Јок, Иегованыҥ Керечилери секта эмес. Олор акту јӱрегинеҥ Иисус Христостоҥ тем алып, оныҥ ӱредӱлери аайынча јӱрерге албаданып турган христиандар.

 «Секта» деген сӧсти кӧп улус бойыныҥ санаазыла оҥдоп јат. Секталар керегинде эки башка эҥ таркадылган санааны ла нениҥ учун бу сӧс биске келишпей турганын кӧрӱп ийектер.

•   Кезик улус сектаны — ӧскӧртилип калган јаҥы кудай јаҥ деп бодогылайт. Је Иегованыҥ Керечилери јаҥы кудай јаҥ сананып таппаган. Карын Кудайга бажырарында бис баштапкы чактыҥ христиандарыныҥ темиле јӱредис. Олордыҥ ӱредӱлери ле јӱрӱми Агару Бичикте бичилип калаган (2 Тимофейге 3:16, 17). Кандый кудай јаҥ чыннаҥ ла христиан болуп турганын Агару Бичиктеҥ кӧрӧр керек деп бис алаҥзыбай јадыс.

•   Кезик улустыҥ санаазыла болзо, секта — каршулу кудай јаҥ болот, оныла кижи башкарып јат. Иегованыҥ Керечилери кандый да кижини бойыныҥ башкараачызы деп бодобой јат. Олор Иисустыҥ артырган темиле јӱрет. Иисус: «Слерди Баштаары јаҥыс — Христос» — деп ӱреткен (Матфей 23:10).

 Каршулу секталарга кӧрӧ, Иегованыҥ Керечилериниҥ кудай јаҥы бойлорына да, ӧскӧ дӧ улуска туза экелип јат. Темдектезе, бистиҥ јарлаар ижистеҥ улам, кӧп улус јаман керектерин артырган, ол тоодо наркотиктер тузаланарын ла аракызак болорын. Анайда ок бис башка-башка ороондордо муҥдар тоолу улусты кычырарына ла бичиирине ӱредерге, бичик-биликке ӱредер курстар ӧткӱредис. Ого ӱзеери, бис тӱбекке тӱшкен улуска болужадыс. Анайып, Христостыҥ јакылталарын бӱдӱрип, бис ӧскӧ улуска кӧп болуш јетиредис (Матфей 5:13—16).