Кӧп куучындаары. Сен ӱзе немени јартаар учурлу деп сананба. Иисус улуска шӱӱп сананарга ла тӱп-шӱӱлтелери чын болзын деп болужарга, сурактар беретен (Мф 17:24—27). Сурактар ӱредӱни јилбилӱ эдет, анайда ок кижи неге бӱдӱп турганын ла материалды канча кире јакшы оҥдоп турганын билип аларга болужат. Суракты берип ийеле, чыдамкай болуп, карууны сакы. Кижи карууны јастыра берзе, тӱзедерге меҥдебе. Мыныҥ ордына кожулта сурактардыҥ болужыла чын тӱп-шӱӱлтеге келерге болуш.

Уур эдери. Шӱӱжип јаткан тема аайынча ончо билериҥди куучындаба (Ин 16:12). Ајаруны абзацтыҥ тӧс шӱӱлтезине эт. Кожулта јетирӱлер сӱреен јилбилӱ де болзо, је олордоҥ улам тӧс шӱӱлтелер кӧрӱнбей барар аргалу. Кижи тӧс шӱӱлтени оҥдоп алган болзо, оноҥ ары барар керек.

Кӧп материалды ӧдӧргӧ албаданары. Бистиҥ амаду — јӱк ле материалды ӧдӧри эмес, је јӱректи томултары (Лк 24:32). Кудайдыҥ Сӧзи бойыныҥ ижин этсин деп, ајаруны тӧс ӱлгерлерге эт (2Кр 10:4; Евр 4:12). Оҥдоорго јеҥил темдерди ле тӱҥдештирӱлерди тузалан. Материалды кижиниҥ айалгаларына ла кудай јаҥы аайынча кӧрӱмине келиштирип ӧткӱр. Мындый сурактар бер, темдектезе: билип алганыҥ сеге јарап турган ба? Бу бисти Иегова керегинде неге ӱредет? Бу јӧпти тузаланганыҥ сеге кандый туза экелер?