Lemkei mi kwong’o 21:1-30
21 E Sitani* ucungo i dhu Israel man ecwayu wang’ Daudi nikwanu wend Juisrael.
2 Pieno, Daudi uwacu ni Yoab man ni judongo mi dhanu kumae: “Wucidhi, man wukwan Juisrael niai i Ber-ceba nitundo i Dan; i ng’eye wudwog wunyuth ira wendgi kara ang’ey.”
3 Ento Yoab uyero kumae: “Wek Yehova unyay wend dhanu pare wang’ dak acel! Rwoth para ubimo, nyo dong’ dhanu maeni ceke gitie ngo jutic peri? E rwoth para, pirang’o ibemito timo lembe ma kumeni? Pirang’o ibeketho Israel udubi?”
4 Ento ubimo ukwero niwinjo Yoab. E Yoab ucidho man ewotho i Israel ceke, i ng’eye, edwogo i Yeruzalem.
5 Yoab ugam udwoko wend dhanu ma gikwanu i bang’ Daudi. Wend jumaco ceke mir Israel ma gi weg palamularu ubino milion acel kud elufu dak acel (1 100 000), man wend jumaco mi Yuda ma gi weg palamularu ke ubino elufu dak ang’wen ku pier abiro (470 000).
6 Ento jukwanu ngo suru pa Lawi man suru pa Benjamin, pilembe ng’ol p’ubimo ufoyo ngo i Yoab.
7 Lembe maeno uton lee dit i Mungu mandha, e egoyo Israel.
8 Daudi ugam uwacu ni Mungu mandha kumae: “Atimo dubo ma dit m’akwanu ko dhanu. Dong’ kawoni akweyi, wek kosa pa jatic peri, kum atimo lemkasegu ma lee dit.”
9 I ng’eye, Yehova uweco i bang’ Gad ma jaewlembe pa Daudi, ewacu kumae:
10 “Cidh iyer ni Daudi nia, ‘Yehova uwacu kumae: “Abeketho matira adek i weng’i. Ng’ii nia akel ma kani i wii.”’”
11 E Gad umondo i bang’ Daudi man eyero ire kumae: “Yehova uwacu kumae: ‘Tim ng’iyong’ic:
12 Nyo ukwayu ndru upodhi pi oro adek, kunoke pi dwi adek jukwor peri givoyi man judegi peri gigoyi ku palamularu migi, kunoke nyo pi nindo adek malaika pa Yehova utii ku palamularu pa Yehova man egoy Israel ceke ku thong’om ma binego dhanu lee i ng’om maeni?’ Kawoni ng’ii cuu lembe m’ukwayu adwok ni Ng’atu m’uora.”
13 E Daudi uwacu ni Gad kumae: “Cwinya ung’abere lee dit. Timba apodh i cing’ Yehova, kum kisa pare tie dit akeca; ento kud apodh i cing’ dhanu ki.”
14 Yehova ugam uoro thong’om iwi Israel, e dhanu mir Israel elufu pier abiro (70 000) githo.
15 M’umedo maeno, Mungu mandha uoro malaika i Yeruzalem kara enyothe; ento kinde m’ebemito nyothe, Yehova uneno man can umake* pi thong’om m’ekelo iwi dhanu, man eyero ni malaika ma nwang’u ubekelo nyothne kumae: “Eromo! Kawoni lor cingi.” Nwang’u malaika pa Yehova ne ucungo ceng’ini ku lela mi fwodo cam pa Ornan ma Jayebusi.
16 Kinde ma Daudi uting’o wang’e, eneno malaika pa Yehova ucungo i kind ng’om ku polo m’emaku palamularu m’ewodho kud i ukorone erieyo yor i Yeruzalem. E ndhu ndhu Daudi ku judongo ma nwang’u gikendo kendi mi saki gipodho arieba wang’gi i ng’om.
17 Daudi ugam uyero ni Mungu mandha kumae: “Nyo tie an ungo re m’awacu nia jukwan dhanu? An re m’adubo man an re m’atimo lembe ma rac; ento rombe maeni e ke gitimo ang’o? E Yehova Mungu para, akweyi, wek cingi ubin i wiya an man iwi ot pa vwa; ento kud ikel goco maeni iwi dhanu peri.”
18 E malaika pa Yehova uwacu ni Gad nia eyer ni Daudi uidh malu man egier pemlam ni Yehova i lela mi fwodo cam pa Ornan ma Jayebusi.
19 Pieno Daudi uidho malu calku lembe pa Gad m’eyero ku nying’ Yehova.
20 I saa maeno, nwang’u Ornan ubefwodo nganu, e elokere man eneno malaika. Wote ang’wen ma nwang’u gibino karacelo kude gigam gipondo.
21 Kinde ma Daudi uidho i bang’ Ornan, Ornan ugam uneno Daudi; e ndhu ndhu eai kud i lela mi fwodo cam man ecidh erum, epodho arieba wang’e i ng’om i wang’ Daudi.
22 E Daudi uyero ni Ornan kumae: “Lwor* ira kaka ma lela mi fwodo cam peri n’i iye, kara agier pemlam ni Yehova keca. Lwore ira i beine ma tap, kara thong’om m’ubenego dhanu ujiki.”
23 Ento Ornan uyero ni Daudi kumae: “Game iri, E rwoth para ubimo, man tim gin ma ber i weng’i. Nen, abemiyo iri dhieng’ m’iromo thiero ni lam m’awang’a; jamfwodo cam ku mberembere mi dhieng’ de ni e m’iromo tiyo kugi ni yen mi mac, nganu de ni e m’iromo thiero ni girathiera mi nying cam. Abemiyo piny maeno zoo iri.”
24 Ento Ubimo Daudi udwoko ni Ornan kumae: “Ungo, ukwayu ang’iewe i beine ma tap, kum abigamu ngo piny peri nia amii ni Yehova, kadi abithiero ngo lam m’awang’a m’ucamu ngo jamcinga.”
25 Pieno Daudi umiyo ni Ornan mola ma kwar ma pekne cekel* dak abusiel pi ning’iewo kaka maeno.
26 E Daudi ugiero pemlam keca ni Yehova man ethiero lam m’awang’a ku lam mi kwiyocwiny i wiye. Daudi ugam ukwayu Yehova, man edwoko ire lembe; eoro mac kud i polo uloro iwi pemlam mi lam m’awang’a.
27 E Yehova ung’olo ni malaika nia edwok palamularu pare i ukorone.
28 Kinde ma Daudi uneno nia Yehova udwoko wang’ rwo pare i lela mi fwodo cam pa Ornan ma Jayebusi, emedere nithiero lam keca.
29 Ento i saa maeca, nwang’u hema mi thier pa Yehova ma Musa uyiko i langa man pemlam mi lam m’awang’a gibino i kaka ma malu i Gibeon.
30 Re Daudi ubed ucidho ngo kuca pi nipenjo Mungu, kum lworo ubino nege lee pi palamularu pa malaika pa Yehova.
Korolembe mi There
^ Kunoke nyo “jajai.”
^ Kunoke “cwinye udieng’.”
^ I dhu Juebrania: “Mii.”
^ Cekel acel ubino grama 11,4. Nen Thenge ma jumedo B14.
