Lemkei mi kwong’o 11:1-47
11 I ng’ey kare, Juisrael ceke gicokiri i bang’ Daudi i Hebron, giwacu ire kumae: “Nen! watie cogoni man ring’kumi.*
2 Nindo m’ukadhu kinde ma Saul ubino ubimo, in re m’ibed itelo wi Israel i lwiny.* Man Yehova Mungu peri uwacu iri kumae: ‘Ibibedo jakwac mi dhanu para Israel, man ibidoko jatela iwi dhanu para Israel.’”
3 Pieno judongo ceke mir Israel gibino i bang’ ubimo i Hebron, man Daudi utimo kugi lembariba i wang’ Yehova i Hebron. I ng’eye, giwiro Daudi ubed ubimo iwi Israel nimakere ku lembe ma Yehova uyero nikadhu kud i bang’ Samwel.
4 I ng’eye, Daudi ku Israel ceke gicidho i kum Yeruzalem, niwacu Yebus i ng’om ma Juyebusi gibed gibedo i iye.
5 Dhanu mi Yebus ginywaru Daudi kumae: “Ibimondo keni tak de ngo!” Ento Daudi umaku ot ma tek mi Sayuni, ma kawoni utie Adhura pa Daudi.
6 Pieno Daudi uyero kumae: “Ng’atu ma kwong’a ma bilar goyo Juyebusi bidoko jatelwic* man jadit ma wijo.” Yoab ma wod Zeruya ular uidho ma kwong’a man edoko jatelwic.
7 E Daudi ucaku bedo i ot ma tekne. Eno re m’uketho julwong’e nia Adhura pa Daudi.
8 Ecaku giero adhura i ng’ete ceke, niai i kum Milo* nitundo i kabedo m’utieke, man Yoab ugiero dong adhurane kendo.
9 E tego pa Daudi uwotho medere ameda, man Yehova mir udul ubino karacelo kude.
10 Maeni gibino jutelwic mi jurumony ma gi jurukara pa Daudi, ma gidiko cing’gi ma tek mandha i kum bimobim pare karacelo ku Israel ceke pi nikethe ni ubimo nimakere ku lembe ma Yehova uyero pi Israel.
11 Maeni gi jurumony adek ma jurukara pa Daudi: Yacobeam ma wod Hakmoni, etie jadit mi jurumony adek ma gi jurukara. Nindo acel enego dhanu dak adek ku tong’ pare.
12 M’ulube ubino Eleazar ma wod Dodo ma Jaahohi. Ebino i kind jurumony adek ma gi jurukara.
13 Ebino karacelo ku Daudi i Pas-damim, kaka ma Jufilisti gicokiri i iye pi nikiedo lwiny. Nwang’u podho moko ubino nuti ma nganu ma juyuke bik i iye; man juaskari giringo Jufilisti.
14 Ento Eleazar ucungo i die podhone man ecero bang’ podhone. Emedere ninego Jufilisti, e Yehova umiyo aloci* ma dit.
15 Dhanu adek m’i kind jutelwic pier adek giloro i cana i bang’ Daudi kinde m’ebedo i oding’om mir Adulam, saa maeno nwang’u udul askari moko mi Jufilisti gigonjo i poga* mi Jurefaim.
16 Nwang’u Daudi ubedo i ka ma tek, man Jufilisti giketho kagonjo migi ma nok i Bethlehem.
17 I ng’eye, Daudi unyutho ava m’etie ko, ewacu kumae: “Aka, nwang’u akeamadh ndhu pii mi kulo m’atong’a m’i dhugang’ mi Bethlehem!”
18 E jurumony adek ma jurukara gikakiri i kagonjo mi Jufilisti man gitwomo pii kud i kulo m’atong’a ma n’i dhugang’ mi Bethlehem gidwogo ko ni Daudi; ento Daudi ukwero nimandhe man eoye i ng’om ni Yehova.
19 Eyero kumae: “Etie lembe ma copere ngo ira i wang’ Mungu para nia atim lembe maeni! Nyo acikara nimadhu rimb dhanu maeni ma giketho kwo* migi i ariti? Kum giketho kwo migi i ariti pi nikelo pii maeni.” Pieno, ekwero nimadhe. Eno tie lembe ma jurumony ma gi jurukara adek pa Daudi gitimo.
20 Abicai m’umin Yoab udoko jadit mi jurumony ma gi jurukara adek mange; enego dhanu dak adek ku tong’ pare, man en de pire ung’eyere nia e calu juadek ma kwong’a.
21 Kud i kind juadek mange, pire ung’eyere lee nisagu juario m’ebino jadit migi; re etundo ngo ka tiend juadek ma kwong’a.
22 Benaya ma wod Yehoyada ubino ng’atu ma cwinye tek,* man etimo lembe dupa ma dongo i Kabzeel. Enego awiya ma co ario pa Ariel mi Moab, eloro bende i vuj pii ecidh enego umvor i nindo mi pei.
23 Enego bende Jamisiri moko m’udongo lazangara mandha; edongo bot abic.* Nwang’u Jamisirine ubino ku tong’ ma dit i cinge ma calu yen pa jacwii kendi, re ecidho i dhoge kud uluth man emayu tong’ pa Jamisirine kud i cinge, e enege ku tong’ parene.
24 Eno tie lembe ma Benaya ma wod Yehoyada utimo, man en de pire ung’eyere nia etie calu jurumony adek ma gi jurukara.
25 Kadok nwang’u pire ung’eyere nisagu dhanu pier adek de, ento etundo ngo ka tiend jurumony adek ma jurukara. Re Daudi ukethe ni jadit mi jukur kume.
26 Jurumony ma jurukara mir udul askari ubino Asahel m’umin Yoab, Elhanan ma wod Dodo mi Bethlehem,
27 Camoth ma Jaharori, Helez ma Japeloni,
28 Ira ma wod Ikec ma Jatekoa, Abiezer ma Jaanathoth,
29 Sibekai ma Jahuca, Ilai ma Jaahohi,
30 Maharai ma Janetofa, Heled ma wod Baana ma Janetofa,
31 Ithai ma wod Ribai mi Gibea m’i ng’om mi suru pa Benjamin, Benaya ma Japirathon,
32 Hurai mi poga* mi Gac, Abiel mi Beth-araba,
33 Azmaveth mi Bahurim, Eliaba ma Jacalbim,
34 wot Hacem ma Jagizoni, Yonathan ma wod Cage ma Jaharari,
35 Ahiam ma wod Sakar ma Jaharari, Elifal ma wod Ur,
36 Hefer ma Jamekerathi, Ahiya ma Japeloni,
37 Hezro ma Jakarmel, Narai ma wod Ezbai,
38 Yoel m’umin Nathan, Mibhar ma wod Hagri,
39 Zelek ma Jaamon, Naharai ma Jaberoth m’ubino jayey jamlwiny pa Yoab ma wod Zeruya,
40 Ira ma Jaithri, Gareb ma Jaithri,
41 Uria ma Jahithi, Zabad ma wod Alai,
42 Adina ma wod Ciza mi suru pa Ruben m’ubino jatelwic mi dhanu mi suru pa Ruben, man dhanu pier adek karacelo kude;
43 Hanan ma wod Maaka, Yocafat ma Jamithni,
44 Uzia ma Jaactaroth, Cama man Yeiel ma gi wot Hotham ma Jaaroer,
45 Yediael ma wod Cimri, man Yoha m’umin ma Jatizi,
46 Eliel ma Jamahavi, Yeribai man Yocavia ma gi wot Elnam, man Ithma ma Jamoab,
47 Eliel, Obed, man Yasiel ma Jamezobai.
Korolembe mi There
^ I dhu Juebrania: “watie rimo acel.”
^ I dhu Juebrania: “ng’atu ma wodho Israel woko man edwogogi.”
^ I dhu Juebrania: “wic.”
^ Etie wec mi dhu Juebrania ma thelembene tie “ng’om ma judhuro.”
^ Kunoke “both.”
^ Kunoke “pambu mi poga.”
^ Kunoke “ng’eyong’ec.”
^ I dhu Juebrania: “wod ng’atu ma jarukara.”
^ Edongo metre 2,23. Nen Thenge ma jumedo B14.
^ Nen Thelembe mi wec.
