Бӱгӱнги кӱнде ар-бӱткенниҥ тӱбеги коркышту кӧп болот. Мындый айалга боло берзе, бистиҥ болужыс аайлу-башту болор учурлу. Мынаҥ улам Башкару Јӧп кажы ла Бет-Элде сакыбаган јанынаҥ болотон айалгаларда болужатан отдел болзын деп, јакару берген.

Ол акалар ар-бӱткенниҥ тӱбеги болгон деп угуп ийзе, тургуза ла аксагалдарла колбожып, ондогы јарчыларга не керектӱ деп сурап угат. Јербойыныҥ јарчылары ар-бӱткеннеҥ улам болгон тӱбектиҥ аайы-бажына бойлорыныҥ кӱчиле чыгып болбос болзо, Бет-Эл болуш јетиретен ишти башкарар акалар кӧстӧӧр аргалу. Бу акалар бойыныҥ кӱӱниле иштейтен улустыҥ болужы, курсак-тамак ла јӱрӱмге эҥ керектӱ немелер керек деп, Бет-Элге айдар аргалу. Ол эмезе олор керектӱ тудунар-кабынар немелерди ондо ло алып, керексинип турган улустыҥ ортозына ӱлештирер аргалу.

Оныҥ учун ака-эјелер баш билинип, бу ишти бойлоры баштабас учурлу. Бу иш аайлу-башту болзо, бис бир ишти эки катап этпезис, акча-манатты ла ӧскӧ керектӱ не немени калас ӱребезис ле булгалыштар болбос.

Бет-Элдиҥ кӧстӧгӧн акалары акту кӱӱнинеҥ иштейтен канча кире улус керек ле канча кире акча керегин башкарат. Анайда ок олор бистиҥ болуш јетирер ижиске јӧмӧшсин деп, јербойыныҥ јаҥдарына баштанар аргалу. Оныҥ учун бисти сурабаган болзо, бис акча јуубай јадыс, гуманитарный болуш аткарбай јадыс ла тӱбек болгон јердӧӧн барбай јадыс.

Бис ака-эјелерди тыҥ сӱӱп јадыс, оныҥ учун тӱбек боло берзе, бис олорго болужарга кӱӱнзейдис! (Евр 13:16). Бис нени эдер аргалу? Эҥ керектӱзи — ол тӱбекке тӱшкендер учун ла олорго болужып тургандар учун мӱргӱӱри. Анайда ок, бистиҥ телекейлик ижиске јӧмӧжип, сый эдип акча берерге јараар. Башкару јӧптиҥ башкартузыла иштеп турган Бет-Элдер, ол акчаны канайып эҥ јакшы эдип тузаланарын билер. Је бу иште бойоор туружарга турган болзоор, «Заявление на служение добровольцем в программе местного проектно-строительного отдела» (DC-50) деп заявление бичип ийерге јараар.

«РАЗРУШИТЕЛЬНЫЕ НАВОДНЕНИЯ В БРАЗИЛИИ» ДЕГЕН ВИДЕОНЫ КӦРӰП, КАРУУ БЕР:

2020 јылда Бразилияда суу кӧдӱрилген кийнинде, Иегованыҥ Керечилери канайып болушканынаҥ сени не кайкатты?