ИЕРУСАЛИМДЕ Агару Бичикте айдылган ороондорго учурлалган музей бар. Анда б. э. озо 700—600 кире јылдардыҥ деп чотолып турган јалбак таш кичеелет. Бу таш Израильдиҥ јеринде, Хеврон деп калада, божогон улустыҥ сӧӧгин јууйтан куй таштаҥ табылган. Бир научный журналла болзо, анда мындый сӧстӧр бичилген: «Хагавтыҥ уулын, Хагафты, Яхве Саваоф каргап салзын». Бу сӧстӧр Агару Бичикке бӱдерге јараар деп канайып кӧргӱзет? Мынаҥ, библиялык ӧйлӧрдӧ Кудайдыҥ ады јарлу болгоны кӧрӱнет. Бу ат јебрен еврей тилге ЙХВХ деп тетраграмматонло бичилген. Кудайдыҥ ады, анайда ок Кудайдыҥ адынаҥ турган улустыҥ ады-јолы божогон улустыҥ сӧӧгин јууйтан ӧскӧ дӧ куй таштарда туштап туратан.

Джорджия штаттыҥ (США) университединде иштеп турган лингвистиканыҥ специализи Рейчел Набулси мындый сӧстӧр айткан: «ЙХВХ деп тетраграмматонныҥ кӧп тузаланылганын кӧрзӧ, еврейлердиҥ бу атка тоомјылу баштанганы кӧрӱнет». Оныҥ да учун Агару Бичикте Кудайдыҥ ады муҥдар катап туштап јат. Керек дезе улустыҥ да ады-јолына Кудайдыҥ ады кирет.

Анайда ок «Яхве Саваоф» деп бичилген сӧстӧрдӧҥ «Иегова — черӱлердиҥ башчызы» деп кӧрӱнет. Айдарда, библиялык ӧйлӧрдӧ улус јӱк ле Кудайдыҥ адын эмес, је «Иегова — черӱлердиҥ башчызы» деп тузалангылаган болтыр. Оныҥ да учун «Иегова — черӱлердиҥ башчызы» деп сӧстӧр Агару Бичикте 283 катап туштайт. Бу сӧстӧрди кӧп сабада Исаия, Иеремия ла Захария тузалангандар.