Lemkei mi kwong’o 22:1-19
22 I ng’eye, Daudi uwacu kumae: “Ot pa Yehova Mungu mandha ni eni, man pemlam ma Israel bibethiero lam m’awang’a i wiye de ni eni.”
2 I ng’eye, Daudi ung’olo nia jucok dhug umondo ma gibedo i ng’om mir Israel karacelo, man ekethogi ni jupay kidi kara gibed gigoy kidi man gipaye pi nigiero ot pa Mungu mandha.
3 Daudi ucoko bende dhu cuma i kadhiri ma lee dit pi niyiko musumali ma jubiguro ko dhugola mi dhugang’ man pi niyiko jamdiko kind piny, ecoko bende mola lee dit ma pek migi pimere ngo,
4 man bende yend tido ma wende kwanere ngo; kum Jusidon man dhanu mi Turo gikelo yend tido lee mandha ni Daudi.
5 Man Daudi uyero kumae: “Suleman ma woda fodi en aradu man eng’eyo lembe akeca ngo,* ot ma jubigiero ni Yehova ke ucikere nibedo leng’ leng’ ma yawe mbe, kara pire uyiki man pi leng’o pare ung’eyere i ng’om zoo. Pieno, abiyiko piny m’ukwayere ire.” E Daudi ucoko dhu jamtic lee dit i wang’ tho pare.
6 Bende, elwong’o Suleman ma wode man eng’olo ire nia egier ot ni Yehova Mungu mir Israel.
7 Daudi uyero ni Suleman ma wode kumae: “Agam ayenyo kud adundena zoo nia agier ot pi nying’ Yehova Mungu para.
8 Ento lembe pa Yehova ubino i bang’a kumae: ‘Icwiro rimo lee akeca, man ikiedo lwiny ma dongo dit. Ibigiero ngo ot pi nyinga, kum icwiro rimo i kadhiri ma lee dit i wang’a iwi ng’om.
9 Nen! ibinyolo nyathin ma nico ma bibedo ng’atu mi kwiyocwiny,* man abimiyo ire yom kud i cing’ judegi pare ceke m’utieke, kum nyinge bibedo Suleman* man i nindo pare abimiyo kwiyocwiny ku bedomoth ni Israel.
10 En re m’ebigiero ot pi nyinga. Ebidoko woda man abibedo won. Abiketho komker mi ker pare bicungo nging’ nging’ man rondo ku rondo iwi Israel.’
11 “Kawoni woda, dong’ Yehova ubed kudi man lembe uwoth iri miero, man igier ot pa Yehova Mungu peri tap calu m’elar eyero piri.
12 Kinde ma Yehova bimiyo iri copo iwi Israel, dong’ emii iri ng’eyo thelembe man nyang’ i lembe kara iwor cik pa Yehova Mungu peri.
13 E lembe biwotho iri miero tek iworo telowic man lembapoka ma Yehova ung’olo ni Musa nia emii ni Israel. Dong’ cwinyi bed tek man bed tek. Lworo kud unegi kadi ndiri de kud ung’oy i ii.
14 Asendara lee pi niyiko mola ma kwar talanto* elufu dak acel (100 000) pi ot pa Yehova man mola ma tar talanto milion acel (1 000 000). Ayiko bende mola ku cuma i kadhiri ma lee dit ma wendgi romo pimere ngo, m’umedo maeno ayiko yen man kidi, ento ibimedo wadi.
15 Jutic ma wendgi dupa ni kudi: jupay kidi, jurubodho mi giedo ma ku kidi, jurubodho mi bau, man kit jutic ceke ma gi jurubodho.
16 Mola ma kwar, mola ma tar, mola, man cuma tie lee dit ma jucopo pimogi ngo. Ai malu icak tic, man dong’ Yehova ubed kudi.”
17 I ng’eye, Daudi ung’olo ni judongo ma wijo ceke mir Israel nia gikony wode ma Suleman, eyero kumae:
18 “Nyo Yehova Mungu mwu ni kudwu ngo, man nyo emiyo ngo iwu yom i ng’etwu kun ku kuni? Kum emiyo ira dhanu mi ng’om maeni, man dong’ ng’ombe n’i the cing’ Yehova man i the cing’ dhanu pare.
19 Kawoni wukec kud adundewu ceke man ku ng’eyong’ec* mwu ceke niyenyo Yehova Mungu mwu, man wucak giero hekalu pa Yehova Mungu mandha, kara jukel sanduku mi lembariba pa Yehova man ajeni ma leng’ pa Mungu mandha i ot ma jugiero pi nying’ Yehova.”
Korolembe mi There
^ Kunoke “ng’ete cok.”
^ I dhu Juebrania: “yom.”
^ Eai kud i wec moko mi dhu Juebrania ma thelembene tie “Kwiyocwiny.”
^ Talanto acel ubino kilo 34,2. Nen Thenge ma jumedo B14.
^ Nen Thelembe mi wec.
