Lemkei mi kwong’o 16:1-43
16 Gigam giroyo Sanduku pa Mungu mandha i hema ma Daudi uguro pire man gikethe i iye; man githiero lam m’awang’a ku lam mi kwiyocwiny i wang’ Mungu mandha.
2 Saa ma Daudi udaru nithiero lam m’awang’a man lam mi kwiyocwiny, emiyo mugisa ni dhanu ku nying’ Yehova.
3 Bende, epoko mukathi ma nguIu ngulu, mukathi ma juyiko ku nying ngasi, man mukathi ma juyiko ku nying ulok acel acel ni Juisrael ceke, ni jumaco ceke man ni jumamon ceke.
4 I ng’eye, eketho Julawi moko pi nitimo i wang’ Sanduku pa Yehova, niyungo* Yehova Mungu mir Israel, nidwoko ire foyofoc, man nipake.
5 Asaf ubino jatelwic, man ng’atu m’ulube ubino Zekaria; Yeiel, Cemiramoth, Yehiel, Matithia, Eliab, Benaya, Obed-edom, man Yeiel gibed gigoyo jamgoyo wer ma juthondhe kud adungu; man Asaf ubed ugoyo jamgoyo wer ma woy awoya,
6 Benaya giku Yahaziel ma gi julam ke gibed gikudho agwara i wang’ sanduku mi lembariba pa Mungu mandha.
7 Cing’ nica re ma Daudi upangu wer ma kwong’a mi dwoko foyofoc ni Yehova, man etelo wi Asaf kud umego pare nia giwere kumae:
8 “Wudwok foyofoc ni Yehova, wulwong’ nyinge,wuketh tic pare ung’eyere i kind dhanu!
9 Wuwer ire, wuwer ire wer mi pak,*wupar cuu* pi tic ma wang’u ijo ceke m’etimo.
10 Wuyunguru pi nyinge ma leng’.
Wek anyong’a neg adunde ju m’uyenyo Yehova.
11 Wusay ka Yehova man tego pare.
Wuyeny wang’e* saa ceke.
12 Wupoy pi tic ma wang’u ijo m’etimo,udu pare man pokolembe pare ma pwe,
13 wu nyikway* Israel ma jatic pare,wu wot Yakobo m’eng’iyowu.
14 Etie Yehova Mungu mwa.
Pokolembe pare timere iwi ng’om zoo.
15 Wupoy pi lembariba pare pi nja ku nja,man pi lembang’ola m’etimo* nitundo i kum dhanu m’utuk elufu acel (1 000),
16 pi lembariba m’etimo kud Abraham,man pi lembe m’ekwong’o ni Isak,
17 m’eketho ubed ni cik ni Yakoboman ni lembariba ma nja ni Israel,
18 kinde m’ewacu kumae: ‘Abimiyo iri ng’om mi Kananni giralaga peri.’
19 Eyero lembe maeno kinde ma wendgi ubino nok,eyo, nyanok magwei, man gibino umondo i ng’om.
20 Gibed giwotho i kind thek kun ku kun,giai kud i bang’ ker acel gicidho i bang’ dhanu mange.
21 Eweko ngo ng’atu moko usendgi,ento ejuko jubim pigi,
22 ewacu kumae: ‘Kud wumul kum ju ma juwiro para,man kud wutim lembe moko ma rac i kum jubila para.’
23 Wuwer ni Yehova, wu ng’om ceke!
Wunyuth pi both pare kubang’ rupiny kubang’ rupiny!
24 Wutwong’ pi dwong’ pare i kind dhanu mi thek mange,pi tic ma wang’u ijo pare i kind dhanu ceke.
25 Kum Yehova e dwong’ man eromo ku pak lee.
Eromo julwore nisagu mungu mange ceke.
26 Mungu ceke mi dhanu gi mungu ma tijgi mbe,ento Yehova re m’ucwiyo polo.
27 Dwong’ ku leng’o n’i kaka ma en’i iye;tego kud anyong’a n’i kabedo pare.
28 Wumii ni Yehova gin m’eromo ko, wu juruot ceke m’i ng’om,wumii ni Yehova gin m’eromo ko nikum dwong’ man tego pare.
29 Wumii ni Yehova dwong’ m’uromo ku nyinge;wukel giramiya man wubin i wang’e.
Wurum piny ni* Yehova ma wurukuru ma leng’.*
30 Kumwu miel i wang’e, wu ng’om ceke!
Ng’om* ucungo nging’ nging’; ecopo yengere ngo.*
31 Wek anyong’a neg polo, man wek ng’om ubed ku mutoro;wutwong’ i kind dhanu mi thek mange kumae: ‘Yehova udoko Ubimo!’
32 Wek nam uwoy man piny ceke m’upong’ i iye;wek anyong’a neg podho ku gin ceke ma n’i igi.
33 Man i saa ma rom eno wek yen mi luli gikok ku mutoro i wang’ Yehova,kum ebebino* nipoko lembe mi ng’om.
34 Wudwok foyofoc ni Yehova, pilembe e ber;mer pare ma lokere ngo bedo rondo ku rondo.
35 Man wuwac kumae: ‘Bodhwa, E Mungu mi both mwa,cok dhogwa man larwa kud i cing’ dhanu mi thek mange,kara wapak nyingi ma leng’man wapeki kud anyong’a.
36 Dong’ pak ubed ni Yehova Mungu mir Israelpi rondo ku rondo.’”*
E dhanu ceke giwacu kumae: “Amen!”* man gipaku Yehova.
37 I ng’eye, Daudi uweko Asaf man umego pare keca i wang’ sanduku mi lembariba pa Yehova, kara gitim i wang’ Sandukune saa ceke calu ma jubed jutimo kubang’ rupiny.
38 Obed-edom man umego pare ma wendgi pier abusiel wi abora man Obed-edom ma wod Yeduthun ku Hosa gibino jukur dhugang’;
39 man Zadok ma jalam ku julam wagi mange gibino i wang’ hema mi thier pa Yehova m’ubino i kaka ma malu i Gibeon,
40 kara gibed githier lam m’awang’a ni Yehova iwi pemlam mi lam m’awang’a nja kugweno kud uthieno, man kara gitim lembe ceke ma jukiewo i Cik pa Yehova m’eng’olo ni Israel.
41 Heman giku Yeduthun de gibino karacelo kugi man dong dhanu ma julondo ma jukwanugi ku nying’gi pi nifoyo Yehova, pilembe “mer pare ma lokere ngo bedo rondo ku rondo”;
42 Heman giku Yeduthun gibed gikudho agwara, jamgoyo wer ma woy awoya, man jamgoyo wer mange ma jupaku ko Mungu mandha; wot Yeduthun ke gibed gikuro dhugang’.
43 I ng’eye, dhanu ceke gidok i pacu migi, man Daudi de dok pi nimiyo mugisa ni juruot pare.
Korolembe mi There
^ I dhu Juebrania: “pi nipoy pi.”
^ Kunoke “wugoy ire mizik.”
^ Kunoke nyo “wuwec.”
^ Kunoke “kakare.”
^ I dhu Juebrania: “kodhi.”
^ I dhu Juebrania: “wec m’eng’olo.”
^ Kunoke “wutim thier ni.”
^ Kunoke nyo “nikum leng’o pare ma dit.”
^ Kunoke “Ng’om ma cego piny.”
^ Kunoke “kabere ngo.”
^ Kunoke “edaru bino.”
^ Kunoke “niai rondo ku rondo nitundo rondo ku rondo.”
^ Kunoke “Ebed kumeno.”
