Иегова биле тӧзӧп јаткан улусты ырысту болзын ла качан да айрылышпазын деп кӱӱнзеп јат (Матф. 19:4—6). Биле тӧзӧӧргӧ турган болзоор, јарагадый эш-нӧкӧр таап аларга слерге не болужар? Иегова бистиҥ Јайаачыбыс. Оныҥ учун биске не болужарын ол эҥ јакшы билер. Јолыгыжып турган ла билелӱ болуп калган ӧйдӧ, бис оныҥ принциптериле башкарынзаас, чыннаҥ ла ырысту болорыс. Је эмди бу принциптердиҥ кезигин кӧрӱп ийектер.

Баштапкызында, биске јаан учурлу чындыкты ундыбас керек: «Јӱрек эҥ тӧгӱнчи ле тыҥ ӱрелип калган» (Иер. 17:9). Оныҥ учун эки кижи јаҥы ла јолыгып, сезимдерине алдырып ийзе, ойгор јӧптӧр чыгарып болбой јат. Сезимдерле башкарынып, биле тӧзӧгӧн улус кийнинде чӧкӧп јат (Укаа 28:26). Айдарда, биле тӧзӧӧрдӧҥ озо, сезимдерле башкарынбай, бой-бойыгарды јакшы билип алыгар.

Анайда ок Укаа сӧстӧр 22:3-те: «Озолондыра сананар кижи тӱбекти кӧрӱп, јажынат, ченемел јок кижи ичкери барып, тӱбекке тӱжет» деп айдылат. Айдарда, јарагадый эш-нӧкӧрди таныжатан сайттардаҥ бедирезе, нениҥ учун јеткерлӱ? Нениҥ учун дезе ондый сайттарда танышкан улус кийнинде тӧгӱндедип салганын билип ийет. Темдектезе, андый сайттарда кезик улус тӧгӱн аккаунттар эдип, бӱдӱҥкей улустыҥ акчазын уштый берет. А кезиктери бойлорын Иегованыҥ Керечилери деп тӧгӱндегилейт.

Анайда ок кижиге јарагадый эш-нӧкӧр таап берерге кезик сайттар математический алгоритмле тузаланат. Је мындый алгоритмдер чыннаҥ ла болужып турган деп кайда да айдылбаган. Эш-нӧкӧр таап алатан јаан учурлу суракта кижиниҥ тургускан формулаларына иженери ойгор бо? Оны Кудайдыҥ принциптериле кижи канайып тӱҥдештиретен эмеш? (Укаа 1:7; 3:5—7).

База бир принцип Укаа сӧстӧр 14:15-те бар: «Ченемел јок кижи кажы ла сӧскӧ бӱдет, а керсӱ кижи кажы ла алтамын сананат». Биле тӧзӧӧрдӧҥ озо, эш-нӧкӧр болотон кижини јакшы билип алар керек. Је таныжатан сайттарда кижини јакшы билип аларга кӱч болот. Слер ого бойоордыҥ страницагарды ачып, кӧп бичижип, куучындажып  та турган болзогор, бой-бойыгарды јакшы билип алганыгар деп айдарга јараар ба? Кезик учуралдарда интернетте таныжып, чыннаҥ ла јарап турган деп сананган кижизи, кӧстӧҥ-кӧскӧ куучындашкан кийнинде, јарабай калат.

Сарнаачы айткан: «Мен тӧгӱнчи улусла отурбагам, чын јӱзин јажыргандарла јӱрбегем» (Сар. 26:4). Кӧп саба улус таныжатан сайтта бойы керегинде тӧгӱнди де бичип салза, јаман неме јок деп сананат. Анайып олор бойы керегинде кӧпчидип ийет эмезе бойы керегинде та нени де јетире айтпай јат. Кезик улус бойыныҥ страницазында олор Иегованыҥ Керечилери деп бичип салат. А бу чыннаҥ ла андый ба? Олор сууга чӧҥӱрилип калган ба? Олордыҥ кӧгӱзи тереҥ бе? Иеговала колбулары бек пе? Јуундагы улус олорды тооп јат па? Ол эмезе олор јуунда јаман тем болуп, слерге де јаман салтарын јетирер бе? (1 Кор. 15:33; 2 Тим. 2:20, 21). Ол кижиде биле тӧзӧйтӧн библиялык тӧзӧлгӧ бар ба? Бу јаан учурлу сурактар. Бу сурактардыҥ карууларын јарай берген кижини јакшы билер ака-эјелерле куучындашпаганчаар, билип албазыгар (Укаа 15:22). Је Иеговага чындык артарга турган ака-эјелер «Кудайга бӱтпес улусла кожо бир комутка јегин[бес]» (2 Кор. 6:14; 1 Кор. 7:39).

Айдарда, андый сайттарда таныжып, эш-нӧкӧр бедиреери јеткерлӱ болот. Андый болордо, јарагадый эш-нӧкӧрди кайдаҥ табар? Кӧп улус јуулыжатан арга боло берзе, Иегованыҥ Керечилери бой-бойлорыла јуунныҥ туштажуларында, курултайларда ла ӧскӧ дӧ туштажуларда таныжып јат. Качан кӧп улус јуулыжар арга јок болзо (темдектезе, пандемия COVID-19-тыҥ ӧйинде), јуунныҥ туштажуларын ӧткӱрерге, бис электронный эдимдер тузаланадыс. Мындый арганыҥ болужыла биле тӧзӧӧргӧ турган ака-эјелер бой-бойыла таныжар аргалу. Анайып, олор ака-эјелердиҥ јакылталарды канайып бӱдӱрип турган ла кандый каруулар берип тургандарын кӧрӧт (1 Тим. 6:11, 12). Анайда ок олор туштажуныҥ кийнинде сессионный залдарда кичинек бӧлӱктерле јуулыжып, куучындажып јат. Бого коштой видео ажыра најыларла јолыгып, куучындажып турган ӧйдӧ, улустыҥ ортозында кижи канайып тудунып турган ла улусла канайып куучындажып турганын кӧрӱп, кижи керегинде кӧпти билип аларга јараар (1 Петр 3:4). Бир канча ӧйдӧҥ јууктада таныжып, слердиҥ амадулараар, баалап турган немелереер тӱҥей бе деп кӧрӱп, бой-бойыгарга јараарыгар ба, јок по деп, оҥдоп ийереер.

Христиан кижи јарагадый эш-нӧкӧр бедиреп тура, библиялык принциптерле башкарынза, тӧзӧгӧн билези ырысту болор аргалу. Андый биле эш-нӧкӧрлӧргӧ баалу эрјинедий болуп, Иегованыҥ јарадузын алар (Укаа 18:22).