1. Христиандарга јӱрӱм учун маргаанда финишке једип аларга, нени эдер керек?

ХРИСТИАНДАР јӱрӱм беретен маргаанда туружып јат. Кемниҥ де бу маргаанда туружып баштаганы јаан удабаган, је кем де кӧп јылдар кайра јӱгӱрип баштаган. Андый да болзо, биске ончобыска финишке јетире јӱгӱрер керек. Оныҥ учун элчи Павелдиҥ Филиппыдагы христиандарга берген јӧби финишке једетен ийде-кӱч берер аргалу. Баштапкы чактыҥ Филиппыдагы јуунныҥ ака-эјелери канча да ӧйдиҥ туркунына Иегованыҥ ишчилери болгон. Олор тегин де јакшы јӱгӱреечилер болгон, је Павел олорды тӱҥей ле јайымжыбазын деп айткан. Павел бу ака-эјелерди оноҥ тем алып, бастыра ийде-кӱчинеҥ амадузына јединзин деп кӱӱнзеген (Флп. 3:14).

2. Павелдиҥ Филиппыдагы ака-эјелерге берген јӧби ӧйинде болгон деп, нениҥ учун айдарга јараар?

² Павелдиҥ Филиппыдагы ака-эјелерге берген јӧби ӧйинде болгон. Нениҥ учун дезе Филиппыдагы јуун тӧзӧлгӧнинеҥ бери удурлажуларга табарткан. Удурлажулар б. э. 50 јылы киреде башталган. Бу јылда Павел ле Сила Кудайдыҥ Македониядӧӧн кӧчсин деп айткан сӧзин угуп, Филиппы калага барган (Ап. ижи 16:9). Анда олор Лидия деген ӱй кижиге туштаган. Бу ӱй кижи олорды угуп турарда, «Кайракан [Иегова] оныҥ јӱрегин ачты», анайып, ол сӱӱнчилӱ јарды алынган (Ап. ижи 16:14). Јаан удабай ол бойы да, айылындагы улузы да сууга чӧҥӱрилген. Је Дьявол ӧйди калас ӧткӱрбеген деп айдарга јараар. Не дезе, улус Павелди ле Силаны тудуп, каланыҥ башчыларына экелеле, каланы шакпырадып турган деп, тӧгӱн јерге бурулап, олорды согуп, тӱрмеге отургызып салган. Оноҥ бир эмеш ӧйдӧҥ каланаҥ чыксын деп, кезем јакару  берген (Ап. ижи 16:16—40). Је олор чӧкӧбӧгӧн. Је јаҥы тӧзӧлгӧн јуунныҥ ака-эјелери керегинде нени айдарга јараар? Олор база чӧкӧбӧгӧн. Павел ле Силаныҥ теми олордыҥ бӱдерин тыҥыткан деп, бис алаҥзыбай јадыс.

3. Павел нени оҥдоп туратан? Бис кандый сурактар шӱӱжип кӧрӧрис?

³ Павел бир де чӧкӧбӧскӧ бек шӱӱп алган (2 Кор. 4:16). Је финишке једерге, ого амадузын ундыбас керек деп, ол оҥдоп туратан. Павелдиҥ теми бисти неге ӱредет? Бистиҥ ӧйдиҥ ака-эјелериниҥ теми, кӱчтердиҥ ӧйинде турумкай артатан арга бар деп, канайып керелейт? Анайда ок келер ӧйгӧ ижемји биске качан да чӧкӧбӧскӧ канайып болужат?

4. Павел бойыныҥ айалгазында Иеговага канайып эрчимдӱ иштеген?

⁴ Павел Филиппыдагы јуунга самара бичип турарда, кандый айалгада болгонын сананып ийектер. Ол Римде, айылда каруулда отурган. Ондо кӧптӧдӧ јарлайтан арга болбогон. Андый да болзо, Павел ого келип турган улуска чындыкты куучындап туратан. Анайда ок ол ыраагындагы јуундарга самаралар бичиир болгон. Бӱгӱнги кӱнде, айылынаҥ чыгып болбой турган кӧп ака-эјелер, олорго келип турган улустыҥ ончозына Иегова керегинде куучындаарга, база кандый ла арганы тузаланып јат. Анайда ок олор, ака-эјелердиҥ айылда тудуп болбой турган улуска, кӱӱн кӧдӱрер самаралар бичийт.

5. Филиппыдагыларга 3:12—14-тӧ айдылганыла, Павелге амадузынаҥ туура јӱре бербеске не болушкан?

⁵ Павел јединген једимдеринеҥ эмезе эткен јастыраларынаҥ улам, амадузынаҥ туура јӱре бербеген. Ол мынайып јартаган: «ичкеризине уулан[арга]» (ӧскӧртӧ айтса финишке једерге), «кийниндезин ундып» салар керек. (Филиппыдагыларга 3:12—14 кычырыгар.) Павелди амадузынаҥ не туура тартар аргалу болгон? Баштапкызында, иудаизмде јединген једимдери. Је Павел оны сӱре-чӧп деп кӧргӧн (Флп. 3:3—8). Экинчизинде, христиандарды истешкени учун бойын бурулаганы. Је Павел андый сезимдерине алдыртпаган. Ӱчинчизинде, Павел Иеговага сӱрекей кӧп иштенгени учун эмди амырап аларга јараар деп сананар аргалу болгон. Је ол анайып сананбаган. Павел, коркышту кӧп кӱчтерге табарткан, темдектезе: тӱрмелеткен, чыбыктаткан, ташла шыбалаткан, керептӱ јӱзӱп барадала чӧҥгӧн, кезикте курсакка ла кийимге јединбей јӱрген. Је андый да болзо, ол јарлаар иште сӱрекей кӧп једимдерге јединген (2 Кор. 11:23—27). Је Павел кӧп једимдерине ле кӧп кыйын-шыра ӧткӧнине кӧрбӧй, Иеговага иштееринде оноҥ ло ары јӱгӱрер керек деп билген. Биске андый ла кӧрӱмдӱ болор керек.

6. «Кийниндезин» дегенине не кирер аргалу?

⁶ Павелдиҥ теми «кийниндезин» ундып саларга канайып болужар? Ӧткӧн ӧйдӧ эткен кинчектерис учун јинип турган болзоос, Иисус Христостыҥ толынты тайылгазы керегинде тереҥжиде шиҥдеп, шӱӱп кӧрӧргӧ јараар. Анайып шиҥдегенис, шӱӱп сананганыс ла мӱргӱгенис, бойысты тӧзӧлгӧ јогынаҥ бурулап турган сезимнеҥ араайынаҥ айрылып каларга болужар. Керек дезе, Иегова таштап салган кинчектерис те учун јинбей барар болорыс. Павелдиҥ теминеҥ база неге ӱренедис? Кем де Иеговага кӧптӧдӧ иштеерге, јаан једимдерге экелетен карьеразын артыргыскан. Андый болзо, слер «кийниндезин» ундып, тузаланбаган аргаларды ундып саларга белен бе? (Тоол. 11:4—6; Јарл. 7:10). «Кийниндезин» дегенине Иеговага иштееринде јеткен једимдерис те, керек дезе ӧткӧн ченелтелерис те кирер аргалу. Канча јылдарга Иегованыҥ биске болушканын сананып  турзаас, колбуларыс тыҥып јат. Је биске Иеговага артыгынча иштенип салганыс учун эмди амыраарга јараар деп сананбас керек (1 Кор. 15:58).

7. 1 Коринфтегилерге 9:24—27-ле болзо, јӱрӱм учун маргаанды јеҥип аларга, нени ундыбас керек? Тем куучындап беригер.

⁷ Павел Иисустыҥ: «Бастыра кӱчигердеҥ албаданыгар, ЈТ» — деп айткан сӧстӧриниҥ учурын јакшы оҥдогон (Лука 13:23, 24). Ого, Христоско ло чылап, учына јетире албаданар керек деп билген. Оныҥ учун Павел христиан јолды маргаанда туружарына тӱҥдештирген. (1 Коринфтегилерге 9:24—27 кычырыгар.) Јӱгӱреечи финишке једетен амадузын ундыбаска, айландыра немени ајыктабай јат. Маргаан калада ӧткӱрилип јаткан болзо, туружаачылар магазиндердиҥ јалтырап турган шилдерин эмезе база ӧскӧ не-немени ајыктай берердеҥ айабас. Олор токтой тӱжӱп, садылып јаткан немелерди ајыктай бергенин качан бирде кӧргӧнӧӧр бӧ? Јок, олор јеҥӱ аларга кӱӱнзеп турган эмей! Биске де, јӱрӱм учун маргаанда, не ле немеге ајыктанбас керек. Бис амадубысты ундыбай, Павел чилеп бастыра кӱчистеҥ албаданып турзаас, кайралды аларыс.

8. Бис недеҥ улам тӱрген јӱгӱрбей барардаҥ айабазыс?

⁸ Бис кандый ӱч шылтактаҥ улам тӱрген јӱгӱрбей барардаҥ айабазыс? Бӱтпеген ижемјилердеҥ, уйадап турган су-кадыктаҥ ла узак ӧйгӧ улалып јаткан ченелтелердеҥ. Је бистиҥ кӱӱнисти мындый ченелтелерди ӧткӧн улустыҥ теми кӧдӱрип салар (Флп. 3:17).

9. Бӱтпеген ижемјилер кандый каршу јетирердеҥ айабас?

⁹ Бӱтпеген ижемјилер. Бис Иегованыҥ берген сӧзиниҥ бӱдерин тыҥ сакып јадыс. Судурчы Аввакум Иегованы Иудадагы јаманды капшай јоголтып салзын деп сураарда, Кудай оны чыдажып сакызын деп айткан (Авв. 2:3). Је бистиҥ ижемјилерис узак ӧйдиҥ туркунына бӱтпей турза, кӱӱнис ӧчӧ берет. Бис керек дезе, кунугып та баштаар болорыс (Укаа 13:12). Андый неме XX-чи чактыҥ бажында болгон. Ол ӧйдӧ кӧп майлаткан христиандар 1914 јылда теҥеридеги  кайралын алар деп иженген. Је олордыҥ ижемјизи бӱтпеген. Кудайдыҥ чындык улузына чӧкӧбӧскӧ не болушкан?

10. Бир билениҥ ижемјизи бӱтпей каларда, олорло не болды?

¹⁰ Чӧкӧнишке алдыртпаган эки христианныҥ темин кӧрӱп ийектер. Ройал Спатц ака 1908 јылда, 20 јаштуда чӧҥӱрилген. Ол удабас ла бойыныҥ теҥеридеги кайралын алар деп, бир де алаҥзыбаган. Керек дезе 1911 јылда ӱйи болотон сыйынга мынайып айткан: «1914 јылда не болорын сен јакшы билериҥ. Оныҥ учун биске капшай алыжып алар керек!» Је 1914 јылда ижемјизи бӱтпей каларда, олорло не болды? Олор чӧкӧбӧгӧн, нениҥ учун дезе озо ло баштап кайрал аларга эмес, је Кудайдыҥ табын бӱдӱрерге кӱӱнзеген. Анайда ок маргаанды учына јетире јӱгӱрерге бек шӱӱп алган. Ройал ла Перл Иеговага эрчимдӱ иштеп, узак јылдардыҥ туркунына, јердеги јӱрӱми божогончо, ого чындык арткан. Кудай бойыныҥ адын быјардаҥ канайып арчып саларын, бастыра јердиҥ ӱстинде бойыныҥ Каандыгын канайып тургузарын ла берген сӧзин канайып бӱдӱрерин тыҥ кӧрӧргӧ турган болороор. Бу ончо неме Иегованыҥ тургузып салган ӧйинде бӱдер деп алаҥзыбагар. Је андый ӧй келгелекте, бӱтпеген ижемјилер кӱӱнисти ӧчӱрбезин эмезе јӱрӱм учун маргаанда јӱгӱрерин араайлатпазын деп, Кудайга эрчимдӱ иштеп јӱректер.

11, 12. Су-кадыгыс уйан да болзо, бис нениҥ учун јӱрӱм беретен маргаанда туружар аргалу? Тем куучындап беригер.

¹¹ Уйадап турган су-кадык. Финишке једерге, јӱгӱреечиниҥ су-кадыгы бек болор керек. Је јӱрӱм учун маргаанда туружып турган улустаҥ андый неме некелбей јат. Керек дезе, су-кадыгы уйан да улус, кӧгӱс јанынаҥ бек артып, Иеговага эҥ артыгын берер аргалу (2 Кор. 4:16). Бир катап Артур Секордто * Бет-Элде медсестра болуп турган эјеле јилбилӱ куучын болгон. Бу ӧйдӧ аканыҥ су-кадыгы коркышту уйадаган. Ол 88 јажыныҥ 55 јылын Бет-Элде иштеерине берген. Медсестра акага болужып ийерге, орынына базып келеле, јалакай сӧстӧр айткан: «Секорд ака, сен Иеговага кӧп иштеп, јаан једимдерге једингеҥ!» Је Артур ака кийниндезиле јӱрбеген. Ол эјеге кӧрӱп, кӱлӱмзиренип ийеле: «Эйе, кӧп иштегем. Је эҥ учурлузы — бистиҥ једимдерис эмес. Озо ло баштап Иеговага чындык артар керек» — деп айткан.

¹² Слер Иеговага кӧп јылдар иштеп турган болороор, је эмди уйан су-кадыгардаҥ улам кӧпти эдип болбой турган болорыгар. Је чӧкӧбӧгӧр! Иегова слердиҥ эткен ижигерди баалап турган деп, бир де алаҥзыбагар (Евр. 6:10). Ундыбагар: Кудайга јик јогынаҥ чындык болгоныс канча кире эдип турганыстаҥ эмес, је чын кӧрӱм-санаалу артып, бойыстыҥ  айалгаларыста канча кире аргабыс бар иштеп турганыстаҥ камаанду (Кол. 3:23). Иегова бисти оҥдоп јат ла бистеҥ эдип болбос неме некебей јат (Марк 12:43, 44).

13. Анатолий ле Лидияга нени ӧдӧргӧ келишкен, олордыҥ теми узак ӧйгӧ улалып турган ченелтелерди турумкай ӧдӧргӧ канайып болужат?

¹³ Узак ӧйгӧ улалып турган ченелтелер. Иегованыҥ кезик ишчилерине кӧп јылдардыҥ туркунына кӱчтерди ле истежӱлерди чыдажарга келижет. Анатолий Мельник * аканыҥ темин кӧрӱп ийектер. Ого 12 јаш болордо, оныҥ адазын тудуп, тӱрмелеп салган. Соондо оны, Молдовадагы тӧрӧл јеринеҥ 7000-наҥ ажыра беристе јерге, Сибирьдӧӧн ссылкага аткарган. Бир јылдаҥ Анатолийди, оныҥ энезин ле энезиниҥ ада-энезин база Сибирьдӧӧн аткарып ийген. Анда олордо ӧскӧ деремнеде ӧдӱп турган јуунныҥ туштажуларына јӱретен арга болгон. Је олорго туштажуларга барарга, кышкыда корон сооктордо, 30 беристе јерди јойу ӧдӧргӧ келишкен. Соондо Мельник аканы Лидия ӱйинеҥ ле бир јашту кызычагынаҥ айрып, ӱч јылга тӱрмелеп салган. Је мындый ченелтелер болгон до болзо, Анатолий ле оныҥ билези Иеговага чындык артып, оноҥ ло ары иштеген. Бӱгӱнги кӱнде Анатолийге 82 јаш, ол Орто Азиядагы филиалда Бет-Элдиҥ комитединде иштейт. Анатолий ле Лидиянаҥ тем алып, Иеговага бастыра кӱчигердеҥ, алдындагызындый ла чылап, турумкай иштегер (Гал. 6:9).

14. Павел нени оҥдогон?

¹⁴ Павел маргаанды учына јетире јӱгӱрип, амадузына једер деп алаҥзыбаган. Майлаткан христиан болуп, ол теҥериге «Кудай кычырып турган кайралды» аларга јӱткӱген. Је оны аларга, бастыра кӱчинеҥ албаданар керек деп билген (Флп. 3:14). Филиппыдагы христиандарга бичилген самарада Павел јилбилӱ тӱҥдештирӱ эткен. Бу тӱҥдештирӱ олорго амадузын ундыбаска болужар керек болгон.

15. Филиппыдагы јуунга бичилген самарада Павел кандый тем бичиген, бу тем олорды амадузына јӱткӱӱрге канайып кӱӱнзеткен?

¹⁵ Павел Филиппыдагы ака-эјелерге олордыҥ гражданствозы «теҥериде» деп эске алындырган (Флп. 3:20). Олорго мыны нениҥ учун ундыбас керек болгон? Ол ӧйдӧ Римниҥ гражданствозын алган кижиге кӧп аргалар берилген *. Је майлаткан христиандардыҥ  гражданствозы канча киреге баалу болгон, нениҥ учун дезе майлаткандардыҥ гражданствозы римниҥ гражданствозына кӧрӧ, канча киреге кӧп аргалар берген. Оныҥ учун Павел Филиппыдагы христиандарды: «Христостыҥ Сӱӱнчилӱ Јарына јарамыкту болуп јӱригер» — деп кӱӱнзеткен (Флп. 1:27). Бу ӱлгерде «јӱригер» деп кӧчӱрилген сӧсти «бойыгарды граждандар чылап тудуныгар» деп кӧчӱрерге јараар. Бӱгӱнги кӱнде майлаткан христиандар кайралга јӱткӱӱринде сӱрекей јакшы тем кӧргӱзет.

16. Филиппыдагыларга 4:6, 7-ле болзо, бис теҥериде де эмезе јерде де јӱретен ижемјилӱ болзоос, биске нени эдер керек?

¹⁶ Бистиҥ ижемјибис ӱргӱлјиге теҥериде јӱретени де эмезе јерде јадатаны да болзо, биске амадубыска оноҥ ло ары јӱткӱӱр керек. Кийниндезинде артып калганын качан да карамдабактар. Иеговага иштеерин не де токтодып салбазын (Флп. 3:16). Кудайдыҥ берген сӧзиниҥ бӱдерин сакып турганаар удап калган болор. Јиит тужыгар ӧдӱп, ийде-кӱчигер де астап калган болор. Эмезе кӧп јылдардыҥ туркунына кӱчтерди ле истежӱлерди чыдажадыгар. Је кандый да айалгада болзогор, «не де керегинде санааркабагар». Јайнап мӱргӱген ӧйдӧ «Кудайдыҥ алдында керексигенеерди ачыгар», ол тушта Кудай слерге не ле сагыштаҥ бийик амыр берер. (Филиппыдагыларга 4:6, 7 кычырыгар.)

17. Келер јӧрмӧлдӧ нени шӱӱжерис?

¹⁷ Јӱгӱреечи финишке јууктап келзе, бастыра ийде-кӱчинеҥ маргаанды једимдӱ јӱгӱрип ийерге албаданат. Мынайып ла биске јӱрӱм учун маргаанда финишке једетен амадубысты ундыбас керек. Бойыстыҥ су-кадыгысты ла айалгаларысты кӧрӱп, канча кире аргабыс бар, Иеговага бастыра кӱчистеҥ иштеп, келер ӧйдӧги сӱреен јакшы јӱрӱмди ундыбай јӱректер. Керектӱ јанындӧӧн јӱгӱрерге ле ийде-кӱчисти јылыйтпаска, нени эдер керек? Келер јӧрмӧл баштапкы јерге нени тургузарын билип аларга ла «эҥ артыгын» талдап аларга болужар (Флп. 1:9, 10).