1, 2. Исаия 65:16, 17-де бичилген Иегованыҥ сӧстӧри биске турумкай болорго канайып болужат?

2017 ЈЫЛДА регион курултай «Турумкай болугар!» деп адалган. Бу курултайдыҥ программазы болотон кӱчтерди ӧдӧргӧ нени эдер керек деп кӧргӱзип берген. Оноҥ бери тӧрт јыл ӧдӱп калган, је бис эмдигенче бу калју телекейде јададыс.

² Слерде бу ӧткӧн јылдарда кандый кӱчтер болгон? Тыҥ ооруганаар эмезе јуук кижигерди јылыйтканаар, ол эмезе ар-бӱткенниҥ тӱбегинеҥ, базыныштаҥ ла истежӱлердеҥ шыралаганаар. Анайда ок јажаар јаанап калганаардаҥ ла COVID-19 деп пандемияныҥ кӱчтеринеҥ санааркап турган болороор. Бис келер ӧйди тыҥ сакып јадыс. Нениҥ учун дезе ол ӧйдӧ андый кӱчтер јоголып калар. Олор «санаага да, јӱрекке де келбес». (Исаия 65:16, 17 кычырыгар.)

3. Бис нени эдер учурлу ла нениҥ учун?

³ Бу телекейдиҥ јӱрӱми коркышту кӱч. Је келер ӧйдӧ мынаҥ јаан кӱчтер болордоҥ айабас (Матф. 24:21). Оныҥ учун биске оноҥ ло ары турумкай болорго ӱренер керек. Нениҥ учун дезе Иисус мындый сӧстӧр айткан: «Чыдамкай болыгар — ол тушта јӱрӱмеерди аргадап аларыгар» (Лука 21:19). Бисте ошкош кӱчтерде турумкай арткан ака-эјелердиҥ темдерин шӱӱп сананып турзаас, турумкай болорыс.

4. Турумкай болорыныҥ эҥ јакшы темин Иегова кӧргӱзет деп нениҥ учун айдарга јараар?

⁴ Турумкай болорыныҥ эҥ јакшы темин кем кӧргӱзет? Иегова Кудай. Кайкамчылу дезеер? Је сананып ийзеер де, Дьяволдыҥ башкарып турган телекейи уур-кӱчтерле толуп калган. Кудай мыныҥ ончозын эмди ле јоголтып ийер эди. Је ол јаманды јоголторго, тургузып салган  ӧйин сакып јат (Рим. 9:22). Эмди, Кудайдыҥ эм тура јоголтпой турган кӱчтериниҥ тогузын кӧрӱп ийектер.

5. Кудайдыҥ ады канайып јабарлалган? Мынаҥ улам слерде кандый сезимдер болот?

⁵ Јабарлалып калган ады. Кудай бойыныҥ адын сӱӱп јат (Иса. 42:8). Ол оныҥ адын улус тооп турзын деп кӱӱнзейт. Је алты муҥ јылдыҥ туркунына оныҥ ады јабарлалып јат (Сар. 74:10, 18, 23). Бу Эдем садта башталган. Дьявол, ӧскӧртӧ айтса, «јабарлаачы» Иегованы Адам ла Евага ырысту болотон арга бербей турган деп бурулаган (Баш. 3:1—5). Ол бӱгӱнги де кӱнге јетире улусты анайып ла тӧгӱндеп јат. Улус Кудайдыҥ адын тообой турган деп санааркап, Иисус ӱренчиктерин мынайып мӱргӱӱрге ӱреткен: «Теҥеридеги Адабыс! Адыҥ Сениҥ агарулалзын» (Матф. 6:9).

6. Иегова нениҥ учун јӱк ле ол башкарар јаҥду деген сурактыҥ аайы-бажына чыгарга, ӧйди јеткилинче берген?

⁶ Башкарар јаҥына удурлажу. Јерле, теҥериле јӱк Иегова башкарар јаҥду. Оныҥ башкарузы эҥ ле јакшы (Ачыл. 4:11). Је Сатана ангелдер ле улусты мынайып сананбазын деп албаданат. Бу сурактыҥ аайы-бажына чыгарга кӧп ӧй керек болгон. Оныҥ учун Иегова ойгор эткен. Ол улуска Јайаачызы јок јӱрӱп болбос деп оҥдоорго, ӧйди јеткилинче берген (Иер. 10:23). Кудайдыҥ чыдамкайынаҥ улам јӱк ле ол башкарар јаҥду ла јӱк ле оныҥ башкарузы чыннаҥ ла амыр-энчӱ, јеткер јок јӱрӱм берер деп, кем де алаҥзыбас.

7. Иеговага удура кемдер тӱймеен кӧдӱрген? Келер ӧйдӧ олорло не болор?

⁷ Балдарыныҥ тӱймеени. Иегова балдарын: ангелдерди де, улусты да бир де једикпес јок, толо кемдӱ эдип јайаган. Је оноҥ бир ангел тӱймеен кӧдӱрип, Сатана, ӧскӧртӧ айтса, «удурлажаачы» болуп калган. Бу тӱймеенге толо кемдӱ Адам ла Ева бириккен (Иуда 6). Кийнинде Сатанага ӧскӧ ангелдер ле улус биригип, Иеговага база удура баргандар. Керек дезе израильтяндар да, Кудайдыҥ талдап алган албатызы, оноҥ јана болуп, тӧгӱн Кудайларга бажырып баштаган (Иса. 63:8, 10). Балдары оны садып ийерде, Иеговага коркышту ачу болгон. Је Кудай чыдамкай болуп, бу ончо немени ӧткӧн. Ол оноҥ до ары ончо ӧштӱлерин јоголтотон ӧй келбегенче, турумкайын кӧргӱзер. Бу кӱн калју телекейдеҥ шыралап калган, је Иеговага чындык арткан улустыҥ ончозына ырысту кӱн болор.

8, 9. Сатана ла улус Кудайды канайып бурулайдылар? Олордыҥ айтканы тӧгӱн деп, бис канайып кӧргӱзерис?

⁸ Сатананыҥ тӧгӱни. Сатана чындык Иовты, ол тоодо Кудайдыҥ ончо чындык ишчилерин, Кудайга акту кӱӱнинеҥ иштебей турган деп бурулаган (Иов 1:8—11; 2:3—5). Оныҥ андый тӧгӱни бӱгӱнги кӱнге јетире улалат (Ачыл. 12:10). Је бис Сатананы тӧгӱнчи деп кӧргӱзер аргалу. Канайып? Ченелтелер ле кӱчтер тушта Кудайга чындык артып, ого сӱӱжисти кӧргӱзип турзаас. Ол тушта Иегова бисти турумкайыс учун Иовты ла чылап кайралдаар (Иак. 5:11).

⁹ Сатана кудай јаҥныҥ башчылары ажыра улустыҥ кыйын-шыразында Кудай бурулу деп ӱредет. Темдектезе, бала божозо, кезик кудай јаҥныҥ башчылары мынайып айдыжат: «Теҥериде Кудайга ангел керек болгон, оныҥ учун ол слердиҥ балагарды алып алган». Бу коркышту јаан тӧгӱн. Карын, бис чынды билерис. Оныҥ учун бис ооруп турзаас,  јууктарысты јылыйтсаас, Кудайысты бурулабайдыс. Удабас Иегова оору-јоболды јоголтып салар, божогон улусты тирилтип ийер деп бӱдӱп јадыс. Бу керегинде улуска куучындап турзаас, Кудайга Сатананыҥ тӧгӱнине каруу беретен арга бередис (Укаа 27:11).

10. Сарын 22:23, 24-тӧҥ Иегова керегинде нени билип јадыс?

¹⁰ Кару ишчилериниҥ кыйын-шыразы. Иегова килеҥкей Кудай. Ол бисти истежӱлердеҥ, оору-јоболдоҥ ло бойыстыҥ јастыраларыстаҥ шыралап турганысты билер. (Сарын 22:23, 24 кычырыгар.) Биске ачу болзо, ого до ачу болот. Ол бисти јӱк ле килеп турган эмес, је кыйын-шыраны јоголтып салар деп сӧзин берет. (Чыгыш 3:7, 8; Исаия 63:9 тӱҥдештиригер.) Оныҥ сӧзинде мындый сӧстӧр бар: «Кудай... [кӧзистеҥ] ончо јашты арчыыр. Ӧлӱм де, ачу-корон до, сыгыт та, јобол до база болбос, нениҥ учун дезе эмдигизи ӧдӱп калган» (Ачыл. 21:4, ЈТ).

11. Иегова божоп калган јуук најыларына нени сезет?

¹¹ Јуук најыларын јоктооры. Иегова божоп калган чындык ишчилерине санаап јат (Иов 14:15). Ол олорды ойто катап кӧрӧргӧ сӱреен тыҥ кӱӱнзейт. Темдектезе, ол «кӧстӧҥ кӧскӧ... куучындашкан» Моисейге эмезе бойыныҥ јуук најызына Авраамга тыҥ санаап јат (Чыг. 33:11; Иак. 2:23). Анайда ок Давидти ле сарындардыҥ ӧскӧ дӧ чӱмдеечилерин тыҥ јоктоп јат. Нениҥ учун дезе олор Иегованы мактап, сӱреен јараш кожоҥдор бичиген (Сар. 104:33). Бу улус божоп то калган болзо, Кудай олордыҥ кажызын да ундыбаган (Иса. 49:15). Иегова олор керегинде ончоны билер. Агару Бичикте олор Кудайдыҥ санаазында эмдигенче ле тирӱ деп айдылат (Лука 20:38).  Удабас Иегова божогон улузын тирилтип алза, олор ойто ого бажырар, а Кудай дезе олордыҥ акту јӱрегинеҥ мӱргӱгенин угар. Бу шӱӱлтелер јуук улузын јылыйткан улусты сӱреен токунадып јат.

12. Бу калганчы кӱндерде Иегованы анчада ла не санааркадат?

¹² Телекейдеги базыныш. Эдемдеги тӱймеенниҥ каршузы коркышту јаман болор ло айалга солынбаганча кӧп ӧй ӧдӧр деп Иегова билген. Бӱгӱнги кӱнде болуп турган јаманды, несправедливостьты ла базынышты оныҥ кӧрӧр кӱӱни јок. Адаанын алар кижи јок улусты, темдектезе, ӧскӱс балдарды ла ӧбӧӧни јок арткан ӱй улусты базынып турза, ого коркышту ачу болот (Зах. 7:9, 10). Је анчада ла оныҥ чындык ишчилерин јаман кӧрӱп, тӱрмелеп турза, Иегова тыҥ санааркайт. Бир де алаҥзыбагар, Иегова слерди тыҥ сӱӱп јат! Нениҥ учун дезе слер кӱчтерди ӧдӱп, Иегова ла чылап, турумкай болодыгар.

13. Улус не јанынаҥ ӱрелип калган? Иегова удабас нени эдер?

¹³ Улустыҥ там ла ӱрелип баратканы. Улус кылык-јаҥыла Иеговага тӱҥей эдип јайалган. Је Сатана олордыҥ кылык-јаҥын ӱреп, олорды јаман керектер эдерине кӱӱнзедет. Нойдыҥ кӱндеринде «јер-ӱстинде улустыҥ кинчек-јаманы ажын[ган]». Мынаҥ улам «јер-ӱстинде улусты не јайадым болбогой деп Кайраканныҥ јӱреги ачула толгон» (Баш. 6:5, 6, 11). Оноҥ бери айалга солынган ба? Јок. Балыр керектер там кӧптӧп калды. Темдектезе, улус алышкалакта кожо конгылайт. Билелӱ улус эш-нӧкӧри эмес кижиле конот. Анайда ок гомосексуализм де таркап калган (Еф. 4:18, 19). Бу керектер Сатананы сӱӱндирип јат. Је анчада ла Кудайдыҥ кижизи уур кинчек эдип ийзе, Сатана тыҥ сӱӱнет. Иегованыҥ мындый керектерди кӧрӧр кӱӱни јок. Оныҥ учун ол мындый керектерди эдип, солынарга кӱӱнзебей турган улусты удабас јоголтып салар.

14. Улустыҥ эдип турган керектеринеҥ улам Јерле, тындуларла не болот?

¹⁴ Јерди ӱреп баратканы. «Кижи кижиле башкарганда, ого каршу јетирет», је мыныҥ ӱстине Кудайдыҥ јайаандарын оныҥ јакарганы аайынча кичеебей, Јерди коркышту тыҥ ӱреп јат (Баш. 1:28; Эккл. 8:9). Учёныйлардыҥ айтканыла, улустыҥ эдип турган керектеринеҥ улам удабас тындулардыҥ ла ӧзӱмдердиҥ миллиондор тоолу бӱдӱмдери јоголып калар. Оныҥ да учун учёныйлардыҥ ар-бӱткен јеткерлӱ айалгада деп санааркап тургандары јолду. Карын, Иегова «јерди кырып тургандарды кырар» ла бастыра јерди рай эдер деп сӧзин берген (Ачыл. 11:18; Иса. 35:1).

15, 16. Иегова ла чылап турумкай артарга биске не болужат? Тем куучындап беригер.

¹⁵ Сананып ийзеер де, теҥеридеги Адабыс бу ончо јаманды канча јылдардыҥ туркунына кӧрӱп, чыдажып јат! (« Иегова нени кӧрӱп турумкай болот» деген рамканы кӧрӱгер.) Кудай бу калју телекейди, јоголтойын ла дезе јоголтып салар эди. Је ол эмдиги јетире јоголтпогон. Бис оныҥ мындый чыдамкайы учун быйанду болодыс. Бир тем кӧрӱп ийектер. Эш-нӧкӧрлӧр балазыныҥ чыгарын сакыгылайт. Је бу ок ӧйдӧ олордыҥ балазы оору чыгар ла узак јӱрбес деп билип ийет. Кандый да кӱчтер болотон болзо, олор балазыныҥ чыкканына сӱӱнип, оны сӱӱрге ле кичеерге белен болот.

¹⁶ Анайып ла Адам ла Еваныҥ бала-барказы толо кемдӱ эмес болуп чыгат.  Је Иегова олорды тӱҥей ле сӱӱп ле кичееп јат (1 Иоанн 4:19). Је ӧрӧги айдылган темдеги ада-энеге кӧрӧ, Иегова балдарыныҥ кыйын-шыразын јоголтып ийер аргалу. Кудай кыйын-шыраны јоголтотон кӱнди ле саатты тургузып салган (Матф. 24:36). Бу кӱн келбегенче Иегованыҥ сӱӱжин шӱӱп сананып турзаас, турумкай болуп артарыс.

17. Еврейлерге 12:2, 3-ле болзо, биске кӱчтерди ӧдӧтӧн ийде-кӱчти не берер?

¹⁷ Иегова — турумкай болорыныҥ эҥ јакшы теми. А Иисус Адазыныҥ турумкайынаҥ тем алат. Анайып, ол јерде болордо јамандадып, кыйын-шыралу ӧлӱмди бис учун чыдажып ӧткӧн. (Еврейлерге 12:2, 3 кычырыгар.) Иисуска бу ончо кӱчтерди ӧдӧргӧ Иегованыҥ турумкайы болушкан. Айдарда, Иегованыҥ турумкайы кӱчтерди ӧдӧтӧн ийде-кӱчти биске де берер.

18. 2 Петр 3:9-ла болзо, Иегованыҥ чыдамкайынаҥ улам кандый арга берилген?

¹⁸ 2 Петр 3:9 кычырыгар. Бу калју телекейди качан јоголтсо јакшы болорын Иегова билер. Је эм тура Иегова миллиондор тоолу улуска оны билип, оныҥ ишчилери болуп калатан арга берет. Анайып, олордыҥ кажызы ла Иеговага быйанду болот. Нениҥ учун дезе Иегова чыдамкайын кӧргӱзип, олордыҥ кажызына ла ак јарыкка чыгып, оны сӱӱп баштайла, ого јӱрӱмин учурлаарга ӧйди јеткилинче берген. Бу телекейдиҥ јоголтыларын миллиондор тоолу улус ӧдӱп чыкса, Иегованыҥ чыдамкайы калас болбогон деп кӧрӱне берер.

19. Бис нени эдерге бек шӱӱп алганыс? Бу учун биске кандый кайрал берилер?

¹⁹ Иегованыҥ теми бис уур-кӱчтерди ӧдӱп, ырысту болор аргалу деп ӱредет. Нениҥ учун дезе, Сатананыҥ тӱймеени кыйын-шыра да экелген болзо, Иегова ырысту Кудай болуп артат (1 Тим. 1:11). Иегова адын агарулап, јӱк ле ол башкарар јаҥду деп кӧргӱзип, бистиҥ уур-кӱчтеристи ле јаманды јоголтпогончо бис те ырысту ла чыдамкай болор аргалу. Оныҥ учун Иегованыҥ чыдамкайын кӧрӱп, бис те чыдамкай болуп јӱректер. Ол тушта бис керегинде мындый сӧстӧр айдарга јараар болор: «Ченелтеге чыдажып турган кижи кежиктӱ, нениҥ учун дезе, ол ченеделе, јӱрӱмниҥ кайралын алар. Бу кайралды Кайракан Оны сӱӱген улуска берер болгон» (Иак. 1:12).