ООН-ныҥ јетиргениле болзо:

•   2023 јылдыҥ ӱлӱрген айыныҥ 7—23 кӱндериниҥ туркунына, Израиль ле Сектор Газаныҥ ортозында јуу-согуштаҥ улам 6 400-теҥ ажыра кижи божогон, 15 200-теҥ ажыра кижи шырка алган, бу улустыҥ кӧп сабазы черӱчилдер эмес, тегин улус. Анайда ок јӱс муҥдар улуска айылдарын артыргызарга келишкен.

•   2023 јылдыҥ сыгын айыныҥ 24-чи кӱнин алза, бу кӱнге јетире Россия ла Украинаныҥ ортозында јуу-согуштаҥ улам 9 701 черӱчил эмес тегин кижи божогон, Украинада 17 748 кижи шыркалаткан.

 Јуу-согуштаҥ улам шыралап турган улуска Агару Бичик кандый ижемји берет?

 Агару Бичикте озодо айдылганыла, Кудай удабас «бастыра јердиҥ ӱстинде јуу-согушты токтодып сала[р]» (Сарын 46:9). Ол улустыҥ башкаруларын, ол эмезе правительстволорын, јоголтып, олордыҥ ордына теҥеридеги башкару тургузар — Кудайдыҥ Каандыгын (Даниил 2:44). Бу Каандык ончо улуска амыр јӱрӱм экелер.

 Иисус Христос, Кудайдыҥ Каандыгыныҥ Кааны, нени эдер:

•   «Ол болуш сурап турган јокту-јойу улусты, базындыргандарды ла ончо болуш јок улусты аргадаар. Ол јоксырап калган ла базындырган улусты карамдаар, јокту-јойу јӱргендерди аргадаар. Ол олорды кыспактадарынаҥ ла базыныштаҥ аргадаар» (Сарын 72:12—14).

 Кудай Каандыгыныҥ болужыла јуу-согуштаҥ улам болуп турган ончо кыйын-шыраны јоголтып салар.

•   «[Кудай] олордыҥ кӧзинеҥ ончо јашты арчыыр. Ӧлӱм де, ачу-корон до, сыгыт та, јобол до база болбос, нениҥ учун дезе башкызы јӱре берген» (Ачылта 21:4).

 Удабас ла Кудайдыҥ Каандыгы јердиҥ ӱстинде коркыш јаан солынталар эдер. Агару Бичикте јердиҥ ӱстинде «јуу-согуш болуп јатканын ла јуу-чак керегинде табыш угарыгар» деп озодо айдылган болгон (Матфей 24:6). Бу да, ӧскӧ дӧ керектер бис улустыҥ башкаруларыныҥ «калганчы кӱндеринде» јададыс деп кӧргӱзет (2 Тимофейге 3:1).