Lemkei mi kwong’o 18:1-17
18 I ng’ey nindo moko, Daudi ukiedo ku Jufilisti man eloyogi, e emayu Gath ku nyithindh adhura m’i ng’ete* kud i cing’ Jufilisti.
2 I ng’eye, Daudi uloyo Moab, e Jumoab gidoko jutic pare man gibed gikelo ire ajok.
3 Daudi uloyo Ubimo Hadadezer mi Zoba ceng’ini kud Hamath kinde ma nwang’u Ubimone ubecidho pi niketho bimobim pare ucung ma tek i ng’om mi dhu Kulo Efrath.
4 Daudi umaku magali pare elufu acel (1 000), juaskari elufu abiro (7 000) ma giringo ku riuni,* man juaskari elufu pier ario (20 000) ma giwotho ku tiendgi. I ng’eye, Daudi utong’o ler mi tok tiend riuni mange ceke, ento eweko dak acel kende ma ringo ku magali.
5 Kinde ma Jusiria mi Dameski gibino konyo Ubimo Hadadezer mi Zoba, Daudi unego Jusiria elufu pier ario wi ario (22 000).
6 I ng’eye, Daudi uketho nyithi kagonjo i Siria mi Dameski, man Jusiria gidoko jutic pa Daudi man gibed gikelo ire ajok. Yehova umiyo aloci* ni Daudi kaka moko ci m’ecidho i iye.
7 Bende, Daudi umayu ban ma ngulu ngulu mi mola ma kwar kud i bang’ jutic pa Hadadezer man edwogo kugi i Yeruzalem.
8 Daudi ucoko mola lee dit kud i Tibhath man kud i Kun ma gin adhura pa Hadadezer. Ku mola maeno, Suleman uyiko Nam mi mola, mbegi, man ajeni mi mola.
9 Kinde m’Ubimo Thou mi Hamath uwinjo nia Daudi uloyo udul mony p’Ubimo Hadadezer mi Zoba ceke,
10 ndhu ndhu egam eoro wode ma Hadoram i bang’ Ubimo Daudi pi nipenje nia etie nenedi man pi nifoye pilembe ekiedo kud Hadadezer man eloye (kum Hadadezer ubed ukiedo wang’ ma pol i dhu Thou), man ekelo ire kwond jamtic ceke ma juyiko ku mola ma kwar, mola ma tar, man mola.
11 Ubimo Daudi uthiero piny maeni de ni Yehova, tap calu m’elar ethiero mola ma tar ku mola ma kwar m’egam eyaku kud i bang’ thek ma e: kud i Edom man Moab, kud i bang’ Juamon, Jufilisti, man Juamalek.
12 Abicai ma wod Zeruya unego Juedom elufu apar abora (18 000) i Poga mi kadu.
13 Eketho nyithi kagonjo i Edom, man Juedom ceke gidoko jutic pa Daudi. Yehova umiyo aloci* ni Daudi kaka moko ci m’ecidho i iye.
14 Daudi umedere nibimo wi Israel ceke, man ebed epoko lembe mi dhanu pare ceke atira man pwe.
15 Yoab ma wod Zeruya ubino jadit mir udul askari, Yehocafath ma wod Ahilud ubino jagor lemkei,
16 Zadok ma wod Ahitub gikud Ahimelek ma wod Abiathar gibino julam, man Cavca ubino jagor.
17 Benaya ma wod Yehoyada ubino jatel wi Jukerethi man Jupelethi. Man wot Daudi gibino ju ma kwong’a i ng’ey ubimo.
