1. Бис нени билерис ле неге бир де алаҥзыбайдыс?

 ЈАРЛААР иште кезик улус биске удурлажар деп билерис. Мынаҥ ары оноҥ тыҥ удурлажулар болордоҥ айабас (Дан. 11:44; 2 Тим. 3:12; Ачыл. 16:21). Је андый да болзо, Иегова биске болужар деп, бир де алаҥзыбай јадыс. Ол алдындагы ишчилерине кандый да кӱч болгон болзо, оныҥ јакылтазын бӱдӱрерге јаантайын болушкан. Оныҥ учун Вавилондо олјодо болгон еврейлерге судурчы Иезекииль канайып јарлаганын кӧрӱп ийектер.

2. Иезекииль кандый улуска јарлаган? Бу јӧрмӧлдӧ нени кӧрӧрис? (Иезекииль 2:3—6).

² Иезекиильдиҥ јарлаган јеринде улус кандый болгон? Иегова олорды «кату ла кедер», анайда ок «тӱймеечи албаты» деген. Олор тегенектерге ле скорпиондорго тӱҥей болгон. Оныҥ да учун Иегова судурчызына: «Коркыба» — деп, канча катап айткан. (Иезекииль 2:3—6 кычырыгар.) Иезекиильдиҥ јарлаар ижи мындый ӱч немедеҥ улам једимдӱ болгон: 1) оны Иегова ийген, 2) Иегованыҥ агару тыны ого ийде-кӱч берген, 3) оныҥ бӱдӱмјизин Кудайдыҥ сӧстӧри тыҥыткан. Судурчыга бу канайып болушкан? Биске бу канайып болужат?

3. Иезекиильдиҥ кӱӱни кандый сӧстӧрдӧҥ кӧдӱрилген болор? Иегова ого кандый сӧстӧрлӧ болушкан?

³ Иегова Иезекиильге: «Мен сени... ийип јадым» — деп айткан (Иез. 2:3, 4). Бу сӧстӧрди угала, Иезекиильдиҥ кӱӱни кӧдӱрилген болор. Нениҥ учун мынайда айдарга јараар? Нениҥ учун дезе Иегова Моисейди ле Исайяны судурчылар эдип кӧстӧп турарда, бого тӱҥей сӧстӧрди база айтканын Иезекииль билетен болгон  болор (Чыг. 3:10; Иса. 6:8). Анайда ок Иегова бу эки ишчизине кӱч ӧйлӧр болордо канайып болушканын уккан болгон. Анайдарда, Иезекиильге: «Мен сени... ийип јадым» — деген сӧстӧр эки катап айдылган болордо, Иезекиильде Иеговага алаҥзыйтан шылтак та болбогон. Бис Иезекиильдиҥ бичигинде: «Иегова меге айткан» — деген сӧстӧргӧ кӧп катап туштайдыс (Иез. 3:16). Анайда ок бу бичикте: «Иегова меге ойто катап баштанган» — деген сӧстӧр такып-такып айдылат (Иез. 6:1). Мыныҥ да учун Иезекииль оны Иегова ийген деп бӱткен эмей. Бого ло коштой Иезекиильдиҥ адазы абыс болгон. Ол уулына Иегова бойыныҥ судурчыларына, темдектезе, Исаакка, Иаковко ло Иеремияга: «Мен сенле кожо» — деп айдып, јаантайын болушкан деп куучындап туратан болор (Баш. 26:24; 28:15; Иер. 1:8).

4. Кандый сӧстӧр судурчы Иезекиильди токунаткан ла ого кӱч берген болор?

⁴ Израильтяндардыҥ кӧп сабазы судурчы Иезекиильдиҥ јарын алынган ба? Иегова озолондыра мынайып айткан: «Израиль албаты сени угарга кӱӱнзебес, нениҥ учун дезе ол мени угарга кӱӱнзебей турган» (Иез. 3:7). Израиль албатыныҥ Иезекиильди укпай турганы Иегованы јектегенине тӱҥей болот. Анайдарда, Иегова судурчызын албаты оны укпай турганы ол уйан судурчы болгонын кӧргӱспей турган деп бӱдӱмјилеген. Бого ло коштой Иегова оныҥ айткан јаргызы бӱдӱп калза, албаты «олордыҥ ортозында судурчы болгон деп билгилеп турар» деп айдып јат (Иез. 2:5; 33:33). Иегованыҥ айткан бу сӧстӧри судурчы Иезекиильди токунаткан. Анайда ок ого оноҥ ло ары Кудайдыҥ јакылтазын бӱдӱрерге ийде-кӱч берген.

5. Исайя 44:8-ле болзо, бис ийде-кӱчти кайдаҥ аладыс?

⁵ Иегова бисти де ийген деп билип турганы́с биске ийде-кӱч берет. Иегова бисти бойыныҥ керечилери деп айдат (Иса. 43:10). Бу биске јаан кӱндӱ болуп јат! Канайып Иегова Иезекиильге: «Коркыба» — деп айткан, ол биске де: «Коркыбагар» — деп айдат. Биске ӧштӱлердеҥ нениҥ учун коркыбас керек? Нениҥ учун дезе бисти, Иезекиильди ле чилеп, Иегова ийген. Оныҥ учун ол бисти болужы јок артыргыспай јат. (Исайя 44:8 кычырыгар.)

6. а) Иегова биске болужарым деп, кандый сӧслӧ бӱдӱмјилейт? б) Не бисти токунадат ла ийде-кӱч берет?

⁶ Иегова биске болужар деп сӧзин берет. «Слер мениҥ керечилерим» деп айдардаҥ озо, ол мынайып айдат: «Суула барзаҥ — мен сениле болорым, агын суулар кечсеҥ — олор сени чӧҥӱрип болбос. От ажыра ӧтсӧҥ — ӧртӧтпӧзиҥ, оныҥ јалбыжына куйкалатпазыҥ да» (Иса. 43:2). Кудайдыҥ ижин эдип турзаас, бисте чакпындалып турган суудый кӱчтер ле оттыҥ јалбыжындый ченелтелер болот. Је бис Кудайыстыҥ болужыла ончо кӱчтерди ӧдӱп, оноҥ ло ары јарлайдыс (Иса. 41:13). Иезекиильдиҥ ле ӧйинде чылап, бӱгӱн кӧп саба улус Кудайдыҥ сӧзин база керексибей јат. Је бу улустыҥ керексибей турганы бисти уйан јарчылар деп кӧргӱспей јат. Иегова бисти оноҥ ло ары јарлап турганысты кӧрӱп, сӱӱнип јат. Бу санаанаҥ улам бис токунал ла ийде-кӱч аладыс. Апостол Павелдиҥ айтканыла болзо, «кажызы ла канча кире кӱчин салып иштегениле јал алар» (1 Кор. 3:8; 4:1, 2). Канча јыл пионер болуп турган бир эје мынайып айдат: «Иегова бистиҥ албаданганысты кайралдап турганын билерге кандый јаан ырыс!»

7. Иезекиильде кӧрӱлтени шӱӱп сананган кийнинде, кандый сезимдер болгон болор? (Кадарындагы јурукты кӧрӱгер.)

⁷ Иезекиильге Кудайдыҥ агару тыны коркышту јаан ийде-кӱч деп кӧрӱлте кӧргӱзилген. Ол сӱреен кӱчтӱ кӧскӧ кӧрӱнбес јайаандарды ла теҥеридеги колесницаныҥ коркышту јаан кӧлӧсӧлӧрин Кудайдыҥ агару тыны ууландырып апарып јатканын кӧргӧн (Иез. 1:20, 21). Иезекииль бу кӧрӱлтени кӧрӱп, мындый сӧстӧр бичиген: «Мыны кӧрӧлӧ, мен кӧҥкӧрӧ тӱшкем» (Иез. 1:28). Кайкамчылу кӧрӱлтени кӧргӧн кийнинде, судурчы тыҥ коркып, бастыра бойы јымырай берген. Иезекииль бу кӧрӱлтени јаантайын шӱӱп сананып јӱрген болор. Анайып, Кудайдыҥ јакылтазын бӱдӱрерге ого Кудайдыҥ агару тыны болужар деп, бӱдӱмјизи там тыҥыган.

8, 9. а) Иегованыҥ јакарузыныҥ кийнинде Иезекииль нени алды? б) Иегова Иезекиильге кату улуска јарлаарга канайып болушкан?

⁸ Иегова Иезекиильге мынайып айткан: «Кижи уулы, тур! Мен сенле куучындажарга турум». Бу сӧстӧр, анайда ок Кудайдыҥ агару тыны Иезекиильге јердеҥ туруп келерге ийде-кӱч берген. «Мендӧӧн тын кире береле, мени тургузып ийди» — деп ол бичиген (Иез. 2:1, 2). Иезекииль Кудайдыҥ судурчызы болуп турарда, оны Иегованыҥ агару тыны башкарган (Иез. 3:22; 8:1; 33:22; 37:1; 40:1). Бу агару тын ого «маҥдайлары кату ла јӱректери кедер улуска» јарлайтан јакылтаны бӱдӱрерге болушкан (Иез. 3:7). Иегова Иезекиильге мынайда айтты: «Мен сениҥ јӱзиҥди олордыҥ ла јӱзи ошкош, маҥдайыҥды — олордыҥ ла маҥдайы  чылап кату эдип салдым. Мен сениҥ маҥдайыҥды отук-таштаҥ да кату, алмаз ошкош эдип салдым. Олордоҥ коркыба, олордыҥ јӱзинеҥ јалтанба» (Иез. 3:8, 9). Бу сӧстӧр, ӧскӧртӧ айтса: «Олордыҥ тескерлежинеҥ бир де чӧкӧбӧ, мен сеге болужарым» дегенин кӧргӱзет.

⁹ Мыныҥ кийнинде Иегованыҥ тыны Иезекиильге јарлайтан јер кӧргӱсти. Судурчы мынайып айдат: «Мен Иегованыҥ сӱреен јаан ийде-кӱчин бойымда сезип турдым». Иезекиильге не керегинде јарлаарын оҥдоп аларга ла бӱдӱмјилӱ этире јарлаарга белетенип аларга, бир неделе керек болгон (Иез. 3:14, 15). Оноҥ Иегова Иезекиильди јалаҥ јерге апарарда, ол ондо «тынла толо берген» (Иез. 3:23, 24). Эмди судурчы јарлаарга белен болды.

10. Јарлаарга биске кандый болуш керек? Нениҥ учун?

¹⁰ Јарлаарга биске кандый болуш керек? Иезекиильдиҥ темин кӧрӱп ийектер. Ого Кудайдыҥ ижин баштаардаҥ озо, Кудайдыҥ агару тыны ийде-кӱч берген. Анайып ла бис керегинде айдарга јараар. Кудайдыҥ агару тыны эмес болзо, бис јарлап болбос эдис. Нениҥ учун дезе јарлаар иш токтоп калзын деп, Сатана бисле јуулажып јат (Ачыл. 12:17). Кижиниҥ кӧрӱмиле кӧрзӧ, бис Сатананыҥ табарулары алдында чек кору јок деп билдирер болорыс. Је јарлаар ишке туружып, бис оны јеҥип аладыс! (Ачыл. 12:9—11). Канайып? Јарлаар ишке туружып турганысла Сатананыҥ табаруларынаҥ коркыбай турганысты кӧргӱзедис. Бис јарлаар ишке туружып турзаас, Сатана јеҥдиртип јат. Сӱӱнчилӱ јарды удурлажулардаҥ коркыбай јарлап турганы́с нени кӧргӱзет? Агару тын биске ийде-кӱч берип турганын ла Иегова бисти јарадып турганын кӧргӱзет (Матф. 5:10—12; 1 Пётр 4:14).

11. Агару тын биске канайып болужар ла оны аларга нени эдер керек?

¹¹ Иегова, сӱрлеп айтса, Иезекиильдиҥ  маҥдайын ла јӱзин кату эткенинеҥ бис неге ӱренип јадыс? Јарлаар ишке учурап турган кандый ла кӱчтерди агару тынныҥ болужыла ӧдӱп чыгарыс (2 Кор. 4:7—9). Агару тынды јаантайын аларга, биске нени эдер керек? Биске оны бир де алаҥзыбай, јаантайын Иегованаҥ сурап турар керек. Иисус бойыныҥ ӱренчиктерине мынайып айткан: «Сурагар... бедирегер... токылдадыгар». Мынайып эдип турзаас, Иегова биске агару тынын берер (Лука 11:9, 13; Ап. ижи 1:14; 2:4).

12. Тӱрбек кайдаҥ келген ле ондо кандый сӧстӧр болгон? (Иезекииль 2:9—3:3).

¹² Иезекиильге јӱк ле агару тын болушкан эмес, је анайда ок оныҥ бӱдӱмјизин Кудайдыҥ сӧстӧри тыҥыткан. Иезекииль дезе кӧрӱлтеде тӱрбек тудунып алган кол кӧрӱп ийген. (Иезекииль 2:9—3:3 кычырыгар.) Бу тӱрбек кайдаҥ келген? Ондо кандый сӧстӧр бичилген? Бу сӧстӧр Иезекиильдиҥ бӱдӱмјизин канайып тыҥыткан? Кӧрӱп ийектер. Кӧрӱнген тӱрбек дезе, Кудайдыҥ ширеезинеҥ келген. Иегова Иезекиильге бу тӱрбекти мынаҥ озо кӧрӱнген ангелдердиҥ бирӱзи ажыра берген болор (Иез. 1:8; 10:7, 20). Анда Кудайдыҥ сӧстӧри, ӧскӧртӧ айтса, тӱймеечи албатыга чыгарылган Кудайдыҥ јаргызы бичилген. Бу јаргыны Иезекииль ол албатыга айдар учурлу болгон (Иез. 2:7). Бу јаргы тӱрбектиҥ эки јанына бичилген болтыр.

13. Иегова Иезекиильге тӱрбекле нени этсин деген? Нениҥ учун бу тӱрбек тату болгон?

¹³ Иегова судурчызына: «Тӱрбегимди јип ий... [оныла] тойо ажанып ал» — деген. Иезекииль тӱрбекти бӱдӱнге јип ийет. Бу сӧстӧрди канай оҥдоор? Иезекиильге Иегованыҥ јарын айдардаҥ озо оны јазап оҥдоп алар керек болгон. Анайда ок ого бу сӧстӧргӧ бӱдер керек болгон. Оноҥ ӧскӧ ондо бу јарды јарлайтан кӱӱн болбос эди. Мыныҥ кийнинде кайкамчылу неме болды. Иезекиильге бу тӱрбек «тату мӧттий» билдирген (Иез. 3:3). Мыны канай айлаар? Ого Иегованыҥ ишчизи болуп иштеери амтанду курсак јип турганына тӱҥей болгон (Сар. 19:8—11). Ол Иеговага оны судурчызы эдип талдап алганына быйанду болгон.

14. Кудайдыҥ јакарузын бӱдӱрерге Иезекиильге не болушкан?

¹⁴ Оноҥ ары Иегова Иезекиильге: «Мениҥ сеге айдып турган сӧстӧримди јазап угуп, тереҥ шӱӱп санан» — деп айткан (Иез. 3:10). Судурчыга бу сӧстӧрди бажына салып, тереҥ шӱӱп сананар керек болгон. Анайып, Кудайдыҥ сӧстӧри Иезекиильдиҥ бӱдӱмјизин тыҥыдып салган. Оноҥ ары Иезекиильде кӧчӱп келген улуска Кудайдыҥ сӱӱнчилӱ јарын айдар ийде-кӱч боло берген (Иез. 3:11). Анайып, Иезекииль бу сӧстӧрди оҥдоп алала бӱдӱп баштаарда, Кудайдыҥ берген јакарузын бӱдӱрерге белен боло берген. (Сарын 19:14 тӱҥдештиригер.)

15. Јарлаар ижис уйадай бербезин деп, биске нени тереҥ шӱӱп сананар керек?

¹⁵ Јарлаар ижис уйадай бербезин деп, биске бӱдӱмјибисти база јаантайын Кудайдыҥ Сӧзи ажыра тыҥыдып турар керек. Ӧскӧртӧ айтса, Кудайдыҥ айдып турган кажы ла сӧзин тереҥ шӱӱп сананып турар керек. А Кудай бӱгӱнги кӱнде биске бойыныҥ Сӧзи, Агару Бичик, ажыра баштанат. Оныҥ Сӧзи бистиҥ санааларысты, сезимдеристи ле кӱӱнисти  башкарып турзын деп турган болзоос, биске нени эдер керек?

16. Кудайдыҥ Сӧзин тереҥ оҥдоорго биске не болужар?

¹⁶ Канайып курсак эт-канысты тыҥыдат, анайып ла Кудайдыҥ Сӧзин ӱренип, шӱӱп сананып турганыс кӧгӱс јанысты тыҥыдат. Бу шӱӱлтени кӧрӱлтеде кӧрӱнген тӱрбек кӧргӱзет. Иегова бисти оныҥ Сӧзиле тойо ажанып алзын деп, ӧскӧртӧ айтса, Агару Бичикти оҥдоп турзын деп кӱӱнзейт. Јакшы оҥдоорго биске мӱргӱӱр, кычырар ла шӱӱп сананар керек. Мӱргӱп турзаас, Кудайдыҥ санаа-шӱӱлтезин оҥдоорго јӱрегисти белетеп јадыс. Оноҥ, Агару Бичиктиҥ сӧстӧрин кычырадыс. Кычырып јадала, токтой тӱжӱп, кычырганысты тереҥ шӱӱп сананадыс. Тузазы кандый болор? Канча ла кире шӱӱп сананып турзаас, Кудайдыҥ Сӧзин ончо ло кире јакшы оҥдоорыс.

17. Агару Бичикте кычырганысты нениҥ учун шӱӱп сананып турар керек?

¹⁷ Нениҥ учун Агару Бичикти кычырып, шӱӱп сананар керек? Бу биске Каандык керегинде јарды јарлаарга ийде-кӱч берет. Анайда ок келер ӧйдӧ Кудайдыҥ кату јаргыларын айдарга ийде-кӱч берер. Бис бу кату јаргыларды удабас ла айдар болорыс. Анайда ок Кудайдыҥ кылык-јаҥдарын шӱӱп сананып турзаас, оныла колбуларыс тыҥыйт. Анайып, тату немени, ол эмезе, јӱрегистеги амырды, таап аладыс (Сар. 119:103).

18. Бистиҥ јерлештерис нени оҥдоп ийер? Нениҥ учун?

¹⁸ Бис судурчылар эмезис. Је бис Иезекииль ле чилеп, Кудайдыҥ Сӧзинде бичилген сӱӱнчилӱ јарды улуска јетирерге бек шӱӱп алганыс. Бу јарды бис Кудай токтотпогончо ло айдарыс. Ол тушта јаргыныҥ кӱни једип келзе, бистиҥ јерлештерис «биске кем де, нени де айтпаган», эмезе «Кудай биске айдарга ундып салган» деп айдып болбос (Иез. 3:19; 18:23). Карын олор бистиҥ куучындаган јарыс Кудайдаҥ болгон деп јарт оҥдоп ийер.

19. Јарлаарга ийде-кӱчти биске не берет?

¹⁹ Јарлаарга ийде-кӱчти биске не берет? Иезекиильге ле болушкан ӱч неме. Бис билерис: бисти Иегова ийген, ийде-кӱчти биске агару тын берип јат ла Агару Бичик бӱдӱмјибисти тыҥыдат. Бис Иегованыҥ болужыла јарлаарга ла учына јетире турумкай артарга бек шӱӱп алдыс (Матф. 24:13).