1, 2. а) Бу јӧрмӧлдӧ кандый сурактар кӧрӱлер? б) Иегова биске болужарга тыҥ кӱӱнзеп турган деп кайдаҥ билерис?

 ИЕГОВА бистерге уур-кӱчтерди ӧдӧргӧ лӧ ого сӱӱнчилӱ иштенип јӱрерге болужар аргалу. Кудай биске канай болужып јат? Оныҥ болужын аларга биске нени эдер керек? Бу сурактардыҥ каруузын билип алактар. Је озо баштап Иегова биске чын ла болужарга турган ба деген сурактыҥ каруузын кӧрӱп ийектер.

² Сурактыҥ каруузын аларга, апостол Павелдиҥ еврейлерге бичиген самаразында Иегова керегинде нени айтканын кӧрӱп ийер керек. Ол мынайда бичиген: «Иегова — мениҥ болушчым, коркыыр немем јок. Кижи меге нени эдер?» (Евр. 13:6). Библиялык справочниктерле болзо, ӱлгердиҥ оригиналында тӱбекке кирип калган кижиге болужарга меҥдеп барып јаткан кижини кӧргӱзип турган сӧс тузаланылган. Сананып ийзеер де, тӱбекке тӱжӱп калган кижиге Иегова база анайып ла болужарга меҥдеп јат. Айдарда, мынаҥ кӧрӱп јадыс, Иегова болужарга јӱк ле белен эмес, је ол бистиҥ Болушчыбыс болорго тыҥ кӱӱнзеп турган. Ол бистиҥ јаныста болзо, бис кандый ла ченелтени сӱӱнчисти јылыйтпай ӧдӧ берерис.

3. Ченелтелердиҥ ӧйинде сӱӱнчибисти јылыйтпаска Иегова биске канайып болужат?

³ Ченелтелердиҥ ӧйинде сӱӱнчибисти јылыйтпаска Иегова биске канайып болужып јат? Бу сурактыҥ каруузын билип аларга, Исайяныҥ бичигин кӧрӱп ийектер. Нениҥ учун бу бичикти? Нениҥ учун дезе Исайяныҥ кӧп судурлары  Кудайдыҥ бӱгӱнги кӱнниҥ ишчилерине бичилген. Анайда ок Исайя Иегова керегинде айдып тура, јеҥил, јарт сӧстӧр тузаланат. Оныҥ учун бу бичиктиҥ 30-чы бажалыгын шӱӱжип ийектер. Бу бажалыкты кычырып јатсаас, Иегова бойыныҥ албатызына канайып болужып турганы санаабыста јарт јуралып јат. Исайяныҥ сӧстӧриле болзо, Кудай: 1) бистиҥ мӱргӱӱлдеристи угат, мӱргӱӱлдериске каруу берет, 2) керектӱ башкартулар берет, 3) биске бӱгӱнги де кӱнде алкыштар берет, келер де ӧйдӧ берер. Айдарда, олордыҥ кажызын ла тереҥжиде шӱӱжип ийектер.

4. а) Исайяныҥ ӧйинде јаткан еврейлер керегинде Иегова нени айткан? Олорло не болгон? б) Иегова чындык еврейлерге кандый ижемји берген? (Исайя 30:18, 19).

⁴ Исайяныҥ 30-чы бажалыгыныҥ бажында Иегова еврейлерди «кедер уулдар», «кинчектиҥ ӱстине кинчек эдет» деп айткан. Анайда ок: «Олор тӱймеечи албаты... Иегованыҥ јасагын угар кӱӱндери јок уулдар» — деген (Иса. 30:1, 9). Олордыҥ сӧсукпазы неге экелди? (Иса. 30:5, 17; Иер. 25:8—11). Исайяныҥ судурыла болзо, Вавилонныҥ черӱзи еврей албатыны олјого апарган. Је бу еврейлердиҥ ортозында Кудайга чындык улус болгон. Бир канча ӧйдӧҥ Иегова олорго килемјизин кӧргӱзер деп, Исайя айткан. (Исайя 30:18, 19 кычырыгар.) Бу судур ӱзе бӱдӱп калган. Иегова албатызын јайымдаган, је оныҥ бӱдерин сакыыр керек болгон. Исайяныҥ: «Иегова слерди килеерге, чыдамкай болуп сакыйт» — деген сӧстӧри Кудайга чындык арткан израильтяндарга аргадалар ӧйин сакыыр керек болгон деп кӧргӱзет. Иегованыҥ албатызы Вавилондо 70 јыл болгон. Бу ӧй ӧткӧн кийнинде, арткан-калган израильтяндарга Иерусалимдӧӧн јанарга јарадылган (Иса. 10:21; Иер. 29:10). Мынайып, олјодо ыйлап јӱрген албаты айылына јанып келеле, сӱӱнгенине ыйлаган.

5. Исайя 30:19-тагы сӧстӧр бисти канайып токунадат?

⁵ «Сениҥ болуш сурап кыйгырганыҥды угуп ийеле, сени килеер» деген сӧстӧр биске де токунал берет (Иса. 30:19). Бу сӧстӧрлӧ болзо, Иегова бистиҥ јайналганду мӱргӱӱлдеристи лаптап угуп турган. Анайда ок судурчы Исайя мындый сӧстӧр айткан: «[Ол] кыйгыҥды угуп ла ийзе, сеге болужар». Айдарда, теҥеридеги Адабыс болуш сурап тургандарга болужарга јӱк ле белен эмес, је болужарга тыҥ кӱӱнзеп турган. Бу шӱӱлте кандый ла кӱчтерди сӱӱнчилӱ ӧдӧргӧ болужат.

6. Иегова кажы ла ишчизиниҥ мӱргӱӱлин лаптап угат деп, Исайяныҥ сӧстӧринеҥ канайып кӧрӱнет?

⁶ Бу ӱлгер бисти база канайып токунадат? Иегова кажы ла ишчизин лаптап угат. Исайяныҥ 30-чы бажалыгыныҥ баштапкы бӧлӱгин кӧрзӧ, «слер» деген солума тузаланылган. Нениҥ учун дезе Иегова ончо албатызына баштанат. Је 19-чы ӱлгерде «сен» деген солума тузаланылган. Нениҥ учун дезе Иегова кажы ла ишчизине таҥынаҥ баштанат. Исайя бичиген: «Сен ыйлабазыҥ. Ол... сени килеер. ...Сеге болужар». Иегова кунугып калган уулына качан да мынайда айтпас: «Акаҥды кӧрзӧҥ, сеге андый ла кӱчтӱ болор керек». Јок, Иегова бистиҥ кажыбысты ла баалап јат. Ол кажы ла ишчизиниҥ мӱргӱӱлин лаптап угат (Сар. 116:1; Иса. 57:15).

7. Исайя ла Иисустыҥ сӧстӧринеҥ кӧп катап мӱргӱӱр керек деп канайып кӧрӱнет?

⁷ Бис Иеговага бойыстыҥ кӱчтеристи мӱргӱӱлде куучындап турзаас, ченелтени  ӧдӧргӧ Иегова биске капшай ла ийде-кӱч берер аргалу. Је кезикте ченелте бистиҥ сакыганыстаҥ узак чӧйилип турза, бош салынып ийбеске, ийде-кӱчти кӧп катап сураарга келижер болор. Иегова бойы да Исайя ажыра мындый сӧстӧр айдат: «Ого [Иеговага] амыр бербегер» (Иса. 62:7). Бу сӧстӧрди канайып оҥдоор? Иеговага амыр отурар арга бербей турганы чылап, кӧп-кӧп катап мӱргӱӱр керек. Исайяныҥ сӧстӧри Иисустыҥ Лука 11:8—10, 13-те бичилген мӱргӱӱл керегинде сӧстӧрин эске алындырат. Иисус та бисти кӧп-кӧп мӱргӱзин деп кӱӱнзедет. Ол ӱлгерлерди оригиналда кӧрзӧ, биске агару тынды эпјоксынбай ла кӧп катап сураар керек деп кӧрӱнет. Анайда ок ойгор тӱп-шӱӱлтелер эдерге, бис Иегованаҥ башкарту сураар аргалу.

8. Исайя 30:20, 21-деги сӧстӧр јебрен ӧйдӧ канайып бӱткен?

⁸ Исайя 30:20, 21 кычырыгар. Вавилонныҥ черӱзи Иерусалимди бӱдӱн јарым јыл курчап алган турарда, канайып калаш ла суу теп-тегин неме болот, анайып ла албаты шыралаарга шайып калган. Је 20 ле 21 ӱлгерлерле болзо, еврейлер кинчегин алынып тӱзединзе, Иегова олорды аргадап алар деп сӧзин берген. Исайя Иегованы Улу таскадаачы деп адап јат. А албатыны Иегова оныҥ табы аайынча бажырарга ӱредип салар деп бӱдӱмјилеп јат. Бу сӧстӧр бӱдӱп калган. Еврейлер олјоноҥ јайымдаларда, Иегова олордыҥ Улу таскадаачызы болгон. Оныҥ башкартузыла еврей албаты ару бажырышты орныктырган. Иегова бистиҥ де Улу ӱредӱчибис деп сӱӱнип јадыс.

9. Иегова бисти таскадып турганыныҥ баштапкы эп-аргазы кандый?

⁹ Бу ӱлгерлерди кычырып јатсаас, бажыста мындый јурук јуралат: бистер ӱренчиктер, а Иегова ӱредӱчи. Иегова бисти эки эп-арганыҥ болужыла ӱредет. Баштапкызы дезе Исайяныҥ сӧстӧринеҥ кӧрӱнет. Ол бичиген: «Слер Улу таскадаачыгарды бойоордыҥ кӧзӧӧрлӧ кӧрӧригер». Бу сӧстӧрлӧ болзо, Таскадаачы бойыныҥ ӱренчиктериниҥ алдында турат. Айдарда, бисте Иегова Кудайдаҥ ӱренетен сӱреен јаан арга бар. Иегова бисти канайып таскадат? Бойыныҥ организациязы ажыра биске јарт башкартулар берип турганы учун јаан быйанду болодыс. Анайда ок Иегова бисти јуунныҥ туштажулары ла курултайлар ажыра ӱредет. Бого ло коштой бисте кепке базылган ла электронный бичиктер бар.  Анайда ок JW Broadcasting^®-тиҥ программалары чыгат ла оноҥ до ӧскӧ кӧп немелер бар. Бу ӱзе неме биске сӱӱнчибисти јылыйтпай иштенерге болужат.

10. «Кийнигердеҥ... ӱн угарыгар» деген сӧстӧрдиҥ учуры кандый?

¹⁰ Судурчы Исайя «кийнигердеҥ... ӱн угарыгар» деген сӧстӧрлӧ Иегованыҥ бисти таскадып турганыныҥ экинчи эп-аргазын бичип салган. Бу сӧстӧрлӧ Исайя Иегованы ӱренчиктериниҥ кийнинеҥ барып јаткан јалакай Таскадаачы деп кӧргӱзет. Ол ӱренчиктерин јолдоҥ туура чыкпазын деп, кандый јолло баратанын айдып берет. Бис бӱгӱнги кӱнде Иегованыҥ ӱнин кийнистеҥ угуп јадыс. Нениҥ учун дезе Кудайдыҥ бичиген сӧстӧри туку качан ӧдӱп калган, ӧскӧртӧ айтса, бистиҥ кийнисте артып калган. Оныҥ учун бис оныҥ Сӧзин кычырып турзаас, оныҥ ӱни бистиҥ кийнистеҥ угулып тургандый (Иса. 51:4).

11. Кӱчтерди сӱӱнчилӱ ӧдӧргӧ кандый эки алтам керек? Јартап беригер.

¹¹ Айдарда, Иегова башкартузын Агару Бичик ле организациязы ажыра берип јат. Бу биске туза берзин деп, нени эдер керек? Эки шӱӱлтеге ајару эдип ийзеер. Баштапкызы: «Бу јол». Экинчизи: «Оныла барыгар» (Иса. 30:21). Бу «јолды» билери ас. Оныла биске јӱрер керек. Кудайдыҥ организациязы Агару Бичик ажыра Иегова бистеҥ нени сакып турганын јартап јат. Анайда ок алган билгирлеристи канайып тузаланарын билип алганыс. Је биске Иеговага сӱӱнчилӱ иштеерге, бу јолды јӱк ле билер керек эмес, је оныла јӱрер керек. Јӱк ле ол тушта Иегова биске алкыжын берер деп алаҥзыбазыс.

12. Исайя 30:23—26-ла болзо, Иегова албатызын канайып алкаган? Јартап беригер.

¹² Исайя 30:23—26 кычырыгар. Бу судур Вавилонныҥ олјозынаҥ тӧрӧл јерине јанып келген еврейлерге канайып бӱткен? Иегова бойыныҥ албатызын артыгынча алкаган. Олордо ӱзе неме јеткил болгон. Иегова бойыныҥ албатызына андый кӧп курсак-тамак берген. Олор тойо ажанган. Је эҥ јаан учурлузы, ару бажырышты орныктырарга, олорды кӧгӱс јанынаҥ азыраган. Олордо бу мындый бай кӧгӱс курсак алдында качан да болбогон. 26-чы ӱлгерле болзо, Иегова олорды кӧгӱс јаркынла јарыдып ийген (Иса. 60:2). Иегованыҥ берген бу сыйлары олордыҥ кӱӱнин кӧдӱрген ле оноҥ ло ары сӱӱнчилӱ јӱректӱ иштеерге болушкан (Иса. 65:14).

13. Ару бажырыштыҥ орныктырылары керегинде судур бӱгӱнги кӱнде канайып бӱдет?

 ¹³ Ару бажырыштыҥ орныктырылары керегинде судур бӱгӱнги кӱнде бӱдӱп јат. 1919 јылдаҥ ала Улу Вавилонноҥ — телекейлик тӧгӱн кудай јаҥдардыҥ империязынаҥ канча миллион албаты чыгып јат. Иегова олорды израильтяндарга берер болгон јердеҥ артык јерге — кӧгӱс райга экелет (Иса. 51:3; 66:8). Кӧгӱс рай ол не дегени?

14. Кӧгӱс рай ол не? Ондо кемдер јадат? («Јартамалды» кӧрӱгер.)

¹⁴ 1919 јылдаҥ ала кӧгӱс райда b майлаткандар јадып баштаган. Кийнинде олорго јерде ӱргӱлјиге јадатан ижемјилӱ улус — «ӧскӧ койлор» кожулган (Иоанн 10:16). Олор до кӧгӱс ороондо јадат, а Иегова олорго алкыштарын артыгынча берип јат (Иса. 25:6; 65:13).

15. Кӧгӱс рай кайда?

¹⁵ Бӱгӱнги кӱнде кӧгӱс рай кайда? Иегованыҥ Керечилери бастыра јердиҥ ӱстинде јадып турган болордо, кӧгӱс рай бастыра јердиҥ ӱстинде эмтир. Оныҥ учун бистиҥ јаткан јерис кайда да болзо, чындык бажырышты јӧмӧп турган болзоос, бис кӧгӱс райда јададыс.

16. Кӧгӱс райдыҥ јаражын јаантайын кӧрӱп турарга биске не болужар?

¹⁶ Кӧгӱс райда артарга, телекейлик христиан јуунды баалап јӱрер керек. Мыны канайып эдер? Кӧгӱс райда улустыҥ јастыраларын эмес, карын јаражын кӧрӱп турар керек (Иоанн 17:20, 21). Нениҥ учун? Мындый тем кӧрӱп ийектер. Јараш садта эмезе паркта башка-башка агаштар бар. Анайып ла јуундардагы кӧгӱс райды јарандырып турган, Агару Бичикте агаштарга тӱҥдештирилген кандый ла улус бар (Иса. 44:4; 61:3). Биске дезе јаантайын јаныста ӧзӱп турган кажы бир агаштардыҥ једикпестерине эмес, карын аралдыҥ јаражына ајару эдип турар керек. Бойыстыҥ јастыраларыс эмезе јуундагы ака-эјелердиҥ толо кемдӱ эмези бастыра јердиҥ ӱстинде бирлик христиан јуунныҥ јаражын кӧлӧткӧлӧп салбазын.

17. Бистиҥ кажыбыс ла јуун бирлик болзын деп, нени эдер аргалу?

 ¹⁷ Кӧгӱс райда бирлик болзын деп, бистиҥ кажыбыс ла нени эдер аргалу? Кажыбыс ла амыр јайаар аргалу (Матф. 5:9; Рим. 12:18). Ака-эјелерле амыр-энчӱ јӱрерге албаданып турзаас, кӧгӱс рай там ла јаранат. Кӧгӱс райда ару бажырышка кажы ла кижини Иегова бойы экелген деп, биске ундыбай турар керек (Иоанн 6:44). Бис кажыбыс ла амыр-энчӱни јӧмӧп турзаас, Иегова мыны кӧрӱп, сӱӱнип јат. Нениҥ учун дезе ол кажы ла кижизин эрјинедий баалап јат (Иса. 26:3; Агг. 2:7).

18. Биске јаантайын нени сананып турар керек? Нениҥ учун?

¹⁸ Иегова ишчилерине алкыштарды артыгынча берет. Биске бу алкыштарды аларга нени эдер керек? Агару Бичикти ле ого тӧзӧлӧнгӧн бичиктерди ӱренип, тереҥ шӱӱп сананып турар керек. Мынайып, христиан кылык-јаҥдарга ӱренип аларыс. А ӱренип алган кийнинде, јуундагы улуска ака-эјелериске чилеп карузыырыс (Рим. 12:10). Анайда ок бӱгӱнги кӱнде бар алкыштарды шӱӱп сананып турзаас, Иеговала колбуларыс там тыҥыыр. А Иегованыҥ келер ӧйдӧ беретен алкыштарын шӱӱп сананып турзаас, Иегова Кудайыска ӱргӱлјиге бажыратан ижемјибис качан да ӧчпӧс. Бу ончо неме биске Иеговага сӱӱнчилӱ иштеерге болужар.

19. а) Исайя 30:18-ле болзо, бис неге алаҥзыбайдыс? б) Биске ончо немени сӱӱнчилӱ ӧдӧргӧ не болужар?

¹⁹ Иегова јаманды јоголтып салза, бис учун «туруп чыгар» (Иса. 30:18). «Иегова справедливый» Кудай, оныҥ учун Сатананыҥ телекейине бир де кӱн узак турарга бербес (Иса. 25:9). Бисти Иегова аргадап аларын оныла кожо чыдамкай сакып јадыс. Је эм тургуза ол ӧй келгелекте мӱргӱӱрин, Агару Бичикти ӱренип тузаланарын ла бойыстыҥ алкыштарысты шӱӱп сананарын оноҥ ло ары баалап турарыс. Ол тушта Иегова биске ончо кӱчтерди сӱӱнчилӱ ӧдӧргӧ кыйалта јогынаҥ болужар.