СЛЕР јуунда кандый бир молјулар аларга турган болороор, је эм тура бу молјуларды бӱдӱрер аргагар јок болот. Бу молјуларды тургуза ӧйдӧ јуундагы ӧскӧ кижиге берип салган болор. Эмезе јажыгар јаанаганынаҥ, су-кадыгар уйадаганынаҥ, акча-манатка јединбей турганаардаҥ эмезе биледеги молјулардаҥ улам, Иеговага кӧп иштеп болбой турган болорыгар. Ол эмезе Иегованыҥ организациязындагы солынталардаҥ улам, канча јылдардыҥ туркунына бӱдӱрген сӱӱген ижигерди артыргызарга келишкен болор. Шылтактар кандый да болзо, слер бойоорды тууразында артып калганаар деп сананар болорыгар. Мынаҥ улам кунугып турганаарды оҥдоп јадыс. Је мындый ӧйдӧ чӧкӧниш, ачуурканыш ла ачыныш јӱрегисте тазылдана бербезин деп, нени эдер керек? Сӱӱнчини јылыйтпаска не болужар?

Крестеечи Иоанныҥ јӱрӱми — сӱӱнчини јылыйтпаска болужатан сӱрекей јакшы тем. Ол сӱрекей јилбилӱ јакылталар бӱдӱрген де болзо, јӱрӱминде јаан солынталар болор деп бодобогон болор. Темдектезе, оныҥ кӧп ӧйи јарлаарына эмес, је тӱрмеде отурарына барар деп, сананбаган да болор. Је ол сӱӱнчилӱ арткан, керек дезе јӱрӱминиҥ учына јетире андый кӧрӱмин јылыйтпаган. Ого не болушкан? Бистерге де, чӧкӧп тӧ турзаас, сӱӱнчибисти јылыйтпаска не болужар?

Иоанн ижин јаскыда б. э. 29 јылында баштаган. Ол: «Кинчектеригерди алынып, Кудайга баштаныгар! Теҥери Каандыгы јууктап келди!» — деп кычыру эдип, Мессияга јол белетеген (Матф. 3:2; Лука 1:12—17). Бу кычыруны угарга, улус Иудей јериниҥ ыраак талаларынаҥ да келип туратан. Олордыҥ кӧбизи бойлорыныҥ кинчектерин алынып, сууга чӧҥӱрилген. Анайып, кычыруны кӧп улус алынган. Анайда ок Иоанн кудай јаҥныҥ улуркак башчыларына, олор солынбаза, олорго кандый јаргы чыгарыларын јалтанбай јарлаган (Матф. 3:5—12). Иоанныҥ Кудайга иштегенинде эткен эҥ учурлу ижи — б. э. 29 јылында, кӱскиде Иисусты чӧҥӱргени болгон. Оноҥ ло бери Иоанн улусты судурлалган Мессияныҥ, Иисустыҥ, кийнинеҥ барзын деп кӱӱнзеткен (Иоанн 1:32—37).

Иоаннга аҥылу иш берилген, оныҥ учун Иисус ол керегинде мындый сӧстӧр айткан: «Энедеҥ  чыккандар ортодо Иоаннаҥ јааны јок» (Матф. 11:11). Иоанн мындый јаан кӱндӱ алганына тыҥ сӱӱнген болор. Бӱгӱнги кӱнде кӧп ака-эјелер Иеговага иштееринде база јилбилӱ јакылталар бӱдӱрет. Терри аканыҥ темин кӧрӱп ийектер. Ол Сандра ӱйиле кожо 50 јылдаҥ ажыра ӧйин толо берип иштеген. Терри айдат: «Иегова меге кандый иш бербеди! Мен пионер болгом, Бет-Элде иштегем, специальный пионер, аймак кӧрӧӧчи ле областьтыҥ кӧрӧӧчизи болгом, эмди дезе ойто специальный пионер болуп иштейдим». Теократиялык јакылталар бӱдӱрерге сӱрекей сӱӱнчилӱ болот, је Иоанныҥ темиле болзо, јаҥы айалгаларда сӱӱнчилӱ артарга албаданар керек.

Крестеечи Иоаннга сӱӱнчилӱ артарга, Иеговага быйанду болгоны болушкан. Ол Кудайдыҥ берген јакылталарын јаантайын баалап туратан. Бир учуралды эске алып ийектер. Иисустыҥ чӧҥӱрилгениниҥ кийнинеҥ оныҥ ӱренчиктери кӧптӧп турарда, Иоанныҥ ӱренчиктери астап баштаган. Мындый айалганы кӧрӱп, Иоанныҥ ӱренчиктери ого: «[Иисус] база крестейт, ончозы Ого барат» — деп айткан (Иоанн 3:26). Је Иоанн мындый каруу берген: «Сыргалјылу кижини колту дейтен. Колтуныҥ најызы дезе, ого коштой туруп, оны тыҥдап, ӱнин угала, сӱрекей сӱӱнет. Мениҥ бу сӱӱнчим эмди бӱтти» (Иоанн 3:29). Иисуска оноҥ јаан иш берилген де болзо, Иоанн бойыныҥ ижин калас деп сананып, кӱйӱнбеген. Карын «колтуныҥ најызы» болотон ижин баалаганынаҥ улам сӱӱнчизин јылыйтпаган.

Иоанныҥ мындый кӧрӱми, ижи токтодуларлу болгон до болзо, сӱӱнчилӱ артарга болушкан. Темдектезе, ого чыкканынаҥ ала назорей болгонынаҥ улам кызыл аракы ичерге јарабас болгон (Лука 1:15). Иисус оныҥ чӱм-јок јӱрӱми керегинде мынайып айткан: «Иоанн келип, курсак јибе[ген], аракы ичпе[ген]». Је Иисус ла оныҥ ӱренчиктеринде дезе, андый токтодулар болбогон. Олордыҥ јӱрӱми кӧп саба улустыҥ јӱрӱминдий болгон (Матф. 11:18, 19). Анайда ок Иоанн бир де кайкал этпеген, је мындый ийде Иисустыҥ ӱренчиктерине, ол тоодо Иоанныҥ да ӱренчиктерине берилген деп, билер болгон (Матф. 10:1; Иоанн 10:41). Је Иоанн бого бир де ачынбаган, ол бастыра ийде-кӱчин Иегованыҥ ижине берген.

Бис Иегованыҥ организациязында эдип турган каруулу молјуларысты баалап турган болзоос, сӱӱнчибисти база јылыйтпазыбыс. Ӧрӧги айдылган Терри ака мынайып айдат: «Меге кандый бир јакылта берилген болзо, оны јакшы эдерге албаданатам». Ол ӧйин толо берип иштеген јӱрӱмин эске алып, айдат: «Иштеген ӧйлӧримди эске аларга кандый јакшы, ӧйим калас ӧткӧн деп бир де сананбайдым».

Иеговага иштееринеҥ јаан сӱӱнчи аларга турган болзоос, Кудайдыҥ берген кандый ла јакылталарын нениҥ учун баалап турганысты шӱӱп сананар керек. Нениҥ учун дезе бу јакылталар «Кудайга [Кудайла, ЈТ] кожо» иштейтен арга берет (1 Кор. 3:9). Канайып ада-ӧбӧкӧлӧрдӧҥ арткан баалу јазалдарды јалтырада јыжып турза, олордыҥ ӧҥи оҥбой јат, анайып ла Иеговага иштегени сӱреен јаан кӱндӱ деп шӱӱп сананып турзаас, бистиҥ сӱӱнчибис ӧчпӧс. Бис Иеговага иштеерге болуп не-немени артырганысты ӧскӧ улустыҥ артырганыла тӱҥдештирбезис. Анайда ок ӧскӧ улустыҥ ижин бистиҥ ижиске кӧрӧ, баалу деп сананбазыс (Гал. 6:4).

Иоанн ижин узакка улалбас деп билер де болгон болзо, је ижиниҥ андый капшай токтоп каларын билбеген болор (Иоанн 3:30). Б. э. 30 јылында Иисустыҥ чӧҥӱрилгениниҥ кийнинеҥ јарым јыл ӧдӧ берерде, Ирод каан Иоаннды тӱрмелеп койгон. Је Иоанн, канча кире аргазы бар, чындык керегинде куучындаарын бир де токтотпогон (Марк 6:17—20). Ого сӱӱнчизин јылыйтпаска кӧгӱс керектерди баштапкы јерге тургусканы болушкан.

Иоанн тӱрмеде болордо, Иисустыҥ јарлаар ижи једимдӱ ӧдӱп турганын угуп ийген (Матф. 11:2; Лука 7:18). Иисус Мессия деп, Иоанн бир де алаҥзыбаган да болзо, је ол Мессия керегинде судурлардыҥ ончозын канайып бӱдӱрерин билерге кӱӱнзеген болор. Бичимелдерле болзо, Мессия — каан болор учурлу болгон. Је бу Иисустыҥ башкарузы удабас ла башталар деп кӧргӱскен  бе? Иисус башкарып баштаза, Иоаннды тӱрменеҥ божодып ийер бе? Оныҥ учун ол Иисустыҥ кандый амадулу келгенин јазап оҥдоп аларга, бойыныҥ эки ӱренчигин Иисуска ийип: «Келер дегени Сен бе, айса ӧскӧни сакыйтан ба?» — деп, сурап уксын деген (Лука 7:19). Байагы ӱренчиктер једип келеле, Иоаннга Иисустыҥ улусты јасканын кӧргӧнин ле Иисустыҥ: «Сокорлордыҥ кӧзи јарыйт, аксактар базып јӱргӱлейт, капкаш балулу улус аруталат, ӱскерлер угат, ӧлгӧндӧр тирилет, тӱреҥилерге Сӱӱнчилӱ Јар јарлалат» — деп айткан сӧстӧрин куучындап берген (Лука 7:20—22).

Ӱренчиктердиҥ куучынын угала, Иоанныҥ кӱӱни кӧдӱрилип, Мессия керегинде судурлар Иисуска бӱдӱп јат деп, бӱдӱмјилене берген. Је Иоанн эмди Иисус ого тӱрменеҥ чыгарга болужар деп иженбеген де болзо, ижи калас болбогон деп бӱткен. Ол мындый кӱч те айалгаларда сӱӱнчизин јылыйтпаска болужатан шылтактар табып туратан.

Бис Иоанн чылап, кӧгӱс керектерди баштапкы јерге тургузып турзаас, турумкай артып, сӱӱнчини јылыйтпазыбыс (Кол. 1:9—11). Сӱӱнчилӱ артарга, Агару Бичикти кычырып, шӱӱп сананар керек, анайда ок Кудайга бистиҥ ижис калас болор аргазы јок деп, ундыбас керек (1 Кор. 15:58). Сандра эје мынайып куучындайт: «Мен Агару Бичикти кажы ла кӱн бир бажалыктаҥ кычырып турзам, Иеговага јууктап турганымды сезедим. Бу меге озо баштап бойымды эмес, је Кудайды сананарга болужат». Бис Иегованыҥ албатызыныҥ солундарын јаантайын кӧрӱп турган болзоос, бойыстыҥ кӱчтеристи эмес, је озо баштап Иегованыҥ ижи керегинде сананадыс. Сандра айдат: «Бистиҥ онлайн-телеберилтеде кажы ла ай чыгып турган программаларды кӧрӱп, бис бойысты Кудайдыҥ организациязына јуук болгонысты сезедис, анайда ок бу программалар берилген јарлаар ишти сӱӱнчилӱ бӱдӱрерге болужат».

Крестеечи Иоанныҥ ижи кыска ла ӧйгӧ болгон, је ол «Илиядый тынду ла кӱчтӱ» јарлаган. Илья чылап, ол «бистий ле [сезимдерлӱ] кижи» болгон (Лука 1:17; Иак. 5:17). Айдарда, бис те быйанзак болуп, кӧгӱс керектерди, айалгаларыс кандый да болзо, баштапкы јерге тургузып турган болзоос, Иеговага сӱӱнип иштеерис.