Иегова учы-кыйузы јок чыдашпас, удабас ол бу телекейди јоголтып салар. Тӧгӱн кудай јаҥдар јоголтылар. Оноҥ албатылардыҥ коалициязы Кудайдыҥ албатызына табару эдер, ол тушта Иегова ончо јаман улусты Армагеддондо јоголтып салар. Бу јаан учурлу керектерди бис энчикпей сакып јадыс.

Улу тӱбек керегинде бис ончо немени билбей јадыс, темдектезе ол чике кандый кӱнде башталарын билбезис. Анайда ок јаҥдар тӧгӱн кудай јаҥдарга кандый шылтактардаҥ улам табару эдерин бис база билбезис. Албатылардыҥ коалициязы Кудайдыҥ албатызына табаруны канча кире ӧйдиҥ туркунына эдерин ле бу канай болорын бис билбезис. Анайда ок Иегова јаман улусты Армагеддондо јоголторго нени тузаланарын бис база билбезис.

Келер ӧйдӧҥ коркыбаска ла јалтанбас болорго болужатан ончо керектӱ јетирӱлер Агару Бичикте бар. Темдектезе, бис калганчы кӱндердиҥ учында јадып турганыс деп билерис (2Тм 3:1). Анайда ок чындык кудай јаҥ јоголтылбазын деп, тӧгӱн кудай јаҥга табару кыскартылар деп билерис (Мф 24:22). Иегова албатызын аргадаар деп билерис (2Пт 2:9). Анайда ок Иегова јаман улуска јаргызын бӱдӱрзин деп ле Армагеддондо кара-бајырт албатыны кичееп алзын деп јакаруны Иисус Христоско берген деп билерис. А Иисус справедливый ла сӱреен јаан ийде-кӱчтӱ, оныҥ учун ол бисти корулап алар (Ач 19:11, 15, 16).

Улу тӱбектиҥ ӧйинде «улус коркыганынаҥ улам санаазын ычкынар». Је бис Иегова албатызын озогы ӧйлӧрдӧ канайып аргадаганын билерис, анайда ок келер ӧйдӧ не болорын билерис. Бу керегинде шӱӱп сананганыс ол јеҥил эмес ӧйлӧрдӧ јаан болуш болор. Бис «сыныгарды тӱзедигер, бажыгарды кӧдӱригер» деп сӧстӧр аайынча эдерис, нениҥ учун дезе јайымыс јуук деп алаҥзыбазыс (Лк 21:26, 28, ЈТ).