Баштапкы чактыҥ христиандарында бойлорыныҥ тӱрбектери кезигинде ле болгон. Андый да болзо, олор јарлаар иште улусла куучындажып тура, Агару Бичикке тайанып шӱӱжер аргалу болгон (Ап.и 17:2, 3). Бис баштапкы христиандардаҥ канайып тем аларыс? Агару Бичикке тайанып шӱӱжерге, озодоҥ белетенер керек. Анайып, јарлаар иште улусла шӱӱжерге белен болорыс.

БИС КАНАЙЫП БЕЛЕТЕНЕР АРГАЛУ? Кажы ла планда Агару Бичиктиҥ ӱлгерлери ле библиялык чындыктыҥ кыска јартамалдары бар. Бу ӱлгерлерге јартамалдарды кайдаҥ таап аларга јараар? Пландагы темалар ла библиялык ӱлгерлер алдында бистиҥ бичиктерде јарталган болгон. Библиялык ӱлгерлердиҥ јартамалын таап аларга, андый јӧрмӧлдӧрди тузаланза јакшы болор. Кезик јарчылар јартамалдарды планындӧӧн бичип алат, кезиги сананып алат. Оноҥ библиялык ӱлгерге кӧргӱзӱ тем таап аларга јараар. Аксагалдар слерге јарагадый јӧрмӧлдӧрди талдап аларга кӱӱнзеп болужар. Планда кӧп јартамалдар јок болгонынаҥ улам, материал ӱренип турган кижиге тузалу болзын деп, јарчы јакшы белетенер учурлу. Анайып, Агару Бичикти ӱренерге белетелген бичик јок то болзо, кожулта јӧрмӧлдӧрди тузаланып, ӱренип турган кижиге ич-кӧгӱс јанынаҥ ӧзӧргӧ, бӱдерин тыҥыдарга ла ченелтелерди ӧдӧргӧ белен болорго болужарар.

ТАКЫП КӦРӦРИ. Кажы ла планныҥ учында Агару Бичиктеҥ алынган ӧскӧ дӧ ӱлгерлер бар. Олорды кычырып, јартаар керек. Ӧткӧн материалды такып кӧрӧргӧ, берилген ӱлгерлерге эртеледе сурактар белетеп алза јакшы. Кожулта јӧрмӧлдӧрлӧ тузаланып турган болзогор, такып кӧрӧрин јӧрмӧлдӧги берилген сурактардыҥ болужыла ӧткӱрерге јараар.

СЛЕР АМАДУГАРГА ЈЕДЕР АРГАЛУ. Элчи Павел Агару Бичикке тайанып шӱӱжерге темигип калган (Ап.и 17:2). Мындый темигӱ бисте де болзын деп, белетенер керек. Ӧй табып, мынайып белетенип турзар, слер кандый ла керекти эдерге белен болорор деп алаҥзыбагар (2Тм 3:17).