Јуу-согуш керегинде, эмезе ӧскӧ укту улусты јамандаганы, эмезе олорго јаман баштанганы керегинде јетирӱлер солундарда тыҥ кӧптӧп калган.

•   «Израиль ле Газаныҥ ортозында конфликттеҥ улам ла экстремистский кӧрӱмдӱ улустыҥ сӧстӧринеҥ улам социальный сетьтерде улус бой-бойын коркышту тыҥ јамандагылап јат» («Нью-Йорк таймс», кӱчӱрген ай 15, 2023).

•   «Ӱлӱрген айдыҥ 7-чи кӱнинеҥ ала телекейде улустыҥ ӧскӧ улусты калју-кату сӧстӧрлӧ јамандап турганы ла мынаҥ улам преступность кенетийин тыҥ кӧптӧй берген» (Деннис Фрэнсис, ООН-ныҥ Генеральный Ассамблеязыныҥ председатели, кӱчӱрген ай 3, 2023).

 Улустыҥ казыр сӧстӧри, базыныш ла јуу-согуш јаҥы неме эмес. Агару Бичикте јебрен ӧйлӧрдӧ «казыр сӧстӧрин ок-јааныҥ окторы чылап ӧскӧ улуска уулап турган» ла јуулашкан улус болгон деп айдылат (Сарын 64:3; 120:7; 140:1). Андый да болзо, Агару Бичик улус бӱгӱнги кӱнде нениҥ учун бой-бойын чек кӧрӧр кӱӱни јок деп јартап јат.

 Агару Бичикте нениҥ учун улус бой-бойын јаман кӧрӱп турганыныҥ эки шылтагы бичилген:

1.  Баштапкызы — Кудайдыҥ Сӧзинде «кӧп улустыҥ сӱӱжи соор» деп озодоҥ айдылып калган (Матфей 24:12). Оныҥ учун улус бой-бойын сӱӱрдиҥ ордына, там ла јаман кӧрӧт (2 Тимофейге 3:1—5).

2.  Экинчизи — улустыҥ бой-бойына коркышту јаман баштанып турганы бу телекейле калју башкараачы — Сатана Дьявол башкарат деп кӧргӱзет. Агару Бичикте айдылат: «Телекей дезе бӱткӱлинче јаманныҥ табында [Сатананыҥ колында]» (1 Иоанн 5:19; Ачылта 12:9, 12).

 Је Агару Бичикте улус удабас бой-бойына база јаман баштанбас деп айдылат, бу ӧйди Кудай тургузар. Анайда ок Кудай улустыҥ бой-бойына јаман баштанганыныҥ ончо каршузын јоголтып салар. Агару Бичикте айдылган:

•   Кудай улустыҥ «кӧзинеҥ ончо јашты арчыыр. Ӧлӱм де, ачу-корон до, сыгыт та, јобол до база болбос, нениҥ учун дезе башкызы јӱре берген» (Ачылта 21:4).