1. Бистиҥ тӧрӧӧндӧрис нени этсин деп кӱӱнзейдис?

«ЧЫНДЫКТЫ билип алала, ончо јууктарым мениле кожо райда јатсын деп кӱӱнзей бергем. Је эҥ ле тыҥ Уэйн ӧбӧӧним ле уулым мениле кожо Иеговага иштезин деп кӱӱнзегем» — деп, Полин * эје куучындайт. Слерде Иегованыҥ ишчизи болголок тӧрӧӧндӧр * бар ба? Бар болзо, слер Полин эјениҥ сезимдерин оҥдоп турган болороор.

2. Бис бу јӧрмӧлдӧ кандый сурактар шӱӱжерис?

² Бис тӧрӧӧндӧристи сӱӱнчилӱ јарды алынзын деп кӱӱнзейдис. Је чындыкты алынзын деп, бис олорды албадап болбозыс. Андый да болзо, бис олорго Агару Бичикте айдылганын шӱӱп сананарга ла чындыкты алынарга болужар аргалу (2 Тим. 3:14, 15). Бу јӧрмӧлдӧ мындый сурактар шӱӱжилер: тӧрӧӧндӧргӧ нениҥ учун јарлаар керек? Олордыҥ сезимдерин нениҥ учун ајаруга алар керек? Олорго, Иегованы бис ле чилеп сӱӱзин деп, канайып болужар керек? Анайда ок јуун канайып болужар аргалу?

3. 2 Петр 3:9-ла болзо, тӧрӧӧндӧриске нениҥ учун јарлаар керек?

³ Иегова удабас јерди јоголтып салза, јерде јӱк «чыннаҥ ла ӱргӱлји јӱрӱм аларга турган улус» (ЈТ) артар (Ап. ижи 13:48). Бис таныш эмес улуска Иегова керегинде куучындаарга кӧп ӧйисти ле ийде-кӱчисти берип турарыста, бистиҥ тӧрӧӧндӧӧрис  чындыкты алынзын деп, оноҥ тыҥ кӱӱнзеп турган эмейис. Теҥеридеги сӱӱштӱ Иегова Адабыс «кем де ӧлӱп калбазын, карын, ончо улус кинчегин алынып, Кудайга баштанзын деп кӱӱнзейт». (2 Петр 3:9 кычырыгар.)

4. Тӧрӧӧндӧриске јарлап тура, кезикте нени ундып саладыс?

⁴ Бис кезикте сӱӱнчилӱ јарды чын куучындайдыс, је кезикте јастыра куучындайдыс. Темдектезе, бис таныш эмес улуска тоомјылу баштанып јадыс, је тӧрӧӧндӧриске тоомјылу баштанарын та нениҥ де учун ундып саладыс.

5. Тӧрӧӧндӧргӧ чындыкты куучындаардаҥ озо, нени ундыбас керек?

⁵ Озо ло баштап бистиҥ кӧбизис чындыкты тӧрӧӧндӧрине јастыра куучындаган. Эмди бис анайып качан да јарлабас эдис. Элчи Павел христиандарга: «Сӧзигер јаантайын јакшылыкту ла чечен болзын. Кажы ла кижиге канайып каруу јандыратанын билип јӱригер» — деп айткан (Кол. 4:5, 6). Бу сӧстӧрди, тӧрӧӧндӧриске јарлап тура, ундыбас керек. Оноҥ башка олорды чындыкка јууктадардыҥ ордына, ырадып саларыс.

6, 7. Иеговага иштебей турган јууктарыстыҥ сезимдерин оҥдоор керек деп кӧргӱзип турган тем куучындап беригер.

⁶ Олордыҥ сезимдерин оҥдоп туругар. Ӧрӧги айдылган Полин эје мынайып айдат: «Озо баштап ӧбӧӧнимле јӱк ле кӧгӱс јанынаҥ куучындажарга албаданатам. Оныҥ учун кӱнӱҥ сайынгы керектерди куучындашпас та болгоныс». Је оныҥ Уэйн ӧбӧӧни, Агару Бичикти јакшы билбегенинеҥ улам, ӱйиниҥ нени айдып турганын аайлабай туратан. Уэйнге ӱйине кудай јаҥынаҥ ӧскӧ база не де керек јок деп билдирген. Ол керек дезе ӱйи коркынчылу сектага кирип калган, ондо оныҥ бажын јӱӱлтип јат деп сананган.

 ⁷ Полин эје эҥирлер ле амыраар кӱндер сайын кӧп сабада кӧгӱс ака-эјелерле кожо болуп, олорго айылдап баратан, јуунныҥ туштажуларына јӱретен ле јарлаар ишке туружатан. Је Уэйн ӱйи ле уулы јанында болзын деп кӱӱнзеген эмей. «Кезикте Уэйн јанып келзе, айылда оны кем де сакыбайтан. Мынаҥ улам ол тыҥ јаҥысканзырап туратан» — деп, Полин айдат. Ол ӱйи ле балазы кемдерле болуп турганын ла ӱйине кандый јаҥы најылар табылганын сананып, бойын ӱйине керек јок болуп калган деп сескен. Оныҥ учун Полинге: «Мен сениле айрылыжарым» — деп, айдар болгон. Канайып сананып јадаар, эје ӧбӧӧниниҥ сезимдерин оҥдоп турган деп кӧргӱзерге, нени эдер аргалу болгон?

8. 1 Петр 3:1, 2-ле болзо, бистиҥ тӧрӧӧндӧрис кӧп сабада неге ајару эдет?

⁸ Айткан сӧстӧригерди керектеригерле кӧргӱзигер. Бистиҥ тӧрӧӧндӧрис кӧп сабада нени айдып турганысты эмес, је нени эдип турганысты кӧрӱп јат. (1 Петр 3:1, 2 кычырыгар.) Мыны Полин де эје оҥдоп ийген. Ол куучындайт: «Уэйн бисти сӱӱп турган, ол чынынча болзо, айрылыжарга кӱӱнзебей јат. Је ол айрылыжарга турарда, мен Иегованыҥ берип турган јӧптӧрин тузаланбай тургам деп, оҥдоп ийгем. Меге ӧбӧӧниме јарлаардыҥ ордына, јакшы керектер эдер керек болгон». Бу ӧйдӧҥ ала Полин Агару Бичик керегинде кӧп куучындабай, ӧбӧӧниле тегин ле темаларды куучындажып баштаарда, Уэйн ӱйиниҥ јымжаганын ла уулыныҥ сӧсуккур болуп калганын ајарып ийген (Укаа 31:18, 27, 28). Анайып, Уэйн Агару Бичиктиҥ јӧптӧри олорго тузазын јетирип турганын кӧрӱп, Кудайдыҥ Сӧзиндеги чындыкты угуп баштаган (1 Кор. 7:12—14, 16).

9. Биске нениҥ учун чӧкӧбӧс керек?

 ⁹ Чӧкӧбӧгӧр. Биске Иегованаҥ тем алар керек: ол, улуска сӱӱнчилӱ јарды угатан ла ӱргӱлји јӱрӱм алатан арганы «такып-такып» берип јат (2 Лет. 36:15). Элчи Павел Тимофейди улуска болужарга чӧкӧбӧзин деп кӱӱнзеткен. Нениҥ учун дезе анайып, Тимофей јаҥыс бойын эмес, је оны угуп турган улусты да аргадап алар эди (1 Тим. 4:16). Бис тӧрӧӧндӧристи сӱӱп јадыс, оныҥ учун олорды Кудайдыҥ Сӧзиндеги чындыкты уксын деп кӱӱнзейдис. Кийнинде Полинниҥ сӧстӧри ле керектери јакшы тӱжӱм экелген. Эмди ол ӧбӧӧниле Иеговага кожо иштеп јат. Олор экӱ пионерлер, Уэйн дезе аксагал. Анайып, Полинниҥ кӱӱнзегени бӱдӱп калды.

10. Биске нениҥ учун чыдамкай болор керек?

¹⁰ Чыдамкай болугар. Тӧрӧӧндӧриске бистиҥ јаҥы кӧрӱмисти ле Кудайдыҥ нормаларыла јӱрӱп турганысты оҥдоорго кӱч болордоҥ айабас. Олор эҥ ле озо кудай јаҥныҥ байрамдарын байрамдабай турганысты ла политикага турушпай турганысты кӧрӱп ийет. Кезик тӧрӧӧндӧр озо баштап биске калјуурардаҥ да айабас (Матф. 10:35, 36). Је биске чӧкӧбӧс керек. Нениҥ учун дезе бис олорго колыбысты јаҥып, бойыстыҥ кӧрӱмисти јартабай барзаас, олорды: «Ӱргӱлји јӱрӱмге турбас» — деп, јаргылап саларыс. Је Иегова биске јаргычылар болотон јаҥ бербеген, ол андый јаҥды Иисуска берген (Иоанн 5:22). Бис чыдамкай болзоос, тӧрӧӧндӧрис библиялык јарды угарга јӧпсинер болор. (« Бистиҥ сайтты тузаланыгар» деген рамканы кӧрӱгер.)

11—13. Элистиҥ теми слерди неге ӱредет?

¹¹ Бӱдӱмјигердеҥ јана баспагар, је черчеҥ болугар (Укаа 15:2). Элистиҥ темин кӧрӱп ийектер. Бу эје ада-энезинеҥ ыраак ӧскӧ ороондо јадып турала, Иегова керегинде уккан. Оныҥ ада-энези Кудайга бӱтпес, политикага эрчимдӱ турушкан улус болгон. Элис эје библиялык сӱреен јакшы чындыктарды олорго тӱрген куучындаар керек деп оҥдоп туратан. «Олорго бойымныҥ јаҥы кӧрӱмимди тӱрген куучындабазам, айалга оноҥ кӱч болуп калардаҥ айабас» — деп, Элис куучындаган. Ол ада-энезине тоолу самара бичип, олорго јилбилӱ болгодый сурактар кӧдӱрген. Темдектезе, «Сӱӱш ол не?» деген суракка, Агару Бичик кандый каруу берип турганын бичиген (1 Кор. 13:1—13). Анайда ок ада-энезине оны јакшы чыдадып салганы учун быйанын айдып, олорго сыйлар аткарып ийген. Олордыҥ айылына барган тужында, энезине айылдыҥ кандый ла ижин эдеринде болушкан. Элистиҥ ада-энезине кызыныҥ неге бӱдӱп турганы озо баштап јарабаган.

¹² Элис ада-энезиниҥ айылында болуп турарда, Агару Бичикти кычырар графигин бир де буспаган. «Энем мыны кӧрӱп, бу бичик меге сӱрекей баалу болгонын оҥдогон» — деп, Элис айдат. Бу ӧйдӧ оныҥ адазы кызыныҥ кӧрӱми нениҥ учун солынганын оҥдоп аларга ла Агару Бичиктеҥ јастыралар таап аларга, оны кычырып кӧрӧргӧ сананган. «Оныҥ учун мен ого Агару Бичик сыйлап, ого бир кезек јылу сӧстӧр бичип салгам» — деп, Элис куучындайт. Бу неге экелди? Адазы Агару Бичиктеҥ бир де јастыра таппаган, карын оны кычырып тура, јӱреги томулган.

¹³ Бистерге удурлажулар да болуп турза, бӱдӱмјибистеҥ јана баспай, черчеҥ болор керек (1 Кор. 4:12б). Темдектезе, Элис эје энезиниҥ удурлажып баштаганын мынайып куучындайт: «Мен сууга чӧҥӱрилеримде, энем мени сӧс укпас кыс деп айткан». Энезиниҥ удурлажузын Элис канайып ӧтти? «Энемге нениҥ учун чӧҥӱрилгенимди јартап береринеҥ качпай, Иегованыҥ Керечили болорго бек шӱӱп алган санаамды солыбазым  деп, тоомјылу јартап бергем. Мен энемди тыҥ сӱӱп тургам деп бӱдӱмјилеп турала, кожо ыйлай бергенис. Оноҥ мен ого јарап турган курсагын азып бердим. Оноҥ ло бери энем Агару Бичик меге јакшы кижи болорго болужат деп оҥдоп баштаган».

14. Биске нениҥ учун тӧрӧӧндӧристиҥ сӧзине кирбес керек?

¹⁴ Тӧрӧӧндӧриске, Иеговага иштеерин нениҥ учун баалап турганысты оҥдоп аларга, кӧп ӧй керек болордоҥ айабас. Элис ада-энезиниҥ кӱӱнзедип турган карьеразынаҥ мойноп, пионер болуп баштаарда, оныҥ энези ойто ло ыйлаган. Је Элис бек шӱӱп алган санаазын солыбаган. Ол айдат: «Тӧрӧӧндӧриҥе бир эмеш ле јай берип ийзеҥ, олор сениҥ ӧскӧ дӧ уйан јандарыҥды ченеп баштаар. Је турумкай болуп, олорго јалакай баштанзаҥ, олордыҥ кемизи-кемизи сени угар болор». Элистиҥ учуралында шак ла андый болгон. Эмди оныҥ ада-энези пионерлер болуп иштейт, адазы дезе аксагал болот.

15. Матфей 5:14—16, 1 Петр 2:12-ле болзо, јуунныҥ улузыныҥ јалакай керектери тӧрӧӧндӧриске канайып болужар аргалу?

¹⁵ Иегова бойына улусты христиан јуунныҥ улузыныҥ јалакай керектери ажыра экелет. (Матфей 5:14—16; 1 Петр 2:12 кычырыгар.) Слердиҥ Иеговага иштебей турган эш-нӧкӧригер јуундагы улусла таныш па? Ӧрӧги айдылган Полин эје ӧбӧӧнин јуундагы ака-эјелерле таныштырарга, олорды айылындӧӧн кычырар болгон. Уэйн бир аканыҥ болужыла Иегованыҥ Керечилери керегинде јастыра кӧрӱмин канайып солыганын эске алат: «Ол мениле кожо бир  спорттыҥ ойынын кӧрӧргӧ, ижинеҥ амыраар кӱн сурап алган. Мен бойымда: „Бу јаман ла кижи эмес эмтир!“» — деп сананган болгом.

16. Јуунныҥ туштажуларына тӧрӧӧндӧрди нениҥ учун кычырар керек?

¹⁶ Тӧрӧӧндӧриске болужатан аргалардыҥ база бирӱзи — олорды јуунныҥ туштажузына кычырары (1 Кор. 14:24, 25). Уэйнниҥ баштапкы барган туштажузы Кайраканныҥ Эҥири болгон. Бу туштажуга ол, ижиниҥ кийнинде болгоны учун ла ӧскӧ туштажуларга кӧрӧ, программазы кыска болгоны учун барган. Уэйн эске алат: «Туштажуда куучын-эрмек не керегинде болгонын оҥдобогон до болзом, меге андагы улус јараган. Олор меге базып келеле, колымнаҥ эзендежип, танышкан. Анайып олорды ачык-јарык ла јакшы улус деп кӧргӧм». Полинге анчада ла бир биле јалакай баштанар болгон. Бу эш-нӧкӧрлӧр ого јуунныҥ туштажуларында ла јарлаар иште уулын алыжарга болушкан. Оныҥ учун Уэйн ӱйиниҥ неге бӱдӱп турганын јакшы билип алар деп шӱӱп алала, Агару Бичикти шак ла бу акала ӱренерге јӧпсинген.

17. Бойысты неде бурулабас керек ле биске нениҥ учун чӧкӧбӧс керек?

¹⁷ Бистиҥ ончо тӧрӧӧндӧрис Иеговага иштеер деп иженип јадыс. Је бис канча да кире албаданзаас, олор чындыкты анайып ла алынбастаҥ айабас. Андый болуп калза, бойоорды бурулабагар. Нениҥ учун дезе, кижини бистиҥ бӱдӱп турганыска бӱтсин деп албадап болбозыс. Андый да болзо, Иеговага иштеп турганаардаҥ алган сӱӱнчигерди тӧрӧӧндӧрӧӧр кӧрӱп јат. Бу олорго јаан камаанын јетирер аргалу. Олор учун мӱргӱп туругар. Олорло куучындажып тура, черчеҥ болугар. Бир де чӧкӧбӧгӧр! (Ап. ижи 20:20). Иегова слердиҥ албаданганыгарды кайралдаар деп алаҥзыбагар. Тӧрӧӧндӧрӧӧр слерди угарга јӧпсинзе, Кудай олорды кыйалта јогынаҥ аргадап алар!