1. 1935 јылда јиит карындаштыҥ јӱрӱминде кандый солынта болгон?

БИР јиит карындаш 1926 јылда 18 јаштуда сууга чӧҥӱрилген. Оныҥ ада-энези, кожо чыккандары Агару Бичиктиҥ Шиҥдеечилери ол эмезе Иегованыҥ Керечилери болгон. Бу јиит ака чӧҥӱрилгенинеҥ ле ала, кажы ла јыл Кайраканныҥ Эҥиринде кызыл аракынаҥ ла калаштаҥ амзап туратан. Је 1935 јылда, Иегованыҥ Керечилериниҥ тӱӱкизинде аҥылу курултай ӧткӧн кийнинеҥ, оныҥ јӱрӱми солынып јат. Ол курултайда Джозеф Рутерфорд ака «Кара-бајырт албаты» деп куучын-эрмек айткан. Бу куучын-эрмекте кандый чындык ачылган?

2. Рутерфорд аканыҥ куучын-эрмегинде кандый јаҥы оҥдомол айдылган?

² Ол ӧйдӧ Агару Бичиктиҥ Шиҥдеечилери Иегованыҥ ончо ишчилери теҥериге барар деп сананган. Јаҥыс дезе, 144 муҥныҥ бӱдӱмјизи, Иегованыҥ теҥериге баратан ӧскӧ ишчилерине кӧрӧ, канча киреге бек деп бодолгон. Је Рутерфорд аканыҥ бу куучын-эрмегинде Ачылта 7:9 јарталган. Анда «кара-бајырт» албаты — Иисустыҥ «ӧскӧ койлоры» * — «ачу-коронды [«улу тӱбекти», ЈТ]» ӧдӱп, ӱргӱлјиге јерде јадар деп, јаҥы оҥдомол  айдылган (Ачыл. 7:14). Олор керегинде Иисус мынайып айткан: «Бу кажаанда эмес база койлорым бар. Мен олорды да экелер учурлу. Олор Мениҥ ӱнимди угар, јаҥыс ӱӱр, јаҥыс Кӱдӱчи болор» (Иоанн 10:16). Айдарда, койлорго тӱҥдештирилген Иисустыҥ ӱренчиктери — Иегованыҥ чындык ишчилери — ӱргӱлјиге јерде јадар (Матф. 25:31—33, 46). Бу оҥдомолдоҥ улам Иегованыҥ кӧп ишчилериниҥ, ол тоодо байагы јиит карындаштыҥ, ижемјизи солынган (Сар. 97:11; Укаа 4:18).

3, 4. 1935 јылда ака-эјелер нени оҥдоп ийген, нениҥ учун?

³ Бу курултайда Рутерфорд ака: «Јерде ӱргӱлјиге јӱрерге кӱӱнзеп турган улус, ӧрӧ туруп ийигер!» — деп сураган. Бу тушта 20 муҥ улустыҥ кӧп сабазы туруп келген. Туруп келген улусты кӧрӧлӧ, Рутерфорд ака: «Кӧрӱгер! Бу не кара-бајырт албаты!» — деп, тыҥ ӱнденип айткан. Бу сӧстӧрди уккан улустыҥ ончозы тыҥ кыйгырыжып сӱӱнгилеген. Олор јерде јӱретенин ле агару тынла майлатпаганын оҥдоп ийгилеген. Эртезинде 840 кижи сууга чӧҥӱрилген. Олордыҥ кӧбизи ӧскӧ койлордыҥ тоозына кирген.

⁴ Бу куучын-эрмектиҥ кийнинеҥ, байагы јиит карындаш ла оноҥ до ӧскӧ ака-эјелер Кайраканныҥ Эҥиринде кызыл аракынаҥ ла калаштаҥ амзабай токтоп калгандар. Бир јобош ака јерде јӱретен ижемјилӱ улустыҥ сезимдерин кӧргӱзип турган мындый сӧстӧр айткан: «1935 јылда Кайраканныҥ Эҥиринде кызыл аракыны ла калашты калганчы катап амзагам. Мен агару тынла майлалбагам, теҥериге барар ижемји менде јок эмтир. Карын јерде јадып, јерди рай эдетен ижемјиге сӱӱнип јадым» (Рим. 8:16, 17; 2 Кор. 1:21, 22). Бу ӧйдӧҥ ала кара-бајырт албаты тоозыла кӧптӧп, майлаткандардыҥ арткан калганына * јӧмӧжип јат.

5. Кайраканныҥ Эҥиринде аракынаҥ ла калаштаҥ амзабай барган улуска Иегова канайып кӧрӧт?

⁵ 1935 јылдаҥ ала аракынаҥ ла калаштаҥ амзабай барган улуска Иегованыҥ кӧрӱми кандый болгон? Иегова олорды јастыра керек эткен деп бурулабаган. Карын олорды ӧскӧ койлордыҥ тоозына кирип турган албаты деп кӧргӧн. Бӱгӱнги де кӱнде кем-кем бойын теҥериге барар деп сананала, аракынаҥ ла калаштаҥ амзап јат (1 Кор. 11:28). Је јастыра эткенин оҥдоп ийеле, јобожыдынып, Иеговага оноҥ ло ары чындык иштеп јат. Эмди олор аракынаҥ ла калаштаҥ амзабай да турган болзо, је Кайраканныҥ Эҥирине тӱҥей ле келип турган. Нениҥ учун дезе анайып олор Иеговага ла Иисуска быйанын кӧргӱзип јат.

6. Иисус ангелдерге нени айткан?

⁶ Бис улу тӱбектиҥ алдында јададыс. Оныҥ учун Ачылтаныҥ 7-чи бажалыгында майлаткандар ла кара-бајырт албаты керегинде бичилгени бисти оморкодып јат. Анда Иисус ангелдерге майлаткандар таҥмалалбаганча тӧрт салкынды божотпозын деп јакарган.  Таҥмалалбаганча дегени ол дезе, майлаткандар Иеговага чындыгын учына јетире кӧргӱспегенче дегени (Ачыл. 7:1—4). Ол тушта Иегова олорго чындык артканы учун кайрал берер. Олор Иисусла кожо теҥериде каандар ла абыстар болуп отурар (Ачыл. 20:6). Анайып 144 муҥ майлаткандар бойыныҥ кайралын алза, Иегова, Иисус ла ангелдер мыны кӧрӱп, тыҥ сӱӱнгилеер.

7. Ачылта 7:9, 10-ло болзо, Иоанн база нени кӧргӧн? (Кадарындагы јурукты кӧрӱгер.)

⁷ Иоанн 144 муҥ каандар ла абыстар керегинде айткан кийнинде, «кем де тоолоп болбос кара-бајырт улус» керегинде куучындаган. (Ачылта 7:9, 10 кычырыгар.) Олор «ак кийимдӱ» болгон. Ак кийими дезе, Сатананыҥ телекейинде Кудайга ла Иисуска чындык артканын кӧргӱзет (Иак. 1:27). Бу улус Иегованаҥ ла Иисустаҥ аргаданыш алганына сӱӱнип, кыйгырыжып турдылар. Олордыҥ колдорында пальма агаштыҥ сабактары болгон. Пальма агаштыҥ сабактарыла олор Иисус олордыҥ кааны болуп турганын кӧргӱскендер. (Иоанн 12:12, 13 тӱҥдештиригер.)

8. Ачылта 7:11, 12-де Иегованыҥ теҥеридеги билези керегинде не айдылат?

⁸ Ачылта 7:11, 12 кычырыгар. Бу ӧйдӧ теҥериде не болуп јат? Иегованыҥ теҥеридеги билези Армагеддонды ӧткӧн кара-бајырт улусты кӧрӱп, тыҥ сӱӱнгилеп јат. Бӱгӱнги кӱнде олор бу судурдыҥ бӱдерин кӧрӧргӧ сӱреен кӱӱнзегилейт.

9. Ачылта 7:13—15-ле болзо, кара-бајырт албаты эмди нени эдип јат?

⁹ Ачылта 7:13—15 кычырыгар. Оноҥ ары Иоанн кара-бајырт албаты «кийимин јунуп, Кураанныҥ каныла ак эткендер» деп кӧрӱп јат. Бу дезе олордыҥ уйады ару болгонын ла Иегова олорды акту улустыҥ тоозына кошконын кӧргӱзет (Иса. 1:18). Анайда ок Иисустыҥ толынты тайылгазына бӱдӱп турганын ла Иеговала колбулары бек болгонын кӧргӱзет (Иоанн 3:36; 1 Петр 3:21). Оныҥ учун Иегова олорго бойыныҥ ширеезиниҥ алдына «тӱни-тӱжи» иштенетен арга берген. Бӱгӱнги кӱнде олор Кудайдыҥ Каандыгын баштапкы јерге тургузып, јарлаар ишке ле ӱренчиктер белетеер ишке эрчимдӱ туружып јадылар (Матф. 6:33; 24:14; 28:19, 20).

10. Кара-бајырт албаты неде алаҥзыбай јат? Олор кандый судурдыҥ бӱдерин кӧргӱлеер?

¹⁰ Улу тӱбекти ӧдӧтӧн кара-бајырт албаты Иегова олорды оноҥ ло ары артыргыспас деп алаҥзыбай јат. Нениҥ учун дезе Иоанн: «Кудайдыҥ чадыры улусла кожо» — деп айткан. Келер ӧйдӧ ӧскӧ койлор Иоанныҥ судурыныҥ бӱткенин кӧрӧр. Анда мынайып айдылган: «Олордыҥ кӧзинеҥ ончо јашты арчыыр. Ӧлӱм де, ачу-корон до, сыгыт та, јобол до база болбос» (Ачыл. 21:3, 4).

11, 12. а) Ачылта 7:16, 17-ле болзо, кара-бајырт албатыга кандый алкыштар берилер? б) Ӧскӧ койлор нениҥ учун Кайраканныҥ Эҥирине барып јадылар?

¹¹ Ачылта 7:16, 17 кычырыгар. Бӱгӱнги кӱнде Кудайдыҥ кезик ишчилери ороонныҥ экономиказы уйадаганынаҥ улам, јуу-согуштардаҥ ол эмезе тӱрмеде отурганынаҥ улам курсакка јединбей јат. Андый да болзо, олор бир де кунукпайдылар. Нениҥ учун дезе олор улу тӱбекти ӧдӱп чыкса, база качан да курсак та јанынаҥ, кӧгӱс те јанынаҥ аштап-суузап јӱрбезин билер. Иоанныҥ бичигениле болзо, олорды  «кандый да изӱ ӧртӧбӧс». Бу дезе Иегова калју телекейди јоголтып јатса, бойыныҥ албатызыныҥ кемизине де кандый да каршу јетирбезин кӧргӱзет. Улу тӱбекти ӧткӧн улусты Иисус «тирӱ сууныҥ агындарына апарар». Кара-бајырт албатыга, бӱгӱнги кӱнде канча миллиард улуска кӧрӧ, ӱргӱлјиге ӧлӱм кӧрбӧйтӧн арга берилер! (Иоанн 11:26).

¹² Мындый ижемји учун ӧскӧ койлор Иеговага ла Иисуска јаан быйанду болот. Иегова олорды теҥериге кычырбаган да болзо, майлаткандарды ла чылап сӱӱп јат. Оныҥ учун јерде де јадатандар, теҥериге де баратандар ончозы Иеговага быйанду болот. Быйанысты дезе, кажы ла јыл ӧткӱрилип турган Кайраканныҥ Эҥирине келип турганысла кӧргӱзедис.

13, 14. Кайраканныҥ Эҥиринде нениҥ учун майлаткандар да, ӧскӧ койлор до болор учурлу?

¹³ Калганчы јылдарда Кайраканныҥ Эҥирине јуулып турган улустыҥ тоозын кӧрзӧ, бир муҥ кире кижиниҥ ортозында јӱк ле бирӱзи аракынаҥ ла калаштаҥ амзап јат. Оныҥ учун кӧп саба јуундарда аракынаҥ ла калаштаҥ амзап турган улус јок. Иегованыҥ ишчилериниҥ кӧбизи јерде јадатан ижемјилӱ. Андый болзо, олор кажы ла јыл Кайраканныҥ Эҥирине нениҥ учун барып турган? Мыны аайлаарга бир тем болужар. Канайып бис најыбыстыҥ тойына олорды сӱӱп турганысты ла олор учун сӱӱнип турганысты кӧргӱзерге барып јадыс, анайып ла ӧскӧ койлор Кайраканныҥ Эҥирине Иисусты ла майлаткандарды сӱӱп турганын кӧргӱзерге барат. Анайда ок ӧскӧ койлор Кайраканныҥ Эҥирине Иисустыҥ толынты тайылгазы олорго ӱргӱлји јӱрӱм јӱретен арга бергенине быйанын кӧргӱзерге барадылар.

¹⁴ Ӧскӧ койлор Кайраканныҥ Эҥирине база бир немедеҥ улам барат. Бу керегинде Иисус мынайып айткан: «Мени эске алынып, анайда эдип јӱригер» (1 Кор. 11:23—26). Оныҥ учун ӧскӧ койлор бу Эҥирди майлаткандар теҥериге барбаганча ӧткӱргилеер. Олор бу Эҥирге ӧскӧ улусты да кычырар.

15. Кайраканныҥ Эҥиринде бистиҥ кажыбыс ла Иегованы ла Иисусты канайып мактаар аргалу?

 ¹⁵ Кайраканныҥ Эҥирине келип, кожоҥ ло мӱргӱӱл ажыра Иегованы ла Иисусты мактап, быйанысты кӧргӱзедис. Андагы болотон куучын-эрмек бисти оноҥ јаан быйанду болорго кӱӱнзедер. Бу јылда айдылатан куучын-эрмек «Иегова ла Иисустыҥ сӱӱжин баалагар!» деп адалар. Кызыл аракыны ла калашты колыска алган тушта, олордыҥ тереҥ учурын сананарыс. Анайда ок Иегова бойыныҥ Уулын бис учун бергениле сӱӱжин кӧргӱскенин сананарыс (Матф. 20:28). Айдарда, теҥеридеги Адабысты ла Иисусты сӱӱп турган ончо улус Кайраканныҥ Эҥирине келгилеер деп алаҥзыбай јадыс.

16. Майлаткандар ла ӧскӧ койлор незиле тӱҥей?

¹⁶ Иегова майлаткандарды да, ӧскӧ койлорды да теҥ баалап јат. Ол бу бӧлӱктиҥ экӱлезин сӱӱп јат. Иегова олор учун бир тӱҥей баа тӧлӧгӧн, ӧскӧртӧ айтса Уулыныҥ јӱрӱмин олор учун берген. Майлаткандарга да, кара-бајырт албатыга да Иеговага ла Иисуска учына јетире чындык артар керек (Сар. 31:23). Је бу эки бӧлӱктиҥ ижемјизи башка: бирӱзи теҥериге барар, экинчизи јерде јадар. Иегова олорго агару тынын да теҥ берет. Бу дезе, майлаткандарга да, ӧскӧ койлорго до агару тын јеткилинче берилип турганын темдектейт.

17. Јерде арткан майлаткандар нени тыҥ сакып јадылар?

¹⁷ Майлаткан христиандар. Майлаткан христиандар энедеҥ чыкса ла теҥериге барар ижемјилӱ болбой јат. Андый ижемји олорго Иегованаҥ берилет. Олор бу ижемјизи керегинде сананып јат, мӱргӱп јат, анайда ок бу кайралын аларга сӱреен тыҥ сакып јат. Је олор теҥеридеги кӧгӱс бӱдӱми кандый болорын јетире оҥдобой турган (Флп. 3:20, 21; 1 Иоанн 3:2). Андый да болзо, олор Иегованы ла Иисусты, ангелдерди ле ӧскӧ дӧ майлаткандарды кӧрӧргӧ тыҥ кӱӱнзеп јадылар. Ол тушта олордыҥ кажызына ла Кудайдыҥ Каандыгында бойыныҥ јери берилер.

18. Ӧскӧ койлор нени тыҥ сакып јат?

¹⁸ Ӧскӧ койлор јерде ӱргӱлјиге јӱретен ижемјизин сӱреен тыҥ баалап јат (Эккл. 3:11). Олор бӱдӱн јерди рай эдип јарандырарга кӱӱнзейт. Ол ӧйдӧ олордыҥ кажызында ла бойыныҥ туразы, сады болор. Райда олор бойлоры да, олордыҥ балдары да бир де оорубас  (Иса. 65:21—23). Кӱӱнзеген кижи кандый ла кырлардыҥ, талайлардыҥ ла агаш-таштыҥ јаражын кӧрӱп, јорыктап јӱрер. А кезик улус Иегованыҥ јайаган ар-бӱткенин шиҥдеер. Је эҥ керектӱзи, олордыҥ Иеговала колбулары кӱннеҥ-кӱнге тыҥып барар.

19. Кайраканныҥ Эҥири биске кандый арга берет? Бу јылда Кайраканныҥ Эҥири качан ӧткӱрилер?

¹⁹ Иегова кажы ла бойыныҥ ишчизине келер ӧйгӧ ижемји берген (Иер. 29:11). Кайраканныҥ Эҥири биске Иеговага ла Иисуска бу ижемји учун быйанысты кӧргӱзетен арга берет. Кайраканныҥ Эҥири Иегованыҥ Керечилериниҥ кажызына ла эҥ ле аҥылу Эҥир болор. 2021 јылда бу Эҥир тулаан айдыҥ 27-чи кӱнинде, кӱн ашкан кийнинде ӧдӧр. Бу суббот кӱн болор. Бастыра јердиҥ ӱстинде Иегованыҥ Керечилери бу Эҥирди башка-башка ӧткӱрер: кем де јайым, кем де истежӱлердиҥ ӧйинде, а кем де тӱрмеде де отурган болор. Је канайып та ӧткӱрилетен болзо, Иегова ла Иисус, ангелдер ле майлаткандар — ончозы бисти теҥеридеҥ кӧрӱп тургулаар. Оныҥ учун кажы ла јуунга, кажы ла бӧлӱкке, јаҥыскан болотон кажы ла јарчыга бу Эҥирди ӧткӱрерге кандый да буудак болбозын!