1. Чын кӧрӱм-шӱӱлтелӱ артары ол не дегени? (2 Тимофейге 4:5).

 БИСТЕ кӱчтер болуп турза, Иеговага ла оныҥ организациязына чындык артарга јеҥил эмес болот. Је мындый кӱчтерди ӧдӧргӧ биске нени эдер керек? Чын кӧрӱм-шӱӱлтелӱ, сергелеҥ ле бек бӱдӱмјилӱ артар керек. (2 Тимофейге 4:5 кычырыгар, ЈТ.) Чын кӧрӱм-шӱӱлтелӱ болоры ол не дегени? Ол дезе токуналу артып, јарык санаалу, ӱзе немени Иегованыҥ кӧзиле кӧрӧри дегени. Ол тушта бис сезимдериске алдыртпай, ӱзе немени јазап шӱӱп сананарыс.

2. Бу јӧрмӧлдӧ нени кӧрӧрис?

² Ӧткӧн јӧрмӧлдӧ јуунныҥ тыштында болуп турган кӱчтердиҥ ӱчӱзин шӱӱшкенис. А бу јӧрмӧлдӧ јуунныҥ ичинде болуп турган кӱчтердиҥ ӱчӱзин кӧрӧрис. Бу кӱчтердеҥ улам Иеговага чындыгыс ченелердеҥ айабас. Бу јӧрмӧлдӧ мындый айалгалар кӧрӱлер: 1) ака эмезе эје биске јаман баштанган деп билдирип турган болзо, 2) бисти тӱзедип турза, 3) организацияда болгон солынталарды алынарга кӱч болуп турза. Мындый айалгаларда чын кӧрӱм-шӱӱлтелӱ артарга ла Иеговага ла оныҥ организациязына чындык артарга нени эдер керек?

3. Ака ба, эмезе эје бе, биске јаман баштанган деп билдирзе, бисте кандый санаалар болордоҥ айабас?

³ Слерде ака эмезе эје слерди ачындырган учурал болгон бо? Ачындырган кижи аксагалдардыҥ бирӱзи болгон болор. Ол слерди ачындырарга кӱӱнзебеген болордоҥ айабас (Рим. 3:23; Иак. 3:2). Је слер ол кижиге тӱҥей ле тыҥ ачынып калганаар. Керек дезе слердиҥ уйкугар да јылыйган. Оноҥ слерде мындый сурак чыккан болор: «Ака мынайып баштанып турган болордо, јуун Кудайдыҥ организациязы канайып болотон?» Шак ла андый санааны Сатана  берип јат (2 Кор. 2:11). Мындый санаага алдыртып ийзеес, Иеговага иштебей барардаҥ айабазыс ла оныҥ организациязынаҥ да јӱре берердеҥ айабазыс. Айдарда, бисти ака ба, эмезе эје бе, ачындырып ийген деп билдирип турза, чын кӧрӱм-шӱӱлтелӱ артарга ла јаман санааларга алдыртпаска биске не болужар?

4. Иосифке јаман баштанып турарда, ол канайып чын кӧрӱм-шӱӱлтелӱ арткан, бис мынаҥ кандый ӱредӱ аладыс? (Башталганы 50:19—21).

⁴ Катуланбагар. Иосифти јаш тужында акалары јаман кӧргӧн. Олор оны кӧрӧр кӱӱндери јок болгон, кезиктери ӧлтӱрерге де санангылаган (Баш. 37:4, 18—22). Мынаҥ улам акалары оны олјого садып ийген. Оныҥ учун Иосиф 13 јыл коркышту тыҥ ченелтелер ӧткӧн. Андый кӱч ӧйлӧрдӧ Кудай оны сӱӱбей турган ла оны артыргызып салган деп санаалар да келердеҥ айабас болгон. Иосиф бир де катуланбаган. Ол чын кӧрӱм-шӱӱлтелӱ арткан. Бу кайдаҥ кӧрӱнген? Ол токуналу артып, јарык санаалу болгон. Оныҥ учун акаларынаҥ ӧчин алатан арга боло берерде, ол ӧчин албай, олордыҥ јаманын таштаган (Баш. 45:4, 5). Иосиф бойыныҥ кӱчтерин сананбай, бӱдӱн јурукты — Иегованыҥ амадузын кӧргӧн. (Башталганы 50:19—21 кычырыгар.) Бис мынаҥ кандый ӱредӱ аладыс? Улус биске јаман баштанган болзо, бир де Иеговага катуланбагар ла слерди Иегова таштап ийген деп сананбагар. Карын слерге ченелтелерди ӧдӧргӧ ол канайып болужып турганын шӱӱп сананыгар. Бого ло коштой улус слерге јаман баштанып турза, олордыҥ јастыраларына ајарбай, карын сӱӱшле бӧктӧп салыгар (1 Пётр 4:8).

5. Микеас деп акага јаман баштанарда, ол чын кӧрӱм-шӱӱлтелӱ артарга нени эткен?

⁵ Бӱгӱнги ӧйдӧ болгон учуралды кӧрӱп ийектер. Тӱштӱк Америкада јадып турган Микеас b деп аксагалдыҥ учуралы мындый болгон. Ого каруулу кезик акалар коркышту јаман баштанган. Ол мынайда куучындайт: «Ол ӧйдӧ менде коркышту тыҥ стресс болгон. Тыҥ санааркагам. Уйкум да јылыйган, нени де эдип болбозыма ыйлагам». Андый да болзо, Микеас чын кӧрӱм-шӱӱлтелӱ арткан, анайда ок сезимдерине алдыртпаган. Ол јаантайын мӱргӱп, чыдажарга, Иегованаҥ агару тын ла ийде-кӱч сураган. Анайда ок ол бистиҥ бичиктердеҥ оныҥ айалгазына келишкедий јетирӱлер бедиреген. Мында кандый ӱредӱ бар? Слерге ака эмезе эје јаман баштанган деп билдирип турган болзо, токуналу артып, кандый ла јаман санаалардаҥ айрылып туругар. Ол недеҥ улам мынайда айтканын эмезе эткенин бис билбес болордоҥ айабазыс. Оныҥ учун ӱзе немени Иеговага куучындап береле, Иегованаҥ бу айалгага аканыҥ эмезе эјениҥ кӧрӱмиле кӧрӧргӧ болужып берзин деп сурагар. Анайып слерди ачындырган кижиниҥ јаманын таштаар болороор (Укаа 19:11). Иегова слердиҥ айалганы кӧрӱп те јат, кӱч ӧйди ӧдӧргӧ болужып та берер деп, бир де ундыбагар (2 Лет. 16:9; Эккл. 5:8).

6. Иегова бисти сӱӱп турганынаҥ улам тӱзедип турган деп, нениҥ учун оҥдоп турар керек? (Еврейлерге 12:5, 6, 11).

⁶ Тӱзедӱ коркышту јаан ачу экелердеҥ айабас. Бис јӱк ле мындый сезимдерге алдыртып ийзеес, тӱзедӱ ӧйинеҥ ӧткӱре кату берилген деп сананар болорыс ол эмезе тӱзедӱни чек алынбас болорыс. Учы-тӱбинде Иегова бисти сӱӱп турганынаҥ улам кату тӱзедип турган деп јаан учурлу шӱӱлтени ајаруга албай каларыс. (Еврейлерге 12:5, 6, 11 кычырыгар.) Анайда  ок сезимдериске алдыртып ийзеес, Сатананыҥ колына кире берердеҥ айабазыс. Ол бисти тӱзедӱни алынбай, Иеговага иштебей барзын ла јуунды артыргызып салзын деп кӱӱнзеп јат. Айдарда, бисти тӱзедип турза, чын кӧрӱм-шӱӱлтелӱ артарга нени эдер керек?

7. а) Јурукты кӧрӱгер. Пётр јастыразын јобош алынарда, Иегова ого каруулу кандый иш берди? б) Пётрдыҥ теми слерди неге ӱредет?

⁷ Тӱзедӱни алыныгар. Иисус Пётрды апостолдордыҥ кӧзинче ле кӧп катап тӱзеткен (Марк 8:33; Лука 22:31—34). Андый ӧйдӧ ого байла коркышту эби јок болгон. Андый да болзо, Пётр Иисуска чындык арткан. Ол тӱзедӱни алынып, бойыныҥ јастыраларынаҥ ӱренген. Оныҥ учун Иегова ого јуунда каруулу иш берген (Иоанн 21:15—17; Ап. ижи 10:24—33; 1 Пётр 1:1). Пётрдыҥ теми бистерди неге ӱредет? Бисти кем-кем тӱзетсе, бис оны алынып тӱзединзеес, бойыска да, айландыра улуска да, јакшы болор. Анайып бис Иеговага да, ака-эјелериске де тузалу кижи болорыс.

8, 9. Каруузына тургузылган кийнинде, Бернарду акада кандый сезимдер болгон, је ого кӧрӱмин солыырга не болушкан?

⁸ Мозамбик јериниҥ Бернарду аканыҥ учуралын кӧрӱп ийектер. Оны аксагалдыҥ каруулу ижинеҥ чыгарып койордо, баштап тарый ондо кандый сезимдер болгон? Ол эске алат: «Мен тыҥ ачынгам, нениҥ учун дезе бу чыгарган јӧплӧ јӧп эмес болгом». Бернарду ака эмди ол керегинде јуунда улус нени айдар деп санааркаган. Ол айдат: «Канча ай ӧткӧн кийнинде мен чын кӧрӱм-шӱӱлтеге келгем ле Иеговага ла оныҥ организациязына бӱдӱп баштагам». Бернарду акага кӧрӱмин солыырга не болушкан?

⁹ Бернарду ака јартайт: «Алдында аксагал болорымда, ака-эјелерле кожо Еврейлерге 12:7-деги ӱлгерди шӱӱжип туратам. Бу олорго Иегованыҥ тӱзедӱзине чын кӧрӱмдӱ болорго болушкан. А эмди мен бойымнаҥ сурагам: „Бу ӱлгерди кемдерге тузаланар керек?“ Иегованыҥ ончо ишчилерине, ол тоодо меге де». Оноҥ Бернарду ака Иеговага ла оныҥ организациязына ойто бӱдӱп турарга, ӧскӧ дӧ солынталар эткен. Агару Бичикти кӧптӧдӧ кычырып, тереҥжиде шӱӱп сананып баштаган. Ака-эјелер ол керегинде нени сананып турган деп санааркаган да болзо, олорло кожо јарлап туратан, јуунныҥ туштажуларына да туружып туратан. Кийнинде Бернарду аканы ойто аксагал эдип  кӧстӧп салган. Слерди де бу аканы чылап, тӱзеткен болзо, ачугарды узак тутпагар, тӱзедӱни алынып, керектӱ солынталар эдигер (Укаа 8:33; 22:4) c. Анайып этсеер, Иегова слерди ого ло оныҥ организациязына чындык артып турганаар учун кайралдаар.

10. Кандый солынтанаҥ улам кезик израильтяндар Кудайга чындык артпаган болор?

¹⁰ Организацияда кандый бир солынталар эдилзе, бис Иеговага чындык артарыс па? Бу суракты ајаруга албазабыс, Иегованаҥ ыраап калардаҥ айабазыс. Темдектезе, Моисейдиҥ јасагы ла оныла колбулу солынталар болордо, кезик израильтяндар нени эткенин кӧрӱп ийектер. Јасак чыккалакта абыстыҥ молјуларын билениҥ бажы бӱдӱретен. Ол тагыл эделе, бойыныҥ билези учун Иеговага тайылга эдип туратан (Баш. 8:20, 21; 12:7; 26:25; 35:1, 6, 7; Иов 1:5). Је јасак иштеп баштаарда, билелердиҥ бажы болгон улус мындый тайылгаларды этпей барган. Нениҥ учун дезе Иегова Ааронныҥ уулдарын абыстар болор деп кӧстӧп салган. Эмди андый тайылганы олор эдер учурлу. Је Ааронныҥ уулдарынаҥ ӧскӧ кижи билези учун тайылга этсе, ӧлтӱртер учурлу болгон (Лев. 17:3—6, 8, 9) d. Бу шылтактаҥ улам Корей, Дафан, Авирам ла 250 башчылар Моисейге ле Ааронго удура барган болор бо? (Тоол. 16:1—3). Бу сурактыҥ каруузын бис билбезис. Је кандый да болгон болзо, Корей ле оныҥ улузы бу учуралда Иеговага чындык артпаган. Айдарда, организацияда кандый бир солынталар болзо, Иеговага чындыгыс ченелип турза, бис нени эдер аргалу?

11. Каафтыҥ билезинеҥ барган кезик левиттердеҥ кандый тем аларыс?

¹¹ Организациядагы солынталарга акту јӱрегердеҥ јӧмӧжигер. Качан израильтяндар чӧлдӧ болордо, Каафтыҥ билезинеҥ барган левиттер коркышту каруулу иш бӱдӱрген. Албаты јолго атанып ла јаткан сайын, кезик каафитяндар кереестиҥ ковчегин албатынаҥ озо апарып туратан (Тоол. 3:29, 31; 10:33; Иис. Н. 3:2—4). Ол андый јаан кӱндӱ болгон! Је качан израильтяндар Ханаан јерге једип келерде, ӱзе неме солына берген. Албаты бир јерге токтоп каларда, ковчегти ары-бери тажыйтаны керек јок боло берди. Оныҥ учун каафитяндарга ӧскӧ молјулар берилген. Темдектезе, Соломонныҥ башкарган ӧйинде каафитяндардыҥ кезиги кожоҥчылар болуп иштеген, кезиги курсак-тамак учун каруулу болгон, база кезиги ӧргӧӧниҥ эжигинде каруулчыктар болуп иштеген (1 Лет. 6:31—33; 26:1, 24). Каафитяндар: «Бистиҥ ада-ӧбӧкӧлӧрис андый јаан учурлу иш эткен, биске база андый ла иш береер» — деп, бир де комудап сурабаган да. Бис мынаҥ кандый ӱредӱ аларыс? Организациядагы солынталардаҥ улам, слерге бойоорго та нени де солыырга келишсе, акту кӱӱнеердеҥ јӧмӧжигер. Кандый ла ишти сӱӱнип бӱдӱригер. Ундыбагар, Иегова Кудай слерди кандый да иш бӱдӱрип турганаар учун баалап турган эмес, је сӧсуккураар учун баалап јат (1 Сам. 15:22).

12. Рахима эједе, Бет-Элди артыргызарга келижерде, кандый сезимдер болгон?

¹² Бэт-Элде иштеген Рахима деген эјениҥ темин кӧрӱп ийектер. Ого Бэт-Элде  иштеерге тыҥ јараган. Је 23 јылдаҥ ажыра иштеп ийген кийнинеҥ оны специальный пионер эдип кӧстӧп салган. Рахима айдат: «Озо баштап мен тыҥ санааркагам. Бойымды чек эш-кереги јок кижи деп сананып туратам. Оноҥ меге мындый сурак амыр бербей туратан: „Мен кандый јастыра эдип ийдим не?“». Анайда ок јуунда кезик ака-эјелер ого ачу сӧстӧр айдып туратан: «Сен ижиҥди јазап бӱдӱрбеген болорыҥ, оныҥ учун сени Бэт-Элдеҥ аткарып ийген». Бир канча ӧйдиҥ туркунына Рахима эје уйуктап болбой, кажы ла тӱн ыйлап туратан. Је ол айдат: «Мен Иегованыҥ ла организацияныҥ сӱӱжине бир де алаҥзыбайтам». Ого мындый чын кӧрӱм-шӱӱлтелӱ артарга не болушкан?

13. Рахимага јаман санааларла тартыжарга не болушкан?

¹³ Рахима јаман санааларын јеҥип алган. Ого не болушкан? Рахима бистиҥ бичиктердеҥ оныҥ айалгазына келишкедий темалар бедиреп кычырган. Ого анчада ла 2001 јылдыҥ кочкор айыныҥ 1-кы кӱниниҥ «Каруулчы шибеезинде» «Побеждай уныние!» деген јӧрмӧл јаан болуш болгон. Анда Агару Бичиктиҥ бичиичизинде, Маркта, бӱдӱрген ижин канча катап солып турарда, јаман санаалар болгон болор деп бичилген. Рахима эске алат: «Марктыҥ теми меге санааркаштардаҥ айрыларга болушкан». Ол бойыныҥ најыларынаҥ тууралабаган. Бойын килеп, туйуксынып та отурбаган. Ол кандый шӱӱлтеге келди? Организацияны Иегова агару тыныла башкарып турган ла акалар оны баалап јат деп. Је анайда ок Иегованыҥ организациязында эҥ ле керектӱ неме — Иегованыҥ табын бӱдӱрери деп оҥдоп алган.

14. Владо акага кандый солынталарды алынарга кӱч болгон, је ого не болушкан?

¹⁴ Словенияда јадып турган Владо деп 73 јашту аксагалга оныҥ јуунын ӧскӧ јуунла бириктирип, барып турган Каандыктыҥ Туразын бӧктӧп койордо, коркышту ачу болгон. Ол куучындайт: «Мен чек оҥдобой турган болгом, мындый јакшы Каандыктыҥ Туразын не јабып койгон. Меге андый ачу болгон, нениҥ учун дезе бу ла јуукта бис Каандыктыҥ Туразын јазап, иштенген болгоныс. Оноҥ мен бойым агашла узанар кижи бу Каандыктыҥ Туразына мебельди бойымныҥ колымла эткем. Јуундарды бириктирип койордо, андый јаан солынталарга эптежерге  биске, јаажы јаанап калган јарчыларга, јеҥил эмес болгон». Је Владо акага акалардыҥ јакарузын бӱдӱрерге не болушкан? Ол бойы мынайда айдат: «Иегованыҥ организациязында солынталарга эптежип алзаас, бу јаан алкыштар экелет. Оноҥ ол келер ӧйдӧ болотон оноҥ јаан солынталарга белетеп јат». Слерге јуундарды бириктиргенин ле эмезе јуунда молјулараарла колбулу солынталарды алынарга јеҥил эмес болуп турган болзо, Иегова слердиҥ сезимдереерди оҥдоп турган деп, бир де алаҥзыбагар. Слер солынталарга эптежип, Иегова ла оныҥ организациязына чындык артсаар, слерди кайрал сакып јат (Сар. 18:25).

15. Јуунныҥ ичинде кӱчтер боло берзе, чын кӧрӱм-шӱӱлтелӱ артарга нени эдер керек?

¹⁵ Чактыҥ учы јууктаган сайын јуунныҥ ичинде кӧп кӱчтер болордоҥ айабас. Мынаҥ улам Иеговага бистиҥ чындыгыс ченелер болор. Оныҥ учун чын кӧрӱм-шӱӱлтелӱ артар керек. Кандый бир ака эмезе эје слерге јаман баштанган деп билдирген болзо, јӱрегерди катуландырбагар. Ол эмезе аксагалдардаҥ слерге тӱзедӱ берилген болзо, бойоордыҥ сезимдереерди кӧп сананбай, карын ол јӧпти алынып, тӱзединерге албаданыгар. Анайда ок Иегованыҥ организациязыныҥ солынталарынаҥ улам, слерге та нени де солыырга келишсе, солынтаны алынып, башкарту аайынча эдигер.

16. Иеговага ла оныҥ организациязына бӱдерге слерге не болужар?

¹⁶ Иеговага чындыгыс ченелип турза, бис Иеговага ла оныҥ организациязына оноҥ ло ары бӱдер аргалу. Је оноҥ ло ары бӱдерге, чын кӧрӱм-шӱӱлтелӱ артар керек, ӧскӧртӧ айтса, јуунныҥ ичинде кӱчтер боло берзе, токуналу болор керек, анайда ок јарык санаалу артып, ончо немеге Иегованыҥ кӧзиле кӧрӧр керек. Бого коштой Агару Бичиктеги андый ла айалгада болгон улусла јууктада таныжып, олордыҥ темдерин шӱӱп сананыгар. Оноҥ Иегованаҥ болуш сурап туругар. Јуундагы ака-эјелердеҥ бир де тууралабагар. Ол тушта Сатана слерди Иегованаҥ ла оныҥ организациязынаҥ качан да айрып болбос (Иак. 4:7).