1. Иегованыҥ ишчилери Давид чилеп канайып санааркап турган болор?

КАЖЫ ла кижи санааркабай, амыр јӱрерге кӱӱнзеп јат. Је бӱгӱнги кӱнде чек санааркабай јӱрер арга јок. Оныҥ да учун Иегованыҥ ишчилери кезикте санааркап, Давид каан чылап мынайып айдып турган болор: «Канчазын санааркап јӱрейин? Јӱрегим кажы ла кӱн сыстап јат» (Сар. 13:2).

2. Бу јӧрмӧлдӧ нени кӧрӧрис?

² Чек санааркабай јӱретен арга јок то болзо, је ӧйинеҥ ӧткӱре санааркабаска болужатан јӧптӧр бар. Бу јӧрмӧлдӧ бисте кандый санааркаштар болот ло санааркабаска болужатан алты јӧп кӧрӱлер.

3. Бисти кандый айалгалар санааркадып јат? Бу айалгаларды солып болорыс па?

³ Санааркаштар недеҥ улам болор аргалу? Бис башка-башка айалгалардаҥ улам санааркап јадыбыс. Ол айалгалардыҥ кезигин солып болбозыс. Темдектезе, курсак-тамактыҥ, кийим-тудумныҥ, ӧскӧ дӧ немениҥ баазы кӧдӱрилип јат. Кем де коркышту криминальный јерде јадат. А кем де кожо иштеп турган улустаҥ, эмезе кожо ӱренип турган балдардаҥ улам балыр керек  эдип ийбеске эмезе ӧскӧ кандый бир кинчек эдип ийбеске санааркап турган болор. Бу ончо неме телекейдиҥ улузы Кудайдыҥ принциптериле јӱрбей турганынаҥ улам болуп јат. Анайда ок, бу телекейдиҥ кудайы, Сатана, бистерди санааркаштарга алдыртып койзоос, Иеговага иштебей барарыс деп билер (Матф. 13:22; 1 Иоанн 5:19). Оныҥ да учун бу телекейде ондый кӧп санааркаштар болуп турган эмей!

4. Бис база недеҥ улам санааркайдыс?

⁴ Бис ӧскӧ дӧ немедеҥ улам санааркап јадыбыс. Темдектезе, акча јетпей јат, су-кадыгыс уйадай берет, иш јок артып каладыс эмезе иш табып болбой јадыс. Ол эмезе кандый бир ченелтени ӧдӱп албазыс деп санааркайдыс. А та кем де келер ӧйдӧ Сатана Кудайдыҥ албатызына табару этсе, чындык артарым ба деп санааркайт. Мынаҥ улам кем де: «Мен канайып санааркабай јӱретем?» — деп сананар болор.

5. Иисустыҥ сӧстӧрин канайып оҥдоор керек?

⁵ Иисус мынайып айткан: «Нени јиирис, нени ичерис... нени кийерис дебегер» (Матф. 6:25). Бу сӧстӧрлӧ болзо, эмди биске не де керегинде санааркабас керек пе? Јок. Мындый санааркаштар Кудайдыҥ озогы да ишчилеринде болгон. Је андый да болзо, олордыҥ Кудайла колбулары тӱҥей ле бек арткан (1 Каан. 19:4; Сар. 6:3) *. Айдарда Иисус бисти чек санааркабазын эмес, је ӧйинеҥ ӧткӱре санааркабазын деген, оноҥ башка Иеговага јазап иштеп болбой барарыс. Эмди ӧйинеҥ ӧткӱре санааркабаска болужатан јӧптӧр кӧрӱп ийектер. (« Мыны канайып эдер?» деген рамканы кӧрӱгер.)

6. Филиппыдагыларга 4:6, 7-ле болзо, санааркабаска не болужар?

⁶ 1. Јаантайын мӱргӱгер. Санааркаштар болуп турза, Иеговага акту јӱректеҥ мӱргӱгер (1 Петр 5:7). Ол тушта Иегова биске «не ле сагыштаҥ бийик амыр» берер. (Филиппыдагыларга 4:6, 7 кычырыгар.) Бу амыр агару тын ажыра берилет (Гал. 5:22).

7. Санааркаштар тушта канайып мӱргӱӱр керек?

⁷ Иеговага мӱргӱп јатсаар, јӱрегерде не барын ӱзе куучындап беригер. Ӧскӧртӧ айтса неге санааркап турганаарды, мынаҥ улам слерде кандый сезимдер болуп турганын куучындагар. Сурагардыҥ аайына чыгып ийгедий болзогор, Иегованаҥ ойгор ло ийде-кӱч сурагар, а чыгып болбогодый болзогор, Иегованы слерге ӧйинеҥ ӧткӱре санааркабаска болушсын деп сурагар. Иеговага кандый болуш керек болуп турганын чокум айдып берзеер, оныҥ каруузын јарт кӧрӱп ийереер. Је Иегова карууны тӱрген ле бербей турган болзо, оноҥ ло ары чӧкӧбӧй мӱргӱгер (Лука 11:8—10).

8. Мӱргӱӱлде нени айдарга ундыбай турар керек?

⁸ Је анайда ок Иеговага быйаныгарды айдарга ундыбай туругар. Анчада ла кӱч ӧйлӧрӧӧрдӧ алкыштараарды сананып туругар. Је кезикте  бис мӱргӱӱлде кандый сӧстӧр айдарын билбей јадыс. Оныҥ учун: «Иегова Кудайым, болушсаҥ!» — дезеес, ол бисти оҥдоп јат (2 Лет. 18:31; Рим. 8:26).

9. Кӱч ӧйдӧ кемге иженер керек?

⁹ 2. Бойыгарга эмес, Иеговага иженигер. Б. э. озо VIII чакта Ассирия Иуданы јуулап келеткен болгон. Бу ӧйдӧ Иуданыҥ албатызы Иеговага иженердиҥ ордына, Египетке иженип јат (Иса. 30:1, 2). Је Иегованыҥ айтканыла болзо, олор Египетке ижензе, тӱбекке тӱжӱп калар (Иса. 30:7, 12, 13). Оныҥ учун Иегова судурчы Исаия ажыра мынайып айткан: «Токыналу артып, Иеговага ижензеер, ийде-кӱчтӱ болорыгар» (Иса. 30:15б).

10. Слер Иеговага иженип турганаарды кандый айалгаларда кӧргӱзер аргалу?

¹⁰ Иеговага иженип турганысты канайып кӧргӱзерис? Ӱч башка айалга кӧрӱп ийектер. Темдектезе слерге акчалу иш келишкен болзын. Је бу ишке кирзеер, кӧгӱс керектерге ӧй јетпей барардаҥ айабас. Эмезе слерди иште Кудайга иштебей турган кижи јарадып баштаган болзын. Ол эмезе јуук кижигер слерге мынайып айдар болор: «Талда! Эмезе мен, эмезе сениҥ Кудайдыҥ!» Бу ӱч айалганыҥ кажызында ла Иеговага бистиҥ сӧсуккурыс ченелип јат. Је Иегова бисти болужы јок артыргыспас (Матф. 6:33; 10:37; 1 Кор. 7:39). Мындый ӧйдӧ слер Иеговага иженереер бе?

11. Истежӱлердиҥ ӧйинде биске кемдердиҥ теми болужар?

¹¹ 3. Агару Бичиктеги темдердеҥ ӱренигер. Бу темдердеҥ бис истежӱлердиҥ ӧйинде токуналу артарга ла Иеговага иженерге ӱренип аларыс. Темдектезе, Иудеяныҥ Ӱстӱги јаргызы апостолдорды јарлабазын деп токтодордо до, олор коркыбагандар. Карын јалтанбай: «Кудайга улустаҥ артык багар керек» — деп айткандар (Ап. ижи 5:29). Олорды камчылаарда да олор оноҥ ло ары јарлагандар. Нениҥ учун дезе апостолдор Иегова олорло кожо, ол олорды артыргыспас деп билер болгон (Ап. ижи 5:40—42). Анайда ок чындык ӱренчикти, Стефанды, алза. Оны ӧлтӱрерге јадарда, оныҥ јӱреги амыр болгон. Керек дезе јаргыда турарда, оныҥ јӱзи, ангелдиҥ чырайы чылап, јаркындалып турды (Ап. ижи 6:12—15). Нениҥ учун дезе ол Иегованы сӱӱндирип турган деп билген.

12. 1 Петр 3:14 лӧ 4:14-лӧ болзо, биске истежӱлердеҥ нениҥ учун коркыбас керек?

¹² Апостолдор нениҥ учун Иегова олорло кожо деп бӱткен? Нениҥ учун дезе Иегова олорго кайкалдар эдер арга берген (Ап. ижи 5:12—16; 6:8). Је бисте андый арга јок. Бӱгӱнги кӱнде Кудай бисти сӱӱп турганын бойыныҥ Сӧзи ажыра кӧргӱзет. Оныҥ Сӧзинеҥ кӱчтердиҥ ӧйинде Иегова биске агару тыны ажыра болужат деп кӧрӧдис. (1 Петр 3:14; 4:14 кычырыгар.) Оныҥ учун келер ӧйдӧ болотон коркышту тыҥ истежӱлерде мен канайдарым деп санааркаардыҥ ордына бӱгӱннеҥ ле ала Иеговага бӱткенисти тыҥыдар керек. Ол бисти качан да артыргыспас ла аргадап алар деп, бир де алаҥзыбас керек. Анайда ок биске баштапкы чактыҥ ӱренчиктери чилеп  Иисустыҥ: «Мен слерге айдатан сӧс лӧ ойгорлык берерим. Ӧштӱлеригердиҥ бирӱзи де ого удурлажып та, удура сӧс тӧ айдып болбос» — деп айткан сӧстӧрине бӱдер керек. Ол биске: «Чыдамкай болуп, јӱрӱмигерди аргадап ал[арыгар]» деп сӧзин берет (Лука 21:12—19). Анайда ок Иегова чындык учун божогон ишчилерин тиргизип алар деп ундыбай јӱректер.

13. Иеговага иженбеген улустыҥ темдеринеҥ неге ӱренедис?

¹³ Анайда ок Агару Бичикте Иеговага иженбеген улустыҥ темдери бар. Бу улустыҥ темдеринеҥ бис олордыҥ јастыраларын этпеске ӱренедис. Темдектезе, Иуданыҥ каанын Асаны алза. Ого удура ефиоптордыҥ коркышту јаан черӱзи келерде, ол Иеговага иженген. Анайып олор Иегованыҥ алкыжыла ефиоптордыҥ черӱзин јеҥип алган (2 Лет. 14:9—12). Је Иуданы Вааса каанныҥ кичинек черӱзи јуулап келедерде, ол Иеговага эмес, Сирияга иженген (2 Лет. 16:1—3). Анайда ок Аса тыҥ оорый да берерде, Иеговага иженбеген (2 Лет. 16:12).

14. Аса каанныҥ јастыраларынаҥ неге ӱренедис?

¹⁴ Озо баштап Аса Иеговага иженген, је оноҥ ол бойына иженип баштаган. Кижиниҥ кӧрӱмиле кӧрзӧ, Аса Сирияныҥ каанынаҥ болуш сураганында јаман ла неме јок ошкош. Је Сирияныҥ кааны ого кыска ла ӧйгӧ болушкан. Оныҥ учун Иегова ого судурчызы ажыра мынайып айткан: «Сен Иегова Кудайыҥа иженбей, Сирияныҥ каанына иженгениҥ учун, Сирияныҥ черӱзи сениҥ колыҥнаҥ чыгып калды» (2 Лет. 16:7). Айдарда биске бойыска ижене бербеске ајарыҥкай болор керек. Анчада ла кандый бир сурактыҥ аайына тӱрген чыгар керек болзо, меҥдебей Иеговага ижензеес, јастыра алтамдар этпезис.

15. Агару Бичикти кычырып јадала, нени этсе јакшы?

¹⁵ 4. Агару Бичиктиҥ ӱлгерлерин ӱренигер. Мыны канайып эдер керек? Агару Бичикти кычырып јадала, биске јалтанбас болорго ло Иеговага иженерге болужып турган ӱлгерлерди чыгара бичип алып турарга эмезе ичисте эмес, је ӱнденип кычырып турарга јараар. Ол эмезе андый ӱлгерлер кӧстиҥ алдында болуп турза јакшы. Темдектезе, Иисус Навинге Кудайдыҥ јасагын ӱнденип, јаантайын кычырып турар керек болгон. Бу ого албатыны јалтанбай башкарарга болушкан (Иис. Н. 1:8, 9). Анайып ла биске Агару Бичиктиҥ ӱлгерлери коркыбаска ла Иеговага иженерге болужар (Сар. 27:1—3; Укаа 3:25, 26).

16. Иегова бисти ака-эјелер ажыра канайып токунадат?

¹⁶ 5. Кудайдыҥ албатызыла кожо болугар. Иегова бисти ака-эјелер ажыра токунадат ла ого иженерге болужат. Темдектезе, бис јуунныҥ туштажузында акалардыҥ куучын-эрмектерин, ака-эјелердиҥ јартамалдарын угадыс, анайда ок туштажунаҥ озо эмезе кийнинде ака-эјелерле куучындажып јадыбыс (Евр. 10:24, 25). Ол эмезе јуук најыгарга сезимдереерди куучындап туругар. Оныҥ јакшы сӧстӧри слерге тыҥ санааркабаска ла Иеговага иженерге болужар (Укаа 12:25).

17. Еврейлерге 6:19-ла болзо, кӱчтердиҥ ӧйинде Кудайдыҥ Каандыгына иженгенис амырысты јылыйтпаска канайып болужат?

 ¹⁷ 6. Келер ӧйгӧ ижемјигер бек болзын. Кудайдыҥ Каандыгына иженгенис «бек якорьго» тӱҥей. Бу ижемји кӱчтерди ӧдӧргӧ лӧ амыр бербей турган санаалардаҥ айрыларга болужат. (Еврейлерге 6:19 кычырыгар.) Ижемјибис бек болзын деп, Кудайдыҥ Сӧзинде келер ӧй керегинде бичилген сӧстӧрди шӱӱп сананар керек (Иса. 65:17). Анайда ок слер бойоорды бир де јаман јок райда јӱргенеер деп сананыгар (Мих. 4:4). Бого коштой бу ижемјигерде улуска куучындагар. Јарлаар ишке ле ӱренчиктер белетеер ишке канча кире аргагар бар туружыгар. Анайып эдип јӱрзегер, келер ӧйгӧ ижемјигер бек болор (Евр. 6:11).

18. Келер ӧйдӧ кӱчтер кандый болор, олорды ӧдӧргӧ биске не болужар?

¹⁸ Бу телекейдиҥ учы јууктаганы сайын бисте кӱчтер оноҥ јаан болор. Оныҥ учун санааркаштар оноҥ до кӧп болор. Је 2021 јылдыҥ ӱлгери кӱчтердиҥ ӧйинде амырысты јылыйтпаска болужар. Биске бойыска бир де иженбес керек. Айдарда бу јылдыҥ туркунына Иеговага иженип турганысты кӧргӱзектер. «Токыналу артып, Иеговага ижензеер, ийде-кӱчтӱ болорыгар» (Иса. 30:15).