Lemkei mi kwong’o 10:1-14
-
Tho pa Saul ku wote (1-14)
10 Nwang’u Jufilisti gibekiedo lwiny i dhu Juisrael. E dhanu mir Israel giringo kud i wang’ Jufilisti, man ju ma dupa githo iwi got Gilboa.
2 Jufilisti gidiyo Saul ku wote ceng’ini mandha, e ginego Yonathan, Abinadab, man Malki-cua ma gi wot Saul.
3 Lak lwiny udoko tek mandha i kum Saul, e weg athero ginene, man ginyayu ret i kume.
4 Pieno Saul uyero ni jayey jamlwiny pare kumae: “Wodh palamularu peri man idhuya ko, kara dhanu maeni ma jutimo ngo yaa i kumgi kud gibin man gisenda ku rac.” Ento jayey jamlwiny pare umito ngo edhuye, pilembe lworo ubino nege lee. Pieno Saul uting’o palamularu pare man epodho i wiye.
5 Kinde ma jayey jamlwiny pa Saul uneno nia etho, en bende epodho iwi palamularu pare man etho.
6 E Saul ku wote adek githo, man dhanu ceke mi ot pare githo karacelo.
7 Kinde ma Juisrael ceke ma gibedo i poga* gineno nia ng’atuman uringo, man nia Saul ku wote bende githo, gicaku weko adhura migi man giringo; e Jufilisti gibino man gibedo i adhurane.
8 Urwonde, kinde ma Jufilisti gibino yaku piny mi ju ma ginego, ginwang’u Saul ku wote githo iwi got Gilboa.
9 E giyaku piny m’i kume, githumo wiye, man gicoko jamlwiny pare. I ng’eye gioro kwenda i ng’om mi Jufilisti pi nimewo lembe maeno ni mungu m’araga migi man ni dhanu.
10 Gigam giketho jamlwiny pare i hekalu* pa mungu migi man giguro upoko wiye i ot pa Dagon.
11 Kinde ma dhanu ceke ma gibedo i Yabec i Gilead giwinjo lembe ceke ma Jufilisti utimo i kum Saul,
12 jurumony ceke giai malu man gicidh giyeyo avuj Saul man avuj wote. Gidwogo kugi i Yabec man gikunyo cogogi i the yen ma dit i Yabec, man gikwiro cam pi nindo abiro.
13 Kumeno re ma Saul utho pilembe egwoko ngo bedoleng’ pare ni Yehova, man pilembe eworo ngo lembe pa Yehova, bende kum epenjo lembe i bang’ ng’atu ma weco ku tipo dhanu m’utho
14 kakare nipenjo Yehova. Pieno enege man edwoko ker udok i cing’ Daudi ma wod Yese.
