Сен Иисустыҥ ӧйинде Галилейде јадып тургаҥ деп, сананып ий. Иерусалимдӧӧн јапаштардыҥ Байрамына келдиҥ. Байрамга башка-башка јерлердеҥ ал-камык албаты келгенинеҥ улам, бастыра кала кыймырап јат. Сен Иеговага тайылга эдерге туруҥ. Малды јединип алала, ӧргӧӧдӧӧн јык толуп калган ороомдорло јӱк арайдаҥ барып јадыҥ. Јууктап келеле, база тайылга эдерге турган ал-камык улусты кӧрӧдиҥ. Эмди абыска малыҥды берип ийетен ӧйиҥ келди. Је бу ок ӧйдӧ, карындажыҥныҥ сеге ачынып турганы санааҥга кирип келди. Ол кайда да бу кыймырап јаткан албатыныҥ ортозында эмезе кайда да калада. Нени эдерин сеге Иисус јартап берген. (Матфей 5:24 кычыр.) Эмди сен карындажыҥла канайып јаражарыҥ? Кажы ла колонкада чын карууны темдектеп сал.

СЕН НЕНИ ЭДЕРИҤ:

• Карындажымда чыннаҥ ла ачынгадый шылтак болгон болзо, куучындажрым.

• Керектиҥ аайын ол јастыра оҥдогон деп, эмезе экилегис бурулу деп сананып турган болзом, карындажымды тӱзедип кӧрӧрим.

• Карындажымды лаптап угарым. Ол нениҥ учун ачынганын учына јетире оҥдобой до турган болзом, билбей калала эби јок айалгага тургузып, оны ачындырып салганым учун јамананымды таштазын деп, акту јӱрегимнеҥ сураарым.

КАРЫНДАЖЫҤ НЕНИ ЭДЕР:

• Јуунда јӧмӧжӧр улус бедиреп, сен оны канайып ачындырып ийгениҥди куучындаар.

• Кажы ла оок-теек немени эске алынып, сени бурулаар, анайда ок сени бурууҥды алынзын деп некеер.

• Јобош тудунып, коркыбай оныла куучындажарга келгениҥди ол бийик баалаар. Јаманыҥды акту јӱрегинеҥ таштаар.

Бис бӱгӱн тайылга эдип тындулар бербей јадыс. Је ака-эјелерле амыр јӱрзеес, јӱк ол тушта Иегова бистиҥ бажырышты јарадар деп, Иисустыҥ принцибы канайып кӧргӱзет?