1, 2. Бу јӧрмӧлдӧ нени кӧрӧрис?

КИЖИ коркышту кыска ла шыралгалу јӱрӱм јӱрет (Иов 14:1). Андый јӱрӱмди Иегованыҥ јебрен ишчилери де кӧргӧн. Кӱчтердеҥ улам олордыҥ кезиги ӧлӱм де сураган (1 Каан. 19:2—4; Иов 3:1—3, 11; 7:15, 16). Је андый да болзо, олор Иеговага иженген. Иегова олордыҥ кӱӱнин кӧдӱрип, токунадып туратан. Бис олордыҥ теминеҥ кӧп немеге ӱренер аргалу (Рим. 15:4).

² Бу јӧрмӧлдӧ башка-башка кӱчтер ӧткӧн улустыҥ темин кӧрӧрис. Темдектезе, Иаковтыҥ уулыныҥ, Иосифтиҥ темин, Ноеминь ле Руфьтиҥ темин, анайда ок 73-чи Сарынды бичиген левиттиҥ ле апостол Петрдыҥ темин. Иегова олорго канайып болушкан? Бистиҥ кажыбыс ла олордоҥ неге ӱренер аргалу? Бу сурактардыҥ каруулары «Иегова кунугып јӱрген улусты артыргыспай јат. Санааркап калган улусты аргадап јат» деп, бистиҥ бӱдӱмјибисти тыҥыдып салар (Сар. 34:18).

3, 4. Јиит Иосифте кандый кӱчтер болгон?

³ Иосиф 17 кире јаштуда эки тӱш кӧргӧн. Бу тӱштерле болзо, ол билезинде эҥ ле тоомјылу кижи болор керек болгон (Баш. 37:5—10). Је оныҥ јӱрӱми кенете  солынып јат. Акалары оны садып ийген. Оноҥ улам ол Египетте Потифар деп кижиниҥ кулы болуп калган (Баш. 37:21—28). Мынайып адазынаҥ ыраак болуп калала, кул кижиниҥ шыралгалу јӱрӱмин кӧрӱп баштаган (Баш. 39:1).

⁴ Бу ӧйдӧҥ ала Иосифте оноҥ јаан кӱчтер болгон. Потифардыҥ ӱйи Иосиф оны албадаарга сананган деп бурулаган. Потифар дезе, мыны угала, керектиҥ аайына чыкпай ла јадып, Иосифти тӱрмелеп салган (Баш. 39:14—20; Сар. 105:17, 18). Ого мынаҥ улам коркышту кӱч болгон болор. Ол тушта улус Кудайдыҥ адын да јамандаган болор.

5. Иосиф тыҥ кунукпаска нени эткен?

⁵ Иосиф мындый айалгада санааркап отурып калардыҥ ордына, Иеговага чындык артарга албаданган. Ол нени де этсе, Кудайды сӱӱндирерге кӱӱнзеген. Иегова оны алкыш јок бир де артыргыспады (Баш. 39:21—23).

6. Иосифке тӱштери канайып болушкан болор?

⁶ Иосифке база не болушкан болор? Ол алдында кӧргӧн тӱштерин сананып јӱрген. Оныҥ да учун айалга качан бирде солынза, ол ойто бойыныҥ билезин кӧрӧр деп, иженип јӱрген болор. Соҥында, Иосифке 37 кире јаш болордо, оныҥ тӱштери чын ла бӱдӱп баштаган (Баш. 37:7, 9, 10; 42:6, 9).

7. 1 Петр 5:10-ло болзо, кӱчтерди ӧдӧргӧ биске не болужар?

⁷ Бис неге ӱренедис? Бӱгӱнги телекей база коркышту калју. Иеговага бӱтпей турган улус биске јаман баштанып јат. Керек дезе јуунда да кем-кем бисти јаман кӧрӧрдӧҥ айабас. Је бис Иеговага ижензеес, коруны оноҥ бедирезеес, ӧйинеҥ ӧткӱре тыҥ кунукпазыс ла  Иеговага оноҥ ло ары чындык иштеерис (Сар. 62:6, 7; 1 Петр 5:10 кычырыгар). Иегова Иосифти јиит деп кӧрбӧй, ого судур тӱштер кӧргӱскен. Ол Иосиф ошкош эмдиги де јиит ишчилерин баалап јат. Олор до Иеговага бажырып турганы учун тӱрмеледип јат (Сар. 110:3). Је Иегова олорды чындык артар деп бир де алаҥзыбай јат.

8. Ноеминь ле Руфьта кандый кӱчтер болгон?

⁸ Эмди Ноеминь ле Руфьтиҥ учуралын кӧрӱп ийектер. Иуда јеринде тыҥ торо башталарда, Ноеминь бойыныҥ билезиле кожо Моав деп јерге кӧчкӧн. Ондо оныҥ ӧбӧӧни, Елимелех деп кижи, јада калган. А Ноеминь эки уулыла артып калды. Соҥында, оныҥ эки уулы Моав јериниҥ Руфь ла Орфа деп кыстарын алган. Је он јыл киредеҥ уулдары да божоп калды (Руфь 1:1—5). Бу ӱч ӱй кижиге коркышту ачу болгон болор. Руфь ла Орфа ойто катап кижиге барар аргалу болгон. Је Ноеминь канайдар, оны кем кичеер? Оныҥ учун Ноеминь коркышту тыҥ ачуга алдыртып, мындый сӧстӧр айткан: «Мени Ноеминь деп адабагар. Мара деп адагар. Нениҥ учун дезе Кӱчтӱдеҥ Кӱчтӱ меге ачу-корон тӱжӱрди». Мынаҥ улам ол Вифлеемге кайра јанарга јадарда, Руфь оныла кожо барды (Руфь 1:7, 18—20).

9. Руфь 1:16, 17, 22-ле болзо, Руфь Ноеминьге канайып болушкан?

⁹ Мындый айалгада Ноеминьге не болушкан? Оныла кожо келген Руфь, Ноеминьди тыҥ сӱӱген. Оныҥ учун оны бастыра јанынаҥ кичееген. (Руфь 1:16, 17, 22 кычырыгар.) Руфь дезе, бойын ла Ноеминьди азыраарга, кере тӱжине арба јууп туратан. Мынаҥ улам Руфьтиҥ јакшы ады чыккан (Руфь 3:11; 4:15).

10. Иегова Ноеминьдий ле Руфьтый јокту улуска сӱӱжин канайып кӧргӱскен?

¹⁰ Иегованыҥ Израиль албатыга берген јасагында јокту улусты килезин деп бичилген. Бу јасакла болзо, кыразыныҥ ажын јуунадып јаткан кижи ӱзе божодо јуубас учурлу. Анайып, Ноеминьдий ле Руфьтый јокту улус курсак јок артпас эди (Лев. 19:9, 10).

11, 12. Вооз Ноеминь ле Руфьти канайып сӱӱндирген?

¹¹ Руфь дезе, Вооз деген кижиниҥ јалаҥдарында иштенген. Вооз Руфьтиҥ иштеҥкейин, Ноеминьди канайып сӱӱп турганын кӧрӱп, кайкап јат. Кийнинде Руфь Воозко барган. Вооз јасак аайынча Ноеминьниҥ ӧбӧӧнине ле уулдарына энчи эдип берилетен јерлерди садып алган (Руфь 4:9—13). База бир эмеш ӧйдӧҥ Вооз ло Руфьта уул бала чыккан. Оныҥ ады Овид. Ол Давид каанныҥ карган адазы болгон (Руфь 4:17).

¹² Ноеминьниҥ кичинек Овидти колына алып, тыҥ сӱӱнип, Иеговага алкыш быйанын айдып турганын сананып ийзеер. Је келер ӧйдӧ Иегова олорго оноҥ јаан алкыш берер. Олор тирилзе, Овид Мессияныҥ ӧбӧкӧзи болгон деп, билгилеп ийер. Бу олорго оноҥ јаан сӱӱнчи экелер!

13. Ноеминь ле Руфьтиҥ теминеҥ кандый ӱредӱ аладыс?

¹³ Бис неге ӱренедис? Бистер кӱч ӧйлӧр болуп турза, ал-санаага тӱжӱп, кӱчтеристиҥ аайы-бажына чыгып болбозыс деп, сананардаҥ айабазыс.  Мындый ӧйдӧ ака-эјелердеҥ ырабаганы ла Иеговага иженгени јакшы. Кезикте Иегова кӱчтерди јоголтпой јат. Темдектезе, ол Ноеминьге ӧбӧӧнин ле уулдарын тиргизип бербеген. Је кӱчтерди ӧдӧргӧ, ол биске ака-эјелер ажыра болужар аргалу (Укаа 17:17).

14. Левит недеҥ улам коркышту тыҥ кунуккан?

¹⁴ Је эмди 73-чи Сарынды бичиген левиттиҥ теми. Ол Иеговага агару ӧргӧӧдӧ иштеген. Је бир немедеҥ кунугып баштаган. Ол арга-чакту бай улуска кӱйӱнген. Олордыҥ јаман керектерине кӱйӱнген эмес, је неге де санааркабай јӱргенине ле ӱзе немези јеткил болгонына кӱйӱнген (Сар. 73:2—9, 11—14). Мынаҥ улам тыҥ кунугып, мындый сӧстӧр айткан: «Тегин јерге јӱрегимди ле колымды кинчектеҥ ару тударга албадангам». Је мынаҥ оныҥ кӧгӱс јанынаҥ уйадап калганы кӧрӱнип јат.

15. Сарын 73:16—19, 22—25-ле болзо, левитке кунукпаска не болушкан?

¹⁵ Сарын 73:16—19, 22—25 кычырыгар. Бу левит Кудайдыҥ агару ӧргӧӧзине кирген. Анда ол Иегованыҥ ишчилериниҥ ортозында Иеговага мӱргӱп, бойыныҥ айалгазын јазаптыра шӱӱп сананып јат. Бу тушта олорго тегин јерге кӱйӱнгенин ле чындык јолдоҥ арай ла болзо, тайкыла бербегенин оҥдоп ийген. Анайда ок олордыҥ тайкылчак јолго турганын ла удабас ончозы кырылып каларын оҥдоп ийген. Оныҥ учун олорго кӱйӱнип, кунугардыҥ ордына, левитке Иегованыҥ кӧрӱмиле кӧрӧр керек болгон. Анайып ол токунай береле, Кудайга ойто сӱӱнчилӱ иштеп баштаган. Ол айткан: «Сӱӱнчини меге јаҥыс сен бередиҥ».

16. Левиттиҥ теминеҥ неге ӱренедис?

¹⁶ Бис неге ӱренедис? Бу телекейдиҥ улузыныҥ једимдерине бир де кӱйӱнбегер. Олор кыска ла ӧйгӧ јакшызынып јӱрген. Удабас ла јок болуп калар  (Эккл. 8:12, 13). Андый улуска кӱйӱнзеер, тегин ле јерге кунугараар, Иеговала колбулараар да ӱрелер. Оныҥ учун Иегованыҥ сӧзин угугар, ака-эјелерле куучындажыгар. Анайып јӱрзеер, чыннаҥ ла ырысту болороор. Анайда ок «ӱргӱлји јӱрӱмге» апарып јаткан чындык јолдо артараар (1 Тим. 6:19).

17. Петр недеҥ улам кунугып туратан болор?

¹⁷ Апостол Петр омок кижи болгон. Оноҥ до улам кӧп јастырып туратан. Темдектезе, Иисус удабас бойыныҥ кыйналып, божоп каларын айдып турарда, Петр ого: «Кайракан! Сениле андый неме болбос» — деген (Матф. 16:21—23). Је Иисус Петрды тӱзедип јат. База бир учуралда улус Иисусты тудуп аларга келерде, Павел улу абыстыҥ кулыныҥ кулагын кезе чабып ийген (Иоанн 18:10, 11). Иисус Петрды ойто ло тӱзедип јат. Ӱчинчи учуралда Петр Иисусты качан да таштабазым деп мактанган бойы улустаҥ коркыйла, ӱч катап јана тӱшкен (Матф. 26:33). Бу учуралдыҥ кийнинеҥ Петр Иисусты оныҥ јаманын качан да таштабас деп сананала, ӧксӧп ыйлай берди (Матф. 26:69—75).

18. Иисус Петрга канайып болушкан?

¹⁸ Петр мындый јастыразынаҥ улам, бойын јинип отурбады. Карын апостолдорло кожо Иеговага оноҥ ло ары иштеген (Иоанн 21:1—3; Ап. ижи 1:15, 16). Ого не болушкан? Петр дезе Иисустыҥ сӧстӧрин сананып јӱрген болор. А ол Петр керегинде мынайып мӱргӱген: «Мен бӱдӱп турганыҥ јылыйбазын деп, сен учун мӱргӱдим... карындаштарыҥныҥ бӱдӱп турганын тыҥыт». Анайда ок Иисус тирилеле, Петрга кӧрӱнген (Лука 22:32; 24:33, 34; 1 Кор. 15:5). База бир учуралда Иисус  тӱниле балыктаган апостолдорына кӧрӱнген. Мында ол Петрга бойыныҥ сӱӱжин кӧргӱзетен арга берген. Мынайып Иисус кару најызыныҥ јаманын таштаганын кӧргӱзип, ого јаан иш берген (Иоанн 21:15—17).

19. Сарын 103:13, 14 бойыстыҥ кинчегиске Иегованыҥ кӧрӱмиле кӧрӧргӧ канайып болужат?

¹⁹ Бис неге ӱренедис? Иисус Петрдыҥ јаманын таштаганыла Иегованыҥ јалакайын кӧргӱскен. Оныҥ учун јастырып ийзеес, Иегова бистиҥ јаманысты таштабас деп сананбас керек. Андый санааны биске Сатана берип јат. Бойоордыҥ да, улустыҥ да јастыразына Иегованыҥ кӧрӱмиле кӧрӧргӧ албаданыгар. Улусты килеп, олордыҥ јастыразын таштап туругар. (Сарын 103:13, 14 кычырыгар.)

20. Келер јӧрмӧлдӧ нени кӧрӧрис?

²⁰ Бис Иосифтиҥ, Ноеминь ле Руфьтиҥ, левит ле Петрдыҥ темдеринеҥ «Иегова кунугып јӱрген улусты артыргыспай јат» деп кӧрдис (Сар. 34:18). Бӱгӱнги кӱнде кӱчтер оноҥ до ары болор. Олордоҥ улам бис кезикте кунугып, шыралап турардаҥ айабазыс. Је Иегованыҥ кӱчиле бу кӱчтерди ӧдӱп турзаас, бистиҥ бӱдерис тыҥып јат (1 Петр 1:6, 7). Келер јӧрмӧлдӧ Иегова бойыныҥ ишчилерине база канайып болужып турганын кӧрӧрис.