Lemkei mi kwong’o 15:1-29
15 Daudi umedere nigiero ire udi i Adhura pa Daudi, bende eyiko kaka ma jubiketho Sanduku pa Mungu mandha i iye, man eguro hema pi Sandukune.
2 E Daudi uwacu kumae: “M’uweko Julawi, ng’atu mange mbe m’ucikere niyeyo Sanduku pa Mungu mandha, kum gin re ma Yehova ung’iyogi kara giyey Sanduku pa Yehova man gitim ire saa ceke.”
3 Daudi ugam ucoko dhu Juisrael ceke i Yeruzalem kara gikel Sanduku pa Yehova kaka m’eyiko pire.
4 Daudi ucoko dhu nyikway Arun ku Julawi.
5 Kud i kind nyikway Kohath, Uriel ma jatelwic kud umego pare dak acel pier ario;
6 kud i kind nyikway Merari, Asaya ma jatelwic kud umego pare dak ario pier ario;
7 kud i kind nyikway Gercom, Yoel ma jatelwic kud umego pare dak acel pier adek;
8 kud i kind nyikway Elizafan, Cemaya ma jatelwic kud umego pare dak ario;
9 kud i kind nyikway Hebron, Eliel ma jatelwic kud umego pare pier abora;
10 kud i kind nyikway Uziel, Aminadab ma jatelwic kud umego pare dak acel kud apar ario.
11 M’umedo maeno, Daudi ulwong’o Zadok gikud Abiathar ma gi julam man Uriel, Asaya, Yoel, Cemaya, Eliel, man Aminadab ma gi Julawi,
12 man eyero igi kumae: “Wun wu jutelwic mi thepacu mi Julawi. Wudwokuru giwu leng’, wun kud umego mwu, man wuyey Sanduku pa Yehova Mungu mir Israel wuter kaka m’ayiko pire.
13 Wang’ ma kwong’a kinde ma wuyeye wun ungo, ng’eicwiny pa Yehova Mungu mwa uopo i kumwa, pilembe wayenyo ngo yore m’atira mi yeye.”
14 Pieno, julam ku Julawi gidwokiri gigi leng’ pi nitero Sanduku pa Yehova Mungu mir Israel.
15 I ng’eye, Julawi giyeyo Sanduku pa Mungu mandha iwi gokgi ku ramakne tap calu ma Musa ular ung’olo calku lembe pa Yehova.
16 E Daudi uyero ni jutelwic mi Julawi nia giketh umego migi gibed ni juruwer kara gibed giwer kud anyong’a, ma nwang’u gibegoyo jamgoyo wer ma juthondhe, adungu, man jamgoyo wer ma woy awoya.
17 Pieno, Julawi ging’iyo Heman ma wod Yoel kud i suru migi, man bende Asaf ma wod Berekia, man Ethan ma wod Kucaya ma nyakwar Merari.
18 Karacelo kugi ubino umego migi mir ungu mir ario: Zekaria, Ben, Yaziel, Cemiramoth, Yehiel, Uni, Eliab, Benaya, Maseya, Matithia, Elifelehu, man Mikneya, Obed-edom, ku Yeiel ma gi jukur dhugang’.
19 Heman, Asaf, man Ethan ma gi juruwer; gibed gigoyo jamgoyo wer ma woy awoya mi mola;
20 man Zekaria, Aziel, Cemiramoth, Yehiel, Uni, Eliab, Maseya, man Benaya gibed gigoyo jamgoyo wer ma juthondhe ma juciko dwande malu;*
21 man Matithia, Elifelehu, Mikneya, Obed-edom, Yeiel, ku Azazia gibed gigoyo adungu ma juciko dwande piny* pi nitelo wi wer.
22 Kenania ma jatelwic mi Julawi ubed uneno wi tic mi yeyo Sanduku, kum eng’eyo tije cuu,
23 man Berekia giku Elkana gibino jukur dhugang’ ma gitimo ceng’ini ku Sanduku.
24 Cebania, Yocafat, Nethanel, Amasai, Zekaria, Benaya, man Eliezer ma gi julam gibed gikudho agwara ma tek i wang’ Sanduku pa Mungu mandha, Obed-edom giku Yehiya bende gibino jukur dhugang’ ma gibed gitimo ceng’ini ku Sanduku.
25 Daudi ku judongo mir Israel man jutelwic mi dhanu elufu gigam gicidho ku mutoro ma dit pi nigamu sanduku mi lembariba pa Yehova kud i ot pa Obed-edom.
26 Calu ma Mungu mandha ukonyo Julawi ma giyeyo sanduku mi lembariba pa Yehova, jugam juthiero nyithi thwoni dhieng’ abiro man nyogi rombe abiro.
27 Nwang’u Daudi ukendo bongu ma leng’ ma bote mbe, Julawi ceke ma giyeyo Sanduku, juruwer, man Kenania ma jatelwic mi ju m’uyeyo Sanduku man mi juruwer de gikendiri kumeno; Daudi ukendo bende efodh* mi bongu ma nwang’.
28 Juisrael ceke gibino cidho ku sanduku mi lembariba pa Yehova ma gibekok kud anyong’a man gibekudho kit agwara ma tung’ tung’, gibegoyo jamgoyo wer ma woy awoya, man gibegoyo jamgoyo wer ma juthondhe man adungu ubewak ma tek.
29 Ento saa ma sanduku mi lembariba pa Yehova utundo i Adhura pa Daudi, Mikal ma nyaku pa Saul ukemo kud i wang’ madhirisa man eneno Ubimo Daudi ubepor malu man ebetimo foc;* e ecaku caye i adundene.
Korolembe mi There
^ I dhu Juebrania: “i Alamoth.” Nen Thelembe mi wec.
^ I dhu Juebrania: “i Ceminith.” Nen Thelembe mi wec.
^ Nen Thelembe mi wec.
^ Kunoke “feth.”