Lemkei mi kwong’o 12:1-40
-
Ju m’udiko cing’gi i kum bimobim pa Daudi (1-40)
12 Maeni gi ju ma gicidho i bang’ Daudi i Ziklag kinde m’ebino ngo agonya niwotho nikum Saul ma wod Kic. Gibino i kind jurumony ma jurukara ma gikonye i lwiny.
2 Gibino weg athero, man gibed gitiyo ku cing’gi mir acwic ku mir acam bende pi ning’uro kidi ku lacur kunoke pi nikilo nying athero kud atumb athero. Gibino i kind umego pa Saul ma giai kud i Benjamin.
3 Jatelwic migi ubino Ahiezer, man Yoac ubino karacelo kude, gin zoo gibino wot Cema ma Jagibea; jumange ubino Yeziel giku Pelet ma gi wot Azmaveth, Beraka, Yehu ma Jaanathoth,
4 Icmaya ma Jagibeon m’ubino jaramony ma jarukara i kind dhanu pier adek, man ebino jatel wi dhanu pier adekne; bende Yeremia, Yahaziel, Yohanan, Yozabad ma Jagedera,
5 Eluzai, Yerimoth, Bealia, Cemaria, Cefathia ma Jaharif,
6 Elkana, Iscia, Azarel, Yoezer, man Yacobeam ma gi nyikway Kora;
7 man Yoela giku Zebadia ma gi wot Yeroham mi Gedor.
8 Dhanu moko mi suru pa Gad gidok i thenge pa Daudi man gicidho i bang’e kinde ma en’i ka ma tek i langa. Gibino jurumony ma jurukara man juaskari ma jutendo pi lwiny, gibino ayika saa ceke ku ban ma lac man ku tong’; wang’gi ubino ve wang’ umvor, man kumgi ubino rep calu kum amur iwi gudi.
9 Ezer ubino jatelwic, Obadia ubino mir arionde, Eliab mir adege,
10 Micmana mir ang’wende, Yeremia mir abije,
11 Atai mir abusiende, Eliel mir abirone,
12 Yohanan mir aborane, Elzabad mir abung’wende,
13 Yeremia mir apaje, man Makbanai mir apar acende.
14 Ju maeno gibino dhanu mi suru pa Gad, man gibino judongo mir udul askari. Ng’atu ma nyanok magwei i kindgi romo ka juaskari dak acel, man ng’atu ma dit m’i kindgi romo ka juaskari elufu acel (1 000).
15 Ju maeno re ma gigam gikadhu kulo Yordan i dwi mi kwong’o kinde m’epong’ lelele i ng’ete kun ku kun, man giriemo dhanu ceke ma gibed gikwo i poga, yo nyangu ku yo reto de.
16 Dhanu moko mi suru pa Benjamin man mi suru pa Yuda bende gibino i bang’ Daudi nwang’u en’i ka ma tek.
17 E Daudi ucidho i bang’gi man ewacu igi kumae: “Tekene wubino i bang’a ku kwiyocwiny pi nikonya, adundena biribere kudwu. Ento tek wubino pi niciba i cing’ judegina ma ke lembe ma rac m’atimo mbe, dong’ Mungu pa kwaruwa re m’unen man epok lembene.”
18 E tipo ubino iwi* Amasai ma jadit mi dhanu pier adek, man ewacu kumae:
“Wan wa dhanu peri, E Daudi, man watie karacelo kudi, E wod Yese.
Kwiyocwiny, kwiyocwiny ubed iri, man kwiyocwiny ubed ni ng’atu m’ubekonyi,Kum Mungu peri ubekonyi.”
E Daudi ujologi man ekethogi i kind judongo mir udul askari.
19 Dhanu moko mi suru pa Manase de gipiey gidok i bang’ Daudi kinde m’ebino karacelo ku Jufilisti pi nikiedo i dhu Saul; ento Daudi ukonyo ngo Jufilisti, pilembe kinde ma rwodhi mi Jufilisti ging’iyo i lembe i kindgi giloke edok, giwacu kumae: “Ebipiey ebidok i bang’ Saul ma rwoth pare, e nwang’u kwo mwa n’i ariti.”*
20 Saa ma Daudi ucidho i Ziklag, dhanu mi suru pa Manase m’ulubo e gipiey gidok i bang’e: Adna, Yozabad, Yediael, Mikael, Yozabad, Elihu, man Zilethai ma gi jutelwic mi dhanu elufu mi suru pa Manase.
21 Gikonyo Daudi pi ninyego i dhug udul weg ayeki, pilembe gin ceke gibino jurukara man dhanu ma cwinygi tek. Gidoko judongo mir udul askari.
22 Kubang’ nindo, dhanu gibed gibino i bang’ Daudi pi nikonye nitundo ma kagonjo pare udoko dit calu kagonjo pa Mungu.
23 Maeni en e wend judongo mi dhanu ma gibino ayika ku jamlwiny pi nikiedo, man ma gibino i bang’ Daudi i Hebron pi nidwoko ker pa Saul ire calku lembe ma Yehova ung’olo.
24 Dhanu mi Yuda ma gimaku ban ma lac man tong’ wendgi ubino elufu abusiel ku dak abora (6 800), gibino ayika ku jamlwiny migi pi nikiedo.
25 I suru pa Simeon, dhanu ma gi jurukara man ma cwinygi tek ma gibino i kind udul askari wendgi ubino elufu abiro ku dak acel (7 100).
26 I suru pa Lawi, dhanu elufu ang’wen ku dak abusiel (4 600).
27 Yehoyada ubino jatelwic mi wot Arun, man dhanu elufu adek ku dak abiro (3 700) gibino karacelo kude,
28 man bende Zadok ma tie jalawobi ma jarukara man ma cwinye tek, karacelo ku jutela pier ario wi ario mi thepacu pagi.
29 I suru pa Benjamin, dhanu ubino elufu adek (3 000) ma gin umego pa Saul; i wang’e ju ma pol m’i kindgi gibed gitielo lembe mi ot pa Saul ku cwinygi ceke.
30 I suru pa Efraim, dhanu ubino elufu pier ario ku dak abora (20 800) gibino jumaco ma jurukara, ma cwinygi tek man ma pigi ung’eyere i kind dhanu mi thepacu migi.
31 I nusu mi suru pa Manase, dhanu ubino elufu apar abora (18 000) ma julondogi kara gibin giketh Daudi ni ubimo.
32 I suru pa Isakar, ju ma gibed ging’iyo i lembe cuu man ma ging’eyo gin ma Israel ucikere nitimo gibino judongo dak ario man umego migi ceke ubino i the telowic migi.
33 I suru pa Zebulon, dhanu ubino elufu pier abic (50 000) ma gicopo bedo juaskari, man juponjogi nikperiri pi lwiny man nikiedo ku kwond jamlwiny ceke; gin zoo gidok i bang’ Daudi kud adunde m’uripo acel.
34 I suru pa Nafthali, jutelwic ubino elufu acel (1 000), man dhanu elufu pier adek wi abiro (37 000) ma gi weg ban ma lac ku tong’ gibino karacelo kugi.
35 I suru pa Dan, dhanu ubino elufu pier ario wi abora ku dak abusiel (28 600) ma gicopo kperiri pi lwiny.
36 Man i suru pa Acer, ju ma gicopo timo i kind udul askari man ma gicopo kperiri pi lwiny wendgi ubino elufu pier ang’wen (40 000).
37 Ju ma giai loka kulo Yordan kud i suru pa Ruben, pa Gad, man kud i nusu mi suru pa Manase gibino juaskari elufu dak acel ku pier ario (120 000) ma gi weg jamlwiny mi kwonde ceke.
38 Ju maeno zoo gibino jumaco ma kiedo lwiny ma gitie ayika nikiedo; gibino i Hebron kud adundegi ceke pi niketho Daudi ni ubimo iwi Israel ceke. Man dong Juisrael m’udong’ zoo giripo dhoggi acel ma gibemito* giketh Daudi ni ubimo.
39 E gibedo ku Daudi keca pi nindo adek ma gibecamu man gibemadhu, kum umego migi giyikiri pi nijologi.
40 Bende, ju ma gikwo ceng’ini kugi, man kadok ju ma gini bor cil i ng’om mi suru pa Isakar, Zebulon, man Nafthali de giyeyo cam iwi kana, iwi ngamia, iwi kit kana mange,* man iwi dhieng’ gibino ko; giyeyo mogo, mukathi mi nying ulam m’uthwo, man mi nying ulok m’uthwo, pigulok, mo, man dhieng’ ku rombe i kadhiri ma lee dit, kum Juisrael gibino kud anyong’a.
Korolembe mi There
^ I dhu Juebrania: “uumo.”
^ I dhu Juebrania: “wabicule ku wiwa.”
^ I dhu Juebrania: “gibino kud adunde acel.”
^ Wec mi dhu Juebrania ma julwong’o ko kana maeni nyutho kana ma min kana unyolo ku riuni.
