Lemkei mi kwong’o 19:1-19
19 I ng’eye, Nahac m’ubimo mi Juamon utho, man wode udoko ubimo kakare.
2 E Daudi uyero kumae: “Abinyutho mer ma lokere ngo ni Hanun ma wod Nahac, pilembe won de unyutho ira mer ma lokere ngo.” Pieno Daudi uoro jukwenda pi nicijuko cwinye pi tho pa won. Ento kinde ma jutic pa Daudi gitundo i ng’om mi Juamon pi nijuko cwiny Hanun,
3 judongo ma wijo mi Juamon giyero ni Hanun kumae: “Iparu nia Daudi ubeyungo wuru ayunga m’uketho eoro dhanu ubin ujuk cwinyi? Nyo eoro ngo jutic pare i beng’i nibino yenyo lembe mi ng’ombuni cuu mandha man nilibe kara ginyothi ceni?”
4 E Hanun umaku jutic pa Daudi, enyaru yir tikgi man ethumo bongu migi puu kud i diere iwi adhiggi, e eriemogi gidok.
5 Saa ma jukoro lembe m’utimo dhanu maeno ni Daudi, e wang’ acel eoro jumange ucidh urombo kugi, pilembe nwang’u junyayu lewic i wigi lee mandha; man ubimo uyero igi kumae: “Wubed i Yeriko nitundo ma yir tikwu bidongo kendo, ka wubidwogo.”
6 I ng’ey kare, Juamon gineno nia ng’wicgi udoko tik ni Daudi, e Hanun man Juamon gioro mola ma tar talanto* elufu acel (1 000) pi nicipangu magali man juring riuni i Mezopothamia,* i Aram-maka, man i Zoba.
7 E gipangu magali elufu pier adek wi ario (32 000), karacelo kud ubimo mi Maaka man dhanu pare. I ng’eye gitundo man giketho kagonjo migi i wang’ Medeba. Juamon gicokiri karacelo kud i adhura migi man giwok woko pi nikiedo lwiny.
8 Saa ma Daudi uwinjo lembene, eoro Yoab i kumgi karacelo kud udul askari ceke, uketho i iye bende jurumony pare ma tek nisagu.
9 Juamon gigam giwok woko man gikperiri pi lwiny i kamondo mir adhura migi, i saa ma rom eno jubim ma gibino gilund gikperiri migi i lum.
10 Kinde ma Yoab uneno nia judhoggi ubebino i kume ku yor i wang’e man ku yor i ng’eye, eng’iyo juaskari moko ma tek mir Israel man ekperogi pi nikiedo i dhu Jusiria.
11 Emiyo dong juaskari mange i cing umin ma Abicai, kara ekpergi pi nikiedo i dhu Juamon.
12 Eyero ire kumae: “Tek Jusiria gidoko tek nisaga, e ibin ilara; ento tek Juamon gidoko tek nisegi, abibino leri.
13 Ubekwayu wabed tek man cwinywa de ubed tek pi dhanu mwa man pir adhura pa Mungu mwa, e Yehova bitimo gin ma ber i wang’e.”
14 Pieno Yoab karacelo ku dhanu pare gicoro pi nikiedo i dhu Jusiria, ento Jusiria giringo kud i wang’e.
15 Kinde ma Juamon gineno nia Jusiria giringo, gin bende giringo kud i wang’ Abicai m’umin Yoab man gidok i adhura migi. I ng’ey lembe maeno, Yoab udwogo i Yeruzalem.
16 Saa ma Jusiria gineno nia Juisrael uloyogi, gioro jukwenda ucidh uwaku Jusiria ma gibedo i ng’om mi dhu Kulo.* Cofak ma jadit mir udul askari pa Hadadezer re m’ubino telo wigi.
17 Kinde ma judwoko lembene ni Daudi, e ndhu ndhu ecoko dhu juaskari mir Israel ceke, gikadhu kulo Yordan man gitundo i bang’gi, e gikperiri pi lwiny pi nikiedo i dhoggi. Daudi ukpero juaskari pare pi nikiedo i dhu Jusiria man Jusiria de gikiedo i dhoge.
18 Ento Jusiria giringo kud i wang’ Israel; man Daudi unego juaskari mi Jusiria elufu abiro (7 000) ma giringo ku magali, man juaskari elufu pier ang’wen (40 000) ma giwotho ku tiendgi. Enego bende Cofak ma jadit mir udul askari migi.
19 Kinde ma jutic pa Hadadezer ceke gineno nia Juisrael uloyogi, gitimo kwiyocwiny pio pio ku Daudi man gitimo ire; e Jusiria gimito ngo gikony Juamon kendo.
Korolembe mi There
^ Talanto acel ubino kilo 34,2. Nen Thenge ma jumedo B14.
^ I dhu Juebrania: “Aram-naharaim.”
^ Niwacu Efrath.