Lemkei mi kwong’o 17:1-27
17 Saa ma Daudi udaru bedo i ot pare gire ci, e eyero ni jabila Nathan kumae: “Abekwo i ot mi yend tido ma kun ke sanduku mi lembariba pa Yehova n’i the hema mi bongu.”
2 Nathan udwoko ni Daudi kumae: “Tim gin moko ci ma n’i adundeni, kum Mungu mandha ni kudi.”
3 Diewor nica, lembe pa Mungu ubino i bang’ Nathan, m’uwacu kumae:
4 “Cidh i bang’ jatic para Daudi man iyer ire nia, ‘Yehova uwacu kumae: “In ungo re m’ibigiero ira ot m’abibedo i iye.
5 Kum akwo ngo i ot niai i nindo m’awodho iye Israel nitundo tin, ento abed aai i hema ma e adok i hema ma kucelo man abed aai kud i hema mi thier ma e adok i hema mi thier ma kucelo.*
6 I kind nindo ceke m’awotho karacelo kud Israel ceke, nyo kud i kind jupoklembe mir Israel m’ang’iyo nia gikway dhanu para Israel, ayero ni ng’atu moko de nia, ‘pirang’o igiero ngo ira ot mi yend tido?’”’
7 “Kawoni yer ni Daudi ma jatic para nia, ‘Yehova mir udul uwacu kumae: “Agemi kud i luba, ku kaka m’ibino kwayu iye rombe kara idok jatela mi dhanu para Israel.
8 Abibedo kudi kakare ceke m’ibecidho i iye, man abikabu judegi peri ceke kud i weng’i; abiketho bende nyingi bibedo calu nying’ dhanu ma dongo mi ng’om.
9 Abimiyo kabedo ni dhanu para Israel man abiketho gibibedo i iye. Gibikwo i iye keca ma gin moko mbe ma bisendogi kendo, man jutimrac de bisendogi* ngo kendo calu ma gibed gitimo i wang’e,
10 niai i nindo m’aketho jupoklembe iwi dhanu para Israel. Man abiketho jukwor peri ceke gibed i the loc peri. M’umedo maeno, awacu iri nia, ‘Yehova bimiyo ker* ni ot peri.’
11 “‘“Kinde ma nindo peri utundo i ajikine man icidho pi nibedo karacelo ku kwaru peri, abiketho kodhi peri, niwacu ng’atu acel m’i kind woti ma buu ni ubimo i ng’eyi, man abiketho ker pare bicungo ma tek.
12 En re m’ebigiero ot ira man abiketho komker pare bicungo ma tek pi nja.
13 Abidoko won man ebidoko woda. Abikabu ngo mer para ma lokere ngo kud i bang’e, calu m’akabe ko kud i bang’ ng’atu m’ular ubino i weng’i.
14 Abikethe ni jawi ot para man abiketho ebibedo iwi ker para pi nja, man komker pare biriyo rondo ku rondo.”’”
15 Nathan ukoro lembe maeni ceke ku gin ma wok i wang’ maeni ceke ni Daudi.
16 E Ubimo Daudi umondo man ebedo i wang’ Yehova, eyero kumae: “E Yehova Mungu, an a ng’a? Kadi ot para en ang’o m’itimo ko ira lembe lee rukeni e?
17 E Mungu, udong’ ubedo ve maeni de fodi uromo ngo, iweco bende pi ot pa jatic peri nitundo i anyim ma bor, man inena ve nia atie ng’atu m’uromo ku yung nisagu,* E Yehova Mungu.
18 Dong’ an a jatic peri Daudi, acopo yero iri ang’o mange pi yung m’imiyo ira ma ke ing’eyo jatic peri cuu dit e?
19 E Yehova, pi jatic peri man pilembe adundeni uyenyo, itimo gin ma dongo maeni ceke m’inyutho ko dwong’ peri.
20 E Yehova, ng’atu moko mbe ma calu in; kadok nwang’u wawinjo pi mungu mange dupa de, re Mungu moko mbe m’uweko in.
21 Man thek mange ma kani iwi ng’om ma tie ve dhanu peri Israeli? E Mungu mandha, icidho man iwarugi kara gibed dhanu peri. Iketho nyingi ung’eyere nikadhu kud i giki ma dongo man ma wang’u ijo m’itimo, m’iriemo ko thek kud i wang’ dhanu peri m’iwaru kud i Misiri.
22 Iketho Israel udoko dhanu peri pi nja; man in, E Yehova, idoko Mungu migi.
23 Kawoni, E Yehova, dong’ lembe m’ing’olo pi jatic peri man pi ot pare ubed mandha pi nja, man dong’ itim tap calu m’ing’olo.
24 Dong’ nyingi ubed rondo ku rondo* man jupake pi nja, kara dhanu giyer nia, ‘Yehova mir udul ma en e Mungu mir Israel, tie Mungu iwi Israel,’ man dong’ ot pa jatic peri Daudi ucung ma tek i weng’i.
25 Kum in, Mungu para, inyutho ni jatic peri nia ibemito miyo ker* ni ot pare. Eno re m’uketho jatic peri unwang’u tegocwiny mi rwo i beng’i kumeni.
26 Man kawoni, E Yehova, in i Mungu mandha, man ing’olo lembe ma beco maeni pi jatic peri.
27 Dong’ enyay mutoro i ii nimiyo mugisa iwi ot pa jatic peri, man otne umedere pi nja i weng’i; kum in, E Yehova, ipoko mugisa iwi ot pa jatic peri man mugisa bibedo i wiye pi nja.”
Korolembe mi There
^ Kunoke nyo “niai kaka moko ma juguro iye hema nicidho kaka mange, man niai i kabedo moko nicidho i kabedo ma kucelo.”
^ Kunoke “biologi.”
^ I dhu Juebrania: “bigiero ot.”
^ Kunoke “ng’atu mi kabedo ma malu.”
^ Kunoke “ubed mandha.”
^ I dhu Juebrania: “ibemito giero ot.”
