1. Иегова бисти ого јуук болзын деп кӱӱнзеп турганын бис кайдаҥ билерис?

 ИЕГОВА бисти ого јуук болзын деп кӱӱнзейт (Иак. 4:8). Ол биске Кудайыс, Адабыс ла Најыбыс болорго турган. Ол бистиҥ мӱргӱӱлдеристи угуп, кӱч ӧйлӧрдӧ болужып јат. Анайда ок ол бисти бойыныҥ организациязыныҥ болужыла ӱредет ле корулайт. Је биске Иеговага јууктаарга нени эдер керек?

2. Бис Иеговага канай јууктаар аргалу?

² Иеговага јууктаарга ого мӱргӱӱр керек, оныҥ Сӧзин кычырып, шӱӱп сананар керек. Ол тушта Иеговага сӱӱжис тыҥып, быйанду болорыс. Мынаҥ улам Кудайыска сӧсуккур болор ло оны мактаар кӱӱн келер. Нениҥ учун дезе кӱндӱни ле макты јӱк ле Иегова алар учурлу! (Ачыл. 4:11). Иеговала канча ла кире јуук танышсаас, оныҥ бойына ла организациязына бӱдӱмјибис тыҥыыр.

3. Дьявол бисти Иегованаҥ ырадарга канайып албаданат? Је биске Кудайды ла оныҥ организациязын качан да артыргыспаска не болужар? (Сарын 31:13, 14).

³ Је Дьявол бисти Иегованаҥ туураладарга албаданып јат, анчада ла јӱрӱмисте уур-кӱчтер болуп турза. Ол кандый эп-арга тузаланат? Ол Иеговага ла оныҥ организациязына бистиҥ бӱдӱмјибисти араайынаҥ уйададарга албаданат. Је бис ого удура турар аргалу. Бистиҥ бӱдӱмјибис бек болзо ло Иеговага тыҥ бӱдӱп турган болзоос, бис Кудайды ла оныҥ организациязын качан да артыргыспазыс. (Сарын 31:13, 14 кычырыгар.)

4. Бу јӧрмӧлдӧ бис нени шӱӱжерис?

⁴ Бу јӧрмӧлдӧ бис јуунныҥ тыштында болуп турган кӱчтердиҥ ӱчӱзин кӧрӧрис. Олордыҥ кажызы ла Иегованыҥ ла оныҥ организациязына бистиҥ бӱдӱмјибисти ченеердеҥ айабас. Бу кӱчтер бисти Иегованаҥ канай туураладып  салардаҥ айабас? Сатананыҥ табаруларына удура турарга биске нени эдер керек?

5. Уур-кӱчтер Иегова ла оныҥ организациязына бистиҥ бӱдӱмјибисти канайып уйададып салардаҥ айабас?

⁵ Кезикте бистиҥ јӱрӱмисте јаан кӱчтер болот. Темдектезе, билегисте биске кем-кем удурлажып турат. Эмезе бис иш јок артып каладыс. Бу кӱчтер Иегова ла оныҥ организациязына бӱдӱмјибисти уйададып, бисти Кудайдаҥ канайып туураладардаҥ айабас? Кӱчтер узакка ӧтпӧй турза, бистиҥ чыдалыс чыгып, санаабыс караҥуйлаардаҥ айабас. Сатана мындый арганы божотпой, Иегова бисти сӱӱбей турган деп санаалар берип јат. Ол бистиҥ кӱчтеристе Иегова ла оныҥ организациязы бурулу деп бӱдӱмјилеерге албаданат. Мындый учурал Египетте кезик израильтяндарла болгон. Олор озо баштап Иегова Моисейди ле Ааронды олорды кулданыштаҥ јайымдаарга ийген деп бӱде бергендер (Чыг. 4:29—31). Је фараон олордыҥ јӱрӱмин оноҥ кӱч эдип ийерде, олор Моисейди ле Ааронды бурулап, мындый сӧстӧр айткан: «Слердеҥ улам фараон ло оныҥ кулдары бисти кӧрӧр кӱӱндери јок боло берген. Олор бисти ӧлтӱрип салзын деп, слер олордыҥ колына кылыш бергенеер» (Чыг. 5:19—21). Је бу не аайлу јаман сӧстӧр! Олор Кудайдыҥ чындык ишчилерин бурулагандар! Айдарда, кӱчтер узак ӧтпӧй турза, Иеговага ла оныҥ организациязына бӱдӱмјибис уйадай бербезин деп, бис нени эдер аргалу?

6. Кӱчтерди ӧдӧргӧ Аввакумныҥ теми бистерге канайып болужар? (Аввакум 3:17—19).

⁶ Иеговага јӱрегерди ачып, оныҥ болужына иженигер. Аввакумныҥ јӱрӱминде кӧп кӱчтер болгон. Керек дезе, Иегова ого болушпай турган деп алаҥзып та баштаган. Оныҥ андый сезимдери мындый сӧстӧринеҥ кӧрӱнет: «Иегова, канчазын јайнап суранайын, мени не укпайдыҥ? [...] Кыйын-шыраны не токтотпойдыҥ?» (Авв. 1:2, 3). Је Иегова чындык ишчизиниҥ акту јӱрегинеҥ айткан мӱргӱӱлине каруузын берген (Авв. 2:2, 3). Аввакум дезе Иегова алдындагы ӧйдӧ бойыныҥ ишчилерине канайып болушканын тереҥ шӱӱп сананала, кунукпай, сӱӱнип баштаган. Анайып, Аввакум Иегова ого болужып турган ла оныҥ болужыла ол кандый ла кӱчтерди ӧдӱп чыгар деп бӱдӱмјиленип алган. (Аввакум 3:17—19 кычырыгар.) Бистер неге ӱренедис? Слерде кӱчтер болуп турган болзо, Иеговага мӱргӱп, сезимдереерди куучындагар. Бӱткӱлинче Иеговага иженигер. Ол слерге кӱчтерди чыдажарга ийде-кӱч берер деп бир де алаҥзыбагар. Оныҥ болужын кӧрӱп ийзеер, бӱдӱмјигер тыҥыыр.

7. Ширли эјеге бир тӧрӧӧни нени айткан, је ого Иеговага бӱдӱмјизин јылыйтпаска не болушкан?

⁷ Јакшы кӧгӱс графиктеҥ тудуныгар. Папуа — Јаҥы Гвинеяда јадып турган Ширли b деп эје кӱчтерге табартарда, ого шак ла кӧгӱс график болушкан. Оныҥ билезине јокту јатканынаҥ улам курсак та табарга кӱч болуп туратан. Оны Иеговага бӱтпей барзын деп, бир тӧрӧӧни мынай айткан: «Слерге Иегованыҥ агару тыны болужып турган деп айдып јадыгар. Ол болуш кайда? Слер эмдигенче ле јокту бойоор. Сен јарлап, тегине ле калас ӧй ӧткӱрип јадыҥ». Ширли эје санана берген: «Кудай бисти чын ла ундып салган болор бо? Је мен алаҥзыганымды тургуза ла Кудайга мӱргӱӱл ажыра  куучындагам. Анайда ок Агару Бичикти ле бистиҥ бичиктерди кычырып, јарлаар иште туружып, јуунныҥ туштажуларын божотпогом». Удабай Ширли Кудай оныҥ билезин кичееп турган деп оҥдоп ийген: олор торолобогон до, анайда ок кандый да кӱчтер болгон болзо, сӱӱнчизин јылыйтпаган. Оноҥ ары ол мынайда куучындаган: «Иегова мениҥ мӱргӱӱлдеримди угуп турган деп сескем» (1 Тим. 6:6—8). Слердиҥ де кӧгӱс графигер јакшы болзо, кандый да алаҥзулар ла кӱчтер слерди Иегованаҥ ыраадып болбос.

8. Ака-эјелер кандый кӱчтерге табартардаҥ айабас?

⁸ Бистиҥ ӧштӱлер СМИ-ни ле соцсетьтерди тузаланып, акалар керегинде тӧгӱн јетирӱлер таркадат (Сар. 31:13). Керек дезе кезик акаларды каршулу керектер эткен деп бурулап, тӱрмеге де отургыскылайт. Андый ла айалга баштапкы чакта болгон, апостол Павелди актуга ла јаргылап, тӱрмеге отургызып салгандар. Мынаҥ улам ака-эјелерде кандый сезимдер болгон?

9. Павелди тӱрмелеп ийерде, кезик христиандарла не болгон?

⁹ Баштапкы чакта апостол Павелди Римде тӱрмелеп ийерде, кезик христиандар оноҥ тууралай берген (2 Тим. 1:8, 15). Нениҥ учун? Нениҥ учун дезе та кем де Павелди чын ла јаман керек эткен деп сананып, оноҥ уйалган болор (2 Тим. 2:8, 9). А та кем де оны јаҥдар Павелди ле чилеп истежердеҥ айабас деп коркыган болор. Павелде кандый сезимдер болгон? Павел кӧп кӱчтер ӧдӱп, ака-эјелер учун јӱрӱмин де берерге белен болгон. А олор Павелди таштап ийгендер (Ап. ижи 20:18—21; 2 Кор. 1:8). Бистерге Павелди таштап ийген ака-эјелер ошкош болбос керек. Кӧстӧлгӧн акалар истежӱлерге табартып турза, биске нени ундыбас керек?

10. Сатана кӧстӧлип калган акаларды истежип турза, биске нени ундыбас керек? Нениҥ учун?

¹⁰ Бисти нениҥ учун истежип турган  ла мыныҥ кийнинде кем турганын ундыбагар. 2 Тимофейге 3:12-де мынайып айдылган: «Кудайга беринип, Христос Иисустыҥ Бойында јӱрер кӱӱндӱ ончо улус истедер». Оныҥ учун Сатана шак ла кӧстӧлгӧн акаларды истеп турган деп, биске кайкабас керек. Сатана олорды Кудайга чындык артпазын деп албаданып јат. Ол тушта ол бисти де коркыдып алар (1 Пётр 5:8).

11. Онисифордыҥ теми бисти неге ӱредет? (2 Тимофейге 1:16—18).

¹¹ Јаантайын акаларга болужып, олордыҥ јанында болугар. (2 Тимофейге 1:16—18 кычырыгар.) Баштапкы чакта јаткан Онисифор деп атту христианды эске алып ийектер. Павел ол керегинде мынайып айткан: «[Онисифор] кижендӱ болгонымнаҥ уйалбаган». Ол коркып, уйалардыҥ ордына Павелди бедиреп, таап алала, ого болушкан. Мынаҥ улам оныҥ бойыныҥ да јӱрӱми јеткерлӱ айалгада болгон. Бис мынаҥ неге ӱренер аргалу? Улустаҥ коркып, истедип турган акаларга болушпай отурып калбактар. Карын олорго оноҥ ло ары болужып, олорды корулап јӱректер (Укаа 17:17). Нениҥ учун дезе олорго бистиҥ сӱӱжис ле болужыс сӱреен керектӱ болот.

12. Россиядагы ака-эјелер биске кандый тем кӧргӱзет?

¹² Россиядагы ака-эјелер јакшы тем кӧргӱзет. Олор тӱрмеде отурган кару ака-эјелерине болужарга белен. Иегованыҥ кажы бир Керечизин јаргылап јатса, олор оныҥ кӱӱнин кӧдӱрерге, јаргыларга келип јат. Бистер неге ӱренедис? Кӧстӧлгӧн акаларды бурулап, истежип, тӱрмелеп салза, коркыбагар. Карын олор учун мӱргӱгер. Тӧрӧӧн-туугандарына болужыгар, анайда ок болужатан ӧскӧ дӧ эп-аргалар бедирегер (Ап. ижи 12:5; 2 Кор. 1:10, 11).

13. Биске каткырыжып турган улус Иеговага ла оныҥ организациязына бистиҥ бӱдӱмјибисти канайып уйададып салардаҥ айабас?

¹³ Бистиҥ кудай јаҥысты јаратпай турган тӧрӧӧн-туугандар, кожо иштеп турган улус эмезе кожо ӱренип турган балдар Иегованыҥ бийик нормаларыла јӱрӱп турганыска ла јарлап турганыска каткырыжардаҥ айабас (1 Пётр 4:4). Кезикте олор айдыжат: «Сен јакшы кижи, је сениҥ кудай јаҥыҥ сеге јайым јӱрерге бербей јат. Сен јӱрӱмнеҥ артып калгаҥ». А кезиги бисти јууннаҥ чыгардырып салган улус учун бурулап, мындый сӧстӧр айдар болор: «Сен эм јуугыҥды сӱӱп турган кижи болуп тургаҥ ба?» Мындый сӧстӧрдӧҥ улам, алаҥзып баштаардаҥ айабазыс. Бис сананар болорыс: «Иегованыҥ некелтелери ӧйинеҥ ӧткӱре бийик эмес пе? Оныҥ организациязында токтодулар ӧйинеҥ ӧткӱре кӧп эмес пе?» Мындый айалга слерге таныш болзо, Иегованыҥ јуунынаҥ ырабаска слерге не болужар?

14. Бис Иегованыҥ нормаларыла јӱрӱп турганыска улус каткырыжып турза, канайдарыс? (Сарын 119:50—52).

¹⁴ Не де болуп турза, Иегованыҥ нормаларыла јӱрӱгер. Бу јанынаҥ Иов сӱреен јакшы тем кӧргӱскен. Оны улус ӧчӧп каткырышкан да болзо, ол Иегованыҥ нормаларыла јӱрген. Иовтыҥ најызы деп адалып тургандардыҥ бирӱзи Иов Кудайдыҥ нормаларыла јӱрзе де, јӱрбезе де, Кудайга бу керек те јок деп бӱдӱмјилеерге албаданган (Иов 4:17, 18; 22:3). Је Иов мындый тӧгӱнге бӱтпеген. Иегованыҥ тургускан јакшыныҥ ла јаманныҥ нормалары чын деп ол билген ле оныҥ нормаларыла јӱрерге бек сананып алган. Иов ого каткырыжып тургандарга айткан: «Ӧлӧрдиҥ ӧлгӧнчӧ јек  јок болуп артарым!» (Иов 27:5, 6). Бис неге ӱренедис? Биске улус каткырыжып та турган болзо, Иегованыҥ нормалары чын деп алаҥзыбагар. Иегованыҥ нормалары эҥ артык ла тузалу болуп турган деп слер јӱрӱмеерде канча катап бӱдӱмјиленген болороор. Оныҥ учун бу нормалардаҥ тудунып турган организацияны бир де артыргыспагар! Ол тушта улус слерге канайып та каткырышса, слер Иегованаҥ бир де тууралабазаар. (Сарын 119:50—52 кычырыгар.)

15. Бриджитти тӧрӧӧндӧри нениҥ учун јаман кӧргӧн?

¹⁵ Индияда јадып турган Бриджит деп эјениҥ учуралын кӧрӱп ийектер. Тӧрӧӧндӧри ого Кудайга бӱдӱп турганы учун каткырышкан. 1997 јылда сууга чӧҥӱрилген кийнинде оныҥ Керечи эмес ӧбӧӧни иш јок арткан, мынаҥ улам ол билезин ада-энези јаткан каладӧӧн кӧчӱрип апарган. Је Бриджитте оноҥ до ӧскӧ ченелтелер башталган. Ӧбӧӧни иш таппай турганынаҥ улам ол кыстарын ла ӧбӧӧнин азыраарга, кере тӱжине иштейтен ишке кирип алган. Бого коштой јуук ла деген јуун 350 километр ыраагында болгон. Анайда ок ӧбӧӧниниҥ тӧрӧӧндӧри Бриджиттиҥ кудай јаҥын чек јаратпаган. Айылдагы айалга чек коомойтый берерде, олорго ойто ло кӧчӧргӧ келишкен. Оноҥ кенетийин ӧбӧӧни божой берген, јаан удабай рак оорунаҥ улам кыстарыныҥ бирӱзи, 12 јашту кызычагы, божоп калган. Је айалга оноҥ кӱч боло берген, не дезе, тӧрӧӧндӧри бу ончо тӱбектерде Бриджитти бурулаган. Ол Иегованыҥ Керечизи болбогон болзо, мындый тӱбектер болбос эди деп олор айдышкан. Је андый да болзо, бистиҥ эје Иеговага ла оныҥ организациязына оноҥ ло ары бӱткен.

16. Бриджит эје Иегованыҥ ла оныҥ организациязын артыргыспаган учун кандый кайрал алган?

¹⁶ Бриджит эје јууннаҥ ыраак јадып турганынаҥ улам, аймак кӧрӧӧчи оны јербойыныҥ улузына јарлазын ла јуунныҥ туштажуларын айылында ӧткӱрзин деп кӱӱнзеткен. Озо баштап эјеге аймак кӧрӧӧчиниҥ айтканы кӱч деп билдирилген, је андый да болзо, ол оныҥ јӧбин  тузаланып баштаган. Ол сӱӱнчилӱ јарды улуска јарлаган, јуунныҥ туштажуларын айылында ӧткӱрген, анайда ок кыстарыла кожо билелик бажырыш ӧткӱретен. Мынаҥ кандый туза болды? Мынайып эје Агару Бичикле кӧп ӱредӱлер баштаган. Ӱренген улустыҥ кезиги сууга чӧҥӱрилген. 2005 јылда Бриджит эје текши пионер болуп калган. Бриджит эјениҥ мынайып Иеговага ла оныҥ организациязына чындык артканы канайып кайралдалган? Эјениҥ јадып турган јеринде эки јуун тӧзӧлгӧн. Кыстары дезе Иеговага чындык иштегилейт. Эмди дезе Бриджит эје кӱчтерди ӧдӧргӧ лӧ тӧрӧӧн-туугандардыҥ јамандажын чыдажарга, ийде-кӱчти ого Иегова берген деп, бир де алаҥзыбай јат.

17. Биске нени бек шӱӱп алар керек?

¹⁷ Бис кӱчтерге табартсаас, Сатана биске Иегова бисти таштап ийер деп санаа берет. Анайып ол бисти Кудайдыҥ организациязында болзоос, бойыстыҥ јӱрӱмисти уурладып саларыс деп бӱдӱмјилеерге албаданат. Бого ло коштой кӧстӧлгӧн акаларды бурулап, истежип, тӱрмеге отургызып салза, бисти коркый берзин деп кӱӱнзейт. Анайда ок улус биске каткырыжып турза, бисти Кудайдыҥ нормалары чын эмес деп сананып, оныҥ организациязына алаҥзый берзин деп албаданат (2 Кор. 2:11). Је бис Сатананыҥ эп-сӱмелерин јакшы билерис, ол бисти тӧгӱндеп болбос. Оныҥ учун Сатананыҥ тӧгӱнин јектеп, Кудайга ла оныҥ организациязына чындык артыгар (Сар. 28:7). Иегова слерди качан да артыргыспас деп ундыбагар. Иегова Кудайдаҥ слерди не де айрып болбозын! (Рим. 8:35—39).

18. Келер јӧрмӧлдӧ нени шӱӱжерис?

¹⁸ Бу јӧрмӧлдӧ бис јуунныҥ тыштында болуп турган кӱчтерди шӱӱштис. Је јуунныҥ ичинде болуп турган кӱч айалгалардаҥ улам Иеговага ла оныҥ организациязына бистиҥ бӱдӱмјибис база ченелердеҥ айабас. Бу кӱчтерди ӧдӧргӧ биске не болужар? Бу керегинде келер јӧрмӧлдӧ шӱӱжерис.