1. Филиппы калада јуун тӧзӧӧринде кемдер болушкан?

ПАВЕЛ, Сила, Лука ла Тимофей Римниҥ колониязына, Филиппы калага, келип, анда Каандык керегинде сӱӱнчилӱ јарды угарга турган кӧп улус барын кӧрӱп ийген. Кудайдыҥ ижин эрчимдӱ бӱдӱрген бу тӧрт ака јуун тӧзӧӧргӧ болушкан. Анайып јербойыныҥ ӱренчиктери кожо јуулыжып баштаган. Олор кӱндӱзек Лидия эјениҥ айылында јуулышкан болор (Ап. ижи 16:40).

2. Јаан удабай Филиппыдагы јуун кандый кӱчтерге табарткан?

² Јаан удабай јаҥы тӧзӧлгӧн јуун кӱчтерге табарткан. Сатана чындыкты кӧрӧр кӱӱни јок улусты бу чындык христиандардыҥ јарлаар ижин тыҥ истежип баштазын деп кӱӱнзеткен. Олор Павел ле Силаны тудуп, чыбыктап, тӱрмелеп салган. Је тӱрменеҥ божодылган кийнинеҥ, олор јаҥы ӱренчиктерге келип, олордыҥ кӱӱнин кӧдӱрген. Соондо Павел, Сила ла Тимофей Филиппы каланаҥ јӱре берерде, Лука калада артып калган болор. Бу јуунла оноҥ ары не болгон? Иегованыҥ агару тыныныҥ болужыла јаҥы чӧҥӱрилген ака-эјелер оноҥ ло ары эрчимдӱ јарлаган (Флп. 2:12). Оныҥ учун Павел олорло оморкоп туратан!

3. Филиппыдагыларга 1:9-ла болзо, Павел не керегинде мӱргӱген?

³ Он јыл кире ӧдӱп каларда, Павел Филиппыдагы јуунга самара бичиген. Бу самараны кычырып јатсаас, Павелдиҥ: «Мен слерди сӱрекей сӱӱп јадым, бу сӱӱш Иисус Христостыҥ ӧзӧгинеҥ чыгат» — деп сӧстӧринеҥ, јуундагы ака-эјелерин сӱрекей тыҥ сӱӱгени кӧрӱнет (Флп. 1:8). Анайда ок Павел  олор учун мӱргӱп, Иегованы олорго сӱӱжин ӧскӱрерге, эҥ артыгын талдап турарга, јек јок болорго, улусты бӱдӱрилтетен таш болбоско ло быйанду керектер эдерге болушсын деп сураган. Павелдиҥ акту јӱрегинеҥ айткан сӧстӧринеҥ бис кӧп немеге ӱренер аргалу деп, слер јӧпсинер болорыгар. (Филиппыдагыларга 1:9 кычырыгар.) Бу сӧстӧрди тереҥжиде кӧрӱп, олорды канайып тузаланарын шӱӱп сананып ийектер.

4. а) 1 Иоанн 4:9, 10-ло болзо, Иегова бисти тыҥ сӱӱп турган деп, канайып кӧргӱскен? б) Бис Кудайды канча киреге тыҥ сӱӱр учурлу?

⁴ Иегова јердӧӧн бойыныҥ Уулын, Иисусты, бистиҥ кинчектерис учун божоп калзын деп ийгениле, бисти тыҥ сӱӱп турганын кӧргӱскен. (1 Иоанн 4:9, 10 кычырыгар.) Кудай бисти мынайып сӱӱген болордо, бис те оны сӱӱрге кӱӱнзедиледис (Рим. 5:8). Бис оны канча киреге тыҥ сӱӱр учурлу? Мыны оҥдоорго, Иисустыҥ фарисейлерге: «Сениҥ [Иегова] Кудайыҥды, бастыра јӱрегиҥле, бастыра јулаҥла [бойыҥла, ЈТ], бастыра санааҥла сӱӱп јӱр» — деп айткан сӧстӧри болужат (Матф. 22:36, 37). Эйе, бис Кудайды бастыра јӱрегисле сӱӱрге кӱӱнзейдис. Анайда ок сӱӱжис кӱнӱҥ сайын ӧссин деп кӱӱнзеп јадыс. Павел Филиппыдагы ака-эјелердиҥ сӱӱжи «там ла там» ӧссин деп бичиген. Је Кудайга сӱӱжисти тыҥыдарга не болужар?

5. Кудайга сӱӱжисти тыҥыдарга нени эдер керек?

⁵ Кудайды сӱӱрге, биске оны билер керек. Агару Бичикте: «Сӱӱбей турганы, Кудайды билип албаган, нениҥ учун дезе Кудай — ол сӱӱш» — деп айдылат (1 Иоанн 4:8). Элчи Павел Кудайга сӱӱжисти тыҥыдарга, Кудай керегинде билгирлер алып, кандый ла сурактарда оныҥ кӧрӱмин оҥдоп алар керек деп јартаган (Флп. 1:9). Агару Бичикти јаҥыла ӱренип баштаарыста, Кудай керегинде билгирлерис ас болгон до болзо, бис оны сӱӱй бергенис. Је билгирлерис кӧптӧгӧн сайын сӱӱжис те тыҥыган. Оныҥ учун Кудайдыҥ Сӧзин јаантайын кычырып, шӱӱп сананар керек (Флп. 2:14).

6. 1 Иоанн 4:11, 20, 21-ле болзо, бистиҥ сӱӱжис ӧссин деп, база нени эдер керек?

⁶ Кудай бисти тыҥ сӱӱп турган деп оҥдоп турганыс, јуундагы ака-эјелеристи сӱӱрге кӱӱнзедет. (1 Иоанн 4:11, 20, 21 кычырыгар.) Бис Иеговага иштеп, оныҥ јакшы кылык-јаҥдарынаҥ тем алып јадыс, анайда ок бисти тыҥ сӱӱп, бис учун јӱрӱмин берген Иисус Христостоҥ тем аладыс. Оныҥ учун ака-эјелерди сӱӱрге јеҥил болор деп сананып турган болорыс. Андый да болзо, кезикте биске бой-бойыгарды сӱӱгер деген јакылтаны бӱдӱрерге јеҥил эмес болот. Филиппыдагы јуунда не болгонын сананып ийектер.

7. Павелдиҥ Еводия ла Синтихияга берген јӧби бисти неге ӱредет?

⁷ Еводия ла Синтихия элчи Павелле кожо эрчимдӱ иштеп јӱрген эјелер болгон. Је олор кылык-јаҥыла јарашпай калала, ачыныжып калган. Павел бу эки эјениҥ јуунына самара бичип, олордыҥ ады-јолын адап, «санаагар бирлик болзын» деп јӧп берген (Флп. 4:2, 3, ЈТ). Ол бастыра јуунга мынайып бичиген: «Нени де этсегер, комыдабай ла эреҥистелбей [блааш-тартышпай, ЈТ] эдигер» (Флп. 2:14). Бу кӧндӱрезинеҥ айдылган јӧптӧр јаҥыс ла Еводия ла Синтихияга болушкан эмес, је Филиппыдагы ӧскӧ дӧ ака-эјелерге бой-бойына сӱӱжин тыҥыдарга болушкан.

8. Биске ака-эјелерди сӱӱрге недеҥ улам кӱч болуп турган болор, је бу буудакты ӧдӧргӧ не болужар аргалу?

⁸ Биске Еводия ла Синтихияга чылап, ака-эјелердиҥ озо ло баштап јастыраларын  кӧрӱп турганыстаҥ улам, олорды сӱӱрге кӱч болуп турган болор. Бис ончобыс кажы ла кӱн јастырып јадыбыс. Оныҥ учун бис улустыҥ јаманын таштап болбой турган болзоос, олорго сӱӱжис сооп баштаар. Темдектезе, кандый бир ака Каандыктыҥ Туразын јуунадарында болужып ийерге ундып саларда, бис ого ачынып калдыс. Бу ӧйдӧ аканыҥ ончо јастыраларын чотоп баштазаас, ого оноҥ тыҥ кыртыштанарыс, сӱӱжис дезе, јоголып калар. Слерде андый неме болгон бо? Болгон болзо, Иегова бистиҥ де, бу аканыҥ да јастыраларын кӧрӱп турганын сананып ийигер. Је Кудай бисти де, бу аканы да сӱӱп јат. Оныҥ учун улустыҥ јакшызын кӧрӧринде Иегованаҥ тем алар керек. Бис ака-эјелерди сӱӱрге бастыра кӱчистеҥ албаданзаас, бистиҥ ортобыстагы бирлигис тыҥыыр (Флп. 2:1, 2).

9. Павел Филиппыдагыларга бичиген самарада «эҥ артыгы» деп айткан сӧстӧриле нени кӧргӱскен?

⁹ Павел агару тынныҥ болужыла Филиппыдагы ака-эјелерди, анайда ок ӧскӧ дӧ христиандарды, «эҥ артыгын» талдап алыгар деп кӱӱнзеткен (Флп. 1:9). «Эҥ артыгына» Иегованыҥ адын агарулаары, оныҥ табын бӱдӱрери ле јуундагы амырды ла бирликти кичеери кирет (Матф. 6:9, 10; Иоанн 13:35). Бу ончо неме бистиҥ јӱрӱмисте баштапкы јерде турган болзо, бис Иегованы чыннаҥ ла сӱӱп јадыс.

10. Иегованыҥ кӧзинде бузук јок болорго, нени эдер керек?

¹⁰ Анайда ок Павел биске бузук јок болор керек деп айткан. Бузук јок болоры толо кемдӱ болорын кӧргӱспей јат. Бисте Иеговадый бузук јок, ол эмезе јик јок болор арга јок. Је бис сӱӱжисти ӧскӱрерге ончоны эдип, эҥ артыгын талдап турган болзоос, Иегова бисти бузук јок деп кӧрӧр. Ака-эјелерге сӱӱжисти кӧргӱзетен аргалардыҥ бирӱзи — олорды бӱдӱрилтетен таш болбос керек.

11. Биске нениҥ учун улусты бӱдӱрилтетен таш болбос керек?

¹¹ Улусты бӱдӱрилтетен таш болбогор деген јакаруга јаан ајару эдер керек. Улусты не бӱдӱрилтердеҥ айабас? Бистиҥ талдаган соот-јыргалдарыс, кийимис, керек дезе ижис те. Бистиҥ талдап алганыста јаман неме јок болор. Је качан талдаганыс ака-эјелердиҥ уйадына тийип турза, мыны јазап сананып кӧрӧр керек. Нениҥ учун дезе Иисустыҥ айтканыла болзо, оныҥ койлорын бӱдӱрилтип турган кижиниҥ мойнына уур таш буулап, талайга чӧҥӱрип салза торт болор эди (Матф. 18:6).

12. Пионер эш-нӧкӧрлӧрдиҥ теминеҥ бис неге ӱренедис?

¹² Иисустыҥ бу јакарузына пионерлер болуп турган эш-нӧкӧрлӧр канайып уккур болгонын кӧрӱп ийектер. Олордыҥ иштеген јуунында чӧҥӱрилгени јаан удабаган ла уйады ӧйинеҥ ӧткӱре сескир эш-нӧкӧрлӧр болгон. Бу эш-нӧкӧрлӧрдиҥ чыдаган билезинде кӧп неме јарабас болгон, оныҥ учун христиандарга киного, керек дезе јаман неме кӧргӱспей турган да кинолорго, барарга јарабас деп сананган. Мынаҥ улам пионер болуп турган эш-нӧкӧрлӧрдиҥ киного барып јӱргенин угала, олор алаҥ кайкаган. Ол тушта пионерлер бу эш-нӧкӧрлӧрди уйадын јакшыны јаманнаҥ ылгаштырарга ӱредип албаганча, кинотеатрга јӱрбес деп шӱӱп алган (Евр. 5:14). Бу пионерлер јӱк бойлорын сананбай, јаҥы ака-эјеге сӱӱжин јаҥыс ла сӧстӧриле эмес, је керектериле де кӧргӱскен (Рим. 14:19—21; 1 Иоанн 3:18).

13. Кижини билбес аразынаҥ кинчекке канайып ийде салардаҥ айабазыс?

¹³ Анайда ок улусты билбес аразынаҥ кинчекке ийде салып турзаас, олорды бӱдӱрилтетен  таш боло бередис. Бу канайып болордоҥ айабас? Темдектезе, кижи Агару Бичикти ӱренип баштайла, аракынаҥ айрыларга, узак ӧйдиҥ туркунына тыҥ тартышкан болзын. Оныҥ учун бу кижи аракыны бир де кичинек ичерге јарабас деп аайлап јат. Ол кӧгӱс јанынаҥ тӱрген ӧзӱп, сууга чӧҥӱрилет. Кийнинде, канча да ӧйдиҥ бажында, ӧскӧ христиан кижи бу јаҥы чӧҥӱрилген кижини айылына кычырып, ичерине албадап јат. Ака јакшы сананып мынайып айдат: «Сен эмди христиан кижи, сенде эмди Иегованыҥ тыны бар. Агару тынныҥ тӱжӱмине бойын тудунып билери кирет. Сен бойыҥды тудунып билер болзоҥ, бир эмеш ичип те ийзеҥ кем јок, јаҥыс ла ажа конбос керек». Сананып ийзеер де, јаҥы чӧҥӱрилген ака бу јӧп аайынча эткен болзо, оныла не болор эди!

14. Бис христиан туштажуларда Филиппыдагыларга 1:9-та бичилген јакаруларды тузаланарга канайып ӱренедис?

¹⁴ Бис христиан туштажуларда Филиппыдагыларга 1:9-та бичилген јакаруларды тузаланарга ӱренедис. Канайып? Баштапкызында, кӧгӱс курсактыҥ арбынду берилип турганынаҥ улам, Иегова нени баалап турганын билип аладыс. Экинчизинде, бузук јок болорго, алган билгирлерди тузаланарга ӱренип јадыс. Ӱчинчизинде, туштажуларда бис «сӱӱрге ле јакшы керектер эдерге» кӱӱнзедилип јадыс (Евр. 10:24, 25). Ака-эјелеристеҥ канча ла кире јаан кӧкӱдӱ алып турзаас, Кудайды ла ака-карындаштарысты ончо ло кире тыҥ сӱӱп јадыс. Бис Кудайды ла ака-эјелерди акту јӱректеҥ сӱӱп турзаас, олорды бӱдӱрилтпеске албаданарыс.

15. «Быйанду керектер» эдерине не кирет?

¹⁵ Павел Филиппыдагы христиандарды «быйанду керектер» этсин деп, сӱреен тыҥ мӱргӱген (Флп. 1:9). Бу керектерге олордыҥ Иегованы ла оныҥ албатызын сӱӱгени, анайда ок Иисуска бӱдӱп турганы керегинде ле келер ӧйгӧ сӱреен јакшы ижемји керегинде куучындаганы кирген. Филиппыдагыларга 2:14-тӧ база бир јилбилӱ тӱҥдештирӱ бар. Ондо мынайып бичилген: «Телекейдеги јарыткыштар чылап јаркындалыгар». Бу сӧстӧр Иисус Христостыҥ: «Слер — бу телекейдиҥ улузына јарык» — деп, ӱренчиктерине айтканын эске алындырат (Матф. 5:14—16). Анайда ок ол бойыныҥ ӱренчиктерине јаҥы ӱренчиктер белетеп, «јердиҥ јаказына да јетире» керечилерим болыгар деп јакару берген (Матф. 28:18—20; Ап. ижи 1:8). Бис бу јаан учурлу иште туружып турзаас, «быйанду керектер» эдип јадыс.

16. Филиппыдагыларга 1:12—14-тӧги сӧстӧр, јеҥил эмес те айалгада, «телекейдеги јарыткыштар чылап», јаркындалар арга бар деп канайып кӧргӱзет? (Кадарындагы јурукты кӧрӱгер.)

¹⁶ Бистиҥ айалгаларыс кандый да болзо, бис «телекейдеги јарыткыштар чылап» јаркындалар аргалу. Кезикте биске буудак болуп турган неме, карын сӱӱнчилӱ јарла ӱлежетен арга боло берет. Элчи Павелдиҥ темин эске алып ийектер. Ол Филиппыдагыларга самараны Римде каруулда отурган тушта бичиген. Је кынјыда болгоны, Павелди каруулчыктарга ла ого келген улуска јарлаарга буудак болбогон. Бу јеҥил эмес айалгада Павелдиҥ эрчимдӱ јарлаганы ака-карындаштарга Кудайдыҥ Сӧзин коркыбай ла јалтанбай јарлаарга болушкан. (Филиппыдагыларга 1:12—14 кычырыгар; 4:22.)

17. Удурлажулар да болуп турза, акалардыҥ канайып јарлап турганын куучындап беригер.

 ¹⁷ Кӧп ака-эјелер Павел чилеп, јалтанбай јарлап јадылар. Олор айылдар сайын ачыгынча јарлаарга јарабас ороондордо јадып турган да болзо, јарлаарын токтотпой јат. Карын сӱӱнчилӱ јарла ӱлежерге, ӧскӧ аргалар бедиреп јат (Матф. 10:16—20). Мындый ороондордыҥ бирӱзинде јадып турган аймак кӧрӧӧчи јарчыларга бойыныҥ тӧрӧӧндӧрине, айылдаштарына, кожо ӱренип эмезе кожо иштеп турган улузына ла таныштарына јарлап кӧрзин деп айткан. Мынайып бу аймактыҥ јуундары эки јылга канча катапка кӧптӧп калган. Бистиҥ јадып турган ороондо ижис база токтодуда болордоҥ айабас. Је бис мындый тапкыр ака-эјелердиҥ теминеҥ јаан ӱредӱ алар аргалу: Иегова биске кандый ла кӱчтерди ӧдӧргӧ болужар деп, бир де алаҥзыбай, јарлаар иште эрчимдӱ туружар керек (Флп. 2:13).

18. Биске нени бек шӱӱп алар керек?

¹⁸ Павелдиҥ Филиппыдагы јуунга бичиген сӧстӧрин, анчада ла бӱгӱнги кӱнде бӱдӱрерге бек шӱӱп алактар. Эҥ артыгын талдап турактар, бузук јок јӱректер, улусты бӱдӱрилтетен таш болбоктор ло быйанду керектер эдектер. Ол тушта сӱӱжис там ла там ӧзӱп турза, бистиҥ буурзак Иегова Адабыс макталар.