1. Улустыҥ бой-бойыла тӧрӧгӧнзишпей турганы недеҥ кӧрӱнет?

АГАРУ БИЧИКТЕ судурлалганыла калганчы кӱндерде улуста бой-бойыла «јаражар [«тӧрӧгӧнзижер», ЈТ] кӱӱни јок» болор (2 Тим. 3:1, 3). Бу судур бӱгӱнги кӱнде бӱдӱп јат. Темдектезе, канча миллиондор тоолу билелер айрылыжып јат. Эш-нӧкӧрлӧр бой-бойыла јарашпай, керижип-уружып турза, балдар да бойлорын кемге де керек јок деп сезет. Мындый айалга керегинде бир семейный консультант мынайып бичиген: «Кезик билелер айрылышпай да турган болзо, бой-бойына кару болордыҥ ордына, компьютерине, телефонына, планшедине эмезе компьютерный ойынына «карузып», олорго кадалып калган отурып јат. Анайда ок мындый билелер бир турада да јадып турган болзо, бой-бойына соок, бой-бойы керегинде нени де јазап билбес».

2, 3. а) Римдегилерге 12:10-ло болзо, бис кемдерге карузыыр учурлу? б) Бу јӧрмӧлдӧ нени кӧрӧрис?

² Бис бу телекей чилеп, бой-бойыска соок баштанарга кӱӱнзебей јадыс (Рим. 12:2). Карын бис јӱк ле билегистиҥ улузына эмес, је ака-эјелерге де карузып јӱрерге кӱӱнзейдис. (Римдегилерге 12:10 кычырыгар.) Је карузыыр дегенин канайып оҥдоор? Бу сӧс  бир билениҥ улузы бой-бойына јылу баштанып турганын темдектейт. Биске ака-эјелерди база мынайда ла сӱӱр керек. Анайып бис Иегова Кудайыска ака-эјелерле кожо бирлик иштеерис. А бу јогынаҥ дезе, Иеговага бажырганыс калас болор (Мих. 2:12).

³ Ака-эјелерге карузып јӱрерге, биске нени эдер керек? Мыны билип аларга, библиялык кезик темдер кӧрӱп ийерис.

4. Иаков 5:11 Иегованыҥ сӱӱжи керегинде нени айдат?

⁴ Бис Агару Бичиктеҥ Иегованыҥ кӧп јакшы кылык-јаҥдарын билип аладыс. Темдектезе, анда «Кудай — ол сӱӱш» деп айдылат (1 Иоанн 4:8). Анайда ок Иегова биске «кӧп быйанду [«сӱрекей тыҥ карузып јат», ЈТ]». (Иаков 5:11 кычырыгар.) Иегованыҥ мындый јакшы кылык-јаҥдарынаҥ улам бис ого јууктаарга кӱӱнзейдис. Иегова бисти кандый тыҥ сӱӱп јат!

5. Иегова килеҥкейин канайып кӧргӱзет? Бис оныҥ теминеҥ неге ӱренедис?

⁵ Иаков 5:11-ле болзо, Иегованыҥ биске карузып турганынаҥ оныҥ буурзагын ол эмезе килеҥкейин кӧрӧдис (Чыг. 34:6). Кудай килеҥкейинеҥ улам бистиҥ јастыраларысты таштап јат (Сар. 51:1). Оныҥ килеҥкейи јӱк ле бистиҥ јаманысты таштаарга эмес, је кӱч ӧйдӧ биске болужарга кӱӱнзедет (Сар. 37:39; 1 Кор. 10:13). Иегованыҥ биске карузып турганы эне кижиниҥ балазына карузып турганынаҥ тыҥ болот (Иса. 49:15). Бис килеҥкей болзоос, ака-эјелердиҥ јастыраларына ачынбазыс та, олордоҥ чӧкӧбӧзис те (Еф. 4:32). Је эҥ учурлузы, бис олорго кӱч ӧйлӧринде болужарыс. Анайып бис Иегованыҥ теминеҥ килеҥкей болорго ӱренедис (Еф. 5:1).

6. Давид ле Ионафан кандый најылар болгон?

⁶ Агару Бичикте бой-бойына карузып јӱрген толо кемдӱ эмес улустыҥ темдери бар. Темдектезе Ионафан ла Давид. Олордыҥ најылашканы керегинде мынайып айдылат: «Ионафанныҥ јӱреги Давидке тартылып, оны бойын чылап сӱӱп баштаган» (1 Сам. 18:1). Давидти Ионафанныҥ адазыныҥ, Саул каанныҥ, ордына каан эдип майлап саларда, Саул оны ӧлтӱрерге сананган. Ионафан дезе, Давидке чын најы болгон, оныҥ учун адазыныҥ мындый јаман керегине турушпаган. Бу эки најы бой-бойына карузып, болужып јӱрген (1 Сам. 20:42).

7. Давид ле Ионафан недеҥ улам најылашпас эди?

⁷ Давид ле Ионафанныҥ најылашканында јилбилӱ немези бар. Темдектезе, Ионафан Давидтеҥ 30 јаш киреге јаан болгон. Је андый да болзо, Ионафан Давидти ченемел јок, јиит уул деп кӧрбӧгӧн. Карын ол оны тоогон.

8. Ионафан Давидке нениҥ учун јакшы најы болгон?

⁸ Ионафан Давидке бир де кӱйӱнбеген. Ондо адазыныҥ кийнинеҥ каан болуп отуратан јаҥы бар болгон (1 Сам. 20:31). Је ол јобош болгон ло Иегованыҥ тургузып салган јаҥына удура барбаган. Оныҥ учун Иегова Давидти каан эдип майлап саларда, ол ачынбаган. Карын ол Давид најызына чындык болгон. Ионафан Иеговага ла Давидке болуп, адазына да удура барарга коркыбаган (1 Сам. 20:32—34).

9. Ионафан Давидтеҥ артык болорго албаданган ба? Јартап беригер.

⁹ Давид јалтанбас, Иеговага тыҥ бӱткен кижи болгон. Је Ионафан да сӱреен ченемелдӱ, јалтанбас јуучыл болгон. Агару Бичикте айдылганыла, улус адалу-уулдуны: «Мӱркӱттеҥ де тӱрген, карагуланаҥ да кӱчтӱ» — деп айдыжатан (2 Сам. 1:22, 23). Је Ионафан дезе кӱчтӱ болгоныла бир де мактанбаган. Ол Давидле маргышпаган ол эмезе Давидтеҥ артык болорго албаданбаган. Карын ол Давидке карузып јӱрген. Качан Давид Голиафты јеҥип аларда, Ионафан оны «бойын чылап сӱӱп баштаган». Бис ака-эјелерге канайып карузыыр аргалу?

10. «Бой-бойыгарды ару јӱрегердеҥ сӱӱгер» дегени нени темдектейт?

¹⁰ Агару Бичик бистерди: «Бой-бойыгарды ару јӱрегеердеҥ јаантайын сӱӱгер» — деп кычырат (1 Петр 1:22). Иегова бу јанынаҥ сӱрекей јакшы тем кӧргӱзет. Оныҥ биске сӱӱжи андый ару, андый тыҥ! Бис ле ого чындык артатан болзоос, оныҥ сӱӱжинеҥ бисти кем де, не де айрып болбос (Рим. 8:38, 39). «Ару јӱрегердеҥ сӱӱгер» деген сӧстӧр грек тилде кемди-кемди сӱӱрге, албаданар керек деп кӧргӱзет. Је чын ла, кезикте ака-эјелерди ару јӱректеҥ сӱӱрге, јеҥил эмес болот. Олордыҥ јастыраларына бӱдӱрилбей, карын бу јӧплӧ јӱрзеес, јакшы болор эди: «Бой-бойыгарга буурзап јӱрерге кичеенигер. Бойыгар ортодо амырды чеберлеп, Тынныҥ бирлигин корулап аларга ончо кӱчигерди  салыгар» (Еф. 4:1—3). Амырды чеберлеерге, ака-эјелердиҥ јастыраларын тоолоордыҥ ордына, Иегова чылап јакшызын кӧрӧргӧ албаданар керек (1 Сам. 16:7; Сар. 130:3).

11. Ака-эјелерге карузыырга, биске кезикте нениҥ учун кӱч болот?

¹¹ Ака-эјелер јастырып турза, биске олорго карузыырга кӱч болот. Мындый айалга баштапкы чактыҥ христиандарында да болгон. Темдектезе, анда Еводия ла Синтихия эјелер керегинде айдылат. Олор Павелле кожо «Сӱӱнчилӱ Јарды јарлап, кӧп иштеп јӱрген эдилер». Је оноҥ бу эјелер та нениҥ де учун бой-бойыла јарашпай барган. Оныҥ учун Павел олорго бой-бойыныҥ јастыразын тоолобой, карын Иисустыҥ ӱреткениле бирлик јӱрзин деп јакарган (Флп. 4:2, 3).

12. Ака-эјелерге карузыырга, биске нени эдер керек?

¹² Ака-эјелерге карузыырга, биске нени эдер керек? Олорло јууктада таныжар керек. Ол тушта, слерге олорды оҥдоорго јеҥил болор. Башка-башка ака-эјелерле таныжыгар. Олорды јажыла талдабагар. Ионафан ла Давидти сананып ийзеер. Олордыҥ ортозы 30 јаш кире болгон. Оныҥ учун биске ака-эјелерле најылажарга, олордыҥ јажы, угы-тӧзи ле арга-чагы буудак болбозын. Анайып бис «ончо... карындаштарды сӱӱ[п]» турганысты кӧргӱзерис (1 Петр 2:17).

13. Биске кажы ла ака-эјеге јуук најы болор керек пе?

¹³ Эмди биске кажы ла ака-эје јуук најы болор керек пе? Јок, андый болор аргазы јок. Иисусты да алза, ол ончо апостолдорын «најыларым» деп айткан, је анчада ла Иоаннга тыҥ карузыган (Иоанн 13:23; 15:15; 20:2). Оныҥ учун бистиҥ де кажы бир ака-эјеге, ӧскӧ ака-эјелерге кӧрӧ, тыҥ карузыганыста јастыра неме јок. Је бис најыларысты ака-эјелердеҥ артык деп сананбай јадыс. Нениҥ учун  дезе Иисус, оныҥ сӱӱген најызы Иаковло кожо теҥеридеги Каандыктаҥ јер сураарда, олорго мынайып айткан: «Оҥ ло сол јаныма дезе отургызар јаҥ Менде јок» (Марк 10:35—40). Иисустаҥ тем алып турзаас, јуунда бӧлӱништер болбос (Иак. 2:3, 4). А христиан јуунда бӧлӱништер деген неме чек болбос учурлу (Иуда 17—19).

14. Ака-эјелерле маргышпаска, Филиппыдагыларга 2:3 биске канайып болужар?

¹⁴ Јуунда кажы ла ака-эјеге карузып турзаас, бой-бойысла маргышпай јадыс. Темдектезе, Ионафан Давидке бир де кӱйӱнбеген, Давидтеҥ артык болорго албаданбаган. Биске де ака-эјелерге кӱйӱнбей, «бойыгар керегинде јобош сананып, ӧскӧ улусты бойыгардаҥ бийик деп бодогор» деген сӧстӧрди ундыбас керек. (Филиппыдагыларга 2:3 кычырыгар.) Јуунда кажы ла кижи баалу болот. Бистиҥ кажыбыста ла јакшы јаныс бар. Бис јобош болзоос, ака-эјелердиҥ јакшы кылык-јаҥдарын кӧрӧрис ле олордоҥ тем аларыс (1 Кор. 12:21—25).

15. Бис Таня эјениҥ учуралынаҥ неге ӱренедис?

¹⁵ Кӱч ӧйдӧ биске ака-эјелер болужып турза, Иегованыҥ сӱӱжин кӧрӧдис. Ӱч балалу Таня деп эјениҥ учуралын кӧрӱп ийектер. Олор 2019 јылдыҥ США-да ӧткӧн «Любовь никогда не проходит» деген курултайында болгон. Суббот кӱнде, программаныҥ кийнинде, отельге јанып барадарда олорды машина табарган. Таня эје мынайып куучындаган: «Бис машинанаҥ чыгып келеристе, јолдыҥ  кырында бир кижи колыла јаҥып турды. Кӧрӧр болзо, ол бистиҥ ака эмтир. Ол база курултайдаҥ јанып бараткан болтыр. Анайда ок бу аканаҥ ӧскӧ, бистиҥ јаныста база бир машина токтой берген. Анда Швециянаҥ келген 5 ака-эје болгон. Эјелер бисти кучактап ийерде, биске андый јакшы болгон. Бис олорго: „Бисле ӱзе јакшы!“ — деп айдарыста да, олор бисти артыргыспай, скорыйдыҥ келерин сакыган. Скорый да једип келерде, олор бисле кожо болгон. Не дезе, олор бисте чыннаҥ ла ӱзе јакшы ба деп, бӱдӱмјиленип аларга кӱӱнзеген. Бу ӧйдӧ бис кажы ла алтамыста Иегованыҥ јаан болужын кӧргӧнис. Оныҥ учун бис ака-эјелерди тыҥ сӱӱп баштаганыс, анайда ок Иеговага быйаныс тыҥыган». А слерде ака-эјелер болушкан учурал болгон бо?

16. Биске бой-бойыска нениҥ учун карузыыр керек?

¹⁶ Биске бой-бойыска нениҥ учун карузыыр керек? Анайып бис ака-эјелерге болужадыс. Анайда ок Кудайдыҥ албатызы бирлик болзын деп јӧмӧжӧдис. Бого коштой ачык јӱректӱ улус бисти Иисустыҥ чын ӱренчиктери деп кӧрӱп, Иеговага бажырып баштаардаҥ да айабас. Је эҥ учурлузы, бой-бойыска карузып турзаас, бис «буурзак Адабысты, кандый ла коот [токунал] береечи Кудайысты» мактап јадыс (2 Кор. 1:3). Оныҥ учун ака-эјелер, бой-бойыска оноҥ тыҥ карузып јӱректер!