 кычырыгар. Иисус истедип те турарда, амырын јылыйтпаган. Нениҥ учун дезе Адазына чындык артканыла оны сӱӱндирип турганын билген. Ол јеҥил эмес те болзо, Кудайга јаантайын сӧсуккур болгон. Бого коштой ол Иегованы сӱӱген ле ого иштеерин баштапкы јерге тургускан. Иисус јерге келердеҥ озо Адазыныҥ ус ишчизи болгон (Укаа 8:30). Јерге келерде, улусты теҥеридеги Адазы керегинде чындыкка ӱреткен (Матф. 6:9; Иоанн 5:17). Мынаҥ улам Иисус јаан сӱӱнчи алган (Иоанн 4:34—36).

9. Јарлаар иште эрчимдӱ турушканы јӱректеги амырды кичеерге канайып болужат?

 ⁹ Иисустаҥ тем аларга турган болзоос, Иеговага сӧсуккур болуп, «Кайраканга иштеерине» кӧп туружар керек (1 Кор. 15:58). Бис јарлаар ишке «эрчимдӱ» туружып турзаас, бойыстыҥ кӱчтериске тыҥ санааркабай јадыс (Ап. ижи 18:5, ЈТ). Кезикте јарлаар иште јӱрӱми бистеҥ де кӱч улуска туштайдыс. Је олор Иеговала таныжып, оны сӱӱп, Агару Бичиктиҥ јӧптӧриле јӱрӱп баштаза, јӱрӱмин јакшы јанындӧӧн солып, јаан сӱӱнчи алат. Бис мыны кӧрӱп, Иегова бисти артыргыспас деп, оноҥ тыҥ бӱдӱмјиленип јадыс. Анайып јӱректеги амырды кичееп аладыс. Бастыра јӱрӱмине депрессияла, бойын эш кереги јок деп сезип турганыла тартыжып турган эје мынайып айдат: «Эрчимдӱ јарлап турзам, сӱӱнчини ле јӱрегимдеги амырды кичеерге јеҥил болот. Нениҥ учун дезе јарлаар иште Иеговага јуук болодым».

10. Бренда эјениҥ теми слерди неге ӱредип јат?

¹⁰ Эмди Бренда эјениҥ темин кӧрӱп ийектер. Оныҥ бойында ла кызында рассеянный склероз. Бренда инвалидтердиҥ колясказында отурат, оныҥ кӱчи немеге јетпей јат. Кезикте ол айылдар сайын јарлайт, је кӧп сабада самаралар бичийт. Ол мынайда айдат: «Бу системада су-кадыгым оҥдолбойтон эмтир деп оҥдоп, ӱзе бойымды јарлаар ишке бергем. Јарлап јӱре, бойымныҥ санааркаштарымды сананбай, бистиҥ јуунныҥ территориязында јадып турган улуска канайып болужарын сананып јадым. Бу меге келер ӧй керегинде јаантайын шӱӱп сананарга болужат».

11—13. а) Элчилер де, ӧскӧ дӧ улус Иисустыҥ чындык најылары болуп турганын канайып кӧргӱскен? б) Иисус олорло најылашканынаҥ кандый туза алган?

¹¹ Иисус јерде Кудайдыҥ ижин бӱдӱрип јӱрерде, элчилер оныҥ чындык најылары болгон. Анайып олор «кезик најы кожо чыкканынаҥ да јуук болот» деп библиялык укаа сӧстиҥ чынын кӧргӱскен (Укаа 18:24). Иисус мындый најылыкты сӱреен баалаган. Оныҥ јарлап јӱрген тужында кожо чыккан карындаштарыныҥ кемизи де ого бӱтпеген (Иоанн 7:3—5). Керек дезе олор оны јӱӱлип калган деп айдышкан (Марк 3:21). Је чындык элчилери ого јӧмӧлтӧ болгон, оныҥ да учун Иисус божоор алдында олорго: «Мениле кожо ончо ченелтелерди ӧттигер» — деп айткан (Лука 22:28).

¹² Кезикте элчилер јастырып туратан, је Иисус олордыҥ јастыразын эмес, карын ого бӱдӱп турганын кӧрӧтӧн (Матф. 26:40; Марк 10:13, 14; Иоанн 6:66—69). Ӧлтӱртердеҥ озо калганчы тӱнде Иисус олорго айтты: «Мен слерди најыларым деп айттым, нениҥ учун дезе Адамнаҥ ончо укканымды слерге айдып бердим» (Иоанн 15:15). Иисустыҥ најылары оныҥ кӱӱнин сӱрекей тыҥ кӧдӱрген. Олордыҥ мынайып јӧмӧшкӧни Иисустыҥ јӱрегин сӱӱндирип туратан (Лука 10:17, 21).

¹³ Иисуста элчилеринеҥ башка ӧскӧ дӧ најылар болгон. Олордыҥ тоозына ого јарлаар иште јӧмӧшкӧн эр де, ӱй де улус кирген. Кезиги оны айылына кычырып, азырап туратан (Лука 10:38—42; Иоанн 12:1, 2). Кезиги оныла кожо јол-јорыкка барып, не барыла ӱлешкен (Лука 8:3). Иисустыҥ најылары нениҥ учун јакшы болгон? Нениҥ учун дезе ол бойы јакшы најы болгон. Ол најыларына јакшыны кӧп эткен, олордоҥ эдип болбос неме некебеген. Иисус толо кемдӱ кижи болгон до болзо, је толо кемдӱ эмес најыларыныҥ јӧмӧлтӧзин сӱреен баалаган. Айдарда, оныҥ најылары ого јӱректеги амырын јылыйтпаска болушкан.

14, 15. Јакшы најыларлу болорго нени эдер керек ле олор биске канайып болужар аргалу?

¹⁴ Чындык најылар Иеговага чындык артарга болужат. Андый најыларлу болорго,  бойыска јакшы најы болор керек (Матф. 7:12). Агару Бичик бисти бойыстыҥ ӧйисти ле ийде-кӱчисти улуска, анчада ла тыҥ керексинип турган улуска, берзин деп кычырат (Еф. 4:28). Слер јуунда кемге болужар аргалу? Темдектезе, айылынаҥ чыкпай турган кижиге магазиннеҥ кандый бир керектӱ немени садып экелерге јараар. Эмезе акчазы јӱк арайдаҥ једип турган аканы эмезе эјени кожо чайлап аларына кычырарга јараар. Јарчы jw.org^® деген сайтла эмезе JW Library^® деген приложениеле тузаланып билбес болзо, оны кӧгӱс эрјинелер бедиреерине ӱредип саларга јараар. Бис улуска болужып турзаас, бойыс јаан сӱӱнчи аладыс (Ап. ижи 20:35).

¹⁵ Најылар биске ченелтелердиҥ ӧйинде јӧмӧжип турза, јӱректеги амырысты јылыйтпаска болужат. Канайып Елиуй Иовтыҥ санааркаштарын укканы чылап, анайып бистиҥ де најылар санааркаштарысты чыдамкай угат (Иов 32:4). Најылар биске нени эдерин айдып берер деп сакыбас керек. Је олордыҥ Агару Бичикке тӧзӧлӧнип берген јӧбин угары јакшы болор эди (Укаа 15:22). Ундыбагар: Давид каан бойыныҥ најыларыныҥ болужын јобош алынган (2 Сам. 17:27—29). Најылардыҥ болужы керек болзо, улуркак болбой, олордыҥ болужын алып туругар. Јакшы најылар — Иегованыҥ јаан сыйы (Иак. 1:17).

16. Филиппыдагыларга 4:6, 7-ле болзо, јӱректе амыр табарга нени эдер керек?

¹⁶ Филиппыдагыларга 4:6, 7 кычырыгар. Агару Бичикте «Кудайдыҥ... амырын»  нениҥ учун «Христос Иисустыҥ Бойында» таап аларга јараар деп айдылат? Нениҥ учун дезе амырды табып, оны кичееп аларга, Кудайдыҥ амадузында Иисус Христос кандый иш бӱдӱрип турганын оҥдоп, ого бӱдер керек. Темдектезе, Иисустыҥ толынты тайылгазынаҥ улам бистиҥ ончо кинчектерис ташталар аргалу (1 Иоанн 2:12). Бу биске јаан токунал берет! Иисус, Кудайдыҥ Каандыгыныҥ Кааны, Сатананыҥ ла оныҥ телекейиниҥ каршузын јоголтып салар (Иса. 65:17; 1 Иоанн 3:8; Ачыл. 21:3, 4). Кандый јакшы ижемји! Иисус биске јеҥил эмес јакару берген де болзо, ол алдындагызындый ла чылап бисти артыргыспай јат. Анайда ок бу телекейдиҥ калганчы кӱндеринде биске болужарга белен болот (Матф. 28:19, 20). Мыны билгенис коркыбаска болужат. Токунал, ижемји ле коркыбас болоры јӱректеги амырды кичеерге јаан болужын јетирет.

17. а) Биске јӱректеги амырысты кичеерге не болужар? б) Иоанн 16:33-ле болзо, бисте кандый арга болор?

¹⁷ Айдарда, кӱч ченелтелердиҥ ӧйинде јӱректеги амырды кичеерге не болужар? Иисуска болушкан аргалар биске де болужар. Баштапкызында, кӧп мӱргӱгер. Экинчизинде, Иеговага сӧсуккур болуп, јеҥил эмес те болзо, јарлаарга белен болыгар. Ӱчинчизинде, кӱч ӧйлӧрдӧ најылардыҥ болужын јектебегер. Ол тушта «Кудайдыҥ... амыры» слердиҥ сагыжыгарды ла јӱрегеерди корулаар, анайып слер Иисус чылап, кандый ла ченелтени јеҥип чыгарыгар. (Иоанн 16:33 кычырыгар.)