1. Кунугып турзаас, биске нени эдерге кӱч болор?

БИСТЕ кажы ла кӱн кандый ла кӱчтер болуп јат. Кунугып турзаас, мындый кӱчтерди ӧдӧргӧ јеҥил эмес болот. Нениҥ учун дезе кунугары уурчы чылап сӱӱнчибисти, ийде-кӱчисти уурдап јат. Агару Бичикте мынайып айдылган: «Тӱбек ӧйинде колыҥды бош салып ийдиҥ бе? Ийде-кӱчиҥ ас болор» (Укаа 24:10). Айдарда, бис кунугып турзаас, уур-кӱчтерди ӧдӧргӧ кӱч болордоҥ айабас.

2. Бис кандый шылтактардаҥ улам кунугардаҥ айабазыс, бу јӧрмӧлдӧ нени кӧрӧрис?

² Бис башка-башка шылтактардаҥ улам кунугардаҥ айабазыс. Темдектезе, толо кемдӱ эмезистеҥ, кандый бир уйан јандарыстаҥ эмезе оору-јоболдоҥ улам. Анайда ок јуунда молјулар берилбей турза эмезе улус сӱӱнчилӱ јарды укпай турза кунугадыс. Бу јӧрмӧлдӧ кунукпаска болужатан јӧптӧр кӧрӱлер.

3. Бойыска чын кӧрӱмдӱ болорго не болужар?

³ Јаантайын јастырып турганыстаҥ улам, Кудай бистиҥ кинчегисти качан да таштабас деп сананадыс. Је бойыска чын кӧрӱмдӱ болорго, не болужар? Агару Бичикте айдылганыла, јӱк ле Иисус Христос толо кемдӱ, а «ончо улус кинчек эдип» јат (Рим. 3:23). Је Кудай дезе, бисти бир де јастырбас деп сананбай јат. Карын ол бисти сӱӱп, килеп јат. Кудай бистиҥ неле тартыжып турганыстыҥ ончозын билер ле биске болужарга белен болот (Рим. 7:18, 19).

4, 5. Дебора ла Мария 1 Иоанн 3:19, 20-неҥ нени билип алган, бу олорго канайып болушкан?

 ⁴ Эмди Дебора ла Мария деп эјелердиҥ темин кӧрӱп ийектер *. Дебора эје кичинек тужында ада-энезиниҥ сӱӱжин кӧрбӧгӧн. Олор оны мактабай да туратан. Ол бойын уйан кижи деп, сананып јӱрген. Бир ле кичинек јастырып ийзе, бойын неге де турбас кижи деп сананып туратан. А Мария эјени дезе, јууктары јаман кӧрӱп, базынып туратан. Мынаҥ улам ол бойын база эш-кереги јок кижи деп сананып јӱрген. Керек дезе сууга чӧҥӱрилген де кийнинде бойын Иегованыҥ Керечили болор аргазы јок деп сананган.

⁵ Бу эки эје Иеговага оноҥ ло ары иштеп јадылар. Олорго не болушкан? Олор Иеговага мӱргӱп, сезимдерин куучындап туратан (Сар. 55:22). Анайда ок олордо недеҥ улам мындый сезимдер болуп турганын Иегова билер деп ле бойын јаман кӧрбӧс керек деп оҥдоп алгандар. (1 Иоанн 3:19, 20 кычырыгар.)

6. Бис јастырып ийзеес, кандый санаалар келердеҥ айабас?

⁶ Кезикте бис тудунып болбой калала, јастырып ийедис. Мынаҥ улам бойысты јинип баштаар болорыс. Агару Бичикте јастырып ийеле, санааркай береринде јаман неме јок деп айдылат (2 Кор. 7:10). Је биске бойысты ӧйинеҥ ӧткӱре јинип: «Мен тӱзединип болбойтон эмтирим, Иегова јаманымды качан да таштабас» — деп сананбас керек. Мынайып сананзаас, Иеговага иштебей барардаҥ айабазыс. Анайда ок ӧйинеҥ ӧткӱре кунуга берзеес, уур-кӱчтерле тартыжып болбой барарыс (Укаа 24:10). Мыныҥ ордына Иеговага јаманысты таштазын деп мӱргӱӱр керек (Иса. 1:18). Бис јаманысты акту јӱрегистеҥ алынзаас, Иегова јаманысты таштап ийер. Анайда ок аксагалдарга баштанар керек (Иак. 5:14, 15).

7. Јастырып ийзеес, нениҥ учун бойысты уйан кижи деп сананбас керек?

⁷ Францияда јадып турган Жан-Люк деп аксагал мынайып айткан: «Чындык кижи јастырбай турган кижи эмес, а јастыразын алынып, тӱзединип турган кижи» (Рим. 7:21—25). Оныҥ учун јастырып ийзеер, бойоорды уйан кижи деп сананбагар. Бис ончобыс јастырып јадыс. Бойыстыҥ кӱчисле качан да тӱзединип болбозыс. Оныҥ учун Иегова биске карузып, толынты тайылга эткен (Еф. 1:7; 1 Иоанн 4:10).

8. Кунугып турзаас, болушты кемнеҥ сураарыс?

 ⁸ Ака-эјелердеҥ болуш сурагар. Бис кунугып турзаас, ака-эјелер бисти угуп, кӱӱнисти кӧдӱрер аргалу (Укаа 12:25; 1 Фес. 5:14). Нигерияда јадып турган Джой деп эје мынайып куучындаган: «Ака-эјелердиҥ болужы јогынаҥ мен канайып јӱрер эдим?! Олор ажыра меге Иегова болужып турган эмей. Бу ака-эјелердеҥ кунугып турган улуска канайып болужарын билип алгам». Је кезикте ака-эјелер биске кандый болуш керек болуп турганын билбестеҥ айабас. Оныҥ учун болушты бойыс сураар керек.

9. Сарын 41:3-теги ле 94:19-тагы сӧстӧр биске канайып болужар?

⁹ Иегованыҥ болужына иженигер. Бис ооруп турзаас, анчада ла хронический оорулу болзоос, јакшы кӱӱн-санаалу артарга кӱч болот. Иегова эм тургуза бисти оорунаҥ јаспай да турган болзо, ооруп турган тужыста ийде-кӱч ле токунал берет. (Сарын 41:3; 94:19 кычырыгар.) Темдектезе Кудай ака-эјелер ажыра болужат. Олор биске магазиннеҥ керектӱ немелер экелип берер аргалу эмезе айылысты арутап берер, ол эмезе бисле кожо мӱргӱп ийер. Бого ло коштой келер ӧй керегинде Агару Бичиктеги сӧстӧр санаабыска кирип келер аргалу (Рим. 15:4).

10. Исанг акага кӱч ӧйдӧ не болушкан?

¹⁰ Нигерияда јадып турган Исанг деп ака јеткерге туштаарда, келтей јаны парализовать эдип ийген. Врач оны качан да баспас деп айткан. «Мен коркышту тыҥ санааркай бергем» — деп, Исанг ака айдат. Је ол ал-санаага тӱжӱп калган отурбады. Ол мынайып куучындаган: «Ӱйимле кожо јаантайын мӱргӱп, Агару Бичикти шиҥдегенис. Анайда ок бисте бар алкыштар учун, темдектезе келер јӱрӱмге ижемји учун, быйанду болодыс».

11. Синди эје сӱӱнчизин јылыйтпаска нени эткен?

¹¹ Мексикада јадып турган Синди эје јаан ооруга табарткан. Мынаҥ улам ол божоп то калардаҥ айабас болгон. Бу кӱч ӧйдӧ ого не болушкан? Больница барардаҥ озо, ол кажы ла кӱн јарлаарга шӱӱп алган. Мынайып шӱӱп алганы ого ооруп турганына ла келер операцияга тыҥ санааркабаска болушкан. Синди эје куучындайт: «Больницада иштеп турган улусла мен мынайып куучындажатам: „Слердиҥ керектереер кандый? Мындый кӱч ишти нениҥ учун талдап алганаар?“ Анайып олорло нени куучындажатанын оҥдоп алатам. Бу улус бого кайкажып туратан, не дезе, ооруп турган улус олорго мындый ајару качан да этпейтен. Олордыҥ кезиги меге адрестерин эмезе телефонныҥ номерлерин де берип ийетен. Бу кӱч ӧйдӧ Иегова меге болужар деп билгем. Је андый јаан сӱӱнчи сыйлаар деп, сакыбагам да!» (Укаа 15:15).

12, 13. Су-кадыгы уйан ака-эјелер канайып јарлап јадылар? Бу кандый једимдер экелген?

¹² Кезик ака-эјелер су-кадыгы уйан болуп калганынаҥ улам, кӧп јарлап болбой јат. Је андый да болзо, олор јарлайтан кандый ла аргалар бедирейт. США-да јаткан Лорел эјениҥ темин кӧрӱп ийектер. Ол тынарга болужатан аппараттыҥ ичинде 37 јыл јаткан. Анайда ок ол ракла ооруган, камык операциялар эттирткен. Бого  коштой хронический ооруларла шыралаган. Је ондый да кӱч айалгада Лорел эје Каандык керегинде куучындап туратан. Темдектезе ол айылына келген больницаныҥ ишчилерине јарлаган. Анайып ол ас ла салза 17 кижиге чындыкка келерге болушкан! *

¹³ Францияда јадып турган Ришар деп аксагал больницада јадып турган эмезе айылдаҥ чыгар аргазы јок ака-эјелерге мындый јакшы јӧп берген: «Улусла куучынды јеҥил баштап ийерге, бистиҥ бичиктерди кӧрӱнип турган јерге салып койыгар. Мындый арга айылдар сайын јарлап болбой барган ака-эјелердиҥ кӱӱнин кӧдӱрер аргалу». Анайда ок андый ака-эјелерде телефон ажыра эмезе самаралар ажыра јарлаар арга бар.

14. Давид биске кандый тем кӧргӱскен?

¹⁴ Су-кадыгыс уйадай бергенинеҥ, јажыс јаанай бергенинеҥ эмезе база ӧскӧ немедеҥ улам Иеговага иштееринде кандый бир молјуларды бӱдӱрип болбой барган болорыс. Оныҥ учун Давид каанныҥ темин кӧрӱп ийектер. Ол дезе, Иеговага ӧргӧӧ тударга сананган. Је Иегова ӧскӧ кижи талдаган. Мынаҥ улам Давид бир де кунукпаган, карын бу ишке канча кире аргазы бар болужарга албаданган. Темдектезе ӧргӧӧ тударга керектӱ ал-камык алтын-мӧҥӱн берген. Бу биске кандый јакшы тем! (2 Сам. 7:12, 13; 1 Лет. 29:1, 3—5).

15. Анри акага кунукпаска не болушкан?

¹⁵ Францияда јадып турган Анри деп акага су-кадыгынаҥ улам, аксагалдыҥ ижин артыргызарга келишкен. Оорузынаҥ улам ол айылыныҥ бор-кар ижин де эдип болбой барган. Ака куучындайт: «Баштап тарый бойымды эш-кереги јок деп сананала, тыҥ кунуга бергем. Је оноҥ бойымныҥ айалгамды солып болбозым деп оҥдойло, токунап калгам. Эмди Иеговага кӱчим јеткенче иштегенимнеҥ јаан сӱӱнчи аладым. Иегова Кудайымга иштеерге мени не де токтодып болбос! Мен Гедеонноҥ ло оныҥ 300 јуучылынаҥ тем аладым. Олор арыгылап та калган болзо, учына јетире тартышкандар!» (Јарг. 8:4).

16. Бис ангелдердиҥ теминеҥ неге ӱренедис?

 ¹⁶ Ангелдер биске база јакшы тем кӧргӱзип јат. Бир катап Иегова Ахав каанныҥ планын бузарга, ангелдериле куучындашкан. Оноҥ ого бир ангелдиҥ эп-аргазы јарай берген (1 Каан. 22:19—22). Мынаҥ улам арткан ангелдер: «А мен не уйан ба?» — деп ачынгылабады. Карын олор бастыра макты Иеговага берерге кӱӱнзеген (Јарг. 13:16—18; Ачыл. 19:10).

17. Молјулар јок дейле кунукпаска нени эдер керек?

¹⁷ Ундыбагар, эҥ јаан сӱӱнчи — Иегованыҥ адын аданып јӱрери ле оныҥ Каандыгын јарлаары. Молјулар бӱгӱн бар, эртен јок болуп калардаҥ айабас. Иегова бисти јӱк ле кандый бир молјуларлу болуп турзаас, баалап турган эмес. Карын Иегова ла ака-эјелерис бисти јобош болгоныс учун сӱӱп јат. Оныҥ учун јобош болорго, Иегованаҥ болуш сурагар. Агару Бичикте бичилген Иегованыҥ чындык ишчилеринеҥ тем алыгар. Анайда ок ака-эјелерге канча кире аргагар бар болужып туругар (Сар. 138:6; 1 Петр 5:5).

18, 19. Каандык керегинде јарды улус укпай турза, биске кунукпаска не болужар?

¹⁸ Бис база бир немедеҥ кунугардаҥ айабазыс. Јарлап турган јеристе улус бисти укпай турза, эмезе айылдарда улус јок болуп турза. Је мындый айалгада сӱӱнчисти јылыйтпаска бир кезек алтамдар болужар. Олордыҥ кезиги « Јарлаар иштеҥ сӱӱнчи аларга не болужар?» деген рамкада бичилген. Анайда ок јарлаар ишке чын кӧрӱмдӱ болор керек. А чын кӧрӱмдӱ болорго, нени эдер керек?

¹⁹ Ундыбагар, бистиҥ амаду — Кудайдыҥ адын ла оныҥ Каандыгын јарлаары. Бис Иеговала, Иисусла, ангелдерле кожо иштенедис (Матф. 28:19, 20; 1 Кор. 3:9; Ачыл. 14:6, 7). Иегова Кудай улусты бойына кычырбаза, ого кем де јууктап болбос (Иоанн 6:44). Оныҥ учун улус бисти бӱгӱн укпай турган болзо, келер тушта угар болор. Анайда ок Иисустыҥ айтканыла, јӱрӱмге  апаратан јолды ас улус табар (Матф. 7:13, 14).

20. Иеремия 20:8, 9 биске кунукпаска канайып болужат?

²⁰ Бис судурчы Иеремияныҥ теминеҥ кӧп немеге ӱренип алар аргалу. Оныҥ јарлаган јеринде улус ого неле деп каткырыжып, јамандагылап туратан. (Иеремия 20:8, 9 кычырыгар.) Мынаҥ улам ол кунугала, Иегова керегинде база јарлабаска да сананган. Је ол анайып отурып болды ба? Јок. Агару Бичиктеги сӧстӧрлӧ болзо, «Иегованыҥ сӧзи» оныҥ јӱрегинде от чылап кӱйӱп турган болгон. Ол оны ичинде тудуп болбоды. Кудайыстыҥ айткан сӧзи бистиҥ де јӱрегисте кӱйер аргалу. Оныҥ учун Агару Бичикти кычырып, оны шӱӱп сананып турар керек. Ол тушта бис Иеговага сӱӱнчилӱ иштеерис ле улус бисти угар болор (Иер. 15:16).

21. Ӧйинеҥ ӧткӱре кунукпаска нени эдер керек?

²¹ Ӧрӧги айдылган Дебора эјениҥ сӧстӧриле болзо, кунугары Сатананыҥ коркышту ийде-кӱчтӱ јепсели болуп калардаҥ айабас. Је бу јепсел Иегованыҥ агару тынына удура не де эмес. Оныҥ учун кунугып турган болзогор, Иегованаҥ агару тын сурагар. Ол слерге јастыралардаҥ ла оору-јоболдоҥ улам тыҥ санааркабаска болужар. Анайда ок молјуларга ла јарлаар ишке чын кӧрӱмдӱ болорго болужар. Јӱрегердиҥ бир ле кичинек санааркаштарын ӱзе Иеговага куучындап туругар. Анайып слер ӧйинеҥ ӧткӱре кунукпазыгар!